༢༠༠༩ ཕྱི་ཟླ་ ༡༢ ཚེས་ ༡༧ རེས་གཟའ་ཕུར་བུ།
༄༅། །ཕྱི་ལོ་ ༢༠༠༩ ཟླ་ ༡༢ ཚེས་ ༡༧ ཉིན་ཌན་མཀ་རྒྱལ་ས་ཀོ་པན་ཧེ་གན་ནང་གོ་ལའི་གནམ་གཤིས་འགྱུར་ལྡོག་གི་རྒྱལ་སྤྱིའི་ཚོགས་འདུའི་སྐབས་བཙན་བྱོལ་བོད་གཞུང་ཕྱི་དྲིལ་ལས་ཁུངས་ཀྱི་ཁོར་ཡུག་ཚན་པའི་འགན་འཛིན་བསྟན་འཛིན་ནོར་བུ་ལགས་དང་གཞུང་འབྲེལ་མིན་པའི་བོད་མིའི་ཚོགས་པ་ཁག་གི་སྐུ་ཚབ་རྣམ་པས་རྒྱ་རིགས་མི་གྲངས་ ༡༠ དང་ཐུག་འཕྲད་ཀྱིས་བོད་ནང་གི་གནམ་གཤིས་དང་འབྲེལ་བའི་སྐོར་བགྲོ་གླེང་གནང་གཏན་འཁེལ་ཡོད་པ་རེད། བཙན་བྱོལ་བོད་གཞུང་ཁོར་ཡུག་ཚན་པའི་འགན་འཛིན་གྱིས་བརྗོད་པར་གཞིགས་ན་བོད་མིའི་སྐུ་ཚབ་རྣམ་པ་དང་རྒྱ་ནག་སྐམ་ས་ནས་ཡིན་པའི་རྒྱ་རིགས་ཁོར་ཡུག་ཆེད་ལས་པ་དང་ཚན་རིག་པ་ཁག་གཅིག་ཐུག་འཕྲད་ཐོག་མཐོ་སྒང་བོད་ཀྱི་གནམ་གཤིས་དང་བོད་ཀྱི་འབྲོག་པའི་གནས་སྟངས་སྐོར་བགྲོ་གླེང་ཞུ་འཆར་ཡོད་པ་རེད་འདུག
བཙན་བྱོལ་བོད་གཞུང་ཕྱི་དྲིལ་ལས་ཁུངས་ཀྱི་ཁོར་ཡུག་ཚན་པ་དེ་ནི་ཕྱི་ལོ་ ༡༩༨༩ ལོར་བཙུགས་གནང་བ་དང་། ཁོར་ཡུག་ཚན་པ་དེས་བོད་ནང་གི་ཁོར་ཡུག་གནས་སྟངས་ཐོག་སྟངས་འཛིན་བྱེད་རྒྱུ་དང་བོད་ནང་གི་ཁོར་ཡུག་དང་འབྲེལ་བའི་གནད་དོན་རྟོག་ཞིབ་དང་ཉམས་ཞིབ་དེ་བཞིན་རྒྱ་གཞུང་གི་བོད་ནང་འཛིན་པའི་སྲིད་བྱུས་དེས་མཐོ་སྒང་བོད་ཀྱི་ཁོར་ཡུག་ཉམས་ཆག་ཇི་འདྲ་གཏོང་ཚུལ་གྱི་དྲིལ་བསྒྲགས་བྱེད་ཀྱི་ཡོད་པ་མ་ཟད། མཐོ་སྒང་བོད་ཀྱི་ཁོར་ཡུག་གནས་སྟངས་དེར་ཡར་རྒྱས་ཇི་འདྲ་གཏོང་དགོས་མིན་གྱི་ལས་དོན་ཐོག་འབད་བརྩོན་གནང་མུས་ཡིན། ཚན་པ་དེས་བཙན་བྱོལ་སྤྱི་ཚོགས་ནང་བོད་མི་རྣམས་ལ་ཁོར་ཡུག་གི་གནས་ཚུལ་གོ་རྟོགས་སྤེལ་སླད་ཁོར་ཡུག་དང་འབྲེལ་བའི་ཟབ་སྦྱོང་དང་ཚོགས་འདུ་དེ་འདྲའང་གོ་སྒྲིག་ཞུས་དང་ཞུ་མུས་ཡིན་པ་བཅས་སོ།།
