༢༠༠༩ ཕྱི་ཟླ་ ༡༡ ཚེས་ ༧ རེས་གཟའ་སྤེན་པ།
༄༅། །ཕྱི་ལོ་ ༢༠༠༩ ཟླ་ ༡༡ ཚེས་ ༤ ཉིན་གྱི་སྔ་དྲོ་༸གོང་ས་མཆོག་མ་ཏ་སུ་ཡ་མའི་ (Matsuyama`s Shiki Memorial Hall) ཤི་ཀིའི་དྲན་རྟེན་ཚོགས་ཁང་དུ་ཉི་ཧོང་གི་དགེ་འདུན་པ་སྟོང་ཕྲག་གཅིག་ཙམ་འདུ་འཛོམས་བྱུང་བ་དེར་ཇི་ལྟར་གསོལ་འདེབས་ཞུས་པ་བཞིན་མགོན་པོ་གང་ཉིད་༸ཞབས་སོར་བཀའ་དྲིན་ཆེ་བ་འཁོད་ཡོད། སྐབས་དེར་༸གོང་ས་མཆོག་གིས་དགེ་འདུན་པ་ཚོར་ཐོས་བསམ་སློབ་གཉེར་རྒྱ་ཆེ་གནང་དགོས་པའི་ཐོག་རྟོག་ཞིབ་མང་ཙམ་གནང་དགོས་སྐོར་བཀའ་སྩལ་དོན། སྡུག་བསྔལ་ཐམས་ཅད་ཀྱི་རྩ་བ་རྨོངས་པ་མ་རིག་པ་དེ་ཡིན། དད་པ་ཙམ་གྱིས་མ་རིག་པ་སེལ་མི་ཐུབ། སྒོམ་སྒྲུབ་ལས་བྱུང་བའི་ཤེས་རབ་དང་རྣམ་དཔྱོད་ཀྱིས་རྨོངས་པ་མ་རིག་པ་དེ་སེལ་ཐུབ་ཅེས་སོགས་ཀྱི་བཀའ་སློབ་སྩལ།
ཉིན་རྒྱབ་༸གོང་ས་མཆོག་ཉི་ཧོང་གི་གྲོང་ཁྱེར་ནཱ་ཧ་ (Naha) ཞེས་པའི་ནང་ཨོ་ཀི་ན་བའི་ཞི་བདེའི་དྲན་རྟེན་སྐྱེད་ཚལ་ (Okinawa Peace Memorial Park) དུ་ཇི་ལྟར་གསོལ་འདེབས་ཞུས་པ་བཞིན་ཆིབས་སྒྱུར་བསྐྱངས་ཏེ་ཉི་ཧོང་གི་ཡེ་ཤུའི་ཆོས་པ་ཁག་གཅིག་དང་མཇལ་འཕྲད་མཛད། སྐྱེད་མོས་ཚལ་དེའི་ནང་ཡོད་པའི་ཨོ་ཀི་ན་བའི་བྱང་ཆུབ་ཆེན་པོའི་ལྡུུམ་རྭ་ (Okinawa Mahabhodi Garden) ཞེས་པ་དེ་ཕྱི་ལོ་ ༡༩༤༥ ལོར་འཛམ་གླིང་དམག་ཆེན་གཉིས་པའི་སྐབས་ཁུལ་དེར་གནས་པའི་ཉི་ཧོང་མི་མང་ ༡༥༠༠༠༠ ཙམ་རྐྱེན་འདས་སོང་བ་རྣམས་ཀྱི་དྲན་རྟེན་ཆེད་དུ་བསྐྲུན་པ་ཞིག་རེད། སྐབས་དེར་༸གོང་ས་མཆོག་གིས་ཡེ་ཤུའི་ཆོས་དཔོན་ཚོ་དང་ལྷན་ས་གནས་དེར་ཐུགས་སྨོན་མཛད་པ་དང་སྦྲགས་ཤིང་སྣ་འདེབས་འཛུགས་ཀྱང་མཛད་ཡོད། དེ་རྗེས་གསར་འགོད་པ་ཚོར་བཀའ་སྩལ་དོན། ང་ཚོས་རང་གི་སྲོག་ལ་གཅེས་པོ་ཡོད་པ་བཞིན་དམག་ཐོག་ཏུ་རྐྱེན་འདས་སོང་བ་ཚོས་ཀྱང་དེ་བཞིན་གཅེས་པོ་ཡོད་པ་དེ་དྲན་དགོས། ཡ་ང་སྙིང་རྗེ་མེད་པའི་མི་གསོད་ཁྲག་སྦྱོར་གྱི་བྱ་སྤྱོད་དེས་ང་ཚོར་དམག་འཐབ་ལ་སྙིང་པོ་མེད་པའི་དྲན་བསྐུལ་གཏོང་ཐུབ་པ་ཞིག་དགོས། དཀའ་ངལ་མེད་པའི་འཛམ་གླིང་ཞིག་ཡོང་བར་ཡིད་སྨོན་ཙམ་བྱས་ནས་བསྡད་པ་དེ་དངོས་ཡོད་གནས་ཚུལ་དང་མི་མཐུན་པ་ཞིག་རེད། ང་ཚོས་འདས་པའི་མྱོང་ཚོར་བློ་ཕམ་ཅན་དེ་དག་ནས་བློ་སྐྱེས་ལེན་པའི་ཐོག་དཀའ་ངལ་རྣམས་གྲོས་མོལ་གྱི་ལམ་ནས་སེལ་ཐབས་བྱེད་དགོས། ངོས་རང་སྐྱེད་མོས་ཚལ་འདིེར་སྨོན་ལམ་རྒྱག་སྐབས་བྱིའུ་སྐད་ཅིག་ཐོས་པ་དེ་ངོས་རང་ལྷ་ས་དང་རྒྱ་གར་ནང་བྱིའུ་སྐད་དེ་རང་ཐོས་མྱོང་བ་དྲན་བྱུང་། བྱིའུ་དེ་ང་ཚོ་ཚང་མར་སྣང་ཚུལ་གཅིག་པ་ཡོད་པ་བཞིན་ང་ཚོ་ཕན་ཚུན་གུས་བརྩི་དང་། ནང་གི་ཞི་བདེ་བསྐྲུན་རྒྱུར་རྣམ་དཔྱོད་ཀྱི་ནུས་པ་དེ་འགྲོ་བ་མི་སྤྱི་ཡོངས་ལ་གཅིག་མཚུངས་སུ་ཡོད་པ་མཚོན་ཐུབ། ང་ཚོ་ཚང་མར་ཕན་ཚུན་སེམས་ཐག་ཉེ་པོའི་ཐོག་མཛའ་བརྩེའི་འབྲེལ་ལམ་ཡང་དག་པ་ཞིག་བསྐྲུན་རྒྱུའི་ནུས་པ་ཡོད་ཅེས་བཀའ་སྩལ། དེ་བཞིན་གསར་འགོད་པ་ཁག་གཅིག་གིས་ཨ་རིའི་སྲིད་འཛིན་ཨོ་བྷ་མ་དང་འབྲེལ་བའི་ཐོག་དྲི་བ་ཕུལ་བར་བཀའ་ལན་སྩལ་སྐབས་མགོན་པོ་གང་ཉིད་སྲིད་འཛིན་ཨོ་བྷ་མས་རྡུལ་ཕྲན་མཚོན་ཆ་འགོག་ཐབས་མཛད་པ་དེར་མཐའ་གཅིག་ཏུ་རྒྱབ་སྐྱོར་ཡོད་སྐོར་དང་སྦྲགས་བཀའ་སྩལ་དོན། རྡུལ་ཕྲན་གྱི་གོ་ལག་མེད་པ་བཟོ་རྒྱུ་དེ་གོམ་པ་དང་པོ་རེད། དེ་ལྟར་ལག་ལེན་འཁེལ་བ་ཞིག་ང་ཚོའི་མི་ཚེའི་ནང་ཡོང་མ་ཐུབ་ནའང་མི་རབས་རྗེས་མ་ཚོས་འཛམ་གླིང་ཁྱོན་ཡོངས་ལ་རྡུལ་ཕྲན་གོ་ལག་མེད་པ་བཟོ་རྒྱུའི་བྱ་སྤྱོད་དེ་རྒྱུན་འཁྱོངས་ཡོང་རྒྱུར་འཆར་གཞི་ཞིག་སྤེལ་ཐུབ་པར་ཕན་གྲོགས་ཡོང་ངེས་ཡིན། ཞེས་བཀའ་སྩལ་ཡོད་པའི་གནས་བསྡུས་སུ།
