༢༠༠༩ ཕྱི་ཟླ་ ༡༠ ཚེས་ ༡༧ རེས་གཟའ་སྤེན་པ།
༄༅། །བོད་མི་མང་སྤྱི་འཐུས་ཀྱི་ཚོགས་གཙོ་ཟུར་པ་སྐུ་གཤེགས་ནུབ་པ་ཆོས་གྲགས་རྒྱ་མཚོ་མཆོག་ནི་ཕྱི་ལོ་ ༡༩༥༡ ལོར་ངམ་རིང་རྫོང་ཁོངས་ཀྱི་ཨེ་ཉིན་དཀར་དུ་འཁྲུངས་པ་དང་ཕྱི་ལོ་ ༡༩༥༩ ལོར་རྒྱ་གར་ལ་བཙན་བྱོལ་དུ་ཕེབས་ནས་མ་སུ་རི་གཏན་སློབ་ནང་སློབ་སྦྱོང་གནང་། དེ་ནས་ཝར་ཌྷ་བོད་ཀྱི་ཆེ་མཐོའི་གཙུག་ལག་སློབ་གཉེར་ཁང་དུ་སྲོལ་རྒྱུན་སློབ་གཉེར་གནང་བ་དང་ཆབས་ཅིག་ཝར་ཌྷ་ནས་བོད་རང་དབང་བདེན་པའི་ལས་འགུལ་འགོ་འཛུགས་སྐབས་འགན་རྐང་ལེན་གནང་མཁན་གྱི་གྲས་ཤིག་ཡིན་པ་དང་དེ་བཞིན་མཐོ་སློབ་ཀྱི་སློབ་ཕྲུག་བདེ་དོན་ཚོགས་པའི་ཚོགས་གཙོའི་འགན་ཡང་བཞེས་ཡོད། དེ་ནས་ལྡི་ལི་མཐོ་སློབ་ཏུ་སློབ་གཉེར་གནང་བ་དང་སྦྲགས་ལྡི་ལི་ས་གནས་ཚོགས་ཆུང་གི་ཚོགས་གཙོ་དང་མཐོ་སློབ་ཀྱི་རྒྱལ་སྤྱིའི་སློབ་ཕྲུག་ཚོགས་པའི་སློབ་སྟོན་པ་གནང་མྱོང་ཡོད། སྤྱི་འཐུས་སྐབས་བདུན་པའི་དབུས་གཙང་འཐུས་མི་དང་བཞུགས་སྒར་འཕགས་བོད་མཛའ་འབྲེལ་ཚོགས་པའི་ཚོགས་གཙོ་དང་པོའི་མཚན་གནས་བཞེས་ཡོད། ཕྱི་ལོ་ ༡༩༧༩ ལོར་བོད་མི་མང་སྤྱི་འཐུས་ལྷན་ཚོགས་ནང་སྔ་འགྱུར་རྙིང་མའི་འཐུས་མིར་འདེམས་ཐོན་བྱུང་བ་དང་སྦྲགས་སྤྱི་འཐུས་ལྷན་ཚོགསཀྱིི་ཚོགས་གཞོན་དང་། དེ་རྗེས་ཚོགས་གཙོའི་ཐུགས་འགན་ཡང་བཞེས་ཡོད། སྐུ་གཤེགས་དམ་པ་ཁོང་ནས་ཕྱི་ལོ་ ༡༩༩༠ བར་རང་གཞུང་ལ་ལྷག་བསམ་རྣམ་དག་གི་སྒོ་ནས་སྲི་ཞུའི་ཞབས་ཕྱི་ཞུས་ཡོད་པ་རེད། ཕྱི་ལོ་ ༡༩༩༢ ལོར་ཨ་རི་ལོ་སི་ཨེན་ཇི་ལེ་སིར་ཕེབས་ནས་དགོངས་པ་མ་རྫོགས་བར་རྙིང་དགོན་དོན་གྲུབ་གླིང་གི་འཛིན་སྐྱོང་ཕྱག་ལས་གནང་ཡོད། ཕྱི་ལོ་ ༢༠༠༩ ཟླ་ ༡༠ ཚེས་ ༡༣ ཉིན་སྒང་ཏོག་ཏུ་དགོངས་པ་རྫོགས་པའི་ཡིད་སྐྱོའི་གནས་ཚུལ་རང་གཞུང་བཀའ་ཤག་གིས་གསན་འཕྲལ་ཐུགས་ཕམ་ཆེན་པོས་དམ་པ་དེ་ཉིད་ཀྱི་ཆེད་ཕྱི་ཚེས་ ༡༧ ཉིན་དབུས་ལས་ཁུངས་ཁག་གི་སྲི་ཞུ་བ་ཡོངས་ནས་ཁོང་ལ་མྱ་ངན་མཚོན་སླད་ཆུ་ཚོད་ ༢།༡༥ ནས་ལས་བྱེད་གསོལ་ཚིགས་ཁང་གི་ཡང་སྟེང་ཚོགས་ཁང་དུ་ལྷན་འཛོམས་ཀྱིས་ཐོག་མར་དཔལ་ལྡན་བཀའ་བློན་ཁྲི་ཚབ་ཆོས་རིག་བཀའ་བློན་མཆོག་གིས་དམ་པ་ཁོང་གི་ལོ་རྒྱུས་སྙིང་བསྡུས་ངོ་སྤྲོད་གྲུབ་མཚམས་མྱ་ངན་གུས་འདུད་སྐར་མ་གཅིག་གནང་བསྟུན་ཆུ་ཚོད་ ༣།༡༥ བར་བསྔོ་སྨོན་གསོལ་འདེབས་གནང་བ་དང་ཆབས་ཅིག་གདུང་སེམས་མཉམ་སྐྱེ་མཚོན་སླད་དབུས་ལས་ཁུངས་ཁག་སྒོ་བརྒྱབ་པ་བཅས་ཀྱི་གནས་བསྡུས་སུ།
