༢༠༠༩ ཕྱི་ཟླ་ ༡༡ ཚེས་ ༢༦ རེས་གཟའ་ཕུར་བུ།
༸གོང་ས་མཆོག་དང་ཁྲིམས་དཔོན་ཨེ་པི་ཤཱ་མཛད་སྒོའི་སྐབས་བསྒྲོན་པའི་སྐུ་པར།
༄༅། །ཕྱི་ལོ་ ༢༠༠༩ ཟླ་ ༡༡ ཚེས་ ༢༡ ཉིན་རྒྱ་གར་གྱི་རྒྱལ་ས་ལྡི་ལི་ཁྲིམས་དཔོན་སུ་ནན་ལྷ་བན་ཐ་རི་ཐེབས་རྩས་གོ་སྒྲིག་ཞུས་ཐོག་ལྡི་ལིའི་ཁྲིམས་ཁང་གོང་མའི་ཁྲིམས་དཔོན་ཨེ་པི་ཤཱ་ (A.P Shah) མཆོག་དང་རྒྱ་གར་གྱི་ཁྲིམས་ཁང་གོང་འོག་གཉིས་ཀྱི་ཁྲིམས་ཞིབ་པས་དབུས་ཁྲིམས་ཞིབ་པ་མང་པོ་ཞིག་དང་དེ་བཞིན་ཕྱི་རྒྱལ་གཞུང་ཚབ་ཁག་གཅིག་གི་སྐུ་ཚབ་དང་གནད་ཡོད་ཀྱི་མི་སྣ་བཅས་ཁྱོན་མི་གྲངས་ ༢༥༠ ལྷག་ཙམ་འདུ་འཛོམས་བྱུང་བའི་ཐོག་༸གོང་ས་མཆོག་ལ་ཇི་ལྟར་གདན་ཞུའི་གསོལ་འདེབས་ཞུས་དོན་བཞིན་ཆིབས་སྒྱུར་བཀའ་དྲིན་བསྐྱངས་ཏེ་ཞི་བདེ་དང་བུད་མེད་སྐོར་ལ་བཀའ་སློབ་སྩལ་དོན། སྙན་གྲགས་དང་བྱས་རྗེས་ཅན་གྱི་ཁྲིམས་དཔོན་སྐུ་མཁྱེན་མ་སུ་ནན་ལྷ་བེན་ཐ་རི་ཁོང་གི་རྗེས་དྲན་ཚོགས་པས་ལོ་ལྟར་དྲན་གསོའི་གཏམ་བཤད་གོ་སྒྲིག་གནང་གི་ཡོད་པར་ལྟར། ཐེངས་འདིར་ངོས་ལ་གོ་སྐབས་གནང་བ་ནི་གཟི་བརྗིད་ཆེན་པོ་ཡིན། དེང་སྐབས་ཞི་བདེ་ཞེས་པ་འདི་རྒྱལ་ཁབ་སོ་སོའི་དབུ་ཁྲིད་དང་ཆབ་སྲིད་པ་ཚང་མས་ཁ་ནས་སྐད་ཆ་ཤོད་རྒྱུའི་དབྱིངས་ཙམ་ལས་དོན་དམ་ཞི་བདེར་སྨན་པའི་ཁ་ཡོད་ལག་ཡོད་ཀྱི་འབྲས་བུ་ཞིག་ཐོན་གྱི་མེད། དེའི་རྒྱུ་མཚན་ནི་ཞི་བདེའི་སྙིང་པོ་ངོས་འཛིན་མ་ཐུབ་པ་ཞིག་ཡིན། ཁ་སྟོང་པའི་སྐད་ཆ་སྙན་པོ་དང་རྣམ་འགྱུར་བཟང་པོ་བཅས་ལ་ཞི་བདེ་ཟེར་གྱི་མེད། སྙིང་རྗེའི་རང་བཞིན་གྱི་ཐོག་ནས་ནང་སེམས་ལ་འགྱུར་བ་གཏོང་ཐུབ་པ་ཡིན་ན་དེ་ནི་ཞི་བདེའི་རྩ་བ་རེད། ཕན་ཚུན་ཡིད་ཆེས་མེད་པ་དང་དོགས་པ་ཅན་གྱི་རྒྱུ་རྐྱེན་ལས་འཇིགས་སྣང་ཡོང་གི་ཡོད་པ་དང་། དེ་དག་ལ་བརྟེན་ནས་ཁོང་ཁྲོ་དང་བདག་འཛིན་སོགས་ཡོང་གི་ཡོད། དེའི་ལྡོག་ཕྱོགས་སུ་སྙིང་རྗེ་ལྡན་པ་དེ་འཇིགས་སྣང་མེད་པ་ཙམ་མ་ཟད། མི་ཕན་ཚུན་དབར་འབྲེལ་བ་དེ་ཡང་ཉེ་རུ་འགྲོ་བ་དང་། ལྷག་པར་དེ་རིང་གི་སོ་སོའི་དགྲ་དེ་ཡང་མུ་མཐུད་སྙིང་རྗེའི་རང་བཞིན་གྱི་བལྟས་པ་ཡིན་ན་མ་འོངས་པར་རང་ཉིད་ཀྱི་སོ་སོར་གཉེན་ཡག་ཤོས་དེ་ཆགས་རྒྱུའི་གོ་སྐབས་ཀྱང་ཡོད་པ་ཞིག་རེད། དེ་འདྲ་ཡིན་དུས་ང་ཚོ་ཚང་མ་འགྲོ་བ་མི་ཞིག་དང་ལྷག་པར་ནུ་ཞོ་ནུ་པའི་སྲོག་ཆགས་ཤེས་རབ་ལྡན་ཤོས་དེ་ཡིན་དུས་དཔལ་འབྱོར་དང་དབང་ཆ་དེ་ནི་ནང་སེམས་ཀྱི་ཞི་བདེའི་རྩ་བར་ངོས་འཛིན་མ་བྱེད་པར་ནང་སེམས་ཀྱི་ཞི་བདེའི་རྩ་བ་དེ་སྙིང་རྗེ་ལ་ཐུག་པ་ཞིག་རེད། ཅེས་བཀའ་སློབ་སྩལ་ཡོད།
༸གོང་ས་མཆོག་ནས་ཁྲིམས་དཔོན་དམ་པ་སུ་ནན་ལྷ་བན་ཐ་རིའི་རྗེས་དྲན་ལ་མཉམ་ཞུགས་མཛད་པ།
ཡང་༸གོང་ས་༸སྐྱབས་མགོན་ཆེན་པོ་མཆོག་ནས་བུད་མེད་ཀྱི་སྐོར་ལ་བཀའ་སློབ་སྩལ་དོན། བུད་མེད་ཚོ་སྐྱེ་དངོས་ཀྱི་ཚན་རིག་ཐོག་ནས་བརྩེ་གདུང་གི་ནུས་པ་ཆེ་བ་ཡོད་སྟབས་ད་ལྟ་དུས་ཚོད་འདིར་ནུས་པ་དེ་དག་འདོན་རྒྱུའི་དུས་སླེབས་ཡོད་པ་རེད། དུས་རབས་ཐོག་མའི་སྐབས་ཡིན་ན་འགོ་ཁྲིད་ཀྱི་སྲོལ་རྒྱུན་དེ་མེད་པར་མི་ཚང་མ་རང་ཁ་རང་གསོ་བྱས་ནས་བསྡད་པ་དང་། དེའི་རྗེས་སུ་སྐྱེས་པ་ཚོའི་དབང་ཤུགས་ཀྱི་ནུས་པའི་འོག་སྤྱི་ཚོགས་གནས་པ་དང་དེ་ནས་རིམ་པས་ཤེས་ཡོན་དེ་གལ་ཆེན་པོ་བརྩིས་དགོས་པའི་དུས་རབས་ཤིག་ལ་སླེབས་པ་རེད། འོན་ཀྱང་ད་ལྟའི་དུས་རབས་སུ་ང་ཚོར་ཡོད་བཞིན་པའི་ཤེས་ཡོན་གྱི་སྲིད་བྱུས་དེས་མིའི་བསམ་བློ་ལ་འགྱུར་བ་གཏོང་ཐུབ་པའི་རྐྱེན་དེ་ཚང་གི་མེད་སྟབས། ང་ཚོ་དང་ལྷག་པར་བུད་མེད་ཚོས་སྙིང་རྗེ་གཞི་ལ་བཞག་སྟེ་ནང་སེམས་ལ་འགྱུར་བ་གཏོང་ཐུབ་པའི་ཤེས་ཡོན་གྱི་ལམ་ལུགས་ཤིག་བཟོ་དགོས་ཀྱི་ཡོད། གནད་དོན་དེའི་ཐོག་བུད་མེད་ཚོ་རང་བཞིན་བརྩེ་གདུང་གི་ནུས་པ་ཆེ་བ་ཡོད་པའི་ཆ་ནས་འགན་མང་བ་འཁྱེར་དགོས་པ་ཞིག་ཆགས་ཡོད་ཅེས་བཀའ་སློབ་སྩལ་གྲུབ་རྗེས་མང་ཚོགས་ཀྱི་དྲི་བར་བཀའ་ལན་ཡང་མཛད་ཡོད། དེ་རྗེས་ལྡི་ལི་ཁྲིམས་ཁང་གོང་མའི་ཁྲིམས་དཔོན་ཨེ་པི་ཤཱ་མཆོག་ནས་༸གོང་ས་མཆོག་གི་མཛད་འཕྲིན་ཁག་ལ་ཆེ་བསྟོད་དང་ལྷག་པར་མགོན་པོ་གང་ཉིད་མཆོག་ནས་འཛམ་གླིང་ཞི་བདེར་སྨན་པའི་ལམ་སྟོན་སྩོལ་བཞིན་པ་ཁག་ལ་བཀྲིན་ཆེ་ཞུས་ཏེ་ལྕམ་སྐུ་སུ་ནན་ལྷ་བན་ཐ་རིའི་དྲན་གསོའི་ལོ་རེའི་གཏམ་བཤད་ཐེངས་ ༡༥ པ་དེ་ལེགས་གྲུབ་བྱུང་ཡོད་པ་བཅས་ཀྱི་གནས་བསྡུས་སུ།
