༢༠༠༩ ཕྱི་ཟླ་ ༡༢ ཚེས་ ༡ རེས་གཟའ་མིག་དམར།
༄༅། །ཕྱི་ལོ་ ༢༠༠༩ ཟླ་ ༡༡ ཚེས་ ༣༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨོ་སི་ཊོ་ལི་ཡའི་གྲོང་ཁྱེར་སི་ཌི་ནིའི་གནམ་ཐང་དུ་༸ཞབས་སོར་འཁོད་སྐབས་རྒྱ་གར་གྱི་གཞུང་ཚབ་ཆེན་མོ་དང་བོད་གཞུང་སྐུ་ཚབ་དོན་གཅོད་སྐུ་ངོ་དྭགས་པོ་བསོད་ནམས་ནོར་བུ་ལགས། བོད་དོན་རྒྱབ་སྐྱོར་ཚོགས་པའི་ཚོགས་མི། ཆིབས་སྒྱུར་གྲ་སྒྲིག་ཚོགས་ཆུང་གིས་དབུས་པས་ཁྱོན་མི་གྲངས་ལྔ་བརྒྱ་བརྒལ་བས་ཕེབས་བསུ་གཟབ་རྒྱས་ཞུས་ཡོད་པ་དང་དེ་བཞིན་བཞུགས་གནས་མགྲོན་ཁང་དུ་༸ཞབས་སོར་འཁོད་སྐབས་བོད་མི་རྣམས་ནས་རིག་གཞུང་འཁྲབ་སྟོན་དང་བཅས་ཕེབས་བསུ་གཟབ་རྒྱས་ཞུས་ཡོད།
༸གོང་ས་མཆོག་གིས་ཨོ་སི་ཊོ་ལི་ཡའི་མངའ་སྡེ་ (New South Wales ) ཞེས་པའི་གྲོང་ཁྱེར་སི་ཊི་ནི་ (Sydney) ནང་དུ་ས་གནས་དེའི་སྔ་དྲོའི་ཆུ་ཚོད་ ༧།༣༠ ཐོག་༸ཞབས་སོར་འཁོད་དེ་མཛད་འཆར་གྱི་ཐོག་མར་བཞུགས་གནས་རོགས་ཚོགས་མགྲོན་ཁང་དུ་གསར་འགོད་ལྷན་ཚོགས་ཤིག་བསྐྱངས་ཡོད། དེ་ཡང་རྒྱལ་སྤྱིའི་གསར་འགོད་པ་འདྲ་མིན་ལྔ་བཅུ་བརྒལ་བ་འདུ་འཛོམས་བྱུང་བའི་ཐོག་༸གོང་ས་མཆོག་གིས་ཞལ་ཤོབ་དང་སྦྲགས་ཐོག་མར་དེ་སྔ་རྒྱ་གར་གྱི་རྒྱལ་ས་ལྡི་ལིར་མགོན་པོ་གང་ཉིད་མཆོག་གི་སྐུའི་མཁྲིས་རྡོ་གཤག་བཅོས་གནང་བ་ལུང་འདྲེན་མཛད་དེ་ད་རེས་སྐུ་གཟུགས་ནང་དབང་པོ་གཅིག་མ་ཚང་བའི་ཐོག་སླར་ཡང་རྒྱལ་ཁབ་འདིའི་ནང་ཆིབས་སྒྱུར་བསྐྱངས་རྒྱུའི་གོ་སྐབས་བྱུང་བར་ཐུགས་དགྱེས་ཚོར་ཆེན་པོ་བྱུང་བའི་བཀའ་སློབ་སྩལ་ཡོད། ཡང་ཐེངས་འདིར་༸གོང་ས་མཆོག་རྒྱལ་ཁབ་དེའི་ནང་ཆིབས་སྒྱུར་སྐྱོང་སྐབས་སྲིད་བློན་ (Kevin Michael) མཆོག་གིས་མཇལ་ཁ་མ་ཞུས་པའི་གནད་དོན་དང་འབྲེལ་བའི་དྲི་བར་བཀའ་ལན་ཕེབས་དོན། མགོན་པོ་གང་ཉིད་མཆོག་གིས་ད་རེས་ཀྱི་ཆིབས་སྒྱུར་འདིའི་དོན་གནད་གཙོ་བོ་ནི་ཁུལ་དེའི་མི་མང་དང་མཇལ་འཕྲད་མཛད་རྒྱུ་མ་གཏོགས་དབུ་ཁྲིད་དང་མཇལ་འཕྲད་སོགས་ཆབ་སྲིད་ཀྱི་དམིགས་ཡུལ་གང་ཡང་མེད་སྟབས་ཐུགས་ཕམ་གང་ཡང་བྱུང་མེད་པ་དང་ལར་ནས་སྲིད་བློན་མཆོག་གི་བཞིན་རས་ཀྱི་དབྱིབས་དེ་ཨེ་ཤི་ཡའི་མི་རིགས་ལྟ་བུ་ཡིན་པ་མ་ཟད། བོད་ཀྱི་གནད་དོན་ཐོག་ལ་གདུང་སེམས་མཉམ་སྐྱེ་གནང་གི་ཡོད་སྐོར་བཀའ་ལན་ཡང་ཕེབས་ཡོད། ༸གོང་ས་མཆོག་གིས་སྐབས་དེར་རྒྱ་བོད་ཀྱི་གནད་དོན་དང་འབྲེལ་བའི་དྲི་བར་བཀའ་ལན་སྩལ་བའི་སྐབས། རྒྱ་ནག་གཞུང་ནས་དྲག་གནོན་གྱིས་གནས་སྐབས་དཀའ་ངལ་སེལ་རྒྱུ་མ་ཡིན་པར་དངོས་ཡོད་གནས་སྟངས་ངོས་འཛིན་པའི་ཐོག་ཕན་ཚུན་ཡིད་ཆེས་གཞིར་བཟུང་ཕུགས་ རྒྱང་རིང་པོའི་སྲིད་བྱུས་འཛིན་ཏེ་བོད་ཀྱི་གནད་དོན་དེ་སེལ་དགོས་ཀྱི་ཡོད་སྐོར་བཀའ་ལན་ཕེབས་པ་དང་ལྷན། རྒྱ་ནག་གི་འགོ་ཁྲིད་མའོ་ཙེ་ཏུང་དང་ཏེང་ཞའོ་ཕིན། ཅང་ཙེ་མིན་དེ་བཞིན་ཧུའུ་ཅིང་ཐའོ་བཅས་མི་ཐོག་སོ་སོས་འཛིན་པའི་སྲིད་བྱུས་ཁག་ལུང་འདྲེན་མཛད་དེ་རྒྱ་ནག་དམར་ཤོག་ཚོགས་པར་སྐབས་བསྟུན་གྱི་དངོས་ཡོད་གནས་སྟངས་གཞིར་བཟུང་ལས་ཀ་བྱ་རྒྱུའི་ནུས་པ་ཡོད་པ་དང་། ལྷག་པར་སྔ་ལོ་བོད་ནང་གི་དོན་རྐྱེན་དང་འདི་ལོ་ཤིང་ཅང་གི་དོན་རྐྱེན་བཅས་རྒྱ་ནག་གི་གནད་ཡོད་དཔོན་རིགས་ཁག་གཅིག་ནས་རྒྱལ་ཁབ་དེས་གྲངས་ཉུང་མི་རིགས་ཐོག་འཛིན་པའི་སྲིད་བྱུས་ལ་བསྐྱར་ཞིབ་དགོས་པའི་དགོངས་འཇགས་འདོན་མཁན་བྱུང་བ་བཅས་ཀྱི་བཟང་པོའི་འགྱུར་ལྡོག་ཁག་གཅིག་བྱུང་ཡང་རྒྱ་ནག་གི་དཔོན་རིགས་ཁྲོད་དུ་ད་ལྟ་ཡང་ལྟ་བ་མཁྲེགས་བཟུང་འཛིན་མཁན་གྱི་ཤུགས་སྣོན་མང་བ་ཡོད་སྟབས་དབུ་ཁྲིད་ཁོང་རང་ཚོ་ཡང་གང་བྱེད་དེ་བྱེད་མེད་པའི་གནས་སུ་ལྷུང་བ་ཡོད་སྐོར་གྱི་བཀའ་ལན་ཕེབས་ཡོད་པ་དང་། རྒྱ་ནག་གཞུང་ཕྱོགས་ནས་བཟང་ཕྱོགས་ཀྱི་རྣམ་འགྱུར་ཞིག་སྟོན་མ་ཐག་མགོན་པོ་གང་ཉིད་བོད་ལ་ཆིབས་སྒྱུར་བསྐྱང་རྒྱུ་གྲ་སྒྲིག་ཨ་གསར་ཡིན་ཞེས་བཀའ་ལན་ཕེབས་ཡོད། ད་རེས་ཀྱི་གསར་འགོད་ལྷན་ཚོགས་དེའི་ཐོག་རིང་མིན་ཡུ་རོབ་ཀྱི་ཌན་མག་རྒྱལ་ས་ (Copenhagen) ཀོ་པན་ཧེ་གན་ནང་གནམ་གཤིས་འགྱུར་ལྡོག་དང་འབྲེལ་བའི་རྒྱལ་ཚོགས་ཀྱི་ལྷན་ཚོགས་ཤིག་འཚོགས་འཆར་ཡོད་པའི་གནད་དོན་དེར་༸གོང་ས་མཆོག་ལ་དགོངས་ཚུལ་ཇི་ཡོད་ཀྱིས་བཀའ་དྲི་ཞུས་པར་བཀའ་ལན་ཕེབས་དོན། འཛམ་གླིང་ནང་གི་དབུ་ཁྲིད་ཚོས་གོ་ལའི་ཚ་དྲོད་དང་འབྲེལ་བའི་གནད་དོན་དེ་གནད་དོན་གཞན་ལས་གལ་ཆེ་བར་རྩིས་འཇོག་བྱེད་དགོས། སྐབས་རེད་དབུ་ཁྲིད་ཚོས་སོ་སོའི་རྒྱལ་ཁབ་ཀྱི་དཔལ་འབྱོར་དམིགས་ཡུལ་དེ་གལ་ཆེ་ཤོས་ཨང་དང་པོར་འཇོག་པ་དང་གོ་ལའི་གནད་དོན་དེ་ཨང་གཉིས་པར་འཇོག་གི་ཡོད། ངོས་ཀྱི་བསམ་པར་གོ་ལའི་གནད་དོན་དེ་ཨང་དང་པོར་འཇོག་དགོས། སྐབས་རེ་གོ་ལའི་བདེ་དོན་ཆེད་དུ་རྒྱལ་ཁབ་སྒེར་གྱི་གནད་དོན་བློས་བཏང་བྱེད་དགོས་པ་ཞིག་རེད། ང་ཚོ་མི་སྒེར་སོ་སོ་ལ་གཞིགས་པའི་འགྱུར་བ་ཞིག་གཏོང་ཐུབ་ཀྱི་རེད། དེའི་ཆེད་དུ་ཁོར་ཡུག་དང་འབྲེལ་བའི་ཤེས་ཡོན་གྱི་གནས་ཚུལ་གོང་མཐོར་གཏོང་ཐབས་བྱེད་དགོས། ངོས་སྒེར་ལ་ཆ་བཞག་ན་ཁྲུས་གཞོང་ (bath tub) ནང་གཟུགས་པོ་འཁྲུ་གི་མེད། ཕྱི་ལ་ནམ་ཐོན་སྐབས་གློག་བསད་ནས་འགྲོ་གི་ཡོད། ཁོར་ཡུག་སྲུང་སྐྱོབ་བྱ་རྒྱུ་དེ་ད་ཆ་ངོས་ཀྱི་མི་ཚེའི་ཆ་ཤས་ཤིག་ཏུ་གྱུར་ཡོད། དེ་མཚུངས་ཁོར་ཡུག་སྲུང་སྐྱོབ་བྱ་རྒྱུ་དེ་ང་ཚོ་ཚང་མའི་མི་ཚེའི་ཆ་ཤས་ཤིག་ཡོང་བ་བྱེད་དགོས། ཞེས་བཀའ་སློབ་ཟབ་མོ་སྩལ་ཡོད། དེ་བཞིན་མི་ཚེ་བདེ་སྐྱིད་ལྡན་པ་ཞིག་ཡོང་ཐབས་ཐོག་བཀའ་སློབ་སྩལ་དོན། ང་ཚོས་གློག་བརྙན་དང་གླུ་གཞས་སོགས་ལ་བརྟེན་པའི་དབང་ཤེས་ཀྱི་བདེ་བ་དོན་དུ་གཉེར་བ་ལས་ཡིད་ཤེས་ལ་བརྟེན་པའི་ཡང་དག་པའི་བདེ་བ་དེ་ཐོབ་ཐབས་བྱེད་དགོས། དབང་ཤེས་ལ་བརྟེན་ནས་བྱུང་བའི་བདེ་བ་དེ་དག་གཏིང་ཟབ་པོ་མེད། བདེ་སྐྱིད་ངོ་མ་དེ་བྱམས་པ་དང་། བརྩེ་བ། བཟོད་བསྲན་སོགས་ལས་བྱུང་བའི་ཡིད་ཤེས་ཀྱི་བདེ་བ་དེ་དག་གཏིང་ཟབ་པོ་ཡོད། ཅེས་བཀའ་སློབ་ཕེབས་ཡོད་པ་མ་ཟད། སྐབས་དེར་ཁོར་ཡུག་ཐོག་ན་གཞོན་རྣམས་ལ་བཀའ་སློབ་སྩལ་དོན། ཁྱེད་ཚོ་གཞོན་སྐྱེས་ཚོ་དུས་རབས་ ༢༡ གི་མི་ཆགས་ཡོད། ཁྱེད་ཚོ་དུས་རབས་ ༢༡ བེད་སྤྱོད་བྱེད་མཁན་གྱི་མི་རབས་གཙོ་བོ་དེ་ཆགས་ཡོད། དེ་མཚུངས་དུས་རབས་ ༢༡ རྫོགས་མཚམས་དེར་འཛམ་གླིང་གི་གནས་སྟངས་ཡག་ཉེས་གང་འབྱུང་མིན་དེ་ཡང་ཁྱེད་ཚོའི་ལག་ཏུ་ཡོད།
འཛམ་གླིང་གི་སྣེ་གསུམ་པ་ཟེར་བའི་བོད་ཀྱི་རང་བྱུང་ཁོར་ཡུག་སྲུང་སྐྱོབ་བྱ་རྒྱུར་ཐུགས་སྣང་དམིགས་བསལ་དགོས་སྐོར་གྱི་བཀའ་ལན་སྩལ་དོན། བོད་ཀྱི་ཁོར་ཡུག་ལ་གོད་ཆག་ཆེན་པོ་འབྱུང་བཞིན་ཡོད་པ་དེས་གླིང་ཆེན་ཨེ་ཤི་ཡའི་ནང་འཚོ་གནས་བྱེད་བཞིན་པའི་མི་འབོར་ཐེར་འབུམ་མང་པོར་དོ་ཕོག་ཡོང་རྒྱུ་རེད་ཅེས་བཀའ་སློབ་སྩལ། དེ་བཞིན་གོ་ལའི་ཚ་དྲོད་ཆེ་རུ་ཕྱིན་པར་བརྟེན་མཐོ་སྒང་བོད་ནང་ཡོད་པའི་ཧི་མ་ལ་ཡའི་གངས་རིའི་འཁྱགས་རོམ་བཞུར་ཚད་དེ་ཆེ་རུ་ཕྱིན་པའི་ཐོག་བོད་ནས་བྱུང་བའི་ རྫ་ཆུ། འབྲི་ཆུ། སེང་གེ་ཁ་འབབ། རྨ་བྱ་ཁ་འབབ་ལ་སོགས་པའི་རྒྱུག་ཆུ་དེ་དག་འཕེལ་རྒྱས་བྱུང་ཏེ་དེ་དག་རྒྱུག་སའི་ས་ཁུལ་རྒྱ་གར། རྒྱ་ནག སྦར་མ། ཐ་ཡི་ལེན་ཌི། ལ་ཨོ་སི། དེ་བཞིན་ཀེམ་པོ་ཌི་ཡ་ལ་སོགས་པའི་ནང་ཆུའི་ཉེན་ཚབས་ཡོད་སྐོར་གྱི་བཀའ་སློབ་ཕེབས་དོན། རྒྱུག་ཆུ་ཆེ་ཁག་དེ་དག་སྤྱིར་གླིང་ཆེན་ཨེ་ཤི་ཡའི་ས་ཁུལ་ཚང་མར་ཁྱབ་ཡོད། རྒྱུག་ཆུ་དེ་དག་གི་འབྱུང་ཁུངས་དེ་བོད་ཡིན། དེར་བརྟེན་ངོས་ཀྱི་བསམ་པར་མི་མང་པོ་ཞིག་རྒྱུག་ཆུ་དེ་དག་ལ་བརྟེན་ཡོད། རྒྱུ་མཚན་དེའི་ཐོག་ནས་ང་ཚོས་བོད་ཀྱི་ཁོར་ཡུག་དེ་དམིགས་བསལ་གྱིས་སྲུང་སྐྱོབ་བྱེད་དགོས་པ་ཞིག་ཆགས་ཡོད།
ད་དུང་༸གོང་ས་མཆོག་གིས་གསར་འགོད་ལྷན་ཚོགས་ཐོག་གསར་འགོད་པ་སྒེར་སོ་སོས་འདྲི་བ་མ་ཕུལ་གོང་ལ་མགོན་པོ་གང་ཉིད་ཀྱི་སྐུའི་མཛད་འཕྲིན་ནང་མཛད་འགན་གཙོ་བོ་གསུམ་ཡོད་པའི་ཁོངས་ནས་འགྲོ་བ་མིའི་ལྷན་སྐྱེས་སུ་ཡོད་པའི་བཟང་པོའི་ཁྱད་ཆོས་གོང་མཐོར་གཏོང་གནང་མཛད་རྒྱུ་དང་ཆོས་ལུགས་ཕན་ཚུན་དབར་མཐུན་སྒྲིལ་གོང་འཕེལ་མཛད་རྒྱུ་བཅས་ཀྱི་གནད་དོན་ཐོག་བཀའ་སློབ་ཕེབས་པ་མ་ཟད། འཛམ་གླིང་འདིའི་ནང་འགྲོ་བ་མི་ཡོངས་རྫོགས་དོན་དངོས་སྤྱི་ཚོགས་ལ་བརྟེན་པའི་སེམས་ཅན་ལྟ་བུ་ཞིག་ཡིན་པ་དང་ཚང་མ་གཅིག་ལ་གཅིག་བརྟེན་ཡིན་སྟབས་རང་ཉིད་ཀྱི་ཁེ་ཕན་ཆེད་འགྲོ་བ་མི་ཡོངས་ཀྱི་བདེ་དོན་ཐོག་ལ་བསམ་བློ་གཏོང་དགོས་པ་དང་། གཞན་ཡང་གནད་དོན་དེ་དང་འབྲེལ་བའི་ཐད་གསར་འགོད་པའི་ལས་འགན་སྐོར་ལའང་བཀའ་སློབ་སྩལ་ཡོད། ཐེངས་འདི་ནི་༸གོང་མཆོག་ཨོ་སི་ཊོ་ལི་ཡར་ཆིབས་སྒྱུར་བསྐྱངས་ཐེངས་བདུན་པ་ཡིན་པ་བཅས།
