༢༠༠༩ ཕྱི་ཟླ་ ༡༢ ཚེས་ ༨ རེས་གཟའ་མིག་དམར།
༄༅། །ཕྱི་ལོ་ ༢༠༠༩ ཟླ་ ༡༢ ཚེས་ ༧ ཉིན་ཌན་མཀ་རྒྱལ་ས་ཀོ་པན་ཧེ་གན་དུ་རྒྱལ་ཁབ་འདྲ་མིན་ ༡༩༢ ཙམ་གྱི་སྐུ་ཚབ་རྣམས་ལྷན་འཛོམས་ཐོག་གནམ་གཤིས་འགྱུར་ལྡོག་དང་འབྲེལ་བའི་རྒྱལ་སྤྱིའི་ཚོགས་འདུ་འཚོགས་བཞིན་ཡོད། ཐེངས་འདིའི་ཚོགས་འདུའི་ཐོག་ཁོར་ཡུག་ལས་འགུལ་གྱི་ཚོགས་མི་དང་། སྲིད་དོན་མི་སྣ། གསར་འགོད་པ་བཅས་ཁྱོན་མི་གྲངས་སྟོང་ཕྲག་མང་པོ་མཉམ་ཞུགས་གནང་རྒྱུ་ཡིན་པ་རེད། ཉིན་བཅུའི་རིང་རྒྱལ་སྤྱིའི་གནམ་གཤིས་འགྱུར་ལྡོག་དང་འབྲེལ་བའི་ལྷན་ཚོགས་དེའི་སྐབས་གོ་ལའི་ཚ་དྲོད་ཆེ་རུ་ཕྱིན་པའི་རྐྱེན་གྱིས་འཛམ་གླིང་ནང་ཁོར་ཡུག་དང་འབྲེལ་བའི་དཀའ་ངལ་ཏེ་ཆུ་ལོག་དང་། མཁའ་རླུང་འབག་བཙོག ཐན་པ་ལ་སོགས་པའི་དཀའ་ངལ་མང་དག་ཅིག་ད་ལྟ་དངོས་གསལ་དོད་པོས་ར་འཕྲོད་ཐུབ་ཡོད་པ་དེ་དག་ལ་གདོང་ལེན་ཇི་ལྟར་དགོས་མིན་དང་། རྒྱལ་ཁབ་སོ་སོའི་གོ་ལའི་ཚ་དྲོད་འཕེལ་རྒྱས་དེ་དགོག་ཐབས་ཀྱི་ལས་འགུལ་ཐོག་འབྱུང་འགྱུར་འཆར་གཞི་ཇི་འདྲ་ཞིག་ལག་བསྟར་དགོས་མིན་གྱི་གན་རྒྱ་འཇོག་རྒྱུའི་གཙོས་པའི་གལ་གནད་ཆེ་བའི་གནད་དོན་མང་པོ་ཞིག་ལ་ཐག་གཅོད་ཐོག་གོ་ལའི་ཚ་དྲོད་ཀྱི་འཕེལ་རྒྱས་དེ་འགོག་ཐབས་ཡོང་རྒྱུའི་རེ་བ་ཆེན་པོ་རྒྱག་བཞིན་ཡོད།
དེ་ཡང་མཉམ་འབྲེལ་རྒྱལ་ཚོགས་ཀྱི་ཁོར་ཡུག་གཙོ་འཛིན་ཡུ་བོ་ཌི་བྷོ་ཡི་མཆོག་གིས་གསུང་དོན། ད་རེས་ཌན་མཀ་གི་རྒྱལ་ས་ཀོ་པན་ཧེ་གན་ནང་གནམ་གཤིས་འགྱུར་ལྡོག་དང་འབྲེལ་བའི་རྒྱལ་སྤྱིའི་ཚོགས་འདུ་ཚོགས་པ་དེས་རྒྱལ་ཁབ་སོ་སོ་ནས་གོ་ལའི་ཚ་དྲོད་འཕེལ་རྒྱས་འགོག་ཐབས་བྱེད་རྒྱུར་ཕུགས་རྒྱང་རིང་པོའི་དམིགས་ཡུལ་འཛིན་པའི་གྲོས་མཐུན་ཐོག་མང་མོས་དམ་བཅའ་འཇོག་ཐུབ་པ་དེ་དག་ངོ་ཐོག་ལག་ལེན་དུ་འཁེལ་ཐུབ་པ་ཞིག་དགོས། ལོ་ ༡༧ ཙམ་གྱི་རིང་ད་བར་གནམ་གཤིས་འགྱུར་ལྡོག་དང་འབྲེལ་བའི་གྲོས་མོལ་སྐབས་རྒྱལ་ཁབ་མང་པོ་འདི་འདྲ་ལྷན་འཛོམས་བྱུང་བའི་ཐོག་མཉམ་རུབ་ཀྱིས་གནམ་གཤིས་འགྱུར་ལྡོག་ཆེད་དུ་དམ་བཅའ་བརྟན་པོ་འཇོག་ཐུབ་པ་དེ་འདྲ་བྱུང་མྱོང་མེད་ཅེས་གསུངས་ཡོད། ད་ལྟའི་ཆར་མཁའ་དབྱིངས་སུ་མཁའ་རླུང་རྫས་ངན་གྱི་ཐོན་འབོར་ཆེ་ཤོས་སྐྲུན་མཁན་རྒྱལ་ཁབ་གཙོ་གྲས་གཉིས་ཡོད་པ་དེ་རྒྱ་ནག་དང་ཨ་རི་གཉིས་ཡིན། ཌན་མཀ་རྒྱལ་ས་ཀོ་པན་ཧེ་གན་དུ་གནམ་གཤིས་འགྱུར་ལྡོག་དང་འབྲེལ་བའི་རྒྱལ་སྤྱིའི་ཚོགས་འདུ་དེར་བཙན་བྱོལ་བོད་གཞུང་ཕྱི་དྲིལ་ལས་ཁུངས་ཀྱི་ཁོར་ཡུག་ཚན་པའི་འགན་འཛིན་དང་ལས་བྱེད་བཅས་གཉིས་མཉམ་ཞུགས་གནང་གི་ཡོད་པ་བཅས་ཀྱི་གནས་བསྡུས་སུ།
