༢༠༠༩ ཕྱི་ཟླ་ ༡༠ ཚེས་ ༢༠ རེས་གཟའ་མིག་དམར།
༄༅། །ཕྱི་ལོ་ ༢༠༠༩ ཟླ་ ༡༠ ཚེས་ ༡༤ ཉིན་བོད་ཀྱི་འགྲེམས་སྟོན་ཁང་དུ་ཡུ་རོབ་དཔལ་འབྱོར་དང་སྤྱི་ཚོགས་ལྷན་ཁང་གི་འཐུས་མི་སྐུ་ཚབ་པི་ཊར་ཁེ་ལི་ཝར་ Peter Clever ལགས་ཀྱིས་གསར་འགོད་གསལ་བསྒྲགས་གནང་དོན།
” ང་རང་ཡུ་རོབ་དཔལ་འབྱོར་དང་སྤྱི་ཚོགས་ལྷན་ཁང་གི་ཚོགས་མི་ཞིག་ཡིན། ལྷན་ཚོགས་འདི་ཡོ་རོབ་སྤྱི་མཐུན་ཚོགས་པའི་གྲོས་མོལ་ལྷན་ཁང་ཞིག་རེད། ང་ཚོར་ཆབ་སྲིད་གནད་དོན་ཐག་གཅོད་བྱེད་རྒྱུའི་དབང་ཚད་གང་ཡང་མེད། ང་ཚོས་དུས་རྒྱུན་དུ་གཙོ་བོ་དཔལ་འབྱོར་དང་། སྤྱི་ཚོགས། རིག་གཞུང་བཅས་ཀྱི་འབྲེལ་བའི་གནད་དོན་ཐོག་ལས་དོན་སྒྲུབ་བཞིན་ཡོད། ང་ཚོ་ནི་འཛམ་གླིང་ནང་གི་ཚོགས་པ་གཞན་ཁག་མང་པོ་དང་འབྲེལ་བ་ཡོད། རྒྱལ་ཁབ་མང་པོའི་ནང་སྤྱི་ཚོགས་ལྷན་ཁང་གི་སྐུ་ཚབ་མང་པོ་ཡོད། དེར་བརྟེན་ང་ཚོ་དང་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་དཔལ་འབྱོར་དང་སྤྱི་ཚོགས་ལྷན་ཁང་དེ་དང་ཡང་འབྲེལ་བ་ཡོད། ང་ཚོ་ཕན་ཚུན་གཉིས་མོལ་གྱི་འདུན་པ་ཡོད་པའི་གནད་དོན་ཐོག་གྲོས་མོལ་ཞུ་བཞིན་ཡོད། རྒྱ་མིའི་ལྷན་ཁང་ནས་ང་ཚོ་བོད་དུ་སྐྱོད་རྒྱུའི་སྣེ་ལེན་བྱས་བྱུང་། རྒྱ་མིའི་དཔལ་འབྱོར་དང་སྤྱི་ཚོགས་ལྷན་ཁང་གི་ཚོགས་གཙོ་ཝང་ཊང་གིས་ང་ཚོར་བོད་ཀྱི་གནས་སྟངས་དེ་སོ་སོ་རང་གི་མིག་གིས་དངོས་སུ་མཐོང་བ་དང་རྣ་བས་དངོས་སུ་ཐོས་པ་བྱེད་རྒྱུ་ཤིན་ཏུ་གལ་ཆེན་པོ་རེད་ཅེས་བཤད་བྱུང་། བོད་ཀྱི་དངོས་ཡོད་གནད་དོན་གསལ་རྟོགས་ཡོང་བ་བྱ་རྒྱུར་བོད་ནང་དུ་ཡོད་པའི་བོད་མི་དང་ཕྱི་ལ་ཡོད་པའི་བོད་མི་བཅས་ཕྱོགས་གཉིས་ཀའི་མཐོང་ཕྱོགས་དེ་ཡོད་པ་བྱེད་རྒྱུ་གལ་ཆེན་པོ་ཡིན་པ་ང་ཚོས་ཐོག་མའི་བསམ་ཚུལ་ནང་ཡོད། བོད་ཕྱི་ནང་གཉིས་ཀའི་དཔལ་འབྱོར་དང་། སྤྱི་ཚོགས། རིག་གཞུང་གི་གནས་སྟངས་ཇི་ཡིན་གྱི་མཐོང་ཕྱོགས་དེ་ཐོག་མར་གསལ་པོ་ཤེས་པའི་ཐོག་ནས་གནད་དོན་དེ་དག་ལ་ལག་བསྟར་བྱེད་ཕྱོགས་སྐོར་ལྟ་དགོས་པ་གལ་ཆེ་ཡིན་པར་ངོས་འཛིན་བྱེད་བཞིན་ཡོད། དེར་བརྟེན་ང་ཚོ་འདི་ལོ་ཟླ་བ་ ༩ པའི་ནང་བོད་དུ་ཕྱིན་པ་ཡིན། འོན་ཀྱང་གསལ་སྟོན་བྱེད་དགོས་པ་ཞིག་ལ་ང་ཚོས་བོད་ཀྱི་ས་ཁུལ་ཆ་ཤས་གཅིག་ལ་མ་གཏོགས་འགྲོ་ཐུབ་མེད། རྒྱལ་ས་ལྷ་ས་གཅིག་པོར་ཕྱིན་པ་རེད། ས་གནས་དེ་བོད་ཀྱི་རྒྱལ་ས་ཡིན་ཙང་གལ་ཆེན་པོ་རེད། ང་ཚོས་ལྷ་ས་འདི་བོད་ཆ་ཚང་ཞིག་མིན་པ་གསལ་པོ་ཤེས་ཀྱི་ཡོད། བོད་ནང་གི་བོད་མིའི་གྲངས་འབོར་བརྒྱ་ཆ་ ༨༠ བརྒལ་བ་ཙམ་ས་ཁུལ་ཁག་སོ་སོར་གནས་ཡོད། འོན་ཀྱང་ང་ཚོས་ལྷ་ས་མ་གཏོགས་མཐོང་མེད། ང་ཚོའི་བོད་ནང་གི་མཐོང་སྣང་གང་བྱུང་སྐོར་ངས་འདིར་རྒྱས་བཤད་ཞུ་རྒྱུ་མིན། འོན་ཀྱང་སྤྱིར་བཏང་བཤད་ན་རྒྱ་གཞུང་གིས་བོད་ནང་འཛུགས་སྐྲུན་ཆེད་དཔལ་འབྱོར་གྱི་མ་རྩ་འགྲོ་གྲོན་ཕོན་ཆེ་གཏོང་བཞིན་འདུག ང་ཚོས་རྒྱ་གཞུང་ནས་བོད་ནང་དཔལ་འབྱོར་འཛུགས་སྐྲུན་གྱི་མ་རྩ་ཕོན་ཆེའི་ཐོག་བོད་དང་རྒྱ་ནག དེ་བཞིན་བོད་དང་འཛམ་གླིང་ཕྱིའི་དབར་འབྲེལ་བ་ཡོང་རྒྱུར་འགྲོ་གྲོན་གཏོང་བཞིན་ཡོད་པ་དེར་ང་ཚོས་དགའ་བསུ་ཞུ་བཞིན་ཡོད། འོན་ཀྱང་སྐབས་དེར་ང་ཚོར་དྲི་བ་ཆེན་པོ་ཞིག་ཡོད་པ་ནི་བོད་མི་ཚོའི་དཔལ་འབྱོར་གྱི་ཡར་རྒྱས་ཆེད་དབུས་གཞུང་གིས་དཔལ་འབྱོར་རོགས་རམ་ཇི་ཡོད་དང་འགྲོ་གྲོན་མ་རྩ་ཇི་འདྲ་ཡོད་པ་དེ་དང་། དམིགས་བསལ་བོད་མི་ཚོའི་ཤེས་ཡོན་གྱི་གནས་སྟངས་ཐོག་དྲི་བ་ཆེན་པོ་ཞིག་བྱུང་། ང་ཚོས་བོད་ནང་བོད་པའི་སློབ་གྲྭ་ཁག་གཅིག་མཐོང་བྱུང་། ངས་བསམ་པར་རྒྱ་གཞུང་ངོས་ནས་བོད་མི་ཚོར་ཤེས་ཡོན་དགོས་པ་དེ་གལ་ཆེན་པོ་ཡིན་སྐོར་ཤེས་ཡོད་བཞག་རེད། འོན་ཀྱང་རྒྱ་གཞུང་ལ་ད་དུང་དྲི་བ་ཞིག་ཡོད། དམིིགས་བསལ་ངོས་རང་འདིར་སླེབས་པའི་རྗེས་ད་དུང་དྲི་བ་ཞིག་སླེབ་ཀྱི་འདུག
ང་རང་རྡ་སར་ཉིན་གཉིས་རིང་སྡོད་སྐབས་མཐོང་ཕྱོགས་སྐོར་གྱི་གནས་ཚུལ་ཞུ་རྒྱུ་ཡིན། ཐོག་མར་ང་ཚོར་༸གོང་ས་མཆོག་དང་མཇལ་འཕྲད་ཞུ་རྒྱུ་བྱུང་། དེ་མིན་ཚོགས་པ་ཁག་འགའ་ཤས་དང་བཀའ་ཤག་གི་མི་སྣ་ཚང་མ་དང་མཇལ་འཕྲད་བྱུང་། ངས་ཚང་མར་གསལ་བཤད་ཞུ་རྒྱུ་ནི། ང་ཚོས་འདིར་འཇིགས་སྐུལ་རིང་ལུགས་པ་རྩ་བ་ནས་མཐོང་མ་བྱུང་། ང་ཚོས་གཅིག་བྱས་ན་འཇིགས་སྐུལ་རིང་ལུགས་པ་ཞིག་ཕལ་ཆེར་ཐུག་ཡོང་བསམ་པའི་གྲ་སྒྲིག་བྱས་ནས་ཡོང་ཡོད། ང་ཚོས་དང་པོའི་མཐོང་སྣང་དེ་བོད་ཁྱིམ་སློབ་གྲྭར་ཕྱིན་པའི་སྐབས་ཀྱི་མཐོང་ཕྱོགས་དེ་རེད། ཁོང་ཚོས་འཚེ་བ་མེད་པ་དང་བྱམས་བརྩེ་བཤད་པ་བཞིན་ལག་ལེན་བསྟར་བཞིན་འདུག ངས་ད་དུང་སྲིད་དོན་མི་སྣ་མང་པོས་གླེང་མོལ་གནང་བ་ཙམ་མིན་པར་འདིར་དངོས་སུ་ཕེབས་ནས་མིག་གིས་ལྟ་ཐུབ་ན་བསམས་པ་དྲན་བྱུང་། ཁོང་ཚོས་ཁ་ནས་འཚེ་བ་མེད་པ་དང་བྱམས་བརྩེ་བཤད་པ་བཞིན་ལག་ལེན་ཡང་བསྟར་བཞིནཡོད་པ་དེ་ནི་འཇིགས་བསྐུལ་རིང་ལུགས་པ་ཚོའི་ཐབས་ལམ་དང་འགལ་བ་རེད། འཇིག་བསྐུལ་རིང་ལུགས་པའི་ཐབས་ལམ་འཚེ་བ་དང་དམིགས་ཡུལ་དེ་ལས་ལྡོག་ནས་དྲག་སྤྱོད་ལ་བརྟེན་པ་ཞིག་རེད། དངོས་གནས་ང་རང་ཧང་སངས་བྱུང་། རྒྱ་མིའི་དཔལ་འབྱོར་དང་སྤྱི་ཚོགས་ལྷན་ཁང་གི་ཚོགས་གཙོ་ཝང་ཌང་གིས་ལབ་པ་བཞིན་ངས་འདིར་སོ་སོ་རང་གི་མིག་གིས་དངོས་སུ་མཐོང་བ་དང་རྣ་བས་ཐོས་ཐུབ་པ་བྱུང་། ངས་འདི་གར་བོད་ཤར་ཕྱོགས་ནས་ཉེ་དུས་བྲོས་བྱོལ་དུ་ཕེབས་པའི་བོད་མི་གཞོན་སྐྱེས་འགའ་ཞིག་ཐུག་པ་ཡིན། ཁོང་ཚོ་ཐུག་པ་ཡིན་ཞེས་བརྗོད་ནས་ཆབ་སྲིད་ཀྱི་གནད་དོན་ཞིག་ཤོད་འདོད་རྩ་བ་ནས་མེད། ངས་ཆབ་སྲིད་དང་ས་ཁུལ་རྩོད་རྙོག་ཐོག་སྐད་ཆ་ཤོད་འདོད་མེད། ང་རང་སྒེར་ལ་ཆ་བཞག་ན་ས་ཁུལ་རྩོད་རྙོག་མི་དགོས་པའི་ཐོག་ནས་༸གོང་ས་མཆོག་གིས་འདོན་གནང་མཛད་པའི་དབུ་མའི་ལམ་དེར་རྒྱབ་སྐྱོར་ཡོད། ས་ཁུལ་རྩོད་རྙོག་དེས་དཀའ་ངལ་གང་ཡང་སེལ་མི་ཐུབ་པའི་ཁར་ད་དུང་རྙོག་ཕྲ་འཕར་མ་བཟོ་ཡི་རེད། གང་ཡིན་ཟེར་ན་ངའི་ལུང་པ་ཇར་མན་དང་ཧང་གྷ་རི་དབར་འཛམ་གླིང་དམག་ཆེན་གཉིས་པའི་རྗེས་ས་ཁུལ་དང་འབྲེལ་བའི་རྩོད་རྙོག་དེ་ཐག་མ་ཆོད་པར་ཡུན་རིང་ལྷག་པ་རེད། སྟབས་ལེགས་པ་ཞིག་ལ་ད་ཆ་རྩོད་རྙོག་དེ་དག་ཞིག་ཚར་བ་རེད། སུ་གཅིག་གིས་ས་ཁུལ་རྩོད་རྙོག་སྐོར་ཤོད་མཁན་མེད། དེ་ཤིན་ཏུ་ནས་གལ་ཆེན་པོ་རེད། གང་ཡིན་ཟེར་ན་ས་ཁུལ་སོགས་ཆབ་སྲིད་རྩོད་རྙོག་དེ་འདྲ་མེད་པའི་ཐོག་ནས་བལྟས་ན་དངོས་གནས་མི་མང་གི་བདེ་སྡུག་དངོས་དེ་ཤེས་ཐུབ། ཁོང་ཚོ་བོད་ནང་སྡོད་མ་ཐུབ་པར་ལུང་པ་གཞན་ཞིག་ལ་བཙན་བྱོལ་དུ་ཡོང་དགོས་པའི་གནས་ཚུལ་ཆགས་པ་དེ་བོད་ནང་གཞི་རྩའི་གནས་སྟངས་ཐོག་མ་འགྲིག་པ་ཆེན་པོ་ཞིག་ཡོད་པ་གསལ་པོ་རེད། ངས་ཁོང་ཚོ་རྒྱ་གར་དུ་ཕ་མས་བཏང་བ་དང་།
གཞན་གྱི་བརྒྱུད་བསྐུལ་བྱས་ནས་ཡོང་བ། འཆམ་འཆམ་ལ་ཡོང་བ། ཡང་ན་རང་ཐག་རང་གཅོད་ཐོག་ནས་ཡོང་བ་ཇི་ལྟར་ཡིན་མིན་དྲིས་པར་ཁོང་ཚོས་བྲོས་བྱོལ་མ་ཡོང་གོང་དུ་འགའ་ཤས་ཀྱིས་ལོ་གཉིས་གསུམ་ཙམ་དང་ཡང་འགའ་ཤས་ཀྱིས་ལོ་ལྔ་ཙམ་རིང་རྒྱ་གར་དུ་ཕྱིན་ན་ཕུགས་ཀྱི་དམིགས་ཡུལ་བསྒྲུབ་རྒྱུར་བསམ་བློ་བཏང་ནས་ལུས་ཡོད། མཐའ་མར་བྲོས་བྱོལ་དུ་ཡོང་བ་དེ་འདྲ་རེད་འདུག ཁོང་ཚོའི་ཕུགས་ཀྱི་དམིགས་ཡུལ་ནི་སོ་སོའི་ཆོས་དང་རིག་གཞུང་སློབ་སྦྱོང་བྱ་རྒྱུ་དེ་རེད། དེར་བརྟེན་གང་ཞིག་འགྲིག་མེད་པའི་གནད་དོན་ཐོག་ང་ཚོས་གྲོས་མོལ་བྱེད་དགོས་པ་ཞིག་ཆགས་ཡོད། ང་ཚོ་ལྷ་སར་ཡོད་སྐབས་རྒྱ་མི་ཚོས་ཁོང་ཚོས་བོད་ཀྱི་སྐད་ཡིག་ཡར་རྒྱས་དང་བདག་གཅེས་བྱེད་རྒྱུ་གལ་ཆེ་ཡིན་སྐོར་བཤད་བྱུང་། ངས་རྒྱ་གཞུང་དང་ལྷན་དུ་བོད་ནང་བོད་མིའི་ཤེས་ཡོན་དང་དཔལ་འབྱོར་གནས་སྟངས་ཐད་གྲོས་མོལ་ཞུ་ཐུབ་པ་ཞིག་དང་ཞུ་དགོས་པ་ཞིག་མཐོང་གི་འདུག ང་རང་ལྷ་སའི་གཞུང་ལམ་ཐོག་གོམ་པ་བརྒྱབ་ནས་འགྲོ་སྐབས་ཚོར་སྣང་གང་བྱུང་བརྗོད་ན། ལྷ་སའི་གྲོང་ཁྱེར་རྙིང་པའི་ལམ་ཐོག་ལ་མང་ཆེ་བ་བོད་མི་ཡིན་པ་དང་གཞུང་ལམ་ཆེན་པོ་དང་ཚོང་ཁང་ཆེན་པོ་སོགས་ཀྱི་ནང་མང་ཆེ་བ་རྒྱ་རིགས་རེད་འདུག ཚོང་ཁང་ཆེན་པོ་དང་ཟ་ཁང་རྫིག་པོ་དེ་ཚོའི་སྦྱིན་བདག་རྒྱ་རིགས་ཡིན་པ་ཤེས་བྱུང་། བོད་མི་ཚོའི་དཔལ་འབྱོར་གནས་ཚད་དེ་བོད་ལ་ཡོད་པའི་རྒྱ་རིགས་ཚོ་དང་ཚད་མཉམ་པ་ཡོང་ཐབས་བྱེད་རྒྱུའི་ཐབས་ལམ་ཇི་ཡོད་སོགས་ཀྱི་ཐོག་ལ་ང་ཚོས་རྒྱ་གཞུང་ལྷན་གྲོས་མོལ་བྱ་རྒྱུ་ཡིན། ང་ཚོས་རྒྱ་ནག་མི་མང་དང་གཞུང་ལ་གནོད་པའི་བསམ་ངན་གང་ཡང་མེད། Brusselsསྦ་རུ་སེལ་ནང་ཡོད་པའི་སྤྱི་ཚོགས་དང་དཔལ་འབྱོར་ལྷན་ཁང་གིས་༸གོང་ས་མཆོག་གདན་འདྲེན་ཞུ་རྒྱུའི་འཆར་གཞི་ཡོད། ང་རང་ཕར་ཕྱིན་ནས་ཁོང་ཚོར་ངེས་པར་དུ་༸གོང་ས་མཆོག་གདན་འདྲེན་ཞུས་ནས་༸གོང་ས་མཆོག་གི་དགོངས་བཞེད་གང་ཡིན་པ་དེ་དག་ཁྱབ་བསྒྲགས་ཡོང་བ་ཞུ་རྒྱུ་དེ་གལ་ཆེན་པོ་འདུག ཅེས་བསམ་ཚུལ་འདོན་རྒྱུ་ཡིན། ངས་ཚོགས་མི་གཞན་ཚོ་ལའང་༸གོང་ས་མཆོག་གི་དགོངས་བཞེད་གང་ཡིན་པ་དེ་དག་ཤེས་རྒྱུའི་གོ་སྐབས་ཐོབ་རྒྱུ་གལ་ཆེན་པོ་མཐོང་གི་འདུག ” ཅེས་པའི་གསར་འགོད་གསལ་བསྒྲགས་གནང་ཡོད།
