༢༠༠༩ ཕྱི་ཟླ་ ༡༠ ཚེས་ ༢༢ རེས་གཟའ་ཕུར་བུ།

༄༅། །ཕྱི་ལོ་ ༢༠༠༩ ཟླ་ ༡༠ ཚེས་ ༢༡ ཕྱེད་ཡོལ་ཆུ་ཚོད་ ༢།༣༠ ཐོག་བདག་ཉིད་ཆེན་པོ་གྷན་དྷིས། རྒྱ་གར་རང་སྲིད་རང་སྐྱོང་། ཞེས་པའི་ཕྱག་དེབ་མཛད་ནས་ལོ་བརྒྱ་འཁོར་བའི་དུས་ཚིགས་ཁྱད་པར་ཅན་འདིར་རྡ་རམ་ས་ལའི (Lion`s club) ལོན་སི་ཁ་ལུབ་ཞེས་ཚོགས་ཁང་ཆེན་མོའི་ནང་མེས་པོ་དམ་པ་གྷན་དྷིའི་སྐུ་ཚེའི་ལོ་རྒྱུས་གསུང་རྒྱུའི་ལས་རིམ་དེ་གྷན་དྷིའི་རྗེས་འཇུག་པ་ཚོས་རོལ་མོ་དང་གླུ་དབྱངས་ཀྱི་བསྟོད་པ་ཕུལ་བའི་ཐོག་དབུ་འཛུགས་གནང་ཡོད། དེ་ཉིན་མེས་པོ་དམ་པ་ གྷན་དྷིའི་ལྟ་གྲུབ་རྒྱུད་འཛིན་གནང་མཁན་རང་གཞུང་བཀའ་ཁྲི་མཁས་དབང་ཟམ་གདོང་རིན་པོ་ཆེ་མཆོག་དང་གཞན་སྲི་ཞུ་བའི་ལས་བྱེད་ཁག་གཅིག བོད་པའི་སློབ་ཕྲུག གཞུང་འབྲེལ་མ་ཡིན་པའི་ཚོགས་པ། རྒྱ་གར་ཡུལ་མི་བགྲེས་པ་ཁག་གཅིག་བཅས་མཉམ་ཞུགས་གནང་ཡོད། མེས་པོ་དམ་པ་གྷན་དྷི་དང་དངོས་སུ་མཉམ་འདྲིས་གནང་མྱོང་མཁན་དཔལ་ན་ར་ཡན་ཌེ་ས་ཡི་ (Shri Narayan Desai) མཆོག་གིས་གསུང་དོན། འདི་ལོ་ནི་གྷན་དྷིས་སྲོལ་གཏོད་པའི་རང་སྲིད་རང་སྐྱོང་དང་རྒྱ་གར་རང་སྐྱོང་གི་ལས་འགུལ་སྤེལ་ཏེ་མི་ལོ་བརྒྱ་འཁོར་བའི་དུས་དྲན་གྱི་ལོ་ཡིན་པ་མ་ཟད། བཙན་བྱོལ་བོད་མི་རྣམས་རྒྱ་གར་ནང་བཙན་བྱོལ་དུ་འབྱོར་ནས་མི་ལོ་ ༥༠ འཁོར་བའི་དུས་དྲན། པེ་ཅིང་གནམ་བདེ་སྒོ་མོའི་ཐང་ཆེན་དུ་རྒྱ་རིགས་སློབ་ཕྲུག་གཙོས་མང་གཙོ་དོན་གཉེར་བ་མང་དག་ཅིག་རྒྱ་གཞུང་གིས་དམར་གསོད་བཏང་ནས་མི་ལོ་ ༢༠ འཁོར་བའི་དུས་དྲན་ཞིག་ཀྱང་སྲུང་བརྩི་ཞུ་རྒྱུའི་ལོ་ཞིག་ཆགས་ཡོད་ཅེས་གསུངས་ཡོད། མེས་པོ་དམ་པའི་མཛད་རྣམ་གསུང་མཁན་གྷན་དྷིའི་སྐུ་སྒེར་དྲུང་ཡིག་སྐུ་ཞབས་མ་ཧཱ་ཌེབ་བྷ་ཡིའི་ (Mahadevbhai) སྲས་དཔལ་ན་ར་ཡན་ཌེ་ས་ཡི་ (Shri Narayan Desai) ཡིན་འདུག་ལ་ཉིན་ལྔའི་རིང་གི་ཟབ་སྦྱོང་ཚོགས་འདུ་དེར་བཀའ་ཁྲི་མཆོག་མཉམ་ཞུགས་གནང་གི་ཡོད་པའི་གནས་བསྡུས་སུ།