༢༠༠༩ ཕྱི་ཟླ་ ༡༡ ཚེས་ ༢༤ རེས་གཟའ་མིག་དམར།
༄༅། །ཕྱི་ལོ་ ༢༠༠༩ ཟླ་ ༡༡ ཚེས་ ༡༨ ཉིན་ཨི་ཊ་ལིའི་རྒྱལ་ས་རོམ་ནང་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་ལྔ་པར་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་ (Nancy Pelosi) མཆོག་གིས་གཏོང་གནང་མཛད་པའི་གསུང་བཤད་དེ་ཨ་རིའི་གྲགས་ཅན་གློག་བརྙན་འཁྲབ་མཁན་སྐུ་ཞབས་རི་ཅ་ཌི་སྒེ་རི་ (Richard Gere) ལགས་ཀྱིས་ལྗགས་ཀློག་གནང་བའི་ནང་འཁོད་དོན།
༄༅། །བཀུར་འོས་ཚོགས་གཙོ་སྐུ་ཞབས་མེ་ཊིའོ་མེ་ཀི་མཆོག་དང་། བོད་དོན་རྒྱབ་སྐྱོར་ཚོགས་པའི་གྲོས་ཚོགས་ཀྱི་ཚོགས་མི་རྣམ་པ། རྒྱལ་ས་རོམ་ནང་རྟེན་གཞི་བྱས་པའི་ཕྱི་འབྲེལ་ལས་དོན་ལྷན་ཁང་།༼ཀ་མེ་རཱ་ཌའི་ཌེཔུ་ཊ་ཨི་ཊ་ལི་ཡ་ནཱ། པཱ་ལཱ་ཛོ་མོན་ཊེ་སི་ཊོ་རིའོ།༽བརྩེ་བའི་ཚོགས་གཞོན་མེ་ཀ་ཀི་མཆོག རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་དེ་འདྲ་ཞིག་ཚོགས་པར་དགའ་བསུ་ཞུ་བཞིན་ཡོད། རྒྱལ་ཁབ་ ༣༠ ལྷག་ཙམ་ནས་ཚོགས་འདུ་དེར་མཉམ་ཞུགས་གནང་མཁན་གྱི་ངོ་མཚར་ལྡན་པའི་གྲོས་ཚོགས་མི་སྣ་འདྲ་མིན་རྣམ་པ་དང་། ཚོགས་བཅར་བ་ལྷན་རྒྱས་བཅས་ལ་བཀུར་འོས་ཚོགས་གཙོ་མཆོག་བརྒྱུད་ངས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། འཛམ་གླིང་འདིའི་ནང་བོད་དོན་ཐོག་རྒྱབ་སྐྱོར་ཤུགས་ཆེ་ཐོབ་བཞིན་ཡོད་པས། རྒྱལ་སྤྱིའི་གྲོས་ཚོགས་ཀྱི་བོད་དོན་རྒྱབ་སྐྱོར་དེར་སྣང་ཆུང་བྱེད་ཐུབ་པ་ཞིག་རྩ་བ་ནས་མིན། དེ་ལྟར་རྒྱབ་སྐྱོར་ཐོབ་པ་དེ་ནི་ཕྱོགས་གཅིག་ནས་བརྗོད་ན་གཙོ་བོ་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་དབུ་འཁྲིད་འོག་འཛམ་གླིང་ནང་འཚེ་མེེད་ཞི་བ་གོང་འཕེལ་དང་། ཕན་ཚུན་བསམ་ཤེས་ཡོང་ཐབས་ཐུགས་བརྩོན་མཛད་བཞིན་ཡོད་པའི་བཀྲིན་ལས་བྱུང་བ་ཞིག་ཡིན། ཨ་རིའི་གྲོས་ཚོགས་ཀྱིས་བོད་མི་ཚོར་དུས་ཡུན་རིང་པོ་ཞིག་ནས་ལངས་ཕྱོགས་སྲ་བརྟན་ཐོག་རྒྱབ་སྐྱོར་ཞུས་ཡོད། ཕྱི་ལོ་ ༢༠༠༧ ལོར་ཨ་རིའི་སྲིད་འཛིན་སྐུ་ཞབས་ཇོ་ཇི་བྷུ་ཤི་ (George Bush) མཆོག་ནས་༸གོང་ས་མཆོག་གི་འཚེ་མེད་ཞི་བདེ་དང་། འགྲོ་བ་མིའི་ཐོབ་ཐང་། ཆོས་ལུགས་ཕན་ཚུན་དབར་བསམ་ཤེས་ཐུབ་ཐབས་སོགས་ཀྱི་ཐོག་ཡུན་རིང་བཟོད་བསྲན་དང་། བླ་ན་མེད་པའི་མཛད་རྗེས་ལ་ངོས་འཛིན་ཞུ་ཆེད་ཨ་རིའི་གསེར་གྱི་གཟེངས་རྟགས་འབུལ་བཞེས་མཛད་སྐབས་ངོས་རང་སྲིད་འཛིན་མཆོག་དང་ལྷན་དུ་མཉམ་ཞུགས་བྱེད་ཐུབ་པར་བློ་སྤོབས་ཆེན་པོ་བྱུང་། ཟླ་བ་སྔོན་མར་ཨ་རིའི་གྲོས་ཚོགས་ཀྱི་ཚོགས་མི་རྣམས་ནས་༸གོང་ས་མཆོག་ལ་ལེན་ཊོ་སི་ཐེབས་རྩ་ཁང་གིས་འགྲོ་བ་མིའི་ཐོབ་ཐང་གི་གཟེངས་རྟགས་འབུལ་བཞེས་མཛད་སྐབས་སླར་ཡང་རྒྱབ་སྐྱོར་ཞུས་ཡོད།ཨ་རིའི་གྲོས་ཚོགས་ཀྱི་འཐུས་མི་ཊོམ་ལེན་ཊོ་སི་དམ་པ་དེར་གུས་བརྩི་ཞུ་ཆེད་དུ་བཙུགས་པའི་ལེན་ཊོ་སི་ཐེབས་རྩ་ཁང་གིས་ཨ་རིའི་གྲོས་ཚོགས་འདི་བཞིན་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་གྲོས་ཚོགས་སུ་གདན་ཞུའི་ཐོག་བོད་དོན་ལ་རྒྱབ་སྐྱོར་ཞུ་མཁན་འཛམ་གླིང་ནང་གི་ཁྲིམས་བཟོ་ལྷན་ཁང་ཐོག་མ་དེ་ཆགས་ཐུབ་པར་ཕན་གྲོགས་ཞུས་ཡོད།
འདས་པའི་ལོ་ ༢༠ རིང་ཨ་རིའི་གྲོས་ཚོགས་ཀྱིས་བོད་དོན་དམིགས་བསལ་འབྲེལ་མཐུད་པ་བསྐོ་གཞག་གནང་བ་དང་། བོད་མིའི་སྤྱི་ཚོགས་ལ་དཔལ་འབྱོར་གྱི་མཐུན་འགྱུར་སྤྲོད་རྒྱུའི་མཚོན་ང་ཚོའི་སྲིད་གཞུང་ནས་བོད་ཀྱི་གནད་དོན་དེར་གཞུང་འབྲེལ་ངོ་བོའི་ཐོག་ནས་སྟངས་འཛིན་ཡོང་བ་བྱ་རྒྱུར་འབད་བརྩོན་མང་དག་ཅིག་ཞུས་ཡོད། དེ་མཚུངས་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐོག་མ་དེ་ཕྱི་ལོ་ ༡༩༩༤ ལོར་ཚོགས་པ་ནས་ད་བར་ཡར་རྒྱས་གང་མཚམས་ཕྱིན་ཡོད། ཚོགས་འདུ་འདི་ལྟ་བུ་ཚོགས་པའི་ཐོག་ང་ཚོ་ཕན་ཚུན་གནས་ཚུལ་དང་ཐབས་བྱུས་བརྗེད་ལེན་གྱིས་གོང་བུའི་རྩོལ་ཤུགས་ཆེ་རུ་གཏོང་ཐུབ་པ་ཞིག་རེད།
རྒྱལ་སྤྱིའི་སྤྱི་ཚོགས་ནས་བོད་མི་ཚོར་རྒྱབ་སྐྱོར་ཞུ་རྒྱུའི་ཐུགས་འགན་བཞེས་བཞིན་ཡོད། རང་དབང་ལ་མོས་པའི་མི་མང་རྣམས་ཀྱིས་རྒྱ་ནག་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་སྐད་ཆ་ཤོད་མ་ཐུབ་ཚེ་འཛམ་གླིང་ས་ཕྱོགས་གཞན་གང་དུའང་ང་ཚོས་འགྲོ་བ་མིའི་ཐོབ་ཐང་སྐོར་སྐད་ཆ་ཤོད་རྒྱུའི་བཟང་སྤྱོད་ཀྱི་ཐོབ་ཐང་དེ་བརླག་པ་རེད། ངོས་རང་ཨ་རིའི་གྲོས་ཚོགས་འོག་མའི་ཚོགས་གཙོ་ཞིག་དང་བོད་མིའི་གྲོགས་མོ་ཞིག་ཡིན་པའི་ཆ་ནས་དེ་རིང་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་འདུ་ཐེངས་ལྔ་པ་འདི་ཞིང་དོན་སྨིན་ལྡན་པ་ཞིག་ཡོང་བར་འཚམས་འདྲི་དང་བཀྲིས་བདེ་ལེགས་ཞུ་རྒྱུ་ཡིན།།
ནེན་སི་པི་ལོ་སིས། (Nancy Pelosi)
གྲོས་ཚོགས་འོག་མའི་ཚོགས་གཙོ། (Speaker of the House)
གསུང་བཤད་ངོ་མ་འདི་དབྱིན་ཡིག་ཐོག་ཡོད་པ་ནས་འདི་ག་བོད་ཡིག་ཚན་པས་ཕབ་སྒྱུར་ཞུས་པས་ཚིག་དོན་ལ་ཧེ་བག་ཡོད་ཚེ་རྩ་བ་དབྱིན་ཡིག་ལ་རྩ་འཛིན་ཡོད་པ་ཞུ།
