༢༠༠༩ ཕྱི་ཟླ་ ༡༠ ཚེས་ ༢༧ རེས་གཟའ་མིག་དམར།
༄༅། །ཕྱི་ལོ་ ༢༠༠༩ ཟླ་ ༡༠ ཚེས་ ༢༧ ཉིན་སྔ་དྲོ་ཆུ་ཚོད་ ༩།༠༠ ཐོག་རྡ་ས་ཡོངས་གླིང་སྔོན་འགྲོ་སློབ་གྲྭ་བཙུགས་ཏེ་ལོ་ངོ་ ༢༥ འཁོར་བའི་དུས་ཆེན་མཛད་སྒོ་སློབ་གྲྭའི་མདུན་ཐང་དུ་དབུ་འཛུགས་ཞུས་ཡོད་པ་རེད།
ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས་ནས་གཏམ་བཤད་གནང་བཞིན་པ།
དེ་ཡང་སྐུ་མགྲོན་གཙོ་བོ་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས་དང་། རྡ་ས་ས་གནས་འགོ་འཛིན། རོགས་ཚོགས་ཀྱི་འགན་འཛིན། གླིང་བླ་བྲང་གི་ཕྱག་མཛོད། དེ་བཞིན་ཕྲུ་གུའི་ཕ་མ་བཅས་རྩེད་ཐང་དུ་ལྷན་འཛོམས་གནང་བའི་ཐོག་མར་གསོལ་ཇ་འབྲས་བསིལ་ཕུལ་གྲུབ་མཚམས་འཕགས་བོད་གཉིས་ཀྱི་རྒྱལ་གླུ་བཏང་། དེ་ནས་སྐུ་མགྲོན་གཙོ་བོ་མཆོག་གིས་སློབ་གྲྭའི་ལོ་རྒྱུས་གསར་དེབ་དབུ་འབྱེད་དང་ལས་བྱེད་ཞབས་ལོ་བཅུ་དགུ་དང་ཉི་ཤུ་འཁོར་བ་རྣམས་ལ་ཕྱག་རྟགས་གནང་། དེ་རྗེས་སློབ་གྲྭའི་འགན་འཛིན་སྤྱི་འཐུས་ཟླ་བ་ཚེ་རིང་ལགས་ནས་དུས་ཆེན་ངོ་སྤྲོད་དང་། དེ་ནས་སློབ་གྲྭའི་འགན་འཛིན་ལྷན་ཚོགས་ཀྱིས་གསུང་བཤད་སྒྲུབ་བསྟུན་སྐུ་མགྲོན་གཙོ་བོ་ནས་གསུང་བཤད་གནང་དོན། ༸སྐྱབས་མགོན་༸རྒྱལ་བའི་ཡོངས་འཛིན་གླིང་རིན་པོ་ཆེ་མཆོག་གི་མཚན་ཟུར་གྱི་རྒྱན་པས་ཡོངས་གླིང་སྔོན་འགྲོའི་སློབ་གྲྭ་བཙུགས་ནས་ལོ་ ༢༥ འཁོར་བའི་དུས་ཆེན་ཐོག་ཕེབས་པའི་དམིགས་བསལ་སྐུ་མགྲོན་རྣམ་པ་དང་། ས་གནས་སྤྱི་འཐུས་རྣམ་པ། ས་གནས་འཐུས་ཚོགས་ཀྱི་ཚོགས་གཙོ་དང་ཚོགས་མི་རྣམ་པ། ཚོགས་པ་སྒྲིག་འཛུགས་ཁག་གི་སྐུ་ཚབ་རྣམ་པ། ཡོངས་གླིང་སློབ་གྲྭའི་འགན་འཛིན་དང་ལས་བྱེད་རྣམ་པ། དགེ་སློབ་རྣམ་པ། དེ་བཞིན་སློབ་ཕྲུག་གི་ཕ་མ་རྣམ་པ་བཅས་ལ་ངས་ཤེས་རིག་ལས་ཁུངས་ཀྱི་ཚབ་ཞུས་ཏེ་འཚམས་འདྲི་དང་བཀྲིས་བདེ་ལེགས་ཞུ་གི་ཡིན། ད་ལྟ་ང་ཚོ་བཙན་བྱོལ་བོད་མིའི་གཞི་རིམ་གྱི་ཤེས་ཡོན་སྲིད་བྱུས་ཞེས་པ་འདིའི་ནང་ལ་གནད་དོན་མང་པོ་ཞིག་ཡོད་པའི་ནང་ནས་གནད་དོན་དེ་དང་འབྲེལ་བ་ཡོད་པ་གཅིག་དེ་སྔོན་འགྲོ་དང་དམའ་རིམ་སློབ་གྲྭ་དེ་དག་ཧ་ཅང་གི་གལ་ཆེན་པོ་ཆགས་ཡོད། སྔོན་འགྲོ་དང་དམའ་རིམ་གྱི་འཛིན་གྲྭ་དེ་དག་སློབ་གྲྭ་ཚང་མའི་ནང་ནས་གལ་ཆེ་ཤོས་ཆགས་ཀྱི་ཡོད། དེའི་སྐབས་ཕྲུ་གུ་གསོ་སྐྱོང་བྱེད་སྟངས་གཞན་དག་ལས་གནད་འགག་ཆེ་བ་ཆགས་ཡོད་སྟབས། དགེ་རྒན་དང་གསོ་སྐྱོང་གནང་མཁན་གྱི་ཕ་ཚབ་དང་མ་ཚབ་རྣམ་པས་ཕྲུ་གུ་དེ་དག་ལ་ཕྱི་ནང་གཉིས་ཀྱི་སབྱོང་བརྡར་ཡོང་ཐབས་བྱེད་དགོས་པ་ཞིག་ཡིན། ཡོངས་གླིང་སྔོན་འགྲོའི་སློབ་གྲྭར་ཆ་བཞག་ན། ལྟོས་ས་ལྟོས་ཕྱོགས་ཀྱི་ཐོག་ནས་དེ་དག་འགྲིག་ཡོད་པ་ཞིག་ལ་ངོས་འཛིན་ཞུ་གི་ཡོད། དཔེར་ན། ང་ཚོས་སློབ་གྲྭ་ཁ་ཤས་ལ་ལྟ་སྐོར་བྱེད་སྐབས་སློབ་གྲྭ་འགའ་ཤས་གནས་ཚད་ཞན་པ་ཡོད་དུས་དགེ་རྒན་དང་འགོ་འཛིན་ལ་སྐད་ཆ་དྲིས་སྐབས་བསྙད་འདོགས་དེ་དམའ་རིམ་ཐོག་ལ་བྱེད་ཀྱི་འདུག དམའ་རིམ་སྐབས་ནས་གནས་ཚད་མེད་དུས་ང་ཚོར་བྱེད་རྒྱུ་མི་འདུག ཅེས་བརྗོད་ཀྱི་འདུག དེ་བཞིན་གཞི་རིམ་གོང་མའི་འཛིན་རིམ་བརྒྱད་པ་དགུ་པ་དེ་དག་ལ་སྐད་ཆ་དྲིས་སྐབས་དེ་མཚུངས་འབྲིང་རིམ་སློབ་གྲྭའི་སྐབས་ནས་གནས་ཚད་སྐྱོ་པོ་འདུག ཅེས་བརྗོད་ཀྱི་འདུག མཐར་གཏུགས་ནས་སྔོན་འགྲོའི་སློབ་གྲྭར་ཐུག་ཡོང་གི་འདུག དེར་བརྟེན་སྔོན་འགྲོ་དང་དམའ་རིམ་ལ་དམིགས་བསལ་ཕྱག་ལས་གནང་ཕྱོགས་དེ་ཤེས་ཡོན་སྲིད་བྱུས་ཀྱི་དགོངས་དོན་ཞིག་རེད། ཚན་རིག་དང་མཐུན་པ་ཡང་རེད། གཉིས་པ་ནི། ཡོངས་གླིང་སློབ་གྲྭར་ཤེས་ཡོན་སྲིད་བྱུས་ཀྱི་ལྟ་སྟངས་ཐོག་ནས་བལྟས་པ་ཡིན་ན་དམིགས་བསལ་བསྔགས་བརྗོད་ཞུ་དགོས་པའི་དོན་དག་ཁ་ཤས་ཤིག་གོང་དུ་དོ་སྣང་བྱུང་། ཐོག་མར་འགོ་འཛུགས་སྐབས་དཀའ་ངལ་མང་པོ་ཞིག་བྱུང་ཡོད་ཀྱང་ད་ལྟ་ལོ་ ༢༥ ཕྱིན་ནས་སློབ་གྲྭ་ཡར་རྒྱས་གོང་འཕེལ་ཐོག་ཧྲ་ཏག་ཏག་གནས་ཡོད་པ་རེད། ང་ཚོའི་གཞི་རིམ་གྱི་ཤེས་ཡོན་སྲིད་བྱུས་ནང་ཚིག་གསལ་དོན་གསལ་བྱས་ནས་འཁོད་པ་ལྟར། སྔོན་འགྲོའི་གནས་སྐབས་ལ་ང་རང་ཚོའི་ལམ་སྲོལ་ཞིག་མ་བྱུང་བར་དུ་ (Montessori) དེ་ཚོ་ལ་གཞི་འཇོག་རྒྱུ་དང་། དེའི་སྐབས་དགེ་རྒན་བུད་མེད་གཙོ་དོན་བྱེད་ཀྱི་ཡིན་ཞེས་ཡོད་པ་རེད། ཤེས་ཡོན་སྲིད་བྱུས་འདིའི་ནང་ལ་ཕ་མ་ཚོ་གལ་ཆེན་པོ་ཆགས་ཀྱི་ཡོད་ལ་དེ་མཚུངས་སློབ་གྲྭ་དང་ཕ་མའི་དབར་གྱི་འབྲེལ་ཐག་ཉེ་པོ་དང་། ཕྲུ་གུ་དང་ཕ་མའི་དབར་གྱི་འབྲེལ་ཐག་ཉེ་པོ་དགོས་ཀྱི་ཡོད།
སློབ་ཕྲུག་རྣམས་ནས་གཞས་སྣ་འཁྲབ་སྟོན་བྱེད་བཞིན་པ།
ང་ཚོས་བར་ལམ་ཞིག་ནས་ཤེས་ཡོན་སྲིད་བྱུས་གསར་པ་ག་རེ་བྱས་ནས་བཟོ་དགོས་བྱུང་བ་རེད་དམ་ཞུས་ན། ལོ་སུམ་ཅུ་བཞི་བཅུའི་ཉམས་མྱོང་ནང་ཤེས་ཡོན་དང་འབྲེལ་བའི་ཉམས་མྱོང་བསྡོམས་ཆེན་པོ་ལྟ་བུ་བརྒྱབ་ན། གནད་དོན་གསུམ་བྱུང་ཡོད་པ་རེད། ཕྱི་ལོ་ ༡༩༦༢ ལོར་ཤེས་རིག་ཚོགས་ཆེན་ཐེངས་དང་པོ་དེ་༸གོང་ས་མཆོག་དབུ་བཞུགས་ཐོག་བསྐྱངས་པ་དང་། དེ་རྗེས་ཕྱི་ལོ་ ༡༩༧༥ ཙམ་ལ་གཉིས་པ་ཚོགས་པ་རེད། གང་ལྟར་ཤེས་རིག་ཚོགས་ཐེངས་བཞི་ཚོགས་ཡོད། ཚོགས་ཐེངས་གཉིས་པ་མན་ཆད་ཀྱི་གྲོས་ཆོད་ཚང་མར་བལྟས་པ་ཡིན་ན།
གནད་དོན་གསུམ་འབུར་དུ་ཐོན་ནས་སླེབས་ཡོད་པའི་དང་པོ་ནི། ང་ཚོའི་བོད་པའི་སློབ་གྲྭར་རྒྱ་གར་གཞུང་གིས་རོགས་རམ་གང་ཐུབ་བྱས་ཏེ་ཡག་པོ་ཡོད་ཀྱང་རྩ་བའི་དེང་རབས་ཤེས་ཡོན་གྱི་གནས་ཚད་ཏོག་ཙམ་འདང་གི་མི་འདུག་བརྗོད་ཀྱི་ཡོད་པ་རེད་ལ་ད་ལྟ་ཡང་དེ་ལྟར་རེད། གཉིས་པ་ནི། ༸གོང་ས་མཆོག་གིས་རྒྱ་གར་སྲིད་བློན་སོགས་ལ་འབོད་སྐུལ་ཤུགས་ཆེ་གནང་སྟེ་བོད་པའི་ཕྲུ་གུ་ཚོའི་སླད་དུ་སློབ་གྲྭ་བཙུགས་ཡོད་པའི་དེ་དག་ནང་བོད་པའི་སྐད་ཡིག་གི་ཤེས་ཚད་ལོ་རེ་ནས་ལོ་རེ་ཉམས་རྒུད་འགྲོ་གི་འདུག་ཅེས་དང་། གསུམ་པ་དེ།
སྔོན་མ་བོད་ལ་མི་སྟོང་ཕྲག་གོང་དེང་སང་གི་སློབ་གྲྭའི་ལམ་སྲོལ་ལྟ་བུ་མེད་པ་རེད། དེ་ལྟར་མེད་པའི་སྐབས་ལ་ཕྲུ་གུ་འཚར་ལོངས་བྱེད་སྟངས་ནི་ཡ་རབས་བཟང་སྤྱོད་ཐོག་ནས་ཡོང་གི་ཡོད། ཕྱི་ལོ་ ༡༩༧༠ དང་ ༡༩༨༠ ནང་ཚོའི་སློབ་གྲྭ་ཆེ་ཁག་དེ་དག་ནང་ལ་སྒྲིག་ལམ་དང་སློབ་སྟོན་པ་དེ་བཞིན་དགེ་རྒན་ཚང་མ་ཡོད་ཀྱང་ཕྲུ་གུའི་ཡ་རབས་དང་བཟང་སྤྱོད་གནས་སྟངས་སྔོན་མ་སློབ་གྲྭ་མེད་པའི་གནས་སྐབས་ལས་ཞན་དུ་འགྲོ་གི་འདུག་ཅེས་དེ་དག་གིས་བསམ་འཆར་ཚོགས་ཆེན་ནང་འདོན་མཁན་སྐབས་དེའི་དགེ་རྒན་དང་མཉམ་དུ་ལས་ཀ་བྱེད་མཁན་གྱི་འགན་འཛིན་ཤ་སྟག་རེད། དེར་བརྟེན་དཀའ་ངལ་དེ་དག་སེལ་ཆེད་ད་ལྟའི་ཤེས་ཡོན་སྲིད་བྱུས་འདི་གཏན་འབེབས་བྱས་པ་རེད། ཅེས་སོགས་ཀྱི་གསུང་བཤད་གནང་ཡོད། དེ་རྗེས་སློབ་ཕྲུག་རྣམས་ནས་གཞས་སྣ་འཁྲབ་སྟོན་དང་རྩེད་རིགས་ཁག་འགྲན་བསྡུར་བྱས་ཡོད་པ་བཅས་ཀྱི་གནས་བསྡུས་སུ།།
