༢༠༠༩ ཕྱི་ཟླ་ ༡༡ ཚེས་ ༢ རེས་གཟའ་ཟླ་བ།
༄༅། །ཕྱི་ལོ་ ༢༠༠༩ ཟླ་ ༡༡ ཚེས་ ༡ ཉིན་ཉི་ཧོང་རྒྱལ་ས་ཊོཀ་ཁྱོའི་ (Tokyo) ནང་། གོ་ལའི་མདུན་ལམ། ཞེས་པ་ཚན་རིག་དང་ནང་ཆོས་དབར་གྱི་བགྲོ་གླེང་གི་ཚོགས་འདུར་མི་མང་ ༣༠༠༠ བརྒལ་བ་ཙམ་འདུ་འཛོམས་ཐོག་ཇི་ལྟར་གསོལ་འདེབས་ཞུས་པ་བཞིན་༸གོང་ས་མཆོག་༸ཞབས་སོར་འཁོད་ཡོད།
ཚོགས་འདུ་འདི་ནི་ཉི་ཧོང་དུ་ཚོགས་པ་ཐོག་མ་དེ་ཆགས་ཡོད། ༸གོང་ས་མཆོག་གིས་ཚོགས་འདུའི་ཐོག་བཀའ་སློབ་སྩལ་དོན། ངོས་ཀྱི་སེམས་ནང་ང་ཚོས་སོ་སོའི་ཉེ་འཁོར་གྱི་མི་རྣམས་ལ་འཛུམ་མདངས་ཀྱི་རྣམ་པ་ཞིག་བསྐྲུན་ཐུབ་ཀྱི་རེད་བསམ་པ་དྲན་གྱི་འདུག ངོས་རང་དེ་རིང་ཉི་ཧོང་གི་མཁས་དབང་ཚོ་དང་ལྷན་བསམ་ཚུལ་བརྗེས་ལེན་བྱ་རྒྱུའི་གོ་སྐབས་ཐོབ་པ་འདིར་དགའ་ཚོར་ཆེན་པོ་བྱུང་། ཞེས་བཀའ་སྩལ། དེ་བཞིན་༸གོང་ས་མཆོག་གིས་ཚོགས་འདུ་དེ་དང་འབྲེལ་བའི་ཐོག་བཀའ་སློབ་སྩལ་དོན། ངོས་རང་ཕྱི་ལོ་ ༢༠༠༧ ལོར་ཉི་ཧོང་དུ་ཡོང་སྐབས་ཤར་ཕྱོགས་པའི་ཚན་རིག་པ་དང་མཁས་དབང་ཚོའི་ལྷན་དུ་བགྲོ་གླེང་བྱ་རྒྱུའི་འདུན་པ་ཡོད་སྐོར་བརྗོད་རྒྱུ་བྱུང་།གང་ཡིན་ཟེར་ན་ནང་ཆོས་དེ་ས་ཁུལ་དེ་ཚོའི་ནང་དར་ཁྱབ་ཆེན་པོ་བྱུང་ཡོད་ཅེས་བཀའ་སློབ་སྩལ། དེ་བཞིན་ཁོར་ཡུག་དང་འབྲེལ་བའི་གནད་དོན་ཐོག་བཀའ་སློབ་ཕེབས་དོན། ཁོར་ཡུག་གནད་དོན་དེ་རྒྱལ་ཁབ་ཀྱི་ས་མཚམས་ལས་བརྒལ་བའི་གནད་དོན་ཞིག་ཡིན། ང་ཚོར་ཡོད་པ་ནི་གོ་ལ་སྔོན་པོ་འདི་ཁོ་ན་ཡིན། དེར་བརྟེན་གོ་ལ་འདིའི་ནང་འཚོ་གནས་བྱེད་མཁན་མི་ཚང་མར་གོ་ལ་འདི་སྲུང་སྐྱོབ་བྱེད་དགོས་པའི་འགན་ཞིག་ཡོད། སྲོག་ཆགས་ཚང་མའི་ནང་ནས་མི་ནི་བརྡབ་དཀྲུག་མང་ཤོས་བཟོ་མཁན་དེ་ཡིན། འདས་པའི་ནོར་འཁྲུལ་གྱིས་ཉམས་མྱོང་གང་བྱུང་བ་དེ་དག་ནས་བློ་སྐྱེས་ལེན་དགོས་པའི་ང་ཚོར་འགན་ཞིག་ཡོད། ང་ཚོས་འཕྲུལ་ཆས་ཡར་རྒྱས་ཀྱིས་ཐོག་ནས་ཕྱི་དངོས་པོའི་གནས་སྟངས་ཚང་མའི་ཐོག་སྟངས་འཛིན་བྱེད་ཐུབ་བསམ་པའི་བཅོས་མའི་གདེང་སྤོབས་ཤིག་ཡོད། ཚོགས་ཁང་འདིའི་ནང་ཚ་གྲང་གི་ཁོར་ཡུག་ཇི་འདྲ་ཞིག་ཡོང་བ་ང་ཚོས་བཟོ་ཐུབ། འོན་ཀྱང་འཛམ་གླིང་ཁྱོན་ཡོངས་ཀྱི་ཁོར་ཡུག་ཚ་གྲང་དེའི་ཐོག་ང་ཚོས་སྟངས་འཛིན་མི་ཐུབ། ཞེས་སོགས་ཀྱི་བཀའ་སློབ་ཕེབས་ཡོད།
དེ་རྗེས་གཙུག་ལག་སློབ་དཔོན་སྐུ་ཞབས་ཤི་མི་ཛུས་༸གོང་ས་མཆོག་ལ་ང་ཚོ་གསོན་པོར་གནས་ཐུབ་པ་ཙམ་མིན་པར་མི་ཚེ་ཇི་འདྲ་ཞིག་གི་ཐོག་སྐྱེལ་དགོས་པའི་བཀའ་དྲིར་བཀའ་ལན་ཕེབས་དོན། དྲག་པོ་དང་འཚེ་བའི་ཐོག་ནས་ང་ཚོའི་དཀའ་ངལ་རྣམས་སེལ་ཐུབ་ཀྱི་མེད་པ་རྒྱལ་རབས་ལོ་རྒྱུས་ནས་དེང་སང་ར་འཕྲོད་ཐུབ་ཀྱི་ཡོད་པར་བརྟེན་ངོས་ཀྱིས་མ་འོངས་པར་བྱམས་བརྩེ་ལྡན་པའི་སྤྱི་ཚོགས་ཤིག་ཡོང་རྒྱུར་རེ་བ་བྱེད་བཞིན་ཡོད། ཅེས་བཀའ་སློབ་སྩལ། དེ་བཞིན་དེང་དུས་ཚན་རིག་དང་འབྲེལ་བའི་ཐོག་བཀའ་སློབ་སྩལ་དོན། དེང་དུས་ཚན་རིག་ཐོག་ནས་ནང་སེམས་རྒྱུད་ཡར་རྒྱས་གཏོང་དགོས་པ་གལ་ཆེར་ངོས་འཛིན་ཐུབ་ནས་དེར་དོ་སྣང་བྱེད་རྒྱུ་དེ་ཤུགས་ཆེ་རུ་འགྲོ་བཞིན་པ་འདི་ནི་མ་འོངས་པར་ཕྱི་དངོས་པོའི་ཡར་རྒྱས་དང་ནང་སེམས་ཀྱི་ཡར་རྒྱས་གཉིས་ཟུང་འབྲེལ་ཐོག་འགྲོ་ཐུབ་རྒྱུར་བློ་སྤོབས་སྐྱེས་དགོས་པའི་སྔོན་རྟགས་ཤིག་ཡིན། ཞེས་བཀའ་སློབ་སྩལ།
དེ་བཞིན་གཙུག་ལག་སློབ་དཔོན་ཏ་ས་ཀིས་དེང་དུས་ཚན་རིག་ཡར་རྒྱས་ཕྱིན་པའི་ཐོག་ནས་འཕྲུལ་ཆས་དེ་དག་གིས་ཆོས་ལ་མཐུན་འགྱུར་བྱེད་ཐུབ་པ་ཡོང་རྒྱུའི་བསམ་ཚུལ་དེར་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། ནང་ཆོས་ནས་གནས་ཚུལ་གང་རུང་ཞིག་རང་གིས་ཁས་མ་བླང་སྔོན་དུ་བརྟག་དཔྱད་ཞིབ་ཚགས་བྱེད་དགོས་པའི་ཚན་རིག་གི་གཞི་རྩའི་ལྟ་གྲུབ་དེ་ལག་བསྟར་བྱེད་བཞིན་ཡོད། ངོས་ཀྱིས་ཚན་རིག་པ་ཚོ་དང་བགྲོ་གླེང་བྱ་རྒྱུ་དེ་ནང་པའི་ཚན་རིག་གི་རྣམ་གཞག་དེ་ཡིན་པ་ལས་ནང་པའི་ལྟ་གྲུབ་དང་ཉམས་ལེན་གྱི་རྣམ་གཞག་དེ་མིན། ཚན་རིག་པ་ཚོ་དང་བགྲོ་གླེང་བྱས་ནས་ནང་པས་སྐྱེ་བ་ཕྱི་མ་ཡོད་པ་བསྒྲུབ་རྒྱུར་ཚན་རིག་གི་རྒྱབ་སྐྱོར་འཚོལ་བའི་དམིགས་ཡུལ་དེ་འདྲ་མིན་པར་ཁོང་ཚོ་དང་བགྲོ་གླེང་བྱས་ནས་འོད་རྡུལ་ཕྲ་མོའི་གྲུབ་དོན་གྱི་རྣམ་གཞག་དང་། ཀླད་པའི་རྣམ་གཞག དེ་བཞིན་སེམས་ཁམས་རིག་པའི་རྣམ་གཞག་སོགས་ཀྱི་གནད་དོན་ཐད་ཕན་ཚུན་བརྗེས་ལེན་དང་ཉམས་མྱོང་གི་གོ་རྟོག་སྤེལ་རེས་བྱེད་རྒྱུ་དེ་ཡིན། ཞེས་བཀའ་སློབ་སྩལ། དེ་མཚུངས་༸གོང་ས་མཆོག་གིས་གཞོན་སྐྱེས་ཚོར་བཀའ་སློབ་ཕེབས་དོན། གཞོན་སྐྱེས་ཚོས་དེང་སང་འཛམ་གླིང་གི་དཀའ་ངལ་རྣམས་གསལ་པོར་ཤེས་པ་བྱས་ཏེ་དེར་ཞུམ་པ་མེད་པའི་ཐོག་གདོང་ལེན་བྱེད་དགོས། གཞོན་སྐྱེས་ཚོ་གཉིད་ལས་ལྡང་ནས་མི་ཚེ་དོན་དང་ལྡན་པ་ཞིག་ཡོང་བ་བྱེད་དགོས་པའི་བཀའ་སློབ་སྩལ་ཡོད། ཐེངས་འདིའི་ཚོགས་འདུ་དེ་གོ་སྒྲིག་གནང་མཁན་ཉི་ཧོང་བོད་ཁང་དང་། ཤིན་ཀོ་ཀུ་ནང་པའི་མཐུན་ཚོགས། དེ་བཞིན་ཨོ་ཀི་ན་བའི་བྱང་ཆུབ་ཆེན་པོའི་ཆོས་ཚོགས་བཅས་ཡིན་འདུག སང་ཉིན་༸གོང་ས་མཆོག་གྲོང་ཁྱེར་ཏ་ཀ་མ་སུའི་ནང་ཆིབས་སྒྱུར་བསྐྱང་འཆར་ཡོད་པ་བཅས་ཀྱི་གནས་བསྡུས་སུ།
