༢༠༠༩ ཕྱི་ཟླ་ ༡༡ ཚེས་ ༢༦ རེས་གཟའ་ཕུར་བུ།
༄༅། །འདི་གར་ཤེས་རིག་ལས་ཁུངས་ནས་བཏང་གནས་ནང་འཁོད་དོན། ཤེས་རིག་ལས་ཁུངས་ནས་ཕྱི་ལོ་ ༢༠༠༩ ཟླ་ ༡༡ ཚེས་ ༢༤ ནས་ ༣༠ བར་ཉིན་བདུན་རིང་སམ་བྷོ་ཊའི་ཁྱབ་ཁོངས་སློབ་གྲྭ་ཁག་གི་གཞི་རིམ་བར་མའི་དགེ་རྒན་ཚོར་ཤེས་ཡོན་སྲིད་བྱུས་དང་འབྲེལ་བའི་ཟབ་སྦྱོང་ཞིག་སྤོན་ཊ་གཏན་སློབ་ཏུ་གོ་སྒྲིག་ཞུ་ཡོད་པ་དང་། ཟབ་སྦྱོང་གི་དབུ་འབྱེད་མཛད་སྒོར་སྐུ་མགྲོན་གཙོ་བོར་རང་གཞུང་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་མཆོག་དང་རིགས་སློབ་དབུ་འཛིན་གཞོན་པ་དགེ་བཤེས་སྐལ་བཟང་དགྲ་འདུལ་ལགས། ཤེས་རིག་གི་ཤེས་ཡོན་འགན་འཛིན་དང་དྲུང་ལས། སློབ་གྲྭ་གཏན་སློབ་ཀྱི་སློབ་སྤྱི་བཅས་ཚོགས་ཕེབས་གནང་ཡོད། ད་ལན་ཟབ་སྦྱོང་ཁོངས་སུ་ཅོན་ཏ་ར་གཏན་སློབ་ནས་གཞི་རིམ་བར་མའི་དགེ་རྒན་ ༤ དང་བདེ་སྐྱིད་གླིང་ཉིན་སློབ་ནས་དགེ་རྒན་ ༣ བྷུན་ ཏར་གཏན་སློབ་ནས་དགེ་རྒན་ ༣ པུར་ཝ་ལ་ནས་དགེ་རྒན་ ༡ མེས་དབོན་དཔེ་སྟོན་སློབ་གྲྭ་ནས་དགེ་རྒན་ ༡ སྤོན་ཊ་གཏན་སློབ་ནས་གཞི་རིམ་བར་མའི་དགེ་རྒན་ ༨ དང་མཐོ་རིམ་དགེ་རྒན་ ༣ བཅས་ཁྱོན་དགེ་རྒན་ ༢༣ འཛུལ་ཞུགས་གནང་ཡོད་པ་དང་། ཟབ་སྦྱོང་རིང་ཤེས་རིག་བཀའ་བློན་དང་དྲུང་ཆེ་མཆོག་ནས་ཤེས་ཡོན་སྲིད་བྱུས་ལེའུ་དང་པོ་ནས་བཅོ་ལྔ་བར་དང་། རིགས་སློབ་དབུ་འཛིན་གཞོན་པ་སྐལ་བཟང་དགྲ་འདུལ་ལགས་ནས་སྲོལ་རྒྱུན་ཤེས་ཡོན། ཅེ་ནེ་ཡེ་ཆེས་མཐོའི་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་ཌོག་ཊར་ར་མུ་མ་ནི་ཝ་ནམ་མཆོག་ནས་ཁྱོན་ཡོངས་ཀྱི་ཤེས་ཡོན་དང་ཤེས་ཡོན་ལྟ་གྲུབ། གཞི་རིམ་ཤེས་ཡོན་སློབ་འཁྲིད་ཐབས་ལམ། སློབ་ཚན་འཆར་འགོད། དེ་བཞིན་ཀ་རུ་ན་ཐེབས་རྩ་ནས་དམིགས་བསལ་ཤེས་ཡོན་མཁས་དབང་མན་ཇུ་སིང་གྷ་ནེ་ཡ་ལགས་ནས་དམིགས་བསལ་ཤེས་ཡོན། སམ་བྷོ་ཊའི་སྤྱི་ཁྱབ་འགན་འཛིན་ལགས་ནས་ཤེས་ཡོན་ཞིབ་འཇུག སྤོན་ཊ་གཏན་སློབ་ཀྱི་ལུས་དགེ་གཉིས་ནས་ཡོག་དང་པྲ་ཎཱ་ཡཱ་མ་སློབ་འཁྲིད་གནང་གཏན་འཁེལ་ཡོད་པ་དང་། གཞན་ཡང་ཟབ་སྦྱོང་ནང་ཁུལ་གོ་བསྡུར་དང་ཤེས་ཡོན་འབྲེལ་བའི་ལྟད་མོ་འགའ་གཟིགས་འབུལ་གནང་རྒྱུ་ཡིན་འདུག ཟབ་སྦྱོང་གི་མཇུག་བསྡོམས་ཕྱིཚེས་ ༣༠ ཉིན་གནང་གཏན་འཁེལ་ཡོད་པ་བཅས་སོ།
