༢༠༠༩ ཕྱི་ཟླ་ ༡༡ ཚེས་ ༥ རེས་གཟའ་ཕུར་བུ།
བོད་གཞུང་ཤེས་རིག་ལས་ཁུངས་ཀྱི་ལས་བྱེད་དང་ཁེ་ཎ་ཌའི་འབྲེལ་ཡོད་ལས་བྱེད་རྣམས་ལྷན་འཛོམས་གོ་བསྡུར་གནང་བཞིན་པ།
༄༅། །ཕྱི་ཟླ་ ༡༡ ཚེས་ ༥ ཉིན་བོད་གཞུང་ཤེས་རིག་ལས་ཁུངས་ནས་བཏང་གནས་ནང་གསལ། འདི་ཟླའི་ཚེས་ ༣ ཉིན་བོད་གཞུང་ཤེས་རིག་ལས་ཁུངས་ཀྱི་བཀའ་བློན་ཡིག་ཚང་དུ་ཁེ་ཎ་ཌའི་ཝན་ཁུ་བར་གྲོང་ཁྱེར་གྱི་སར་མན་ཕེ་ར་ཛ་གཙུག་ལག་སློབ་གྲྭའི་འགན་ཡོད་ལས་བྱེད་དང་ཤེས་རིག་ལས་ཁུངས་ཀྱི་གནད་ཡོད་ལས་བྱེད་ཁག་ཅིག་ལྷན་ཚོགས་གནང་བ་རེད།
ལྷན་ཚོགས་དེའི་ནང་བོད་གཞུང་ཤེས་རིག་ལས་ཁུངས་ཀྱི་འཛིན་སྐྱོང་དང་འཆར་འགོད་ཚན་པའི་འགན་འཛིན་དྲུང་ཆེ་དངོས་གྲུབ་རྡོ་རྗེ་དང་། དེང་རབས་ཤེས་ཡོན་ཚན་པའི་འགན་འཛིན་དྲུང་འཕར་རི་ཁ་བཀྲ་ཤིས་ནོར་བུ། སྲོལ་རྒྱུན་ཚན་པའི་འགན་འཛིན་བཀྲ་ཤིས་དོན་གྲུབ། ཤེས་ཡོན་འགན་འཛིན་ཚེ་རིང་བསམ་གྲུབ་དང་ཚེ་རིང་ཕུན་ཚོགས་སོགས་ཡོད་པ་དང་། ཁེ་ཎ་ཌའི་སར་མན་ཕེ་ར་ཛ་གཙུག་ལག་སློབ་གྲྭའིི་ཕྱོགས་ནས་སྐུ་ཞབས་ཇིམ་སེ་ཨོག་དང་། ལྕམ་སྐུ་མར་ཏི་གཉིས་ཕེབས་ཡོད་ལ་ཐེངས་འདིའི་བཞུགས་མོལ་ལྷན་ཚོགས་ནང་གཙོ་བོ་དགེ་རྒན་འོས་སྦྱོང་གི་ལས་རིམ་དང་། སློབ་ཚན། ལམ་ལུགས། ཐབས་ལམ་སོགས་ཀྱི་ཐད་ཕྱོགས་གཉིས་དབར་གོ་རྟོགས་སྤེལ་རེས་གནང་ཞིང་། ལྷག་པར་ཁེ་ཎ་ཌའི་ནང་ལག་བསྟར་བྱེད་བཞིན་པའི་དགེ་རྒན་འོས་སྦྱོང་གི་སྔོན་ཐོན་ཐབས་ལམ་ཁག་ངོ་སྤྲོད་ཞིབ་ཕྲ་གནང་ཡོད་པ་མ་ཟད། མཇུག་ཏུ་ཕྱོགས་གཉིས་ཀས་ད་ཕན་དགེ་རྒན་འོས་སྦྱོང་དང་འབྲེལ་བའི་ཉམས་མྱོང་སྤེལ་རེས་ཀྱི་ལས་དོན་ཁྲོད་ལྷགས་པའི་གནད་དོན་ཁ་ཤས་ལ་གྲོས་བསྡུར་གྱིས་མ་འོངས་པར་ཡར་རྒྱས་གཏོང་ཕྱོགས་ཀྱི་ཐབས་ལམ་བཏོན་ཡོད་པ་རེད།
