༢༠༠༩ ཕྱི་ཟླ་ ༡༡ ཚེས་ ༧ རེས་གཟའ་སྤེན་པ།
༄༅། །ཕྱི་ལོ་ ༢༠༠༩ ཟླ་ ༡༡ ཚེས་ ༦ ཉིན་གྱི་སྔ་དྲོ་༸གོང་ས་མཆོག་ནས་ཉི་ཧོང་གི་ཨོ་ཀི་ན་འི་ཁུལ་དུ་བསྐྱངས་པའི་མཛད་འཕྲིན་གྱི་མཐའ་མར་ཉི་ཧོང་དང་ཕྱི་རྒྱལ་གྱི་གསར་འགོད་པ་ཁག་གཅིག་གིས་དྲི་བར་བཀའ་ལན་སྩལ་དོན། བོད་ཀྱི་གནད་དོན་དེ་རྒྱ་གཞུང་ནས་བཤད་པ་ལྟར་༸གོང་ས་མཆོག་གི་སྐུ་སྒེར་གྱི་གནད་དོན་ཞིག་མིན་པར་བོད་མི་ས་ཡ་དྲུག་གི་གནད་དོན་ཞིག་ཡིན་སྐོར་སླར་ཡང་བཀའ་སྩལ་ཡོད་པའི་སྐོར་ཉི་ཧོང་སྐུ་ཚབ་དོན་ཁང་གི་དྲུང་གཞོན་ཚེ་དབང་རྒྱལ་པོ་ལགས་ཀྱིས་གསུང་སྒྱུར་ཞུས་པའི་ནང་འཁོད་ཡོད། དེ་ཡང་བོད་ཀྱི་དཀའ་རྙོག་དེ་རྒྱ་གཞུང་ནས་༸གོང་ས་མཆོག་དང་རྒྱ་ནག་སྲིད་གཞུང་དབར་གྱི་དཀའ་ངལ་ཞིག་ཡིན་པར་འགྲེལ་བརྗོད་བྱེད་ཀྱི་འདུག་པ་དེ་ནི་ནོར་བ་ཞིག་ཡིན། དེའི་དཀའ་ངལ་ནི་བོད་ནང་ཡོད་པའི་བོད་མི་རྣམས་ཀྱི་བདེ་སྡུག་དང་རང་དབང་གི་དཀའ་ངལ་ཞིག་ཆགས་ཡོད། དེ་འདྲ་ཞིག་ལ་བསམ་བློ་བཏང་ནས་གྲོས་མོལ་མ་བྱས་པར་༸གོང་ས་མཆོག་གི་ཐོབ་ཐང་གཅིག་པུའི་ཐོག་སྐད་ཆ་བྱས་པ་ཡིན་ན་གཞི་རྩ་ཡོད་པ་ཞིག་ཆགས་ཀྱི་མི་འདུག ཅེས་བཀའ་ལན་ཕེབས་པ་དང་ཆབས་ཅིག་སྔ་ལོ་ཕྱི་ཟླ་ ༡༡ ནང་༸གོང་ས་མཆོག་གི་སྐུ་ཚབ་རྣམས་ནས་རྒྱ་གཞུང་དབར་འབྲེལ་མོལ་བྱས་ཡོད་ཀྱང་དེ་དག་ལ་རྒྱ་གཞུང་ནས་ཡ་ལན་ཡག་པོ་ཞིག་བྱས་མི་འདུག
རྒྱ་གཞུང་ནས་བཟང་ཕྱོགས་རྣམ་པ་ཞིག་བསྟན་ཐུབ་པ་ཡིན་ན་མགོན་པོ་གང་ཉིད་དང་བཙན་བྱོལ་གཞུང་གི་ངོས་ནས་མུ་མཐུད་དེ་འབྲེལ་བ་བྱེད་རྒྱུའི་གྲ་སྒྲིག་ཡོད། ཅེས་བཀའ་སྩལ་ཡོད། ལྷག་པར་རྒྱ་ནག་གཞུང་ཕྱོགས་ནས་གནས་ཚུལ་གང་ཡིན་རུང་གཞི་རྩ་དེ་བདེན་པར་གཞི་བཞག་ནས་བསམ་བློ་མ་བཏང་བར་དུས་ཚོད་བསྐྱལ་རྒྱུའི་བསམ་བློའི་ཐོག་ནས་བོད་དོན་ལ་འབྲེལ་བ་བྱས་ཏེ་བསྡད་པ་ཡིན་ན། དེ་ནི་གྲུབ་འབྲས་སོན་རྒྱུ་ཡོད་པའི་གནས་སྟངས་གང་ཡང་ཆགས་ཀྱི་མི་འདུག ཅེས་བཀའ་སློབ་སྩལ་ཡོད། ཡང་གསར་འགོད་པ་གཅིག་གིས་རྒྱ་གཞུང་གི་དཔོན་རིགས་ཚོས་བོད་ཀྱི་གནད་དོན་སེལ་རྒྱུའི་འདུན་པ་མེད་པའི་སྐོར་གྱི་དྲི་བར་བཀའ་ལན་སྩལ་བའི་ནང་འཁོད་དོན། རྒྱ་ནག་མི་མང་དང་མཁས་དབང་ཁག་གཅིག དེ་བཞིན་དཔོན་རིགས་ཁག་མང་པོ་ཞིག་གིས་བོད་དོན་གྱི་དཀའ་ངལ་སེལ་དགོས་པ་མ་ཟད། ངོས་ནས་བཏོན་པའི་དབུ་མའི་ལམ་གྱི་སྲིད་བྱུས་ཀྱི་དགོངས་དོན་ལ་བདག་པོ་རྒྱག་དགོས་པ་ཞིག་རེད། ཅེས་བརྗོད་ཀྱི་ཡོད་ལ་རྒྱ་ནག་མི་མང་དང་དཔོན་རིགས་འགའ་ཞིག་གིས་རྒྱབ་སྐྱོར་ཡག་པོ་ཡོད། འོན་ཀྱང་ད་ལྟའི་དཀའ་ངལ་དེ་རྒྱ་ནག་གཞུང་གི་ལྟ་བ་མཁྲེགས་པོ་བཟུང་མཁན་དཔོན་རིགས་ཁ་ཤས་ཀྱིས་བོད་དོན་ཐོག་རྒྱ་གཞུང་ནས་གུ་ཡངས་ཏོག་ཙམ་བྱས་ཚེ་དེ་དཀའ་རྙོག་ཆེན་པོ་ཞིག་ཆགས་ཀྱི་ཡོད་པ་དང་། དེ་ལས་གནས་བབ་དེ་འདྲ་ཐོག་ལ་བཞག་ན་ཡག་གི་རེད་བསམ་མཁན་དེ་འདྲ་འདུག་ཀྱང་མ་འོངས་པར་དེ་དག་ལ་འགྱུར་བ་འགྲོ་རྒྱུའི་རེ་བ་ཆེན་པོ་ཡོད། ཅེས་བཀའ་ལན་ཕེབས་ཡོད། ཡང་༸གོང་ས་མཆོག་ཕྱི་རྒྱལ་ཡུལ་གྲུ་འདྲ་མིན་ནང་ལ་ཆིབས་སྒྱུར་སྐྱོང་སྐབས་རྒྱལ་ཁབ་དེ་དང་དེའི་གཞུང་འབྲེལ་དཔོན་རིགས་ཁག་གཅིག་ནས་མགོན་པོ་གང་ཉིད་མཆོག་དང་མཇལ་འཕྲད་གནང་གི་མེད་པའི་སྐོར་གྱི་དྲི་བར་བཀའ་ལན་སྩལ་དོན། དཔོན་རིགས་ཁག་དང་མཇལ་འཕྲད་བྱུང་བ་དེ་ནི་ཡག་པོ་རེད། གལ་ཏེ་དེ་ལྟར་མ་བྱུང་ཡང་ངོས་ལ་བློ་ཕམ་དེ་འདྲ་གང་ཡང་མེད། འོན་ཀྱང་ནུབ་ཕྱོགས་རྒྱལ་ཁབ་དང་ལྷག་པར་ཉི་ཧོང་ནས་སྔ་ལོ་བོད་ནང་དོན་རྐྱེན་བྱུང་སྐབས་ཚང་མས་བོད་པར་གདུང་སེམས་མཉམ་སྐྱེ་དང་རྒྱབ་སྐྱོར་ཡག་པོ་གནང་བ་དེར་ཐུགས་རྗེ་ཆེ་ཞུ་རྒྱུ་ཡིན་ཞེས་བཀའ་ཕེབས་ཡོད། ཡང་བཀའ་ལན་ཕེབས་པའི་ནང་འཁོད་དོན། རྒྱ་གཞུང་གི་སྲིད་བྱུས་ཐོག་ནས་༸གོང་ས་མཆོག་ས་གནས་གང་དུ་ཕེབས་ཀྱང་དེ་སྲིད་དོན་ཡིན་པའི་ངོས་འཛིན་བྱེད་ཀྱི་ཡོད་པ་རེད། འོན་ཀྱང་མགོན་པོ་གང་ཉིད་མཆོག་ནས་ངོས་འཛིན་དེ་འདྲ་གནང་གི་མེད། ཕྱོགས་གཅིག་ནས་༸གོང་ས་མཆོག་གིས་སྔོན་མ་ནས་བཀའ་ཕེབས་དོན་ལྟར། མགོན་པོ་གང་ཉིད་ཀྱི་ཕྱག་གཡས་པ་དེ་དུས་རྟག་དུ་རྒྱ་ནག་ལ་བརྐྱངས་གནང་མཛད་ཡོད་པར་རྒྱ་གཞུང་ནས་བདག་སྤྲོད་མ་བྱུང་བ་ཡིན་ན་ཕྱག་གཞན་དེ་རྒྱལ་སྤྱིའི་ནང་ཡོད་པའི་རྒྱབ་སྐྱོར་ཚོགས་པ་ཁག་ལ་བརྐྱངས་གནང་མ་མཛད་ཐབས་མེད་རེད། ཅེས་བཀའ་ཕེབས་ཡོད་པ་བཅས་སོ།
