༢༠༠༩ ཕྱི་ཟླ་ ༡༠ ཚེས་ ༦ རེས་གཟའ་མིག་དམར།
༄༅། །བོད་གཞུང་ཐེ་ཝན་སྐུ་ཚབ་དོན་གཅོད་ཁང་ནས་གནས་ཚུལ་བཏང་འབྱོར་བྱུང་བའི་ནང་འཁོད་དོན། ཕྱི་ལོ་ ༢༠༠༩ ཟླ་ ༡༠ ཚེས་ ༦ ནས་ ༢༤ བར་ཐེ་ཝན་ལྷོ་ཕྱོགས་ཐེ་ནན་གྲོང་ཁྱེར་དུ་ཆགས་པའི་རྒྱལ་གཉེར་གྲན་ཀུང་གཙུག་ལག་སློབ་གྲྭ་ཆེན་མོའི་ནང་བོད་མི་རྣམས་བཙན་བྱོལ་དུ་གྱར་ནས་ལོ་ལྔ་བཅུ་འཁོར་བའི་དུས་དྲན་སྲུང་བརྩིི་འགྲེམས་
སྟོན་ཞིག་བསྐོང་ཚོགས་གནང་ཡོད། དེ་ཡང་འདི་ལོ་ཐེ་ཝན་རྒྱལ་ས་ཐེ་པེ་དུ་ཟླ་ ༧ པའི་ནང་བོད་གཞུང་སྐུ་ཚབ་དོན་གཅོད་ཁང་གིས་འདས་པའི་ལོ་ལྔ་བཅུའི་བཙན་བྱོལ་བོད་མིའི་སྐྱིད་སྡུག་དྲན་གསོའི་འགྲེམས་སྟོན་ཞིག་གོ་སྒྲིག་གནང་བར་ཐེ་ཝན་མི་མང་རྣམས་ནས་དོ་སྣང་ཆེན་པོ་གནང་སྟེ་དུས་ཡུན་ཟླ་བ་གཅིག་ཙམ་ནང་ཁྱོན་མི་གྲངས་ཁྲི་གསུམ་ལྷག་འགྲེམས་སྟོན་ལ་གཟིགས་སྐོར་ཕེབས་ཡོད་
པར་སོང་། ད་རེས་ཕྱི་ཟླ་ ༡༠ པའི་ནང་ལྷོ་ཕྱོགས་གྲོང་ཁྱེར་དུ་ཡང་བསྐྱར་འགྲེམས་སྟོན་གོ་སྒྲིག་ཞུས་ཡོད་པ་དང་། འགྲེམས་སྟོན་དེར་དཔར་རིགས་འདྲ་མིན་སུམ་བརྒྱ་ལྷག་ལ་རྒྱ་ཡིག་གི་ངོ་སྤྲོད་མཉམ་སྦྱར་ཡོད་པ་དང་། གཙོ་བོ་བོད་ཀྱི་རྒྱལ་རབས་ལོ་རྒྱུས་དང་། ༸གོང་ས་མཆོག་གི་མཛད་འཕྲིན། ཆོས་དང་རིག་གཞུང་། འདས་པའི་ལོ་ལྔ་བཅུའི་རིང་བོད་ནང་གི་གནས་སྟངས། བཙན་བྱོལ་བོད་མིའི་མང་གཙོའི་ལམ་ལུགས་དང་བཙན་བྱོལ་བོད་གཞུང་། བཙན་བྱོལ་ནང་ཆོས་སྒར་དང་གཞིས་སྒར་ཚུགས་སྟངས། ཤེས་རིག་གཅེས་སྐྱོང་དེ་བཞིན་བོད་ཀྱི་དངུལ། སྦྲགས་རྟགས་སོགས་རིག་དངོས་ཁག་གཅིག་བཅས་འགྲེམས་སྟོན་གནང་ཡོད། དེ་བཞིན་ཐེ་ཝན་གྲོང་ཁྱེར་གཞན་ཁག་ནང་རིམ་བཞིན་འགྲེམས་སྟོན་དང་བོད་ཀྱི་གློག་བརྙན་སོགས་སྟོན་རྒྱུའི་ལས་རིམ་མུ་མཐུད་གནང་འཆར་ཡོད་པ་སོགས་ཀྱི་གནས་བསྡུས་སུ།
