༢༠༠༩ ཕྱི་ཟླ་ ༡༠ ཚེས་ ༣༡ རེས་གཟའ་སྤེན་པ།
༄༅། །ཕྱི་ལོ་ ༢༠༠༩ ཟླ་ ༡༠ ཚེས་ ༣༡ ཉིན་གྱི་སྔ་དྲོ་ཆུ་ཚོད་ ༧།༣༠ བཞུགས་སྒར་རྡ་སའི་དམངས་ཁྲོད་ཚོགས་པ་བཅུ་ཡིས་གོ་སྒྲིག་འོག་ཐེག་ཆེན་ཆོས་གླིང་གཙུག་ལག་ཁང་དུ་དཔལ་རྒྱལ་བ་ཀརྨ་པ་རིན་པོ་ཆེ་མཆོག་དབུ་བཞུགས་ཐོག་རྡ་སའི་ཉེ་འཁོར་དགོན་སྡེ་ཁག་གི་གྲྭ་བཙུན་དང་སེར་སྐྱ་མི་མང་བརྒྱ་ཕྲག་བརྒལ་བ་འདུ་འཛོམས་གནང་སྟེ་རྒྱ་
གཞུང་གིས་དམར་གསོད་བཏང་བའི་བོད་མི་རྣམས་ཀྱི་ཆེད་བསྔོ་སྨོན་དང་མཆོད་འབུལ་རྒྱ་ཆེ་ཞིག་གནང་འགོ་བཙུགས་ཡོད། དེ་ཡང་རྒྱ་གཞུང་ནས་བོད་མི་རིགས་ཀྱི་བདེ་སྡུག་དང་མངོན་འདོད་ལ་གདེང་འཇོག་སྤུ་ཙམ་མེད་པར་ཉེས་མིང་སྣ་ཚོགས་བཀལ་ཏེ་དྲག་གནོན་དང་བཙོན་འཇུག་ཐ་ན་དམར་གསོད་བཏང་དང་གཏོང་མུས་ཡིན་པ་མ་ཟད། ཉེ་ཆར་ཕྱི་ཚེས་ ༢༠ ཉིན་བོད་རིགས་ན་གཞོན་རང་ལོ་ ༢༧ ལ་སོན་པ་ལྷ་ས་ནས་ཡིན་པའི་བློ་བཟང་རྒྱལ་མཚན་ལགས་དང་། རང་ལོ་ ༢༥ ལ་སོན་པ་སྟག་རྩེ་རྫོང་ཞོལ་ཤང་ནས་ཡིན་པ་ལོ་ཡག་ལགས། དེ་བཞིན་རང་ལོ་ ༢༡ ལ་སོན་པ་ས་སྐྱ་ནས་ཡིན་པ་བུ་མོ་སྤེན་སྐྱིད་ལགས་ཀྱིས་མཚོན་པས་ཉེས་མེད་བོད་མི་མང་དག་ཅིག་རྒྱ་གཞུང་གིས་སྲིད་དབང་སྒེར་གཅོད་འོག་སྐུ་སྲོག་ཤོར་བའི་རྒྱལ་གཅེས་ཁོང་རྣམས་ཚེ་རབས་ཕྲེང་བར་བསགས་པའི་སྡིག་ལྟུང་མཐའ་དག་བྱང་ཞིང་དག་ནས་དལ་རྟེན་བཟང་པོ་རིམ་བརྒྱུད་ཀྱི་སྐུ་བཞི་ཡེ་ཤེས་ལྔ་ལྡན་གྱི་གོ་འཕང་མངོན་དུ་འགྱུར་ཆེད་ཉིན་གསུམ་རིང་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་མཆོད་འབུལ་དང་བསྔོ་སྨོན་གནང་བཞིན་ཡོད་པ་དང་ཉིན་མཐའ་མར་དུས་མིན་རྐྱེན་འདས་སུ་གྱུར་བ་རྣམས་ཀྱི་བདུན་ཚིགས་གཉིས་པ་དང་སྟབས་བསྟུན། བརྒྱུད་སྟོད་གྲྭ་ཚང་ནས་དཔལ་རྡོ་རྗེ་འཇིགས་བྱེད་ཀྱི་བདག་འཇུག་གནང་རྒྱུ་ཡིན་པ་བཅས་ཀྱི་གནས་བསྡུས་སུ།
