༢༠༠༩ ཕྱི་ཟླ་ ༡༠ ཚེས་ ༩ རེས་གཟའ་པ་སངས།
༄༅། །ཕྱི་ལོ་ ༢༠༠༩ ཟླ་ ༡༠ ཚེས་ ༩ ཉིན་མེས་དབོན་གཙུག་ལག་དཔེ་སྟོན་སློབ་གྲྭ་དབུ་བརྙེས་ནས་ལོ་ངོ་བཞི་འཁོར་བ་དང་དུས་མཚུངས་རང་ཅག་བོད་མི་རྣམས་བཙན་བྱོལ་དུ་འབྱོར་ནས་མི་ལོ་ཧྲིལ་པོ་ ༥༠ འཁོར་བར་རྒྱ་གར་གཞུང་མང་ལ་བཀའ་དྲིན་རྗེས་དྲན་སླད་དུས་དྲན་མཛད་སྒོ་སྲུང་བརྩི་ཞུས་
ཡོད། དེ་ཡང་སྔ་དྲོ་ཆུ་ཚོད་ ༡༠།༠༠ པའི་ཐོག་དཔེ་སྟོན་སློབ་གྲྭའི་མདུན་ཐང་དུ་དགེ་ལས་སློབ་ཕྲུག་དང་། དེ་བཞིན་སློབ་ཕྲུག་གི་ཕ་མ་བཅས་འདུ་འཛོམས་ཐོག་དགེ་ཆེ་ནས་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ལ་ཕེབས་བསུ་དང་། དེ་རྗེས་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པའི་རྒྱལ་གླུ་ཕུལ་བ་དང་། དེ་རྗེས་སློབ་ཕྲུག་ཕོ་མོ་བརྒྱ་ལྷག་ནས་རྒྱ་གར་གཞུང་མང་ལ་ལེགས་གསོའི་མཉམ་གཞས་རྒྱ་གར་ལ་ཐུགས་རྗེ་ཆེ་ཞེས་པ་བཏང་། དེ་ནས་དགེ་ཆེ་ནས་མཛད་སྒོ་ངོ་སྤྲོད་ཀྱི་གསུང་བཤད་གནང་གྲུབ་མཚམས་སློབ་ཕྲུག་ཚོས་རྟེན་འབྲེལ་མཚོན་ཆེད་བཀྲ་ཤིས་ཞོལ་པ་འཁྲབ་སྟོན་དང་། སྔོན་འགྲོའི་སློབ་མ་རྣམས་ནས་ཞབས་གཞས་དང་མཚན་ཉིད་རིག་པའི་རྟགས་གསལ་རྩོད་རྗེས་ལོ་ངོ་ལྔ་བཅུ་འཁོར་བའི་དགའ་སྐྱོའི་དྲན་གསོ་ཞེས་པའི་གཏམ་བརྗོད་སོགས་འཁྲབ་སྟོན་བྱས་ཡོད། དེ་རྗེས་སྐུ་མགྲོན་གཙོ་བོ་མཆོག་ནས་གསུང་བཤད་གནང་གསལ། དེ་རིང་ནི་མེས་དབོན་དཔེ་སྟོན་གཙུག་ལག་སློབ་གྲྭ་འགོ་བཙུགས་ནས་ལོ་བཞི་འཁོར་བའི་ཉིན་མོ་ཞིག་ཡིན། ངས་ཐོག་མར་དགེ་ལས་སློབ་ཕྲུག་རྣམས་ལ་འཚམས་འདྲིའི་བཀྲིས་བདེ་ལེགས་ཞུ་གི་ཡོད། ད་ལྟ་གོང་དུ་སློབ་མ་རྣམས་ནས་བོད་གཞས་ལ་སོགས་ཡག་པོ་བཏང་སོང་། དེ་དག་འོད་སྡེར་ལྟ་བུ་བཟོས་པ་ཡིན་ན་སློབ་གྲྭར་གཞན་ལ་ཡང་དཔེ་སྟོན་ལྟ་བུ་ཞིག་ཡོང་གི་རེད། དེ་བཞིན་དཔེ་སྟོན་སློབ་གྲྭར་བོད་ཀྱི་ཐུན་མོང་མ་ཡིན་པའི་རིག་གཞུང་གཙོ་བོར་འགྱུར་བའི་དབྱིན་ཡིག་སློབ་ཀྱི་ཡོད་པ་དང་། ལྷག་པར་དུ་ད་ལྟ་འདིར་སློབ་མ་རྣམས་ནས་མཉམ་གཞས་རྒྱ་སྐད་ཐོག་ནས་ཕ་མའི་བཀའ་དྲིན་ཞེས་པ་དེ་ཡག་པོ་ཞིག་བཏང་སོང་། ཕྱི་ཕྱོགས་ནས་དཔེ་སྟོན་སློབ་གྲྭར་རྒྱ་ཡིག་སློབ་ཀྱི་ཡོད་པ་རེད་ཅེས་གླེང་སློང་ཡོད་ཀྱང་མི་དང་མི་བར་གོ་རྟོགས་སེལ་རྒྱུར་སྐད་ཡིག་འདྲ་མིན་ཤེས་རྒྱུ་དེ་ནི་གལ་ཆེན་པོ་རེད། སྤྱིར་བཏང་ཤེས་བྱའི་གནས་གང་ཞིག་ཡིན་རུང་ང་ཚོས་སྦྱོང་དགོས་པ་ནི་གལ་ཆེན་པོ་ཡིན། དགེ་རྒན་རྣམས་ཀྱིས་བོད་མི་རིགས་ལ་གནའ་སྔ་མོ་ཡོད་པའི་ཡ་རབས་དང་གོམས་གཤིས་བཟང་པོ་དེ་དག་ཉམས་པ་སོར་ཆུད་དང་མ་ཉམས་གོང་འཕེལ་ཡོང་སླད་སློབ་ཕྲུག་ཚོར་བྱམས་བརྩེའི་སྒོ་ནས་སློབ་ཁྲིད་གནང་རྒྱུ་དང་ལམ་སྟོན་གང་མང་གནང་རོགས་ཞེས་རེ་སྐུལ་ཞུ་གི་ཡོད། ང་ཚོ་བཙན་བྱོལ་ལ་གྱར་ནས་ལོ་ལྔ་བཅུ་ཕྱིན་ཡང་སྤྱིར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་མཛད་པ་འཕྲིན་ལས་དང། ཡང་སྒོས་བོད་རྒྱ་ཆེའི་མི་མང་གིས་ཞུམ་པ་མེད་པའི་སྙིང་སྟོབས་ལ་བརྟེན་ནས་ད་བར་བོད་དོན་བདེན་པའི་འཐབ་རྩོད་ལ་འཛམ་གླིང་རྒྱལ་ཁབ་མང་པོ་ཞིག་ནས་རྒྱབ་སྐྱོར་གནང་དང་གནང་མུས་རེད། དེར་བརྟེན་སློབ་ཕྲུག་དང་དགེ་རྒན་རྣམ་པས་བོད་མི་རིགས་ཀྱི་ངོ་བོ་དང་རིག་གཞུང་མ་བརླག་པར་རྒྱུན་འཛིན་བྱེད་གལ་ཆེན་པོ་ཡིན་སྐོར་སོགས་གསུང་བཤད་གནང་། སློབ་གྲྭ་འདི་ནི་སྐབས་བཅུ་གསུམ་པའི་བོད་མི་མང་སྤྱི་འཐུས་གྲོས་ཚོགས་ཚོགས་དུས་བརྒྱད་པའི་སྐབས་སྤྱི་མོས་ཐོག་གཏན་འབེབས་གནང་བའི་བཙན་བྱོལ་བོད་མིའི་གཞི་རིམ་གྱི་ཤེས་ཡོན་སྲིད་བྱུས་ཀྱི་སྙིང་དོན་ལག་བསྟར་བྱེད་ཆེད་ཐོག་མར་ཤེས་རིག་ལས་ཁུངས་དང་། སམ་བྷོ་ཊ་སྤྱི་ཁྱབ་ཡིག་ཚང་གཉིས་ནས་ཐུགས་འགན་ཆེ་བཞེས་ཀྱིས་ཕྱི་ལོ་ ༢༠༠༥ ཟླ་ ༡༠ ཚེས་ ༡༠ ཉིན་གསར་འཛུགས་བྱས་པ་ཞིག་ཡིན་པ་དང་། ད་ལྟའི་ཆར་སློབ་མ་གྲངས་ ༡༧༧ དང་དགེ་ལས་གྲངས་ ༣༠ ཡོད་པ་བཅས་ཀྱི་གནས་བསྡུས་སུ།།
