༢༠༠༩ ཕྱི་ཟླ་ ༡༢ ཚེས་ ༣ རེས་གཟའ་ཕུར་བུ།
༸གོང་ས་མཆོག་རྒྱ་ནག་རང་དབང་རིག་གཞུང་ལས་འགུལ་མཐུན་ཚོགས་ཀྱི་ཚོགས་མི་ལྷན་དུ་སྒྲོན་པ།
༄༅། །ཕྱི་ལོ་ ༢༠༠༩ ཟླ་ ༡༢ ཚེས་ ༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨོ་སི་ཊོ་ལི་ཡའི་གྲོང་ཁྱེར་སི་ཌི་ནིའི་ནང་རྟེན་གཞི་བྱས་པའི་རྒྱ་རིགས་གྲངས་ ༣༥༠ ཙམ་ལ་ཚོགས་ཁག་གཉིས་ལ་མཇལ་ཁ་དང་བཀའ་སློབ་ཕེབས་ཡོད། ༸གོང་ས་མཆོག་ཐེངས་འདིར་ཨོ་སི་ཊོ་ལི་ཡ་དང་ནིའུ་ཛི་ལེན་ཌིའི་ནང་ཉིན་
བཅུའི་མཛད་འཆར་སྐབས་གཙོ་བོ་ཆོས་འབྲེལ་དང་མི་མང་ལ་བཀའ་སློབ་སྩལ་གནང་མཛད་རྒྱུ་ཡིན་པ་རེད། དེ་ཡང་ཕྱི་ཚེས་ ༢ ཉིན་མགོན་པོ་གང་ཉིད་མཆོག་ནས་གསུང་ཆོས་བར་གསེང་སྐབས་གྲོང་ཁྱེར་སི་ཌི་ནིའི་ནང་རྟེན་གཞི་བྱས་པའི་རྒྱ་རིགས་ཚོགས་ཁག་གཉིས་ལ་མཇལ་ཁ་སྩལ་བ་དང་སྦྲགས་བོད་རྒྱ་མི་རིགས་དབར་འཆམ་མཐུན་གྱི་འབྲེལ་བ་དེ་གོང་མཐོར་གཏོང་གནང་མཛད་ཡོད།
ཉིན་དེའི་ཞོགས་པ་༸གོང་ས་མཆོག་གིས། རྒྱ་ནག་རང་དབང་རིག་གཞུང་ལས་འགུལ་མཐུན་ཚོགས། ཞེས་པའི་ཚོགས་མི་རྒྱ་རིགས་གྲངས་ ༧༠ ཙམ་ལ་མཇལ་ཁ་དང་བཀའ་སློབ་སྩལ་དོན། དངོས་གནས་བྱས་ན་རྒྱ་ནག་གཞུང་གི་སྐུ་ཚབ་ལྷན་དུ་ཕྱི་ལོ་ ༢༠༠༢ ལོ་ནས་ད་བར་ཐེངས་བརྒྱད་ཙམ་སྐད་ཆ་ཤོད་རྒྱུ་བྱུང་བ་རེད། ཐེངས་ལྔ་པ་དེའི་སྐབས་རྒྱ་ནག་གཞུང་གི་འཐབ་ཕྱོགས་གཅིག་གྱུར་གྱི་ལས་བྱེད་པ་ཚོས་ཏཱ་ལའི་བླ་མས་ཁ་བྲལ་བྱེད་ཀྱི་མེད་པ་དེ་གསལ་པོ་འདུག ཅེས་ལབ་པ་རེད། འོན་ཀྱང་ལོ་དེའི་ཟླ་ ༤ ། ༥ ནས་ཏཱ་ལའི་ཁ་བྲལ་ཟེར་ནས་སྐྱོན་བརྗོད་བྱེད་རྒྱུ་དེ་ཤུགས་ཆེ་རུ་ཕྱིན་པ་རེད། བྱས་ཙང་འགོ་ཁྲིད་ཚོས་ཁ་བྲལ་བྱེད་ཀྱི་མེད་པ་དེ་ཤེས་ཀྱི་ཡོད་བཞིན་དུ་ཁ་བྲལ་རེད་ཅེས་སྐྱོན་བརྗོད་བྱས་པ་ཡིན་ན་ཕན་ཐོགས་ཆེ་བ་ཞིག་མཐོང་བ་ཡིན་ཙང་ཁ་བྲལ་ཡིན་པའི་སྐྱོན་བརྗོད་བྱེད་ཀྱི་ཡོད། མི་མང་ཚོས་དེ་ཤེས་ཀྱི་མེད། སྔ་མོ་མའོ་ཙེ་ཏུང་ཡོད་པའི་སྐབས་ལ་ཡིན་ན་ས་གནས་མི་རིགས་རིང་ལུགས་ལའང་ངོ་རྒོལ་དང་རྒྱ་རིགས་ཆེན་པོའི་རིང་ལུགས་ལའང་ངོ་རྒོལ་བྱས་ཡོད། བར་སྐབས་ལ་རྒྱ་རིགས་ཆེན་པོའི་རིང་ལུགས་ཟེར་རྒྱུ་དེ་བར་སྐབས་ཁྱོན་ནས་ཤོད་ཀྱི་མི་འདུག ཉེ་ཆར་གཞི་ནས་བཤད་ཡོང་གི་འདུག ཁ་སེང་ཤིང་ཅང་གི་གནས་ཚུལ་དེ་བྱུང་རྗེས་གཞི་ནས་དེ་ཤོད་ཀྱི་འདུག དེ་སྔ་མའོ་ཙེ་ཏུང་གིས་གུང་ཁྲན་ཏང་ལ་ཕིས་ཕིས་༼སྐྱོན་བརྗོད༽བྱེད་དགོས་པ་རེད། སོ་སོས་༼ཕིས་ཕིས༽བྱེད་རྒྱུ་དང་མི་གཞན་གྱི་༼ཕིས་ཕིས༽ཉན་རྒྱུ་དེ་འདྲ་མ་བྱས་ན་ཉ་མོ་ཆུ་དང་བྲལ་བ་དང་གཅིག་པ་རེད་ཅེས་དེ་འདྲ་བཤད་པ་ངོས་རང་གིས་གོ་མྱོང་ཡོད། ཡིན་ནའང་ལྔ་བཅུ་ང་དགུའི་ལོ་དེར་མའོ་ཙེ་ཏུང་རང་ཉིད་ཀྱིས་ལག་ལེན་དེ་བསྟར་མ་སོང་། ང་ཚོ་བཙན་བྱོལ་བ་ཚོས་འདི་བསམ་པ་རྣམ་དག་གིས་ལག་ལེན་བསྟར་གྱི་ཡོད། བྱས་ཙང་ཀྲུང་གོ་གུང་ཁྲན་ཏང་གི་བསླབ་བྱ་དེ་བསྐྱར་དུ་དྲན་གསོ་བྱེད་རོགས་ཞེས་ངོས་ནས་ལབ་འདོད་བྱུང་། ཞེས་བཀའ་སློབ་སྩལ་དང་སྦྲགས་རྒྱ་ནག་རིག་གཞུང་རང་དབང་ལས་འགུལ་མཐུན་ཚོགས་ཀྱི་ཕྱག་ལས་ལ་བསྔགས་བརྗོད་མཛད་པ་དང་འགྲོ་བ་མིའི་ལྷན་སྐྱེས་སུ་ཡོད་པའི་བཟང་པོའི་ཡོན་ཏན་གོང་འཕེལ་གཏོང་རྒྱུ་དང་བྱམས་བརྩེ་ལྡན་པའི་རིག་གནས་གསར་བརྗེ་ཞིག་བྱེད་དགོས་ཀྱི་ཡོད་པའི་ལམ་སྟོན་བཀའ་སློབ་སྩལ་དོན། རང་དབང་ལྡན་པའི་ཐོག་ནས་མིའི་བཟང་སྤྱོད་གོང་དུ་སྤེལ་རྒྱུ་དེ་ངོས་ཀྱིས་བལྟས་ན་དེ་ཆབ་སྲིད་ཀྱི་གནས་ཚུལ་ཞིག་ཆགས་ཀྱི་མེད། བྱས་ཙང་ཁྱེད་རང་ཚོའི་ལས་འགུལ་དེ་ཞེ་དྲག་ཡག་པོ་དང་གལ་ཆེན་པོ་ཞེ་པོ་རེད། ཁྱེད་ཚོའི་ལས་འགུལ་དེར་ངོས་ཀྱིས་རྗེས་སུ་ཡི་རང་ཡོད། ད་དུང་ཡིན་ནའང་ཁྱེད་རང་ཚོས་ཤུགས་བརྒྱབ་ནས་བྱེད་རོགས་བྱེད་ཞུ་རྒྱུ་ཡིན། རིག་གནས་གསར་བརྗེ་ཆེན་པོ་ཟེར་རྒྱུ་དེ་གང་ལྟར་གྲལ་རིམ་འཐབ་རྩོད་ཀྱི་ཁོང་ཁྲོ་ཤུགས་ཆེན་པོ་ཞིག་གིས་ཀུན་ནས་བླླངས་ནས་༼ཝིང་ཧ་ཏཱ་གྷ་མིན༽ཟེར་རྒྱུ་དེ་ཆགས་པ་རེད། ད་ལྟ་ཁྱེད་རང་ཚོས་དངོས་ནས་བྱམས་བརྩེ་ལྡན་པའི་༼ཝིང་ཧ་ཏཱ་གྷ་མིན༽ཞིག་ཆགས་པ་བྱས་ན་ཡག་པོ་རེད། ཅེས་བཀའ་སློབ་སྩལ་བ་དང་སྦྲགས་ཞལ་ཤོབ་མཛད།
དེ་རྗེས་༸གོང་ས་མཆོག་ནས་ད་ལྟའི་རྒྱ་ནག་གི་ཆབ་སྲིད་གནས་སྟངས་དང་དེས་འབྱུང་འགྱུར་བོད་དང་རྒྱ་ནག་ནང་གི་གནས་སྟངས་ཇི་འདྲ་ཞིག་ཡོང་མིན་ཐོག་བཀའ་སློབ་སྩལ་དོན། ཀྲུང་ཧ་རན་མིན་ཀུང་ཧོ་གྷོ་༼རྒྱ་ནག་མི་མང་སྤྱི་མཐུན་རྒྱལ་ཁབ༽ཟེར་བའི་ཀུང་ཧོ་༼སྤྱི་མཐུན༽ཟེར་བ་དེར་ངོས་རང་དགའ་པོ་ཞེ་དྲག་ཡོད། ༼ཀུང་ཧོ་༽དེ་ཡོང་བར་འཆམ་མཐུན་དགོས་པ་དང་འཆམ་མཐུན་ཡོང་བར་ཡིད་ཆེས་དགོས། ཡིད་ཆེས་ཡོང་བར་འདྲ་མཉམ་དགོས། ད་ལྟའི་དུས་འདིར་ངོས་ནས་གལ་ཆེ་ཤོས་དེ་རྒྱ་ནག་ནང་ལམ་སེང་མང་གཙོ་ཟེར་རྒྱུ་དེ་ཡོང་རྒྱུ་ཁག་པོ་རེད། མང་གཙོ་དེ་ཡང་ཨུ་རུ་སུ་ལ་བྱུང་བ་བཞིན་ཟང་ཟིང་དེ་འདྲ་བྱུང་བ་ཡིན་ན་སུ་གཅིག་ལའང་ཕན་ཐོགས་མེད། མང་གཙོ་དེ་ག་ལེར་འགྱུར་བ་ཕྱིན་ཏེ་བྱུང་བ་ཡིན་ན་ཡག་པོ་ཡོད། ད་ལྟ་ཛ་དྲག་གང་ཡོད་དམ་བརྗོད་ན་གསར་འགྱུར་རང་དབང་ལྡན་པ་ཞིག་དང་ཕྱི་གསལ་ནང་གསལ་དགོས་རྒྱུ་དེ་རེད། རྒྱ་ནག་མི་མང་དུང་ཕྱུར་ ༡༣ དེ་དག་གིས་དངོས་ཡོད་གནས་ཚུལ་ཤེས་རྒྱུའི་ཐོབ་ཐང་ཡོད། དེ་འདྲ་ཡིན་དུས་རྒྱ་ནག་མི་མང་ཚོས་རྒྱལ་ནང་གི་གནས་ཚུལ་ཡིན་ནའང་འདྲ། རྒྱལ་སྤྱིའི་གནས་ཚུལ་ཡིན་ནའང་འདྲ་དངོས་ཡོད་གནས་ཚུལ་ཇི་ཡིན་ཤེས་པ་དགོས་རྒྱུ་དེ་ཧ་ཅང་གལ་ཆེན་པོ་ཞིག་ཆགས་ཡོད། དེ་ཡོང་བར་རང་དབང་ལྡན་པའི་གསར་འགྱུར་དགོས་རྒྱུ་དེ་གལ་ཆེན་པོ་ཞིག་མཐོང་གི་འདུག དེ་དང་ཆབས་གཅིག་རིམ་པས་ཁྲིམས་ཀྱི་དབང་སྒྱུར་ཟེར་བ་དེ་དགོས་རྒྱུ་ཧ་ཅང་གལ་ཆེན་པོ་ཡིན། ན་ནིང་བོད་ཀྱི་གནས་ཚུལ་དེ་བྱུང་རྗེས་རྒྱ་རིགས་མང་པོ་ཞིག་རླུང་ལང་འདུག དེ་བཞིན་དེ་རིང་རྒྱ་རིགས་ངོ་འགོལ་བྱེད་མཁན་ཁ་ཤས་ཡོད་སྐོར་བརྗོད་ཀྱི་འདུག ཁོང་ཚོས་དངོས་ཡོད་གནས་ཚུལ་ཤེས་ཀྱི་མེད་སྟབས་ཁག་མི་འདུག་ཅེས་བཀའ་སློབ་སྩལ། དེ་བཞིན་མགོན་པོ་གང་ཉིད་མཆོག་གི་རྒྱ་ནག་གི་གནས་སྟངས་ཐོག་བཀའ་སློབ་སྩལ་དོན། རྒྱ་ནག་ནང་དཔལ་འབྱོར་ཡར་རྒྱས་ཧ་ཅང་ཤུགས་ཆེ་འགྲོ་བཞིན་ཡོད་ནའང་རྒྱལ་སྤྱིའི་སྤྱི་ཚོགས་ནང་བརྩི་མཐོང་དང་རྒྱབ་སྐྱོར་ཐོབ་པར་རྒྱ་ནག་ནང་ཕྱི་གསལ་ནང་གསལ་དགོས་པ་རེད་ཅེས་དང་། དེ་བཞིན་རྒྱ་ནག་གི་སྲོལ་རྒྱུན་ནང་ལེགས་བྱང་ཕྱུག་པོ་ཞིག་ཡོད་པ་དེར་བསྟོད་བསྔགས་མཛད་པ་དང་སྦྲགས་བཀའ་སློབ་སྩལ་དོན། དཔལ་འབྱོར་ཡར་རྒྱས་རྐྱང་པས་ཞི་བདེ་བསྐྲུན་ཐུབ་པ་ཞིག་མིན། ཞི་བདེ་བསྐྲུན་པར་ང་ཚོར་བྱམས་བརྩེའི་ལེགས་བྱང་ཞིག་ཀྱང་དགོས་པ་རེད་ཅེས་བཀའ་སྩལ།
ཉིན་གུང་ལྗགས་སྨིན་གྱི་བར་སེང་སྐབས་༸གོང་ས་མཆོག་གིས་ཝི་ཏི་ནམ་མི་གྲངས་ ༡༠༠༠ ཙམ་ལ་མཇལ་སྩོལ་སྐབས་མགོན་པོ་གང་ཉིད་མཆོག་ནང་པ་ཞིག་ཡིན་པའི་ངོས་ནས་ཝ་ིཏི་ནམ་པ་ཚོར་རང་གི་སྲོལ་རྒྱུན་ནས་དར་བའི་ནང་ཆོས་དེ་བདག་གཅེས་དགོས་སྐོར་དང་དེ་བཞིན་༸གོང་ས་མཆོག་གིས་མི་སྒེར་སོ་སོའི་ལས་འགན་ཡོད་པའི་སྐོར་བཀའ་སློབ་སྩལ་དོན། མ་འོངས་པའི་གནས་སྟངས་ཇི་འདྲ་ཞིག་ཡོང་མིན་ང་ཚོ་མི་རེ་ངོ་རེར་འགན་ཡོད་ཞེས་བཀའ་སྩལ་བ་དང་ཉིན་གུང་བཀའ་ཆོས་དབུ་འཛུགས་མ་མཛད་སྔོན་ལ་ས་གནས་བོད་མི་ཚོས་བོད་ཀྱི་སྲོལ་རྒྱུན་རིག་གཞུང་གི་གཞས་སྣ་འཁྲབ་སྟོན་ཞིག་གཟིགས་འབུལ་ཞུས་ཡོད་པ་རེད
