༢༠༠༩ ཕྱི་ཟླ་ ༡༡ ཚེས་ ༡༢ རེས་གཟའ་ཕུར་བུ།
༄༅། །ཕྱི་ལོ་ ༢༠༠༩ ཟླ་ ༡༡ ཚེས་ ༡༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མོན་རྟ་དབང་ཁུལ་གྱི་ཆོས་འབྲེལ་གྱི་ཉིན་གཉིས་པའི་གསུང་ཆོས་བཀའ་དྲིན་ཆེ་བ་སྩོལ་སྐབས་འབྲུག་ནས་བཅར་བའི་དད་ལྡན་ཆོས་ཞུ་བ་རྣམས་ལ་དམིགས་བསལ་བཀའ་ཕེབས་པའི་ནང་། ཕྱི་དངོས་པོ་ཡར་རྒྱས་འགྲོ་བ་དང་བསྟུན་བཤད་སྒྲུབ་
གཉིས་ལྡན་གྱི་ནང་པ་ཞིག་ཡོང་ཐབས་བྱེད་དགོས་པའི་ལམ་སྟོན་སྩལ་བ་མ་ཟད། ཕྱེད་ཡོལ་སྤྱན་རས་གཟིགས་ཐུགས་རྗེ་ཆེན་པོའི་བཀའ་དབང་བཀའ་དྲིན་སྩོལ་གནང་སྐབས་ཆོས་ཞུར་མི་གྲངས་ ༤༠༠༠༠ བརྒལ་བ་བཅར་ཡོད་པ་རྣམས་ལ་ཐོག་མར་རྟེན་འབྲེལ་བསྟོད་པའི་འཕྲོ་སྐྱོང་དབུ་འཛུགས་མ་མཛད་གོང་དགེ་སྡིག་སྤང་བླང་གི་ལམ་སྟོན་
བཀའ་དྲིན་སྩལ་དོན། དེ་ལྟར་སྡིག་སྤོང་དགེ་སྒྲུབ་བྱེད་རྒྱུ་དེ་མངོན་མཐོ་བསྒྲུབ་རྒྱུའི་ཐབས་ཆགས་ཀྱི་ཡོད། དེ་ཕལ་ཆེར་འཛམ་གླིང་གི་ཆོས་ལུགས་གཙོ་ཆེ་བ་ཐུན་མོང་བ་རེད། དེ་ནས་རང་གི་སེམས་ནི་ཡོངས་སུ་འདུལ་གསུངས་ཡོད་པ་དེས་སྡིག་པ་སྤོང་དགེ་བ་སྒྲུབ་ཟེར་རྒྱུ་དེ་ཁྲིམས་བཅད་པ་ལྟ་བུ་ཞིག་མ་རེད། སེམས་ནས་དང་དུ་བླང་སྟེ་སྡིག་པ་སྤོང་རྒྱུ་དང་དགེ་བ་བསྒྲུབ་རྒྱུ་ཞིག་དགོས་ཀྱི་ཡོད། དེ་འདྲ་ཡིན་དུས་སེམས་ནས་སྡིག་པ་ལ་ཉེས་དམིགས་སུ་མཐོང་བ་དང་དགེ་བར་ཡོན་ཏན་མཐོང་བ་ཞིག་དགོས་ཀྱི་ཡོད། དེ་ཡོང་བར་སེམས་ང་རྒྱལ། ཕྲག་དོག ཞེ་སྡང་། འཇིགས་སྣང་དེ་འདྲའི་འོག་བསྡད་པ་ཡིན་ན། སྡིག་པ་ཕལ་ཆེར་ངང་ནས་ཡོང་གི་ཡོད། ཞེ་སྡང་དང་ཕྲག་དོག་ཆེན་པོ་སྐྱེས་ཡོང་བ་ཡིན་ན། གཞན་ལ་གནོད་པ་བྱེད་རྒྱུ་རང་ཤུགས་ཀྱི་ཡོང་གི་ཡོད། གཞན་ལ་བརྩེ་བའི་བསམ་བློ་དང་གཞན་ལ་ཕན་ཐོགས་བྱེད་རྒྱུའི་བློ་ཞིག་ཡོད་པ་ཡིན་ན། གཞན་ལ་ཕན་པ་བསྒྲུབ་རྒྱུ་ཞིག་རང་བཞིན་ཡོང་གི་རེད། བྱས་ཙང་དེ་འདྲ་ཡིན་དུས་སྡིག་པ་སྤོང་དགེ་བསྒྲུབ་ཟེར་རྒྱུ་དེ་རྩ་བ་ཐུག་ས་དེ་རང་གི་སེམས་འདུལ་དགོས་ཀྱི་ཡོད་པ་རེད། མ་འདུལ་བའི་དབང་གིས་སྡིག་པ་བསགས་ཀྱི་ཡོད། འདུལ་བའི་དབང་གིས་དགེ་བ་བསགས་ཀྱི་ཡོད་པ་རེད། དེ་ལྟར་སེམས་མ་འདུལ་བར་འདུལ་བར་བྱེད་རྒྱུ་དང་། འདུལ་བ་དེ་གོང་ནས་གོང་དུ་སྤེལ་རྒྱུ་ཞེས་པ་དེ་སངས་རྒྱས་པའི་ཆོས་ཀྱི་ཕལ་ཆེར་ཁྱད་ཆོས་རེད་ཅེས་བརྗོད་ཆོག་གི་རེད། ཅེས་བཀའ་སློབ་སྩལ་ཡོད། ཡང་༸གོང་ས་མཆོག་གིས་སངས་རྒྱས་ཀྱི་བསྟན་པ་དར་བ་ལ་རང་གི་སྒོ་གསུམ་གྱི་ཉེས་སྤྱོད་འདོམས་དགོས་པ་དང་དཀར་པོ་དགེ་བའི་ལས་ལ་བརྩོན་ཏེ་སེམས་འདུལ་ཐབས་བྱེད་དགོས་སྐོར་བཀའ་སློབ་ཕེབས་དོན། བསྟན་པ་རྒྱས་ཟེར་རྒྱུ་དེ་གཙོ་བོ་ང་ཚོའི་སེམས་རྒྱུད་ཀྱི་སྟེང་ནས་ཡོང་དགོས་པ་ཞིག་རེད་མ་གཏོགས་ཕྱི་ལ་གཙུག་ལག་ཁང་ཡོད་པ་ཙམ་གྱི་སངས་རྒྱས་ཀྱི་བསྟན་པ་རྒྱས་པ་ཟེར་གྱི་མ་རེད། སངས་རྒྱས་ཀྱི་བསྟན་པ་ཟེར་བ་དེ་སེམས་ཀྱི་ཡོན་ཏན་ཞིག་ཡིན། ལུང་གྱི་ཡོན་ཏན་དང་རྟོགས་པའི་ཡོན་ཏན་ཞེས་སྐབས་སེམས་ཀྱི་ཡོན་ཏན་ཞིག་ཆགས་ཡོད།
དེ་འདྲ་ཡིན་དུས་ང་ཚོའི་སེམས་རྒྱུད་ལ་ཐོས་པ་རྒྱ་ཆེན་པོ་ཞིག་བཙལ་ནས་ལུང་གི་ཡོན་ཏན་གྱི་ཕྱུག་པ་ཞིག་དང་ཐོས་བརྩོན་སྒྲུབ་ལ་གཞོལ་ཏེ་སྒྲུབ་པ་ཉམས་ལེན་གྱི་ཐོག་ནས་རྟོགས་པའི་ཡོན་ཏན་ཞིག་བཅས་དེ་འདྲ་བྱུང་བ་ཡིན་ན། སངས་རྒྱས་ཀྱི་བསྟན་པ་རྒྱས་པ་ཞེས་བརྗོད་ཀྱི་ཡོད། ང་ཚོ་ཡིན་ཡང་བསྟན་པ་དང་མཇལ་ཟེར་རྒྱུའི་གོ་བ་ངོ་མ་དེ་རང་གི་སེམས་རྒྱུད་ལ་ལུང་རྟོགས་ཀྱི་བསྟན་པའི་བག་ཆགས་བཞག་སྟེ་ལུང་རྟོགས་ཀྱི་བསྟན་པའི་ཡོན་ཏན་ང་ཚོའི་རྒྱུད་ལ་ཆུང་ངུ་ནས་སྐྱེས་ཐུབ་པ་ཞིག་བྱུང་ན། དངོས་གནས་སངས་རྒྱས་བསྟན་པ་མཇལ་བ་ཞེས་པའི་དེ་ཡིན། དེ་མིན་ཆོས་ཡོད་སའི་ལུང་པ་ཞིག་སྐྱེས་པ་ཙམ་གྱིས། དཔེར་ན། རྟ་དབང་ཁུལ་དུ་ཡོད་པའི་བྱ་བྱིའུ་དེ་ཚོའི་གྲས་ཆོས་དར་སའི་ཡུལ་དུ་སྐྱེས་ཡོོད་ཀྱང་ཆོས་གང་ཡང་ཤེས་ཀྱི་མེད།
དེ་བཞིན་དུ་ཆོས་དད་མེད་མཁན་གྱི་མི་ས་ཆ་ཆོས་དར་སའི་ཡུལ་དུ་ཡོད་ནའང་སེམས་ནང་ཆོས་ལ་དད་པ་དང་ཤེས་རབ་མེད་ན། བསྟན་པ་མཇལ་རྒྱུ་ཞིག་མི་འདུག དེ་འདྲ་ཡིན་དུས་བསྟན་པ་མཇལ་ཞེས་པ་དེ་གཙོ་བོ་རང་གི་སེམས་རྒྱུད་ལ་དད་པ་དང་ཤེས་རབ་ཀྱི་ཡོན་ཏན་དེ་དག་སྐྱེས་ཐབས་བྱེད་རྒྱུ་གལ་ཆེན་པོ་རེད། ཅེས་བཀའ་སློབ་སྩལ་ཡོད། ཐེངས་འདིར་མོན་རྟ་དབང་དུ་༸གོང་ས་མཆོག་གིས་ཆོས་འབྲེལ་སྐབས་འབྲུག་ཁུལ་ནས་ཆོས་ཞུ་བ་སྟོང་ཕྲག་ཁ་ཤས་ཕེབས་ཡོད་པ་རྣམས་ལ་ཆེད་དུ་དམིགས་ཏེ་ཕྱི་དངོས་པ་ཡར་རྒྱས་དང་སྦྲགས་སངས་རྒྱས་པའི་ཆོས་དེ་བཤད་སྒྲུབ་གཉིས་ལྡན་གྱི་སྒོ་ནས་དར་སྤེལ་ཡོང་ཐབས་སྐོར་ལ་བཀའ་སློབ་ཕེབས་དོན། འབྲུག་རྒྱལ་ཁབ་དེ་ཡང་ཆོས་ལྡན་རྒྱལ་ཁབ་རེད། སངས་རྒྱས་ཀྱི་བསྟན་པ་དར་ཁྱབ་ཆེན་པོ་ཡོད་པ་ཞིག་རེད་འདུག ཕྱི་དངོས་པོའི་འཛུགས་སྐྲུན་ཡར་རྒྱས་མྱུར་པོ་འགྲོ་གི་ཡོད་པ་རེད། དེ་དང་མཉམ་དུ་སངས་རྒྱས་པའི་ཆོས་ཚུལ་གཅིག ལྷག་པར་འབྲུག་པ་བཀའ་བརྒྱུད་ཀྱི་བསྟན་པ་བཀའ་རྙིང་ཟུང་འཇུག་ལྟ་བུ་གསུངས་ཀྱི་ཡོད་པ་རེད། དེ་ལྟ་བུའི་ཆོས་ཚུལ་བཤད་སྒྲུབ་ཟུང་འབྲེལ་ཐོག་ནས་དར་སྤེལ་འགྲོ་རྒྱུའི་ཐོག་འབད་བརྩོན་གནང་ཐུབ་ན་དངོས་གནས་ཡག་པོ་ཡོང་གི་རེད། ཕྱི་དངོས་པ་ཡར་རྒྱས་ཡོད་པ། ནང་བསམ་བློར་བདེ་སྐྱིད་ཡོད་པ་སོགས་ཡག་པོ་ཡོང་གི་རེད། ཅེས་ཀྱི་ཆོས་འབྲེལ་བཀའ་ཆོས་གྲུབ་བསྟུན་རྟེན་འབྲེལ་བསྟོད་པའི་འཕྲོ་སྐྱོང་མུ་མཐུད་དབུ་འཛུགས་མཛད་ཡོད་པ་བཅས་ཀྱི་གནས་བསྡུས་སུ།
