༢༠༠༩ ཕྱི་ཟླ་ ༡༡ ཚེས་ ༣ རེས་གཟའ་མིག་དམར།
༄༅། །ཕྱི་ལོ་ ༢༠༠༩ ཟླ་ ༡༠ ཚེས་ ༣༡ ཉིན་ཉི་ཧོང་རྒྱལ་ས་ཊོཀ་ཁྱོའི་ནང་ཀོ་ཀུ་གི་གན་ཚོགས་ཁང་ཆེན་མོའི་ནང་དད་ལྡན་ཆོས་ཞུ་བ་གྲངས་ ༥༠༠༠ བརྒལ་བར་༸གོང་ས་མཆོག་གིས་རྗེ་རིན་པོ་ཆེས་མཛད་པའི་ལམ་གཙོ་རྣམ་གསུམ་དང་། སེམས་བསྐྱེད་ཀྱི་གསུང་ཆོས་སྩལ་ཡོད། དེ་ཡང་བཀའ་ཆོས་དབུ་འཛུགས་མ་མཛད་སྔོན་དུ་བཀའ་སློབ་ཕེབས་དོན། སེམས་པ་བཟང་པོ་བྱེད་རྒྱུ་དེ་ལུས་སེམས་གཉིས་ཀར་བདེ་ཐང་ཡོང་རྒྱུར་གལ་ཆེན་པོ་ཞིག་ཆགས་ཡོད། དེ་རིང་ཁ་སང་ཚན་རིག་པ་ཚོས་ཁོང་ཁྲོ་དང་། ཞེ་སྡང་། འདོད་རྔམ། དེ་བཞིན་ཕྲག་དོག ཉོན་མོངས་བཅས་པ་དེ་ཚོའི་རིགས་ཀྱིས་གཟུགས་པོའི་ནང་གི་ནད་གཞི་སྔོན་འགོག་བྱེད་མཁན་དེ་དག་གི་གཟུངས་བཅུད་ཉམས་ཞན་གཏོང་གི་ཡོད་པ་གསལ་བཤད་བྱས་ཡོད། བདེ་སྐྱིད་བསྐྲུན་རྒྱུའི་སྨན་ཁབ་དེ་འདྲ་མེད། ང་དང་ཁྱེད་བསམ་པའི་བར་ཐག་དེ་ཉུང་དུ་གཏོང་ཐུབ་ན་བདེ་སྐྱིད་ཡོང་གི་རེད། ཅེས་བཀའ་སློབ་སྩལ། དེ་བཞིན་༸གོང་ས་མཆོག་ནས་འཛམ་གླིང་གི་ཆོས་ལུགས་གཙོ་ཆེ་བ་གཞན་ལའང་ཞི་བདེ་བསྐྲུན་རྒྱུའི་ནུས་པ་ཡོད་སྐོར་བཀའ་སྩལ་བ་དང་སྦྲགས་དེང་དུས་ཤེས་ཡོན་ལམ་སྲོལ་ནང་བཟང་སྤྱོད་ཀྱི་ཉམས་ལེན་དེ་མཉམ་འབྲེལ་བཏང་བའི་ཐོག་ནས་སེམས་བཟང་པོ་ཞིག་བསྐྲུན་ཐུབ་ཀྱི་ཡོད་པ་བཀའ་སྩལ། དེ་བཞིན་རང་གི་དགྲ་བོར་བྱམས་པ་སྒོམ་ཟེར་དུས་དགྲ་བོས་གདུག་རྩབ་བཏང་བ་དེར་བཟོད་སྒོམ་བྱས་པ་དེེ་བྱམས་པ་སྒོམ་པའི་གོ་དོན་རྣམ་དག་ཞིག་མིན་པས་གཟབ་ནན་བྱེད་དགོས་སྐོར་བཀའ་སློབ་སྩལ་དོན། རང་གི་དགྲ་བོའི་བྱ་སྤྱོད་མ་རུང་བ་དེར་གདོང་ལེན་བྱེད་དགོས་པ་ལས་དགྲ་བོ་གང་ཟག་དེར་བྱམས་པ་སྒོམ་དགོས་ཞེས་བཀའ་སློབ་སྩལ། ད་རེས་ཀྱི་གསུང་ཆོས་གོ་སྒྲིག་གནང་མཁན་ཉི་ཧོང་བོད་ཁང་དང་། ཤི་ཀི་ཀུ་ནང་པའི་མཐུན་ཚོགས། ཨོ་ཀི་ན་བའི་བྱང་ཆུབ་ཆེན་པོའི་ཆོས་ཚོགས་བཅས་ཡིན་པའི་གནས་བསྡུས་སུ།
