༢༠༠༩ ཕྱི་ཟླ་ ༡༡ ཚེས་ ༢༣ རེས་གཟའ་ཟླ་བ།
༄༅། །རང་ཅག་ཁ་བ་རི་པ་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ་༸རྒྱལ་ཀུན་སྙིང་རྗེའི་རང་གཟུགས་འཕགས་མཆོག་འཇིག་རྟེན་དབང་ཕྱུག་སྡོམ་བརྩོན་འཁོར་བསྒྱུར་གྱི་རྣམ་པར་རོལ་པ་ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག་༸གོང་ས་ལྷ་མིའི་རྣམ་འདྲེན་༸སྐྱབས་མགོན་༸རྒྱལ་བའི་དབང་པོ་སྐུ་ཕྲེང་བཅུ་བཞི་པ་ཆེན་པོ་མཆོག་ཨི་ཊ་ལི་དང་ལྡི་ལི་ཁུལ་དུ་རླབས་ཆེན་གྱི་མཛད་འཕྲིན་རྒྱ་ཆེ་བསྐྱངས་ཏེ་ཕྱི་ལོ་ ༢༠༠༩ ཟླ་ ༡༡ ཚེས་ ༢༣ སྔ་དྲོ་ལྡི་ལི་ནས་མཁའ་ལམ་བརྒྱུད་གྷ་གལ་གནམ་ཐང་དུ་༸ཞབས་སོར་འཁོད་སྐབས་བོད་མི་མང་སྤྱི་འཐུས་ཚོགས་གཞོན་མཆོག་དང་། བདེ་སྲུང་དྲུང་ཆེ་དེ་བཞིན་གཞུང་འབྲེལ་མ་ཡིན་པའི་ཚོགས་པ་ཁག་གི་འགན་འཛིན་ཁག སེར་སྐྱ་མི་མང་རྣམས་ནས་ལག་ཏུ་དཀར་གཙང་གི་མཇལ་དར་ཐོགས་ནས་དད་གུས་སྤྲོ་གསུམ་གྱི་སྒོ་ནས་ཕེབས་བསུའི་འཚམས་འདྲིའི་སྣེ་ལེན་གཟབ་རྒྱས་ཐོག་བཞུགས་སྒར་དུ་༸ཞབས་སོར་བདེ་བར་བཀའ་དྲིན་བསྐྱངས་ཡོད། ཕྱི་ལོ་ ༢༠༠༩ ཟླ་ ༡༡ ཚེས་ ༢༤ དང་ ༢༥ ཉིན་གྲངས་གཉིས་རིང་འཇིགས་བྱེད་ལྷ་བཅུ་གསུམ་པའི་བཀའ་དབང་དང་ཕྱི་ཚེས་ ༢༤ ཉིན་ཇོ་བོ་རྗེ་དཔལ་ལྡན་ཨ་ཏི་ཤས་མཛད་པའི་བྱང་ཆུབ་ལམ་སྒྲོན་གྱི་བཀའ་ཆོས་སྩལ་གནང་མཛད་རྒྱུ་ཡིན་པ་བཅས་ཀྱི་བསྡུས་སུ།
