༢༠༠༩ ཕྱི་ཟླ་ ༡༢ ཚེས་ ༡༧ རེས་གཟའ་ཕུར་བུ།
༄༅། །ཕྱི་ལོ་ ༢༠༠༩ ཟླ་ ༡༢ ཚེས་ ༡༤ ཉིན་རྒྱལ་ཁབ་འདྲ་མིན་ ༣༠ ཙམ་གྱི་གྲོས་ཚོགས་འཐུས་མི་ ༢༠༠ ཙམ་ཨི་ཊ་ལིའི་རྒྱལ་ས་རོམ་ནང་ཟླ་ ༡༡ ཚེས་ ༡༨།༡༩ ཉིན་གཉིས་རིང་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་གྱི་ཚོགས་འདུ་ཞིག་ཚོགས་ཡོད་པ་དེ་ཁོངས་རྒྱལ་ཁབ་འདྲ་མིན་ ༡༦ ཙམ་གྱི་གྲོས་ཚོགས་འཐུས་མི་ ༣༥ ཙམ་ནས་ཌན་མཀ་གི་རྒྱལ་ས་ཀོ་པན་ཧེ་གན་ནང་གོ་ལའི་གནམ་གཤིས་འགྱུར་ལྡོག་གི་ཚོགས་འདུའི་གཙོ་སྐྱོང་བར་མཐོ་སྒང་བོད་ཀྱི་གནམ་གཤིས་འགྱུར་ལྡོག་དེར་རྒྱལ་སྤྱིས་དོ་སྣང་སྤྲོད་དགོས་པའི་འབོད་སྐུལ་གྱི་ཞུ་ཡིག་གཅིག་ཕུལ་ཡོད་པའི་ནང་དོན།
མཁྱེན་ཡངས་ཚོགས་བཅར་བ་ལྷན་རྒྱས་མཆོག་ལ།
ང་ཚོས་རྒྱལ་ས་ཀོ་པན་ཧེ་གན་ནང་འཛམ་གླིང་མཉམ་འབྲེལ་རྒྱལ་ཚོགས་ཀྱིས་གོ་སྒྲིག་གནང་བའི་གོ་ལའི་གནམ་གཤིས་འགྱུར་ལྡོག་གི་རྒྱལ་སྤྱིའི་ཚོགས་འདུའི་སྐབས་འཛམ་གླིང་གི་སྣེ་གསུམ་པ་ཞེས་གྲགས་པའི་མཐོ་སྒང་བོད་ཀྱི་ཁོར་ཡུག་གནས་སྟངས་དེར་དོ་སྣང་སྤྲོད་དགོས་པ་དེ་ཛ་དྲག་གི་གནས་སྟངས་ཤིག་ཆགས་ཡོད་པའི་བསྐུལ་མ་ཞུ་རྒྱུ་ཡིན། འཛམ་གླིང་གི་ལྷོ་སྣེ་དང་བྱང་སྣེ་གཉིས་ལས་གཞན་པའི་འཛམ་གླིང་ནང་འཁྱགས་རོམ་གྱི་ཆུ་མཛོད་ཆེ་ཤོས་ཡོད་པའི་ས་ཆ་དེ་མཐོ་སྒང་བོད་ཆགས་ཡོད། གོ་ལའི་གནམ་གཤིས་འགྱུར་ལྡོག་གི་དཀའ་ངལ་སེལ་རྒྱུའི་ཐབས་ལམ་འཚོལ་རྒྱུ་དང་གནམ་གཤིས་འགྱུར་ལྡོག་དང་བསྟུན་ནས་འཚོ་གནས་བྱེད་ཕྱོགས་ཀྱི་རྒྱལ་སྤྱིའི་ཆབ་སྲིད་ཀྱི་ལངས་ཕྱོགས་ཇི་འདྲ་ཞིག་གཏན་འབེབས་བྱེད་སྐབས་མཐོ་སྒང་བོད་ཀྱི་གནམ་གཤིས་འགྱུར་ལྡོག་གི་དཀའ་ངལ་དང་། ལྷག་པར་དུ་བོད་མི་ས་སྐྱེས་རྡོ་སྐྱེས་ཀྱི་འབྲོག་པ་ཚོའི་གནས་སྟངས་དེ་ཐད་ཀར་འབྲེལ་བ་ཡོད་པ་ཞིག་ཡོང་བའི་ཐོག་སྲིད་བྱུས་གཏན་འབེབས་ཀྱི་ལངས་ཕྱོགས་ཤིག་བཟུང་དགོས་པ་དེ་ང་ཚོས་གལ་ཆེ་ཞིག་ཆགས་ཡོད་པ་བསམ་བཞིན་ཡོད། མཐོ་སྒང་བོད་ཀྱི་གནམ་གཤིས་འགྱུར་ལྡོག་གི་དཀའ་ངལ་དེ་ད་ཆ་རྒྱལ་སྤྱིའི་གནད་དོན་ཞིག་ཏུ་གྱུར་ཡོད་པར་བརྟེན་གལ་ཆེན་པོ་ཞིག་ཆགས་ཡོད། ཕྱི་ཟླ་ ༡༡ ཚེས་ ༡༨། ༡༩། ཉིན་གཉིས་རིང་རྒྱལ་ཁབ་ ༣༠ ཙམ་གྱི་གྲོས་ཚོགས་འཐུས་མི་རྣམས་ནས་རྒྱལ་ས་རོམ་གྱི་ནང་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ལྔ་པ་དེ་ཚོགས་སྐབས་བརྗོད་གཞི་གཙོ་བོ་གཅིག་ནི་མཐོ་སྒང་བོད་ཀྱི་གནམ་གཤིས་སྐོར་དེ་ཆགས་ཡོད། དེར་བརྟེན་ལྷན་ཚོགས་སྐབས་གཏན་འབེབས་བྱུང་བའི་བསྒྲགས་གཏམ་དེའི་ནང་དོན།
རྒྱ་གཞུང་གིས་ཚོང་ཁེའི་ཆེད་བོད་ཀྱི་རང་བྱུང་ཐོན་སྐྱེད་ལོག་སྤྱོད་བྱས་པ་དང་། བོད་ནང་དུག་རླངས་ཐོན་འབོར་ཆེད་རུ་བཏང་བ། བོད་ཀྱི་འབྲོག་པ་ཚོ་ས་གནས་གཅིག་ཏུ་གཏན་སྡོད་བྱེད་བཅུག་པར་བརྟེན་ཁོང་ཚོའི་སྲོལ་རྒྱུན་གྱི་འཚོ་བརྟེན་བྱེད་རྒྱུའི་སྐྱས་སྤོས་ཀྱི་ལམ་སྲོལ་དང་འབྲེལ་བ་ཆད་ནས་བོད་ཀྱི་རྩ་ཐང་གི་བདག་དབང་བརླག་པ་སོགས་ལ་བརྟེན་འཛམ་གླིང་གི་སྣེ་གསུམ་པར་གྲགས་པའི་མཐོ་སྒང་བོད་ཀྱི་ཁོར་ཡུག་དེ་ཉམས་ཆག་འགྲོ་བཞིན་ཡོད། རྒྱ་གཞུང་གིས་མཐོ་སྒང་བོད་ཀྱི་གནམ་གཤིས་འགྱུར་ལྡོག་གི་དཀའ་ངལ་སེལ་རྒྱུ་དང་གནམ་གཤིས་འགྱུར་ལྡོག་དང་བསྟུན་ནས་འཚོ་གནས་བྱེད་ཕྱོགས་ཀྱི་སྲིད་བྱུས་གང་གཏན་འབེབས་བྱས་པ་དེ་ཨེ་ཤི་ཡའི་མི་འབོར་ཐེར་འབུམ་མང་པོ་དང་འབྲེལ་བ་ཆགས་ཡོད། དེར་བརྟེན་བོད་མི་ཚོའི་ཉམས་མྱོང་ལ་གཞི་བཅོལ་ནས་མཉམ་ཞུགས་བྱེད་ཐུབ་པ་དགོས་རྒྱུ་དེ་གོ་ལའི་གནམ་གཤིས་འགྱུར་ལྡོག་གི་སྲིད་བྱུས་དེ་ལམ་ལྷོང་ཐོག་ལག་བསྟར་ཐུབ་རྒྱུར་མེད་དུ་མི་རུང་བ་ཞིག་ཆགས་ཡོད་ཅེས་སོགས་འཁོད་ཡོད། འབོད་སྐུལ་གྱི་ཞུ་ཡིག་དེར་རྒྱབ་སྐྱོར་གནང་མཁན་རྒྱལ་ཁབ་ ༡༦ གི་གྲོས་ཚོགས་འཐུས་མིས་མཚན་རྟགས་བཀོད་པའི་རྒྱལ་ཁབ་ཁག་ནི། ཨི་ཊ་ལི། ཁེ་ཎ་ཌ། ཨ་སི་ལེན་ཌི། ཨོ་སི་ཊོ་ལི་ཡ། རྒྱ་གར། ཡུ་རོབ་མཉམ་འབྲེལ་མཐུན་ཚོགས། ཕ་རན་སི། དབྱིན་ཡུལ། སུ་ཝི་ཌན། སྦེལ་ཇམ། ལི་ཐོ་ནི་ཡ། ཧོ་ལེན་ཌི། ཌན་མཀ། ཨིས་ཊོ་ནི་ཡ། པོ་ལེན་ཌི། སི་ཀོ་ཊི་ལེན་ཌི། བཅས་ཡིན་པའི་གནས་བསྡུས་སུ།།
