༢༠༠༩ ཕྱི་ཟླ་ ༡༠ ཚེས་ ༡༧ རེས་གཟའ་སྤེན་པ།
འདི་གར་ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། སྤྱི་ལོ་ ༢༠༠༩ ཟླ་ ༡༠ ཚེས་ ༡༣ ཉིན་གདན་ས་བཀྲ་ཤིས་ལྷུན་པོའི་སྔགས་ཆེན་ཞལ་སྔ་ནས་རྗེ་བཙུན་བློ་བཟང་ཆོས་གྲགས་དཔལ་བཟང་པོ་མཆོག་བོད་ཀྱི་རྒྱལ་ས་ལྷ་སར་དགོངས་པ་ཞི་དབྱིངས་སུ་ཐིམས་འདུག སྔགས་ཆེན་ཞལ་སྔ་ནས་མཆོག་ནི། གཞིས་རྩེ་གྲོང་ཁྱེར་དང་ཁད་ཉེ་བའི་ལྷོ་ཕྱོགས་ལྕགས་ཞེས་པའི་ལུང་པར་སྐུ་འཁྲུངས་ཤིང་། མཚན་ལ་སྤེན་པ་ཞེས་ཞུ། སྐུ་ན་ཆུང་ནས་གདན་ས་བཀྲ་ཤིས་ལྷུན་པོར་རབ་ཏུ་བྱུང་ཞིང་ཚད་ལྡན་དགེ་བའི་བཤེས་གཉེན་དུ་མ་བསྟེན་ནས་ཐོས་བསམ་དཔྱིས་ཕྱིན་པར་མཛད་དེ་མཁས་པའི་གྲགས་པ་ཐོབ། དམངས་གཙོའི་བཅོས་སྒྱུར་དང་རིག་གསར་སྐབས་སྐུ་ངལ་ཚད་མེད་བྱུང་ཞིང་ལྷག་པར་རིག་གསར་སྐབས་བཙོན་དུ་བཞུགས་དགོས་བྱུང་།
སྤྱི་ལོ་ ༡༩༨༥ ལོར་༸པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་ནས་སྔགས་ཆེན་དུ་བསྐོ་བཞག་གནང་བ་ནས་གདན་སའི་བཤད་སྒྲུབ་ཀྱི་འཁུར་ལོ་མང་བཞེས་ཤིང་། དགེ་ལྡན་བསྟན་པའི་བདག་པོའི་སྐུར་བཞེངས་ནས་རིས་མེད་དད་ལྡན་སྐྱེ་བོ་རྣམས་ལ་ཟབ་རྒྱས་ཆོས་ཀྱི་འཁོར་ལོ་རྒྱུན་ཆད་མེད་པར་བསྐོར། ༸པཎ་ཆེན་སྐུ་ཕྲེང་བཅུ་པ་ཞིང་ལ་ཕེབས་རྗེས་ཡང་སྲིད་རྩད་གཅོད་ཚོགས་ཆུང་གི་ཚོགས་མིའི་གྲས་ཤིག་ཡིན་པ་དང་། སྤྱི་ལོ་ ༡༩༩༥ ལོར་༸པཎ་ཆེན་རིན་པོ་ཆེའི་ཡང་སྲིད་ཀྱི་དོན་རྐྱེན་སྐབས་དགེ་འདུན་ཆོས་ཀྱི་ཉི་མ་༸པཎ་ཆེན་རིན་པོ་ཆེའི་ཡང་སྲིད་ཡིན་པའི་སྒྲུབ་བྱེད་མཐར་བཀག་གནང་རྐྱེན། རྒྱ་གཞུང་གིས་སྔགས་པ་གྲྭ་ཚང་གི་ཁྲི་ཐོག་ནས་ཕུད་དེ་གཞིས་རྩེར་བཀག་ཉར་བྱས། གཞིས་རྩེའི་སེར་སྐྱ་མི་མང་གིས་གསང་བའི་ཐོག་གསུང་ཆོས་དང་བཀའ་སློབ་ཞུ་བ་སོགས་ལ་བརྟེན། གཞིས་རྩེར་ཡང་བཞུགས་མ་བཅུག་པར་ལྷ་སར་གདན་དྲངས་ཏེ་བཀག་ཉར་འོག་དུས་ཚོད་གང་མཚམས་བཞུགས། དེ་རྗེས་ར་མོ་ཆེ་གཙུག་ལག་ཁང་དང་འབྲེལ་བ་བྱུང་སྟེ་རིམ་པས་དགོན་དེའི་ཁྲི་ལ་ཕེབས་ནས་སྔར་བཞིན་བསྟན་པའི་བྱ་བ་རྒྱ་ཆེར་མཛད་དེ། ལྷ་ས་ཁུལ་དུ་གསུང་ཆོས་གནང་མཁན་མེད་པའི་སྟོང་ཆ་ཁ་གསབ་མཛད་ཅིང་། བོད་ཀྱི་གདན་ས་ཆེན་པོ་བཞིས་གཙོས་བོད་ཡུལ་སྟོད་སྨད་བར་གསུམ་གྱི་དད་ལྡན་སེར་སྐྱ་ཁྲི་ཕྲག་དུ་མར་ཟབ་རྒྱས་ཆོས་ཀྱི་འཁོར་ལོ་རྒྱུན་ཆད་མེད་པར་བསྐོར། ར་མོ་ཆེའི་ཇོ་བོར་གསེར་གྱི་དབུ་དཔྲོག་ཕུལ་བ་དང་བོད་སྟོད་སྨད་བར་གསུམ་གྱི་དགེ་འདུན་གྱི་སྡེ་ལ་བསྙེན་བཀུར་གནང་བ་སོགས་བསྟན་པའི་མིག་རྒྱན་དུ་འོས་པའི་མཛད་པ་དུ་མ་བསྐྱངས། སྤྱི་ལོ་ ༢༠༠༩ ལོ་འགོར་རང་གི་གདན་སར་ཐེངས་གཅིག་ཕེབས་བཅུག སྐུ་གཤེགས་སྐབས་དགུང་གྲངས་བརྒྱད་ཅུ་གྱ་ལྔ་ལ་ཕེབས་ཡོད། སྔགས་ཆེན་ཞལ་སྔ་ནས་མཆོག་ནི། ཐུགས་དྲང་ཚུགས་ལྡན་ཞིང་ཐུགས་ལ་གང་དགོངས་གསུང་ཕོད་པའི་སྙིང་སྟོབས་ལྡན་པ་དང་། ༸པཎ་ཆེན་རིན་པོ་ཆེའི་ཡང་སྲིད་རྩད་འཚོལ་གནང་སྐབས་ནག་ཆུ་ལྷ་རིར་༸དགེ་འདུན་ཆོས་ཀྱི་ཉི་མ་དང་དངོས་སུ་མཇལ་ཏེ། སྐུ་ཚེ་སྔོན་མའི་བག་ཆགས་ཀྱིས་ཕན་ཚུན་ཐུགས་འདྲིས་ཡོད་པ་ལྟ་བུས་གསུང་གླེང་དུ་མ་གནང་ཞིང་། སྔགས་ཆེན་རིན་པོ་ཆེའི་སྐུ་པང་དུ་བཞུགས་ཏེ་ཡུད་ཙམ་གཟིམ་པ་སོགས་ཐུགས་སྣང་དགེ་བའི་རྟགས་མཚན་བསམ་གྱིས་མི་ཁྱབ་པ་བྱུང་ཡོད། མདོར་ན་ཁོང་ནི་༸པཎ་ཆེན་སྐུ་ཕྲེང་བཅུ་གཅིག་པ་རྩད་འཚོལ་གནང་མཁན་དང་མཇལ་མྱོང་མཁན་གྱི་མི་ཆེས་ཉུང་ངུའི་ནང་ནས་གཅིག་ཡིན་པ་བཅས་ཀྱི་ངོ་སྤྲོད་མདོར་བསྡུས་སུ།།
