༢༠༠༩ ཕྱི་ཟླ་ ༡༡ ཚེས་ ༣༠ རེས་གཟའ་ཟླ་བ།
༄༅། །འདི་གར་ཆོས་རིག་ལས་ཁུངས་ནས་བཏང་ནང་འཁོད་དོན། བཀུར་འོས་རྒྱལ་སྤྱིའི་ཁོར་ཡུག་ཚོགས་ཆེན་གྱི་ཚོགས་འཐུས་ལྷན་རྒྱས་མཆོག་གི་
དྲུང་དུ།
ད་ལམ་འདི་གར་རྒྱ་གར་གྱི་རྒྱལ་ས་ལྡི་ལིའི་ཉེ་འགྲམ་དུ་ཕྱི་ལོ་ ༢༠༠༩ ཟླ་ ༡༡ ཚེས་ ༢༣ དང་ ༢༤ ཉིན་གཉིས་རིང་རི་བོ་ཧི་མ་ལ་ཡའི་བརྒྱུད་དུ་གཏོགས་པའི་བོད་བརྒྱུད་ནང་པའི་དགོན་སྡེ་ཁག་ ༤༢ ནས་ཕེབས་པའི་གྲགས་ཅན་བླ་སྤྲུལ་ཁག་དང་། མཁན་པོ་སློབ་དཔོན་དགེ་འདུན་པ་བཅས་འདུ་འཛོམས་ཀྱིས། སྤྱིར་ཁོར་ཡུག་ཉམས་ཆག་སྲུང་སྐྱོབ་དང་། ལྷག་པར་ཧི་མ་ལ་ཡའི་ད་ལྟའི་གནས་སྟངས་ཉམ་ང་ལས་སྐྱོབ་དགོས་པ་ནི་སྐབས་བབས་ཀྱི་གལ་གནད་ཆེན་པོར་བརྩིས་ཏེ། སེམས་ཚབས་ཆེན་པོས་ད་ལན་ཀོ་པན་ཧེ་གན་ལ་ཚོགས་གཏན་འཁེལ་བའི་རྒྱལ་སྤྱིའི་ཁོར་ཡུག་ཚོགས་འདུར་འབོད་སྐུལ་ཤུགས་ཆེར་ཞུ་རྒྱུའི་གཤམ་གསལ་དོན་གནད་ཁ་ཤས་ཡོད།
འཕགས་བོད་ས་མཚམས་སུ་གཞི་རྒྱ་ཆེ་བའི་དམག་མིའི་གཞི་རྟེན་ལ་བརྟེན་ནས་རང་བཞིན་གྱིས་སྣུམ་འཁོར་དང་རྫས་རྡུལ་གྱིས་རྐྱེན་པས་མཐོ་སྒང་གི་གངས་རི་སོགས་སྣོད་བཅུད་ལ་གནོད་སྐྱོན་འབྱུང་བཞིན་པར་བརྟེན། ཧི་མ་ལ་ཡའི་རི་རྒྱུད་བོད་དང་བཅས་པ་འཚེ་མེད་ཞི་བའི་བསྟི་གནས་སུ་སྒྱུར་ཐུབ་ན་ཁོར་ཡུག་ཉམས་ཆག་གི་རྐྱེན་ངན་དུ་མ་རང་ཞིར་གྱུར་ངེས་ལ། ཚོགས་ཆེན་འདིའི་ཐོག་ནས་དམིགས་བསལ་དགོངས་བཞེས་ཡོང་བ།
འཛམ་གླིང་སྤྱི་དང་ལྷག་པར་ཨེ་ཤ་ཡའི་སྣོད་བཅུད་སྲུང་སྐྱོབ་སླད་ཆུ་བོ་མང་པོའི་འབྱུང་གནས་ས་ཡི་གོ་ལའི་འཁྱག་རོམ་གྱི་སྣེ་མོ་གསུམ་པར་གྱུར་པའི་ཧི་མ་ལ་ཡའི་རི་རྒྱུད་ཀྱི་ཁོར་ཡུག་གལ་ཆེའི་རང་བཞིན་ཚང་མས་དགོངས་མངའ་ལྟར། དེང་དུས་ས་མཚམས་སྲུང་སྐྱོབ་དང་དེང་རབས་ཡར་རྒྱས་ལ་བསྙད་པའི་ཁོར་ཡུག་ལ་གནོད་པའི་ཚབས་ཆེའི་ལས་རིགས་བྱུང་དང་འབྱུང་བཞིན་ལ། ཉེན་ཁ་འདི་ལས་འཕྲལ་དུ་སྐྱོབས་ཐབས་འཛམ་གླིང་རྒྱལ་སྤྱི་ནས་དམིགས་བསལ་དགོངས་བཞེས་རྒྱ་ཆེན་པོས་རྒྱབ་སྐྱོར་ཕྱག་ལེན་ལ་འཁེལ་བ་ཞིག་གནང་རོགས་ཞུ་རྒྱུ།
ཁོར་ཡུག་སྲུང་སྐྱོབ་སྐོར་གཅིག་ཁག་གཅིག་བཞག་མིན་པར་རྒྱལ་ཁབ་ཚང་མས་འགྲན་བསྡུར་གོམ་པ་མདུན་བསྐྱོད་ཀྱིས་འགྲོ་དགོས་པ་ནི་སྐབས་བབས་ཀྱི་གལ་ཆེའི་དོན་གནད་ཅིག་ཏུ་གྱུར་འདུག་པས་དེ་བཞིན་དགོངས་བཞེས་ཡོང་བ་ཞུ་རྒྱུ།
འཛམ་གླིང་རྒྱལ་སྤྱིའིི་ཁོར་ཡུག་སྲུང་སྐྱོབ་ཀྱི་ཚོགས་འདུ་ནམ་ཚུགས་ལ་ཧི་མ་ལ་ཡའི་རི་རྒྱུད་ནང་པའི་དགོན་སྡེ་ཁག་གི་སྐུ་ཚབ་ངེས་པར་ཚོགས་བཅར་ཆོག་པའི་དམིགས་བསལ་དགོངས་བཞེས་ཡོང་བ་ཞུ་རྒྱུ།
ཉེ་ཆར་ www.ecobuddhism.org དྲ་རྒྱའི་ཐོག་གནམ་གཤིས་འགྱུར་ལྡོག་ཐད་ནང་པའི་གསལ་བསྒྲགས་ཡིག་ཆ་ལ་རྒྱབ་སྐྱོར་ཞུ་རྒྱུ་ཡིན། འཕགས་ཡུལ་རྒྱལ་ས་ལྡི་ལིའི་ཉེ་འགྲམ་གུར་ག་འོང་དུ་ཕྱི་ལོ་ ༢༠༠༩ ཟླ་ ༡༡ ཚེས་ ༢༣ དང་ ༢༤ ཉིན་གཉིས་རིང་ཧི་མ་ལ་ཡའི་བོད་བརྒྱུད་དགོན་སྡེ་ཁག་གི་ཁོར་ཡུག་སྲུང་སྐྱོབ་སྐོར་ཚོགས་འདུ་ཐེངས་དང་པོའི་ཚོགས་བཅར་བ་ཐུན་མོང་ནས་ཕུལ།།
