༢༠༠༩ ཕྱི་ཟླ་ ༡༢ ཚེས་ ༣༡ རེས་གཟའ་ཕུར་བུ།
བྱེས་ཀྱི་གདན་སའི་མཁན་ཆེན་བློ་བཟང་ཚེ་བརྟན་ལགས་ཀྱིས་བརྟན་བཞུགས་ཀྱི་མཎྜལ་འདེགས་འབུལ་ཞུ་བཞིན་པ།
༄༅། །ཕྱི་ལོ་ ༢༠༠༩ ཟླ་ ༡༢ ཚེས་ ༣༠ ཉིན་གྱི་སྔ་དྲོ་གཞིས་བྱེས་གདན་ས་བཀྲིས་ལྷུན་པོ་ནས་ཀུན་གཟིགས་པཎ་ཆེན་སྐུ་ཕྲེང་བཅུ་པ་རྗེ་བཙུན་བློ་བཟང་འཕྲིན་ལས་ལྷུན་གྲུབ་ཆོས་ཀྱི་རྒྱལ་མཚན་དཔལ་བཟང་པོ་མཆོག་དགོངས་པ་གཞན་དོན་དུ་གཤེགས་ནས་མི་ལོ་ཧྲིལ་པོ་ཉི་ཤུ་འཁོར་བའི་དུས་དྲན་དང་སྟབས་བསྟུན། ལྷར་བཅས་སྲིད་ཞིའི་གཙུག་རྒྱན་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་ཐམས་ཅད་མཁྱེན་པ་རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་སྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག་སྤྱི་སྒོས་བསྟན་འགྲོའི་དོན་དུ་སྐུ་ཚེ་བསྐལ་བརྒྱར་བརྟན་པའི་བརྟན་བཞུགས་རྗེས་དྲན་མཆོད་འབུལ་ཆེད་སྔ་དྲོ་ཆུ་ཚོད་ ༧།༠༠ ཐོག་ཐེག་ཆེན་ཆོས་གླིང་གཙུག་ལག་ཁང་དུ་གདན་ས་བཀྲིས་ལྷུན་པོའི་དགེ་འདུན་འདུས་མང་དབུས་སུ་བཙན་བྱོལ་བོད་གཞུང་གི་ཁྲིམས་ཞིབ་པ་རྣམ་གཉིས་དང་། བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་དབུས་ཕྱག་སྦྲེལ་བཀའ་བློན་རྣམ་པ། བོད་མི་མང་སྤྱི་འཐུས་ཚོགས་གཙོས་དབུས་སྤྱི་འཐུས་རྒྱུན་ལས་རྣམ་པ། རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ་དང་། ལྷན་ཁང་ཁག་གི་དྲུང་ཆེ་ཆུང་། ཚོགས་པ་ཁག་གི་སྐུ་ཚབ། གདན་ས་བཀྲ་ཤིས་ལྷུན་པོའི་སབྱིན་བདག་དང་སྐུ་མགྲོན་སེར་སྐྱ་མི་མང་སློབ་ཕྲུག་བཅས་སྟོང་ཕྲག་བརྒལ་བ་འདུ་འཛོམས་ཀྱིས་རྗེས་དྲན་གསོལ་འདེབས་ཚོགས་ཡོད། དེ་རྗེས་བཀྲིས་ལྷུན་པོའི་མཁན་ལས་སབྱིན་བདག་བཅས་ནས་སྤོས་སྣེས་སྔོན་བསུས་ཏེ་༸གོང་ས་༸སྐྱབས་མགོན་ཆེན་པོ་མཆོག་ཕོ་བྲང་ནས་སྤྱན་རྒྱ་དང་། བདུག་སྤོས། བཀྲ་ཤིས་ཞོལ་པའི་གར་རོལ་དང་བཅས་གཙུག་ལག་ཁང་ཡང་སྟེང་དུ་གདན་འདྲེན་ཞུས་ཏེ་བཞུགས་ཁྲི་རིན་པོ་ཆེར་༸ཞབས་སོར་འཁོད་རྗེས་རྟེན་འབྲེལ་གསོལ་ཇ་འབྲས་བསིལ་འདེགས་འབུལ་ཞུས།
དེ་ནས་གཞིས་བྱེས་བཀྲིས་ལྷུན་པོ་ནས་མདོ་ལུགས་ཀྱི་ཐོག་ནས་བརྟན་བཞུགས་དངོས་གཞི་འདེགས་འབུལ་དང་བཀྲིས་ལྷུན་གདན་སའི་མཁན་ཆེན་དཀའ་ཆེན་བློ་བཟང་ཚེ་བརྟན་ལགས་ཀྱིས་མཎྜལ་ལྗགས་བཤད་ཕུལ་ཏེ་༸གོང་ས་མཆོག་སྐུ་ཚེ་བསྐལ་བརྒྱར་བརྟན་པའི་བརྟན་བཞུགས་བསྟར་འབུལ་ཞུས། བརྟན་བཞུགས་གྲུབ་བསྟུན་༸གོང་ས་མཆོག་གཙུག་ལག་ཁང་གི་གསུང་ཆོས་རྭ་བར་གདན་ཞུས་ཀྱིས་པཎ་ཆེན་སྐུ་ཕྲེང་བཅུ་པའི་རྗེས་དྲན་མཛད་སྒོ་དངོས་གཞི་དབུ་འཛུགས་གནང་བའི་ཐོག་མར་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་གིས་དབུས་བོད་ཀྱི་བདེན་དོན་ཆེད་སྐུ་སྲོག་ལེགས་སྐྱེས་སུ་ཕུལ་བའི་དཔའ་བོ་དཔའ་མོ་རྣམས་ཀྱི་སླད་ཚང་མ་སྐུ་བཞེངས་ཀྱིས་ངག་བཅད་སྐར་མ་གཅིག་གནང་བ་དང།
དེ་རྗེས་བཀྲིས་ལྷུན་པོའི་དགེ་འདུན་པས་དབུས་མཛད་སྒོ་དང་མཐུན་པའི་གསོལ་འདེབས་སྨོན་ལམ་འདོན་སྐུལ་དང་། དེ་ནས་བྱེས་ཀྱི་བཀྲ་ཤིས་ལྷུན་པོའི་མཁན་ཆེན་ནས་དུས་དྲན་དང་འབྲེལ་བའི་གསུང་བཤད་གནང་། དེ་རྗེས་༸གོང་ས་མཆོག་གིས་པཎ་ཆེན་སྐུ་ཕྲེང་བཅུ་པའི་མཛད་རྣམ་གངྒའི་ཟེགས་མ་ཞེས་བྱ་བ་པཎ་ཆེན་ཨེར་ཏེ་ནི་གླེང་བ་ཞེས་པའི་དེབ་གསུམ་དབུ་འབྱེད་བཀའ་དྲིན་ཆེ་བ་བསྐྱངས། དེ་ནས་བོད་མི་མང་སྤྱི་འཐུས་ཚོགས་གཙོས་སྤྱི་འཐུས་ཀྱི་གསུང་བཤད་གྲུབ་པ་དང་བཀའ་བློན་ཁྲི་པ་མཆོག་གིས་བཀའ་ཤག་གི་གསུང་བཤད་གནང་། དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་བ་སྙིང་དོན། ༸རྒྱལ་དབང་པཎ་ཆེན་རྣམ་གཉིས་སྐུ་ཕྲེང་ན་རིམ་ནས་བླ་སློབ་ཀྱི་འབྲེལ་བ་ཟབ་ཅིང་། གནམ་ལ་ཉི་ཟླ་ཟུང་གཅིག ས་ལ་༸རྒྱལ་པཎ་རྣམ་གཉིས། ཞེས་པ་ལྟར་ལྷག་པར་དུ་༸རྒྱལ་དབང་སྐུ་ཕྲེང་བཅུ་གསུམ་པ་ཆེན་པོའི་སྐབས་ནས་པཎ་ཆེན་རིན་པོ་ཆེ་དང་ཧ་ཅང་གི་ཐུགས་སྣང་གཤིན་པོ་ཡོད་པའི་ལོ་རྒྱུས་ཀྱི་འཕེལ་རིམ་རྣམས་དོན་གསལ་ལ་མདོར་བསྡུས་པ་ཞིག་བཀའ་སློབ་ཕེབས།
དེ་བཞིན་པཎ་ཆེན་སྐུ་ཕྲེང་བཅུ་པ་མཆོག་ནི་སངས་རྒྱས་བསྟན་པ་དང་བོད་མི་མང་གི་བདེ་སྐྱིད་ཆེད་བློ་སྟོབས་ཞུམ་པ་མེད་པ་དང་། སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་ངོས་འཛིན་སྐབས་ཧ་ཅང་གི་མཚན་རྟགས་བཟང་པོ་བྱུང་བའི་སྐོར་ལ་སོགས་པའི་བཀའ་སློབ་ཟབ་ཅིང་རྒྱས་པ་སྩལ། དེ་རྗེས་བཀྲིས་ལྷུན་པོའི་སྐུ་ཚབ་ཀྱིས་ཐུགས་རྗེ་ཆེའི་གསུང་བཤད་གནང་བ་དང། དེ་རིང་སྔ་དྲོའི་མཛད་སྒོ་དངོས་གཞི་ཁག་གྲོལ་བ་དང་ཚེས་ ༣༡ དགོང་དྲོ་བོད་གཞུང་ཟློས་གར་དུ་པཎ་ཆེན་རིན་པོ་ཆེ་རྗེས་དྲན་གྱི་བཙན་བྱོལ་ནང་གླུ་པ་གྲགས་ཅན་ཁག་གདན་ཞུས་ཀྱིས་གླུ་གར་འཁྲབ་སྟོན་ཞུ་རྒྱུ་ཡིན་འདུག་པ་བཅས།།
