༢༠༠༩ ཕྱི་ཟླ་ ༡༠ ཚེས་ ༧ རེས་གཟའ་ལྷག་པ།
༄༅། །བཀའ་བརྒྱུད་རྒྱལ་ཡོངས་ཁོར་ཡུག་སྲུང་སྐྱོབ་ཚོགས་པས་གོ་སྒྲིག་ཞུས་པའི་འོག་ཕྱི་ལོ་ ༢༠༠༩ ཟླ་ ༡༠ ཚེས་ ༣ སྔ་དྲོའི་ཆུ་ཚོད་ ༨།༠༠ ཐོག་ཚོགས་ཞུགས་རྣམས་ཚོགས་ཁང་དུ་ལྷན་འཛོམས་རྗེས་དཔལ་རྒྱལ་དབང་ཀརྨ་པ་མཆོག་དང་རྒྱུད་སྟོད་གྲྭ་ཚང་གི་མཁན་པོ་རིན་པོ་རྣམ་གཉིས། དེ་བཞིན་དམིགས་བསལ་སྐུ་མགྲོན་དུ་གདན་ཞུ་གནང་བའི་འཕྲོད་བསྟེན་བཀའ་བློན་དཔལ་འབྱོར་ཚེ་རིང་མཆོག་བཅས་ཚོགས་འདུ་དབུ་འཛུགས་ཀྱི་མཛད་སྒོར་ལྷན་ཞུགས་གནང་ཡོད། དེ་རྗེས་ཁོར་ཡུག་སྲུང་སྐྱོབ་གོ་སྒྲིག་ཚོགས་ཆུང་ནས་ཐོག་མར་ཚོགས་འདུ་ངོ་སྤྲོད་དང་ཚོགས་ཕེབས་རྣམ་པར་ཕེབས་གསུའི་གསུང་བཤད་གྲུབ་རྗེས་དགེ་འདུན་པའི་ཞལ་འདོན་གསུང་སྐུལ་དང་སྦྲགས་གསོལ་ཇ་དང་འབྲས་བསིལ་འདེགས་འབུལ་ཞུས། དེ་ནས་རྗེས་དཔལ་ལྡན་འཕྲོད་བསྟེན་བཀའ་བློན་མཆོག་གིས་ཁོར་ཡུག་སྲུང་སྐྱོབ་ལམ་སྟོན་ཤེས་བྱའི་སྒྲོན་མེ་ཞེས་པའི་ཕྱག་དེབ་གཅིག་དབུ་འབྱེད་དང་གསུང་བཤད་གནང་དོན་ དེང་འཛམ་བུ་གླིང་སྤྱིའི་ཁོར་ཡུག་གནས་སྟངས་ཛ་དྲག་ཅན་དུ་འགྱུར་བཞིན་པའི་དུས་སྐབས་འདིར་དཔལ་རྒྱལ་བ་ཀརྨ་རིན་པོ་རིན་པོ་མཆོག་ནས་ཐུགས་འགན་བཞེས་ཏེ་ཁོར་ཡུག་སྲུང་སྐྱོབ་ཐོག་ཚོགས་འདུ་འདི་འདྲ་གནང་བར་དད་གུས་ཆེན་པོ་ཞུ་བཞིན་ཡོད།
འཛམ་གླིང་ལྷོ་བྱང་དང་གངས་ཅན་བོད་ཀྱི་དབུས་པའི་ནང་བསིལ་དྲོད་མ་སྙོམས་པར་ཚ་དྲོད་འཕེལ་ཏེ་རང་བྱུང་གི་གངས་རི་བཞུ་བའི་དཀའ་ངལ་དང་། མིའི་རིགས་ཀྱི་འདོད་རྔམ་ངོམས་པ་མེད་པའི་དབང་གི་ཚན་རིག་ཡར་རྒྱས་དང་འཕྲུལ་རིགས་སོགས་ལས་དུས་རབས་ཉི་ཤུ་དང་ཉེར་གཅིག་པ་འདིའི་ནང་འདོད་རྔམ་གི་བེད་སྤྱོད་ལོག་པ་བྱས་པ། ཤིང་ནགས་ཚད་མེད་གཅོད་འབྲེག་དང་བཟོ་གྲྭ་ཆེ་བ་ཁ་ཤས་ཀྱི་དུག་རླང་སོགས་ཀྱི་འཛམ་གླིང་ཁོར་ཡུག་འབག་བཙོག་ཕྱིན་ཏེ་སྔ་མོ་མི་རེའི་རྒྱབ་ལ་ཆུ་རེ་འཁྱེར་སྲོལ་མེད་པ་དང་། ད་ཆ་མི་རེའི་རྒྱབ་ལ་ཆུ་འགྱིག་དམ་རེ་འཁྱེར་དགོས་པ་དང་། དེ་བས་གྲོང་ཁྱེར་ཆེ་བ་འགའ་ཞིག་ནང་དབུགས་རྔུབ་རྒྱུར་དཀའ་ངལ་ཡོད་པ་བཞིན་སྲོག་དབུགས་རྒྱབ་ལ་ཁྱེར་དགོས་པ་ཆགས་སྲིད། ད་རེས་རྒྱལ་ཡོངས་བཀའ་བརྒྱུད་ཁོར་ཡུག་སྲུང་སྐྱོབ་ཚོགས་འདུ་སྐོང་ཚོགས་གནང་བ་དེ་ནི་༸གོང་ས་མཆོག་གིས་དུས་ཡུན་རིང་པོ་ཁོར་ཡུག་ལ་ཐུགས་སྣང་ཆེར་བསྐྱེད་མཛད་པ་དེར་དབུ་འོག་དཔུང་འདེགས་གནང་བ་ཞིག་རེད་བསམ་གྱི་ཡོད། མ་འོངས་དཔལ་རྒྱལ་བ་ཀརྨ་པ་རིན་པོ་ཆེ་མཆོག་ནས་འཛམ་གླིང་གི་ཁོར་ཡུག་སྲུང་སྐྱོབ་ཐད་ཐུགས་འགན་བཞེས་ཐུབ་རྒྱུར་ཚང་མས་འཕྱར་གྲུ་མཉམ་འདེགས་གནང་རོགས་ཞུ་གི་ཡོད། ཅེས་སོགས་ཀྱི་གསུང་བཤད་གནང་། དེ་རྗེས་དཔལ་རྒྱལ་བ་ཀརྨ་པ་རིན་པོ་ཆེ་མཆོག་གིས་ཁོར་ཡུག་སྲུང་སྐྱོབ་དང་འབྲེལ་བའི་གསུང་བཤད་གནང་དོན། དུས་རབས་ཉེར་གཅིག་འཚོ་ཐབས་ཀྱིས་ཁོར་ཡུག་ལས་འདོན་ལེན་ཤུགས་ཆེན་བྱས་ཤིང་།
ང་ཚོས་རྡོ་སྣུམ་དང་། ཤིང་ཆ། ཆུ་སོགས་ཐོན་ཁུངས་སྔར་ལས་མང་བ་བེད་སྤྱོད་བྱེད་པ་ལས་མཇུག་འབྲས་ལ་བསམ་གཞིགས་བྱེད་ཀྱི་མེད། མཚམས་རེ་མིའི་རིགས་ཀྱི་འདོད་པ་ནི་རང་བཞིན་ངོམས་མཐའ་མེད་པ་ལྟ་བུ་ཞིག་རེད། འོན་ཀྱང་ས་ཆེན་པོ་འདིས་ང་ཚོར་ཇི་ཙམ་འཚོ་སྲིང་བྱེད་ནུས་པ་ནི་ཚད་གཞི་ཅན་ཞིག་ཡིན། ཞེས་སོགས་རང་བྱུང་ཁམས་ཀྱི་ནུས་པའི་འབྱུང་ཁུངས་ལ་འཛད་མཐའ་མེད་པ་ཞིག་མིན་སྐོར་དང་། རང་བྱུང་ཁོར་ཡུག་གི་འབྱུང་ཁུངས་ལ་བག་མེད་རྒྱས་སྤྲོས་མི་བྱེད་བར་བསྲི་ཚགས་བྱེད་དགོས་པའི་སྐོར་ལ་དཔེ་དང་བཅས་གསུང་དོན། སངས་རྒྱས་ཞལ་བཞུགས་པའི་དུས། དགེ་འདུན་གྱི་འཚོ་བ་ལ་གཟབ་ནན་དང་བསྲི་ཚགས་བྱས་ཏེ་དངོས་རྫས་གང་ཡང་ཆུད་ཟོས་སུ་གཏོང་གི་མེད། ངས་དཔེ་ཆ་ཞིག་གི་ནང་དགེ་འདུན་རྣམས་ཀྱིས་ཆོས་གོས་གསར་པ་ཞིག་བླངས་རྗེས་ཆོས་གོས་རྙིང་པ་དེ་གདན་དང་ཉལ་ཤུབས་ལྟ་བུར་བེད་སྤྱད་དེ་ཡང་བཀོལ་ཟད་ཐེབས་རྗེས་འཕྱི་རས་སུ་བེད་སྤྱད་ནས་མཐར་དེ་ཡང་ཞིག་ཧྲུལ་དུ་སོང་རྗེས་རས་ཚལ་རྣམས་རྡོ་ཐལ་དང་བསྲེས་ཏེ་གྱང་ལ་བྱུག་གི་ཡོད་པའི་སྐོར་ཀློག་རྒྱུ་བྱུང་ཞེས་དང་། ཡང་བོད་དང་ཧི་མ་ལ་ཡའི་ས་ཁུལ་ནི་ཨེ་ཤི་ཡའི་ཆུ་བོ་ཕལ་མོ་ཆེའི་འབྱུང་གནས་ཡིན་པས་ལྷག་པར་གལ་ཆེ་བ་ཡིན། དེར་བརྟེན། ངོས་ནས་དེར་གནས་པའི་མི་ཚོས་ཁོར་ཡུག་ལ་བདག་སྐྱོང་བྱེད་ཚུལ་གྱི་མིག་དཔེ་བཟང་པོ་ཞིག་སྟོན་ཐུབ་པའི་རེ་བ་ཞུ་གི་ཡོད། ང་ཚོས་ཁོར་ཡུག་ལ་ཕལ་ཆེར་བཅོས་ཐབས་མེད་པ་ལྟ་བུའི་གནོད་འཚེ་ཆེན་པོ་བཏང་ཟིན་མོད། ཁོར་ཡུག་སྲུང་སྐྱོབ་ཀྱི་གོམ་སྟབས་ཆུང་ངུ་ཞིག་སྤོ་བའི་དོན་དུ་རེ་བ་རྟ་རྔ་ཙམ་མེད་པ་མི་སྲིད་པས། མི་ཚང་མས་རང་རང་གི་ཆུ་ཐིགས་རེ་ཙམ་ལེགས་སྐྱེས་སུ་ཕུལ་ནས་མཐར་རྒྱ་མཚོ་ཆེན་པོ་ཞིག་ཏུ་འགྱུར་རྒྱུ་དེ་ནི་ངོས་ཀྱི་སྨོམ་ལམ་ཡིན། ཞེས་སོགས་བཀའ་སློབ་གནང་རྗེས་དགོན་སྡེ་ཁག་གི་སྐུ་ཚབ་ནས་ལས་སྡོམ་སྙན་སྒྲོན་གྱི་ཚོགས་འདུ་དངོས་གཞི་དབུ་ཚུགས་གནང་ཡོད།
ད་རེས་བཀའ་བརྒྱུད་རྒྱལ་ཡོངས་ཁོར་ཡུག་སྲུང་སྐྱོབ་ཚོགས་ཆེན་ཐེངས་གཉིས་པ་འདི་ཉིན་དྲུག་རིང་འཚོགས་རྒྱུ་ཡིན་པ་དང་། ཨ་རི་ནས་ཁོར་ཡུག་ཐད་རིགས་གཅིག་མཁས་དབང་ཅུང་རྒྱལ་པ་བདེ་སྐྱིད་ལགས་དང་། དེ་བཞིན་གཞན་མཁས་དབང་འགའ་ཤས་དང་རྒྱ་བལ་འབྲུག་གསུམ་ནང་གི་དགོན་སྡེ་ཁག ༣༣ ནས་སྐུ་ཚབ་གྲྭ་བཙུན་བརྒྱ་ལྷག་མཉམ་ཞུགས་གནང་ཡོད་པ་དང་བཀའ་བརྒྱུད་རྒྱལ་ཡོངས་ཁོར་ཡུག་སྲུང་སྐྱོབ་ཐེངས་དང་པོ་དེ་སྔ་ལོ་གནས་མཆོག་རྡོ་རྗེ་གདན་དུ་ཚོགས་ཡོད་པ་བཅས་སུ།
