༢༠༠༩ ཕྱི་ཟླ་ ༡༠ ཚེས་ ༨ རེས་གཟའ་ཕུར་བུ།

༄༅། །ཕྱི་ལོ་ ༢༠༠༩ ཟླ་ ༡༠ ཚེས་ ༡ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ནས་སྤེལ་བའི་གནས་ཚུལ་ལྟར་ན། ཨོ་བྷ་མ་སྲིད་གཞུང་ནས་བོད་དོན་དམིགས་བསལ་འབྲེལ་མཐུད་སྐུ་ཚབ་ཏུ་ལྕམ་སྐུ་མ་རི་ཡ་ཨོ་ཊེ་རོ་བསྐོ་གཞག་གནང་འདུག དེ་ཡང་ཉིན་དེར་ཨ་རིའི་ཕྱི་སྲིད་དྲུང་ཆེ་ལྕམ་སྐུ་ཧི་ལེ་རི་ཁི་ལིན་ཊོན་ Hillary Clinton མཆོག་ནས་ཨ་རིའི་དྲུང་གཞོན་ལས་རོགས་ལྕམ་སྐུ་མ་རི་ཡ་ཨོ་ཊེ་རོ་ Maria Otero ཨ་རིའི་གཞུང་ནས་བོད་དོན་དམིགས་བསལ་འབྲེལ་མཐུད་སྐུ་ཚབ་ཏུ་བསྐོ་གཞག་གི་གསལ་བསྒྲགས་གནང་ཡོད། ད་ཆ་ཁོང་རང་བོད་དོན་དམིགས་བསལ་འབྲེལ་མཐུད་སྐུ་ཚབ་ཡིན་པའི་ཐོག་ནས་ཨ་རིའི་གཞུང་གི་བོད་ཐོག་འཛིན་པའི་སྲིད་བྱུས་དང་། བོད་དོན་ལས་རིམ་དང་ལས་འཆར་ཁག་ལ་འབྲེལ་མཐུད་གནང་རྒྱུ་ཡིན་པ་དང་། དེ་བཞིན་ཁོང་ནས་༸གོང་ས་མཆོག་གི་སྐུ་ཚབ་དང་རྒྱ་ནག་གཞུང་གི་བར་འབྲེལ་མོལ་གྱི་ཁོར་ཡུག་བཟང་པོ་བསྐྲུན་རྒྱུའི་ཕྱག་ལས་གནང་རྒྱུ་དང་། དེ་དང་ཕྱོགས་མཚུངས་བོད་ཀྱི་ཐུན་མོང་མ་ཡིན་པའི་རིག་གཞུང་སྲུང་སྐྱོབ་ཡོང་རྒྱུར་རྒྱབ་སྐྱོར་སྣེ་ཁྲིད་གནང་གི་རེད། ཅེས་ཨ་རིའི་ཕྱི་སྲིད་དྲུང་ཆེ་ཧི་ལེ་རི་ཁི་ལིན་ཊོན་མཆོག་ནས་གསུངས་ཡོད། ལྕམ་སྐུ་མ་རི་ཡ་ཨོ་ཊེ་རོ་བོད་དོན་འབྲེལ་མཐུད་སྐུ་ཚབ་ཏུ་བསྐོ་གཞག་བྱུང་བར་བོད་མི་མང་སྤྱི་འཐུས་ལྷན་ཁང་ནས་འཚམས་འདྲིའི་ཕྱག་བྲིས་ཕུལ་ཡོད་པ་མ་ཟད། བོད་གཞུང་ཕྱི་དྲིལ་དྲུང་ཆེ་ཐུབ་བསྟན་བསམ་འཕེལ་ལགས་ནས་ཀྱང་འཚམས་འདྲི་ཞུས་ཡོད། དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་ནས་ཀྱང་དམིགས་བསལ་དགའ་བསུའི་འཚམས་འདྲི་ཞུས་ཡོད་པ་རེད།