༢༠༠༩ ཕྱི་ཟླ་ ༡༠ ཚེས་ ༨ རེས་གཟའ་ཕུར་བུ།
༄༅། །ཕྱི་ལོ་ ༢༠༠༩ ཟླ་ ༡༠ ཚེས་ ༧ ཉིན་བོད་ཀྱི་གཞོན་ནུ་ལྷན་ཚོགས་དབུ་བརྙེས་ཏེ་མི་ལོ་༤༠ འཁོར་བའི་དུས་དྲན་སྲུང་བརྩིའི་མཛད་སྒོ་བོད་གཞུང་ཟློས་གར་རྩེད་ཐང་དུ་ཚོགས་ཡོད་པ་རེད། གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༡།༠༠ མཛད་སྒོའི་ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་དང་དབུས་
གཞོན་ནུའི་ཚོགས་གཙོ། རྒྱུན་ལས་རྣམ་པ། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། རྡ་ས་ས་གནས་གཞོན་ནུའི་རྒྱུན་ལས་གསར་རྙིང་བཅས་ལྷན་ཞུགས་ཀྱིས་ཐོག་མར་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས་བོད་མི་རིགས་དང་རྒྱལ་ཁབ་ཀྱི་
ཆེད་དུ་རང་སྲོག་བློས་བཏང་བའི་རྒྱལ་གཅེས་དཔའ་པོ་ཕོ་མོ་རྣམས་ཀྱི་མཛད་རྗེས་ལ་གུས་བཀུར་མཚོན་ཆེད་ངག་བཅད་སྐར་མ་གཅིག་གནང་བ་དང་། དེ་ནས་ས་གནས་བོད་གཞུང་ཟློས་གར་གཞོན་ནུའི་རུ་ཁག་ནས་གཞོན་ནུའི་མཐུན་གཞས་བཏང་གྲུབ་མཚམས་རྡ་ས་ས་གནས་གཞོན་ནུའི་ཚོགས་གཙོ་བསམ་གཏན་ལྷུན་གྲུབ་ལགས་ནས་དུས་དྲན་ངོ་སྤྲོད་གསུང་བཤད་གནང་། དེ་རྗེས་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཆོག་ནས་ས་གནས་གཞོན་ནུའི་སྐབས་བཅུ་གསུམ་དང་བཅུ་བཞིའི་རྒྱུན་ལས་རྣམས་ལ་བཀྲ་ཤིས་མཇལ་དར་གནང་བ་དང་། དེ་ནས་བོད་ཀྱི་གཞོན་ནུའི་ཚོགས་གཙོ་ཚེ་དབང་རིག་འཛིན་ལགས་ནས་དབུས་སྤྱི་ཁྱབ་ལས་ཁང་ནས་སྤེལ་བའི་ཡོངས་ཁྱབ་གསུང་བཤད་སྒྲོག་སྦྱངས་གནང་དོན། དེ་རིང་བོད་ཀྱི་གཞོན་ནུ་ལྷན་ཚོགས་དབུ་བརྙེས་ནས་མི་ལོ་ཧྲིལ་པོ་ ༤༠ འཁོར་བའི་དུས་ཚིགས་འདིར་ཐོག་མར་ད་བར་བོད་རང་བཙན་གྱི་དོན་དུ་རྩ་ཆེའི་སྐུ་སྲོག་བློས་བཏང་བའི་རྒྱལ་གཅེས་དཔའ་བོ་དཔའ་མོ་རྣམས་ལ་བོད་ཀྱི་གཞོན་ནུ་ལྷན་ཚོགས་སྤྱི་ཁྱབ་ལས་ཁང་ནས་གུས་འདུད་ཆེན་པོས་བླ་ན་མེད་པའི་བཀའ་དྲིན་རྗེས་དྲན་ཞུ་རྒྱུ་དང་། གཞིས་བྱེས་ཁ་བྲལ་ནས་མི་ལོ་ཧྲིལ་པོ་ ༥༠ འཁོར་བའི་དུས་མཚམས་འདིར་ཐག་རིང་གཞན་ཡུལ་ནས་ང་ཚོས་གཞིས་ལུས་སྤུན་ཟླ་རྣམས་ཧ་ཅང་དྲན་བཞིན་པའི་ཐོག་ནས་གཞིས་ལུས་བོད་རིགས་སྤུན་ཟླ་ཡོངས་ལ་མཛའ་སེམས་ཟབ་མོས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། རྒྱ་གར་གཞུང་དང་མང་ཚོགས་ཀྱི་གཙོས་ད་བར་བོད་དོན་ཐོག་བདེན་རྒྱབ་གནང་མཁན་ཡོངས་ལ་དེ་རིང་གོ་སྐབས་འདི་བརྒྱུད་བོད་མི་འདས་གསོན་ས་ཡ་དྲུག་གི་ཚབ་ཞུས་ཏེ་སྙིང་དབུས་ནས་བཀའ་དྲིན་ཆེ་ཞུ་རྒྱུ་དང་། འབྱུང་འགྱུར་ཡང་བོད་དོན་ལ་བདེན་རྒྱབ་སྔར་ལྷག་ཡོང་བའི་རེ་འབོད་ཞུ་གི་ཡོད། ཅེས་སོགས་ཀྱི་གསུང་བཤད་གྲུབ་རྗེས་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཆོག་གིས་གསུང་བཤད་གནང་དོན། དེ་རིང་བོད་ཀྱི་གཞོན་ནུ་ལྷན་ཚོགས་དབུ་བརྙེས་ནས་ལོ་ངོ་བཞི་བཅུ་འཁོར་བའི་དུས་དྲན་མཛད་སྒོ་སྲུང་བརྩིར་ཕེབས་མི་རྣམ་པ་ལྷན་རྒྱས་ལ་ངས་བཀྲིས་བདེ་ལེགས་ཞུ་གི་ཡོད། བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་ཀྱི་ངོས་ནས་ད་བར་བོད་ཀྱི་རྩ་དོན་ཐོག་ལ་ཕྱག་ལས་གནང་བ་དེ་དག་ལ་རྗེས་སུ་ཡི་རང་ཞུ་རྒྱུ་ཡིན། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་དང་དབུས་སྤྱི་ཁྱབ་རྒྱུན་ལས་རྣམ་པ། དེ་བཞིན་རྡ་ས་ས་གནས་ཀྱི་རྒྱུན་ལས་གསར་རྙིང་གཉིས་དང་། ཚོགས་མི་ཚང་མ་ལ་འདི་གར་མི་མང་མང་པོ་ཞིག་ཕེབས་འདུག་ཁོང་རྣམ་པ་ཚང་མའི་ཚབ་ཞུས་ནས་ཁྱེད་རྣམ་པར་འཚམས་འདྲི་ཞུ་པ་དང་ཆབས་ཅིག་ད་བར་ཕྱག་ལས་མང་པོ་ཞིག་གནང་ཡོད་ཀྱང་ད་ལྟའི་ཆར་ང་ཚོར་ལས་ཀ་བྱེད་རྒྱུ་དེ་ལས་མང་བ་ཞིག་ལྷག་ཡོད་པ་རེད། ང་ཚོའི་བོད་རྒྱལ་ཁབ་དེ་རྒྱ་གཞུང་གི་འོག་གནས་ཡོད་པ་དེ་ནི་དངོས་ཡོད་ཀྱི་གནས་ཚུལ་ཞིག་རེད། དེ་བཞིན་༸གོང་ས་མཆོག་གིས་གཙོས་ང་ཚོ་གཞན་ཡུལ་དུ་སྐྱབས་བཅོལ་ལ་བསྡད་ནས་ལོ་ངོ་ལྔ་བཅུ་འགྲོ་གི་ཡོད། ལྷག་པར་དུ་ཕྱི་ལོ་ ༢༠༠༨ ལོར་གཞིས་ལུས་བོད་མི་དམངས་ཀྱི་སྙིང་སྟོབས་ཞུམ་མེད་ཀྱི་ཐོག་ནས་བོད་རྒྱལ་ཁབ་དང་མི་རིགས་ཀྱི་ཆེད་དུ་ཞི་བའི་སྒེར་ལངས་ཆེན་པོ་ཞིག་བྱས་ཡོད་པ་རེད། ད་ལྟའི་ཆར་རྒྱལ་གཅེས་པ་ཁོང་རྣམ་པ་ནི་རྒྱ་གཞུང་གི་སྡུག་སྦྱོང་མནར་གཅོད་མྱངས་དང་མྱོང་མུས་སུ་གནས་ཡོད།
དེར་བརྟེན་ང་ཚོ་རང་དབང་ལུང་པའི་ནང་གནས་པའི་བོད་མི་ཚང་མས་བོད་རྒྱལ་ཁབ་དང་མི་རིགས་ཀྱི་ཆེད་དུ་ལས་ཀ་བྱེད་དགོས་པ་ཡིན། ང་ཚོ་ཐབས་ལམ་གང་ཞིག་བརྒྱུད་ནས་བོད་ཀྱི་བདེན་པའི་འཐབ་རྩོད་བྱས་ཀྱི་ཡོད་རུང་། གང་ལྟར་ང་ཚོའི་ཁ་གཏད་ངོ་ཤེས་པའི་ཐོག་ནས་འཐབ་རྩོད་གནང་དགོས་པ་ཞིག་ཡིན། དཔེར་ན། ང་ཚོ་གནས་ཡུལ་རྒྱ་གར་ནང་ལ་ཆ་བཞག་ནའང་། ཐབས་ལམ་འདྲ་མིན་སྤྱད་ནས་རྒྱ་གར་རང་དབང་ཐོབ་པ་རེད་འདུག་མ་གཏོགས་ཐབས་ལམ་གཅིག་ཁོ་ནར་བརྟེན་ནས་འཐབ་རྩོད་བྱས་པ་ཞིག་རེད་མི་འདུག ཁ་ཞེ་གཉིས་མེད་ཀྱི་ཐོག་ནས་ལས་འགུལ་སྤེལ་དགོས། དབུ་མའི་ལམ་དང་། རང་བཙན་ག་རེ་ཡིན་ནའང་རྡོག་ལ་སྒྲིལ་ཏེ་ལས་འགུལ་སྤེལ་རྒྱུ་གལ་ཆེན་པོ་ཡིན། དེ་སྔ་རྒྱ་གར་དབྱིན་ཇིའི་དབང་བསྒྱུར་སྐབས་ཀྱི་འབྱུང་རབས་ནང་རྡོག་རྩ་གཅིག་སྒྲིལ་བྱུང་མེད་པའི་ལོ་རྒྱུས་ཀྱི་དངོས་དོན་དྲངས་ཏེ་བོད་ཕྱི་དང་ནང་གཉིས་རྡོག་ལ་སྒྲིལ་རྒྱུར་བོད་ནང་དང་རྒྱ་གར་དུ་སློབ་གཉེར་སོགས་ལ་ཕེབས་པ་ཚོར་འབྲེལ་བ་བྱེད་རྒྱུ་དེ་གལ་ཆེན་ཡིན་སྐོར་སོགས་དང་། རྒྱ་མིའི་ངོས་ནས་ང་ཚོ་དཀྲུགས་རྒྱུ་དང་གཏོར་རྒྱུའི་འབད་བརྩོན་བྱེད་ཀྱི་ཡོད་པས་ང་ཚོས་ནམ་ཡང་གཟབ་ནན་བྱེད་དགོས་པའི་སྐོར་སོགས་ཀྱི་ལ་གསུང་བཤད་གྲུབ་མཚམས་གཞོན་ནུའི་ཉིན་མོར་དམིགས་བསལ་ལག་རྩེད་སྤོ་ལོའི་འགྲན་བསྡུར་གྱི་མཐའ་མ་དེ་བཞིན་བུ་མོའི་རུ་ཁག་གཉིས་དང་། བུའི་རུ་ཁག་གཉིས་བསྡུར་ཏེ་མི་མང་རྣམས་ལ་གཟིགས་མོ་ཕུལ་རྗེས་དགོང་དྲོ་ཟློས་གར་ཚོགས་ཁང་དུ་གཞོན་ནུའི་རུ་ཁག་འགའ་ནས་གཞས་སྣ་འཁྲབ་སྟོན་ཞུས་རྗེས་ས་གནས་གཞོན་ནུའི་དྲུང་ཆེ་ངག་དབང་བློ་གྲོས་ལགས་ནས་ཐུགས་རྗེ་ཆེ་ཞུས་ཏེ་གཞོན་ནུའི་ཚོགས་པ་དབུ་བརྙེས་ནས་ལོ་ངོ་བཞི་བཅུ་མཛད་སྒོ་ཡོངས་སུ་ལེགས་གྲུབ་བྱུང་བའི་གནས་བསྡུས་སུ།།
