༢༠༠༩ ཕྱི་ཟླ་ ༡༡ ཚེས་ ༡༠ རེས་གཟའ་ཟླ་བ།
༄༅། ཕྱི་ལོ་ ༢༠༠༩ ཟླ་ ༡༡ ཚེས་ ༡༠ ཉིན་སྔ་དྲོ་བོད་གཞུང་ཤེས་རིག་ལས་ཁུངས་ཀྱིས་གོ་སྒྲིག་ཐོག་རྡ་ས་གངས་སྐྱིད་ལས་བྱེད་གསོལ་ཐབ་ཡང་སྟེང་དུ་སམ་བྷོ་ཊའི་ཁྱབ་ཁོངས་གཞི་རིམ་དབྱིན་ཇིའི་སྐད་ཡིག་སློབ་ཁྲིད་བྱེད་མཁན་གྱི་དགེ་རྒན་ ༡༤ ལ་ཟབ་སྦྱོང་འགོ་འཛུགས་ཞུས་པར་སྐུ་མགྲོན་གཙོ་བོ་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་
ལགས་དང་། སམ་བྷོ་ཊའི་སྤྱི་ཁྱབ་འགན་འཛིན་ཀརྨ་ཆུང་བདག་ལགས། ཤེས་རིག་ཤེས་ཡོན་འགན་འཛིན་ཚེ་རིང་ཕུན་ཚོགས་ལགས། དྲུང་ལས་སྐལ་བཟང་རིན་ཆེན་ལགས་བཅས་མཉམ་བཅར་ཞུས་ཡོད་ལ་ཁོང་ཚོས་ངོ་སྤྲོད་དང་ཟབ་སྦྱོང་དགོས་དམིགས་ཐད་གསུང་བཤད་གནང་ཡོད། ཟབ་སྦྱོང་སྤྲོད་མཁན་ཨོ་སི་ཊོ་ལི་ནས་ཡིན་པ་དབྱིན་ཇིའི་སྐད་ཡིག་སློབ་ཁྲིད་ཉམས་མྱོང་ཅན་ཊོ་ནི་ལོན་ཌན་ཡིན་པ་དང་། དེ་ཡང་ཕྱི་ལོ་ ༢༠༠༤ ལོར་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་གཏན་འབེབས་བྱས་རྗེས་ཕྱི་ལོ་ ༢༠༠༥ ལོར་མེས་དབོན་གཙུག་ལག་དཔེ་སྟོན་སློབ་གྲྭ་དབུ་བརྙེས། དེ་རྗེས་ཕྱི་ལོ་ ༢༠༠༦ ལོར་སམ་བྷོ་ཊ་བོད་སློབ་ཁྱབ་ཁོངས་སློབ་གྲྭ་ཚང་མའི་ནང་ཤེས་ཡོན་སྲིད་བྱུས་ལག་བསྟར་འགོ་འཛུགས་ཞུས་ཡོད། ཤེས་ཡོན་སྲིད་བྱུས་དགོངས་དོན་སྐད་ཡིག་གཉིས་པ་དབྱིན་ཡིག་སློབ་ཁྲིད་བྱ་རྒྱུ་དེ་འཛིན་རིམ་བཞི་པ་ནས་འགོ་འཛུགས་ཞུ་རྒྱུ་ཡིན་པ་ལྟར། དགེ་རྒན་རྣམས་ནས་དེ་སྔ་སྔོན་འགྲོ་དང་འཛིན་རིམ་དང་པོ་གཉིས་པ་བཅས་ལ་སློབ་ཁྲིད་གནང་ལམ་ལྟར་མ་ཡིན་པར་འཛིན་གྲྭ་བཞི་པའི་སློབ་ཕྲུག་རྣམས་ལ་སློབ་ཁྲིད་འགོ་འཛུགས་ཐབས་ལམ་མི་འདྲ་ཞིག་གནང་སྟེ་སློབ་ཕྲུག་རྣམས་འཛིན་གྲྭ་དྲུག་པར་སླེབས་སྐབས་དབྱིན་ཡིག་གནས་ཚད་རྗེས་ལུས་མེད་པ་གང་ལེགས་ཡོང་བའི་དམིགས་དོན་ཆེད་དུ་ཡིན་འདུག་པ་དང་། ད་རེས་ཟབ་སྦྱོང་འདི་ཟླ་འདིའི་ཚེས་ ༡༠ ནས་ཚེས་ ༢༡ བར་ཉིན་བཅུ་གཅིག་རིང་སྤྲོད་རྒྱུ་ཡིན་འདུག
དེ་བཞིན་ཤེས་རིག་ལས་ཁུངས་ཀྱི་འགོ་སྒྲིག་འོག་ས་ར་མཐོ་སློབ་ཏུ་ཤེས་ཡོན་སྲིད་བྱུས་དང་འབྲེལ་བའི་ཟབ་སྦྱོང་ཞིག་ཀྱང་འདི་ཟླའི་ཚེས་ ༩ ཉིན་འགོ་བཙུགས་ཀྱིས་ཚེས་ ༡༤ བར་ཉིན་དྲུག་རིང་སྤྲོད་མུས་ཡིན་པ་དང་། རྡ་ས་བོད་ཁྱིམ་དང་། མ་སུ་རི་བོད་ཁྱིམ། སྒེར་ཁག་གི་སློབ་གྲྭའི་གཞི་རིམ་དགེ་རྒན་གྲངས་ ༢༤ མཉམ་ཞུགས་གནང་ཡོད་པའི་གནས་བསྡུས་སུ།
