༢༠༠༩ ཕྱི་ཟླ་ ༡༡ ཚེས་ ༢༡ རེས་གཟའ་སྤེན་པ།
༄༅། །ཕྱི་ལོ་ ༢༠༠༩ ཟླ་ ༡༡ ཚེས་ ༢༣ ནས་ ༢༤ བར་ཆོས་རིག་ལས་ཁུངས་ནས་གོ་སྒྲིག་ཞུས་ཐོག་ཉིན་གྲངས་གཉིས་རིང་བོད་བརྒྱུད་ནང་བསྟན་གྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་པའི་བསྟན་བདག་བླ་ཆེན་རྣམ་པའི་དབུ་ཁྲིད་འོག་རྒྱ་བལ་འབྲུག་གསུམ་དང་ཧི་མ་ལ་ཡའི་རི་རྒྱུད་ཁུལ་གྱི་བླ་སྤྲུལ་དང་དགེ་བཤེས་རྣམ་པ། མཁས་དབང་རྣམ་པ། དགོན་སྡེའི་སྐུ་ཚབ་རྣམ་པ་བཅས་ལ་ཁོར་ཡུག་སྲུང་སྐྱོབ་སྐོར་ལྡི་ལིའི་ཉེ་འཁོར་གུར་ག་འོང་དུ་ལྷན་ཚོགས་ཤིག་ཚོགས་རྒྱུ་ཡིན་འདུག དེ་ཡང་སྔ་དྲོ་ཆུ་ཚོད་ ༩།༡༥ ཐོག་སྐུ་མགྲོན་དང་ཚོགས་མི་རྣམ་པ་ཚོགས་ཁང་དུ་བཞུགས་གྲལ་འཁོད་གནང་རྒྱུ། ཆུ་ཚོད་ ༩།༣༠ ཐོག་༸གོང་ས་༸སྐྱབས་མགོན་ཆེན་པོ་མཆོག་ལྷན་ཚོགས་དེར་ཆིབས་སྒྱུར་གྱིས་སྣང་གསལ་ཞལ་དབྱེ་བཀའ་དྲིན་བསྐྱང་གྲུབ་མཚམས་ཆོག་གྲྭ་རྣམས་ནས་ཤིས་བརྗོད་གསུང་སྒྲོག་སྐབས་རྟེན་འབྱུང་གསོལ་ཇ་དང་བཞེས་འབྲས་འདེགས་འབུལ་ཞུ་རྒྱུ། དེ་རྗེས་ཆོས་རིག་བཀའ་བློན་མཆོག་ནས་༸གོང་ས་མཆོག་ལ་མཇལ་དར་འབུལ་ལམ་ཞུས་རྗེས་ཚོགས་འདུའི་ངོ་སྤྲོད་གསུང་བཤད་གནང་རྒྱུ་དང་དེ་ནས་བཀའ་ཁྲི་མཆོག་ནས་བཀའ་ཤག་གི་གསུང་བཤད་གནང་རྒྱུ། དེ་རྗེས་དཔལ་སུན་དར་ལལ་བྷ་ཧུ་གུ་ན་མཆོག་ནས་གསུང་བཤད་གནང་རྒྱུ། དེ་ནས་༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་སློབ་བཀའ་དྲིན་སྩལ་རྒྱུ། དེ་རྗེས་ཆོས་རིག་དྲུང་ཆེ་ནས་ཐུགས་རྗེ་ཆེ་ཞུའི་གསུང་བཤད་གནང་རྒྱུ་ཡིན་འདུག་པ་བཅས་སོ།
