༢༠༠༩ ཕྱི་ཟླ་ ༡༡ ཚེས་ ༢༣ རེས་གཟའ་ཟླ་བ།
༄༅། །ཕྱི་ལོ་ ༢༠༠༩ ཟླ་ ༡༡ ཚེས་ ༡༩ ནས་ ༢༡ ཝར་ཎ་མཐོ་སློབ་གཙུག་ལག་སློབ་གཉེར་ཁང་དང་ལྡི་ལི་མཐོ་སློབ་གཙུག་ལག་སློབ་གཉེར་ཁང་གཉིས་ཀྱིས་ཐུན་མོང་ཐོག་གོ་སྒྲིག་བྱས་པའི་བོད་ཀྱི་རིག་གཞུང་དང་ལོ་རྒྱུས་སྐོར་རྒྱལ་སྤྱིའི་ལྷན་ཚོགས་ཤིག་ལྡི་ལི་མཐོ་སློབ་གཙུག་ལག་སློབ་གཉེར་ཁང་དུ་ཚོགས་པའི་ཐོག་རྒྱལ་ཁབ་འདྲ་མིན་ཁག་བཅུ་བཞི་ནས་མཁས་དབང་གྲངས་བཞི་བཅུ་ཞེ་གསུམ་འདུ་འཛོམས་ཐོག་བོད་ཀྱི་རྒྱལ་རབས་ལོ་རྒྱུས་དང་རིག་གཞུང་འཚོལ་ཞིབ་ཆེད་དུ་རྒྱལ་སྤྱིའི་ལྷན་ཚོགས་ཤིག་སྐོང་ཚོགས་གནང་ཡོད། ཕྱི་ཚེས་ ༢༡ ཉིན་ལྷན་ཚོགས་མཇུག་བསྡོམས་ཀྱི་མཛད་སྒོའི་སྐུ་མགྲོན་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གདན་ཞུའི་གསོལ་འདེབས་ཞུས་པ་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་ལྷན་ཚོགས་ལ་ཆིབས་སྒྱུར་བཀའ་དྲིན་བསྐྱངས་ཡོད།
སྐབས་དེར་ལྡི་ལི་ཐོ་སློབ་ཀྱི་དབུ་འཛིན་གཞོན་པ་སློབ་དཔོན་དྷི་པག་པེན་ཌལ་མཆོག་དང་ཨ་རི་ནས་ཕེབས་པའི་སློབ་དཔོན་ཨི་ལོ་མཆོག་ཇར་མན་ནས་ཕེབས་པའི་སློབ་དཔོན་ཤའོ་མཆོག་སོགས་ཚོགས་ཞུགས་གནང་ཡོད་པའི་ཚོགས་མགོན་དུ་༸གོང་ས་མཆོག་༸ཞབས་སོར་འཁོད་རྗེས་ལྡི་ལི་མཐོ་སློབ་ཀྱི་དབུ་འཛིན་གཞོན་པས་མགོན་པོ་གང་ཉིད་མཆོག་ལ་གུས་བསུའི་འཚམས་འདྲི་དང་ངོ་སྤྲོད་གསུང་བཤད་གནང་ཡོད། དེ་རྗེས་༸གོང་ས་མཆོག་གིས་བཀའ་སློབ་ཕེབས་དོན། དེ་རིང་འདིར་རྒྱལ་སྤྱིའི་རང་བཞིན་ལྡན་པའི་མཁས་པའི་ཚོགས་འདུ་ཚོགས་ཏེ་བོད་ཀྱི་འདས་པའི་ལོ་རྒྱུས་ཐོག་དང་དེ་བཞིན་ཆོས་དང་རིག་གཞུང་སྤྱི་ཚོགས་ཀྱི་གནས་སྟངས་སོགས་གང་ཅིའི་ཐོག་ལ་མཁས་དབང་མང་པོ་ཞིག་འཛོམས་ཏེ་གོ་བསྡུར་བྱེད་རྒྱུ་བྱུང་བ་རེད། ཅེས་སོགས་ཀྱི་བཀའ་སློབ་སྩལ་ཡོད། ཡང་༸གོང་ས་མཆོག་གིས་བོད་རིགས་ཀྱི་མཐོ་སློབ་སློབ་ཕྲུག་རྣམས་ལ་དམིགས་བསལ་བཀའ་སློབ་ཕེབས་དོན། ང་ཚོ་བོད་པའི་ཕྲུ་གུ་ཚོས་དེ་རིང་ཁ་སང་འདས་པའི་ལོ་ལྔ་བཅུ་ལྷག་ཙམ་རིང་ལ་ང་ཚོ་ཚང་མས་ཤེས་ཡོན་ཐོག་ལ་བློ་སེམས་སྒྲིལ་ཏེ་ཤུགས་བརྒྱབ་པ་རེད། ལོ་ལྔ་བཅུ་ཕྱིན་པའི་རྗེས་ལ་གང་ལ་གང་ཙམ་གྱི་གྲུབ་འབྲས་ཐོན་ཡོད། ད་དུང་ཡང་ང་ཚོ་ཆོག་ཤེས་བྱས་ནས་སྡོད་རྒྱུ་རྩ་བ་ཉིད་ནས་རེད་མི་འདུག མུ་མཐུད་ནས་སློབ་སྦྱོང་ཐོག་ལ་ཤུགས་རྒྱག་རྒྱུ་དང་རིག་པ་སྒྲིམ་དགོས་རྒྱུ་དེ་ཧ་ཅང་གལ་ཆེན་པོ་རེད།
སློབ་སྦྱོང་ཐོག་ནས་ངོས་ཀྱིས་རྒྱུན་དུ་འབོད་སྐུལ་བྱེད་ཀྱི་ཡོད། ང་ཚོས་དངོས་གནས་ལས་རིགས་འདྲ་མིན་ནང་ལ་སོ་སོས་རིགས་གཅིག་རྐང་འཛིན་གྱི་འགན་ལེན་བྱེད་ཐུབ་རྒྱུ་དེ་འདྲའི་སློབ་སྦྱོང་མཐར་ཕྱིན་པ་ཐོན་ཐུབ་པ་བྱ་རྒྱུ་དེ་གལ་ཆེན་པོ་ཡིན། ཞེས་བཀའ་སློབ་སྩལ་ཡོད། ཡང་༸གོང་ས་མཆོག་གིས་བོད་ནང་གི་རྒྱ་ཆེའི་བོད་མི་རྣམས་ལ་སྙིང་སྟོབས་དང་སེམས་ཤུགས་ཡོད་ཀྱང་རང་དབང་གི་གོ་སྐབས་མེད་པ་དང་འདི་གར་རང་དབང་གི་གོ་སྐབས་ཡོད་པའི་སྐོར་ལ་བཀའ་སློབ་ཕེབས་དོན། བོད་ནང་ཡོད་པའི་རྒྱ་ཆེའི་མི་མང་དེ་དག་ཧ་ལས་པའི་སྙིང་སྟོབས་དང་སེམས་ཤུགས་ཆེན་པོ་ཡོད་པ་ཚང་མས་ཤེས་གསལ་རེད། འོན་ཀྱང་རང་དབང་ལྡན་པའི་གོ་སྐབས་ཡོད་པ་མ་རེད། ང་ཚོ་འདི་གར་རང་དབང་ལུང་པའི་ནང་ལ་རང་དབང་གི་གོ་སྐབས་ཡོད། སོ་སོས་སྒྱིད་ལུག་ངན་པ་བྱས། རྣམ་གཡེང་དང་གཞན་དབང་དུ་བཏང་། ཡང་ན་དོན་དག་ཆུང་ཚགས་ལ་མགོ་འཁོར་ནས་བསྡད་པ་ཡིན་ན་ཐབས་སྐྱོ་པོ་རེད། གཞན་ང་ཚོར་གོ་སྐབས་ཧ་ལས་པའི་ཡག་པོ་ཡོད། རྩ་ཆེན་གོ་སྐབས་དེ་འདྲ་ཡོད་དུས་ཉིན་གཅིག་ཡིན་ཡང་འཕྲོ་བརླག་མ་ཕྱིན་པ་བྱས་ཏེ་སོ་སོའི་ཤེས་ཡོན་ཐོག་སྦྱང་བརྩོན་དང་དོ་སྣང་བྱེད་རྒྱུ་ཧ་ཅང་གལ་ཆེན་པོ་རེད། ཁྱེད་རང་གཞོན་སྐྱེས་ཚོས་ད་ལྟ་བར་དུ་ཧུར་ཐག་བྱེད་ཀྱི་ཡོད་པ་རེད་ལ་ད་དུང་ཡིན་ཡང་ཚང་མས་ཤུགས་བརྒྱབ་ནས་ཧུར་སྐྱེད་བྱེད་རོགས་ཞེས་འབོད་སྐུལ་བྱེད་རྒྱུ་གཅིག་ཡིན། ཞེས་བཀའ་སློབ་སྩལ་ཡོད། ལྷག་པར་༸གོང་ས་མཆོག་གིས་དེང་དུས་ཀྱི་ཤེས་ཡོན་ཡོད་པའི་ཐོག་བོད་ལ་རང་ཉིད་ཀྱི་ཕ་མེས་ནས་ཡོད་པའི་སྤྱི་ནོར་དེ་དག་ངོ་ཤེས་དགོས་རྒྱུ་སྐོར་བཀའ་སློབ་ཕེབས་དོན། དེང་དུས་ཀྱི་ཤེས་ཡོན་སློབ་སྦྱོང་བྱས་པ་དང་ཆབས་ཅིག་ང་ཚོ་བོད་རང་ཉིད་ལ་ཕ་མེས་ནས་གསོག་སྒྲུབ་བྱས་པའི་སྤྱི་ནོར་ཡོད་པ་དེ་དག་ངོ་ཤེས་པ་བྱས་ཏེ་བདག་པོ་རྒྱག་ཐུབ་པ་བྱ་རྒྱུ་གལ་ཆེན་པོ་རེད། དེ་མ་བྱུང་ན་གང་ལྟར་དེང་དུས་ཀྱི་ཤེས་ཡོན་དང་བོད་རང་ཉིད་ལ་གནའ་རབས་ནས་ཡོད་པའི་སངས་རྒྱས་ཀྱི་ཆོས་དང་འབྲེལ་བའི་ལྟ་གྲུབ་གཉིས་ཟུང་དུ་འབྲེལ་ཐུབ་པ་བྱུང་ན་སོ་སོ་རང་ཉིད་ཡིན་ཡང་མི་ཚེ་སྐྱིད་པ། ཁ་ཆག་སྣ་རལ་འདྲ་མིན་ཡོང་བའི་སྐབས་ཏན་ཏན་སེམས་ནང་ལ་སྤོབས་པ་དང་སྙིང་སྟོབས་ཤིག་ཡོད་པ་ཡིན་ན་ཏན་ཏན་བཟོད་བསྲན་བྱ་རྒྱུའི་ནུས་པ་ཆེ་བ་ཡོད། དཀའ་ངལ་གདོང་ལེན་བྱ་རྒྱུའང་ནུས་པ་ཆེ་བ་ཡོད་པ་རེད། དེ་འདྲ་ཡིན་དུས་སོ་སོ་རང་ཉིད་སེམས་སྐྱིད་པ་མི་ཚེ་དོན་དང་ལྡན་པ། རང་སྐྱིད་པ་རོགས་པ་བདེ་བ། ཚེ་སྔ་ཕྱི་ཁས་བླང་པ་ཡིན་ན་ཚེ་འདི་བདེ་བ་ཐོབ་པ། དེ་འདྲ་ཡིན་དུས་ཁྱེད་རང་ཚོས་དེ་ལ་དོ་སྣང་མང་ཙམ་ཞིག་བྱེད་རོགས་ཟེར་རྒྱུ་ཡིན་ཞེས་བཀའ་སློབ་ཟབ་མོ་སྩལ་ཡོད།
