༢༠༠༩ ཕྱི་ཟླ་ ༡༠ ཚེས་ ༢༦ རེས་གཟའ་ཟླ་བ།
༄༅། །ཕྱི་ལོ་ ༢༠༠༩ ཟླ་ ༡༠ ཚེས་ ༢༤ ཉིན་བོད་གཞུང་ཕྱི་དྲིལ་ཁོར་ཡུག་སྡེ་ཚན་དང་གངས་དཀར་ཏི་སི་ཁོར་ཡུག་གོ་རྟོགས་ལས་འགུལ་ཁང་། རྡ་ས་ས་གནས་འགོ་འཛིན་གྱི་ཁོར་ཡུག་སྡེ་ཚན་བཅས་ཐུན་མོང་ནས་གོ་སྒྲིག་ཐོག་མེག་གྷན་བོད་ཁྱིམ་ཉིན་སློབ་ཚོགས་ཁང་དུ་གནམ་གཤིས་འགྱུར་ལྡོག་ཐད་རྒྱལ་སྤྱིའི་ཉིན་མོ་སྲུང་བརྩི་ཞུས་ཡོད་པ་རེད།
དེ་ཡང་སྐུ་མགྲོན་གཙོ་བོ་ད
པལ་རྒྱལ་བ་ཀརྨ་པ་རིན་པོ་ཆེ་མཆོག་ལ་ཇི་ལྟར་གསོལ་འདེབས་ཞུས་པ་ལྟར་ཆུ་ཚོད་ ༩།༣༠ ཐོག་ཚོགས་ཁང་དུ་ཆེད་ཕེབས་ཀྱིས་ཐོག་མར་༸རྒྱལ་བའི་སྐུ་པར་མཐོང་གྲོལ་རིན་པོ་ཆེའི་དྲུང་དུ་མར་མེ་ཞལ་འབྱེད་གནང་སྟེ་ཞབས་སྟེགས་སུ་འཁོད་རྗེས་གངས་དཀར་ཏི་སིའི་ཁོར་ཡུག་གོ་རྟོགས་ལས་འགུལ་ཁང་གི་འགན་འཛིན་
ཚེ་རིང་གཡང་སྐྱིད་ལགས་ནས་ལས་རིམ་དབུ་འཛུགས་ཀྱིས་སྐུ་མགྲོན་གཙོ་བོ་མཆོག་དང་ཚོགས་བཅར་བ་ཡོངས་ལ་འཚམས་འདྲིའི་བཀྲིས་བདེ་ལེགས་ཞུས་རྗེས་གསོལ་ཇ་དང་འབྲས་བསིལ་ཕུལ། དེ་ནས་སྐལ་བཟང་རིན་ཆེན་ལགས་ནས་བཟོ་སྐྲུན་གནང་བའི་ཁོར་ཡུག་འགྱུར་ལྡོག་གི་རྗེས་འབྲས་ཞེས་པའི་བརྙན་དཔར་ཞིག་ཀྱང་དེར་བསྡུས་མི་མང་
རྣམས་ལ་བསྟན། དེ་རྗེས་ཕྱི་དྲིལ་ཁོར་ཡུག་སྡེ་ཚན་གྱི་འགན་འཛིན་བསྟན་འཛིན་ནོར་བུ་ལགས་ནས་བོད་དང་འབྲེལ་བའི་གནམ་གཤིས་འགྱུར་ལྡོག་སྐོར་བརྙན་དཔར་བསྟན་པ་དང་ཆབས་ཅིག་ཁོང་ནས་དེ་དག་འགྱུར་ལྡོག་ཕྱིན་པའི་རྒྱུ་རྐྱེན་སོགས་དེར་བསྡུས་མང་ཚོགས་རྣམས་ལ་འགྲེལ་བརྗོད་གནང་། དེ་ནས་རྡ་ས་ས་གནས་འགོ་འཛིན་ཚེ་རིང་ཕུན་ཚོགས་ལགས་ནས་གནམ་གཤིས་འགྱུར་ལྡོག་ཐད་མི་མང་གི་ངོས་ནས་གང་བྱེད་ཐུབ་པའི་སྐོར་ལ་གཏམ་བཤད་གནང་། དེ་ནས་དཔལ་རྒྱལ་བ་ཀརྨ་པ་རིན་པོ་ཆེ་མཆོག་གིས་ཁོར་ཡུག་སྲུང་སྐྱོབ་ཀྱི་གལ་ཆེའི་རང་བཞིན་སྐོར་ལ་གསུང་བཤད་གནང་གསལ། དེ་རིང་འདི་གར་བཅར་བའི་རྣམ་པ་ལྷན་རྒྱས་ལ་ཐོག་མར་ངས་འཚམས་འདྲིའི་བཀྲིས་བདེ་ལེགས་ཞུ་གི་ཡིན། སྤྱིར་བཏང་འཛམ་གླིང་གི་ཁོར་ཡུག་གནས་སྟངས་དང་ཡང་སྒོས་བོད་ཀྱི་ཁོར་ཡུག་གནས་སྟངས་གང་འདྲ་ཡིན་པ་གོང་དུ་འགྲེལ་བརྗོད་གནང་བར་སོང་ཚང་མས་ཤེས་གསལ་རེད། ངོས་ནས་ཁོར་ཡུག་སྲུང་སྐྱོབ་ཀྱི་གལ་ཆེའི་རང་བཞིན་སྐོར་བརྗོད་དགོས་ཀྱང་ངོས་དེ་འདྲའི་ཐོག་སློབ་སྦྱོང་བྱས་ཏེ་ཉམས་མྱོང་ཡོད་མཁན་ཞིག་མིན། འོན་ཀྱང་དེ་རིང་འདི་གར་མང་ཚོགས་མང་པོ་འཛོམས་འདུག་པས་གོ་སྐབས་འདི་བཟུང་སྟེ་ཁོར་ཡུག་སྲུང་སྐྱོབ་སྐོར་ལ་ཚིག་ཁ་ཤས་ཤིག་ཞུས་ན་ཕན་ཐོགས་ཡོང་གི་རེད་བསམ་གྱི་འདུག ང་ཚོ་ཚང་མ་དམ་པའི་ཆོས་ཉམས་སུ་བླངས་ནས་དཀོན་མཆོག་ལ་སྐྱབས་སུ་འགྲོ་མཁན་ཞིག་ཡིན་པ་མ་ཟད། སེམས་ཅན་ཡོངས་ལ་བདེ་བ་ལྡན་རྒྱུའི་རེ་བ་བྱེད་མཁན་ཞིག་ཡིན། འོན་ཀྱང་ང་ཚོའི་བདག་འཛིན་གྱི་བསམ་བློས་དེ་ལྟར་སྒྲུབ་རྒྱུར་བགེགས་བྱེད་ཀྱི་ཡོད། ང་ཚོར་རང་ཉིད་གཅིག་པུར་རང་ཚུགས་ཐུབ་ཀྱི་ཡོད་བསམ་པའི་བསམ་བློ་ལོག་པ་ཞིག་ཡོད་དུས་དེས་རང་གི་དོན་དུ་གཞན་བཀག་ནས་གཞན་གྱི་བདེ་བ་འཕྲོག་རྒྱུ་སོགས་ཀྱི་གནས་ཚུལ་མང་པོ་ཞིག་ཡོང་གི་ཡོད། དོན་དངོས་ཐོག་ང་ཞེས་པ་འདི་ཡང་ང་ཚོའི་ཉེ་འཁོར་གྱི་སྐྱེ་ལྡན་དངོས་པོ་རྣམས་དང་ཁོར་ཡུག་ལ་མ་ལྟོས་པར་ཡོང་མི་ཐུབ་པ་ཞིག་ཡིན། དཔེར་ན། ང་ཚོའི་ཁ་ཟས་དང་གྱོན་གོས་གང་ཞིག་བེད་སྤྱོད་བཏང་རུང་དེ་དག་ཀྱང་དངོས་པོ་གཞན་ལ་བརྟེན་ནས་གྲུབ་ཡོད་པ་མ་ཟད། ཐ་ན་ང་ཚོས་དབུགས་ཤིག་བཏང་ཡང་རྩི་ཤིང་དང་ནགས་ཚལ་སོགས་ཕྱིའི་དངོས་པོ་ནས་བྱུང་བ་མ་གཏོགས་རང་རྒྱུད་གཅིག་པུ་ནས་བྱུང་བ་ཞིག་མིན་པར་ཚན་རིག་པས་ཁུངས་སྐྱེལ་བྱས་ཡོད། ང་ཚོས་༸གོང་ས་མཆོག་གི་བཀའ་ཆོས་ཞུ་བར་བཅར་སྐབས་མགོན་པོ་གང་ཉིད་མཆོག་གིས་ང་ཚོ་ཚང་མ་གཅིག་གིས་གཅིག་ལ་བརྟེན་ནས་གྲུབ་པ་རེད་མ་གཏོགས་སྦྱར་སྡོང་རྐང་གཅིག་ལྟ་བུ་བྱས་ནས་གྲུབ་ཡོད་པ་མ་རེད་ཅེས་བཀའ་སྩལ་བ་དེ་དབུ་མའི་ལྟ་བ་ལྟ་བུ་ཞིག་གསུངས་ཀྱི་འདུག་བསམ་པ་དྲན་སྲིད། དོན་དངོས་སུ་ང་ཚོ་ཚང་མ་རྟེན་ཅིང་འབྲེལ་བ་བྱུང་བའི་ནང་གནས་ཡོད་སྟབས། མི་སྒེར་གྱི་བྱ་སྤྱོད་ཀྱིས་འཛམ་གླིང་འདིར་ཤུགས་རྐྱེན་ཐེབས་ཀྱི་ཡོད། དེ་སང་འཛམ་གླིང་ཐོག་རང་བྱུང་གི་གནོད་འཚེ་ཆུ་ལོག་དང་ཐན་པ་སོགས་ཀྱི་གནས་ཚུལ་ཇེ་མང་ནས་ཇེ་མང་དུ་ཕྱིན་ཏེ་མི་མང་པོ་ཞིག་སྡུག་བསྔལ་གྱི་གནས་སུ་གྱར་ཡོད་པ་ནི་ང་ཚོས་བརྙན་འཕྲིན་དང་རླུང་འཕྲིན་བརྒྱུད་ནས་ཤེས་གསལ་ཡིན། དེ་ལྟ་བུའི་སྡུག་བསྔལ་མཚམས་མ་ཆད་པར་ཡོང་བའི་རྒྱུ་མཚན་གཙོ་བོ་དེ། མིའི་བྱེད་ལས་ལ་བརྟེན་ནས་བྱུང་བ་རེད། ང་ཚོ་མིས་ནོར་འཁྲུལ་ཅན་གྱི་ལས་ཀ་བྱས་ཏེ་འཛམ་གླིང་ཧྲིལ་པོ་ཉེན་ཁའི་ནང་ལ་ལྷུང་རྒྱུའི་མཚམས་ལ་སླེབས་ཡོད། དེེར་བརྟེན་ང་ཚོས་སྤང་བླང་བྱེད་ཀྱི་ཡིན་ཞེས་ཁ་ཙམ་མིན་པར་ཁས་བླངས་ཡོད་ན། སྲོག་ལྡན་ཡོངས་ཀྱི་རྟེན་གཞིར་འགྱུར་བའི་འཛམ་གླིང་འདི་འཕུང་དུ་འཇུག་རྒྱུའི་བྱ་བ་དེ་དག་སྤང་སྟེ་དགེ་བའི་ལས་ལ་འཇུག་དགོས། མདོར་ན། འཛམ་གླིང་འདིར་གནས་པའི་སེམས་ཅན་མཐའ་དག་ལ་བདེ་ཐང་ཡོང་ཆེད་ཁོར་ཡུག་སྲུང་སྐྱོབ་བྱེད་རྒྱུ་ནི་གལ་ཆེན་པོ་ཡིན། ང་ཚོ་མང་ཆེ་བས་ཁོར་ཡུག་སྲུང་སྐྱོབ་བྱེད་འདོད་ཡོད་པ་རེད། དེར་བརྟེན་ང་ཚོ་ཚང་མས་ཕྱར་གྲུ་མཉམ་འདེགས་མ་བྱས་ན་མི་རེ་ཟུང་གིས་ལྷག་བསམ་ཆེན་པོའི་སྒོ་ནས་ལས་དོན་སྒྲུབ་ཀྱང་དཀའ་ངལ་མ་ལུས་པ་སེལ་རྒྱུ་ནི་དཀའ་ལས་ཁག་པོ་རེད། ཉེ་སྔོན་ནས་བཟུང་འཛམ་གླིང་འདིའི་སྟེང་ལ་འབྱུང་བའི་གནོད་འཚེ་མང་པོ་ཞིག་བྱུང་ཡོད་པ་དེ་དག་ཉམས་མྱོང་བསགས་ནས་མ་འོངས་དེ་འདྲ་མི་ཡོང་བའི་སླད་ང་ཚོས་ཁོར་ཡུག་སྲུང་སྐྱོབ་ཐད་ཁ་ཙམ་མིན་པར་ལས་དོན་བསྒྲུབ་དགོས་པ་གལ་ཆེན་པོ་རེད། དེ་བཞིན་ཚན་རིག་གཞིར་བཞག་བྱས་ནས་བཤད་ན། རྩི་ཤིང་ནགས་ཚལ་དེ་དག་གིས་སྲོག་ལྡན་ཡོངས་རྫོགས་ལ་ཟས་སྨན་སོགས་མཁོ་སྤྲོད་བྱེད་ཀྱི་ཡོད་པ་མ་ཟད། ང་ཚོར་འཚོ་རླུང་ཡང་མཁོ་སྤྲོད་བྱེད་ཀྱི་ཡོད། དེར་བརྟེན་ཁོར་ཡུག་སྲུང་སྐྱོབ་བྱེད་རྒྱུ་ནི་ཤིན་ཏུ་ནས་གལ་འགངས་ཆེན་པོ་ཞིག་ཡིན་པ་སོགས་ཀྱི་སྐོར་གསུང་བཤད་གནང་རྗེས་དཔལ་རྒྱལ་བ་ཀརྨ་པ་རིན་པོ་ཆེ་མཆོག་ནས་བསྣམས་ཕེབས་པའི་ཉི་མའི་ཁྱིམ་བརྒྱུད་སྐོར་གྱི་བརྙན་དཔར་ཞིག་དེར་བསྡུས་མང་ཚོགས་རྣམས་ལ་བསྟན་པ་དང་ཆབས་ཅིག་ཁོང་ནས་དེ་དག་གི་ཆགས་སྟངས་ཐད་འགྲེལ་བཤད་ཀྱང་སྐྱོན་ཡོད། དེ་ནས་གངས་དཀར་ཏི་སིའི་ཁོར་ཡུག་གོ་རྟོགས་ལས་འགུལ་ཁང་གི་འགན་འཛིན་ནས་ཐུགས་རྗེ་ཆེ་ཞུའི་གཏམ་བཤད་གནང་སྟེ་མཛད་སྒོ་མཇུག་སྒྲིལ། ཐེངས་འདིའི་གནམ་གཤིས་འགྱུར་ལྡོག་ཐད་རྒྱལ་སྤྱིའི་ལས་འགུལ་ཉིན་མོ་སྲུང་བརྩིར་བོད་མི་མང་སྤྱི་འཐུས་ཚོགས་གཞོན་མཆོག་དང་སྤྱི་འཐུས་རྒྱུན་ལས་རྣམ་པ། གཞུང་འབྲེལ་མ་ཡིན་པའི་ཚོགས་པ་ཁག་གི་འགན་འཛིན་རྣམ་པ། རྡ་སའི་ཉེ་འཁོར་དུ་གནས་པའི་དགོན་སྡེ་ཁག་གི་འཐུས་ཚབ་རྣམ་པ། དེ་བཞིན་གསར་འགོད་པ་དང་མི་མང་བཅས་ཁྱོན་མི་མང་བརྒྱ་ཕྲག་བརྒལ་བ་ཆེད་བཅར་གནང་ཡོད། དེ་ནས་ཉིན་རྒྱབ་གནམ་གཤིས་འགྱུར་ལྡོག་གིས་རྐྱེན་པས་བོད་དུ་ཤུགས་རྐྱེན་ཇི་ཡོད་ཀྱི་པར་རིགས་འགྲེམས་སྟོན་ཞིག་གནང་བ་ཡོད་པ་མ་ཟད། ཧི་མ་ལ་ཡའི་རི་རྒྱུད་ཀྱི་མི་མང་གི་གནམ་གཤིས་བརྟན་ལྷིང་ཆེད་ལས་འགུལ་སྙན་ཞུའི་མཚན་རྟགས་བསྡུ་རུབ་ཀྱང་གནང་ཡོད། ཕྱི་དྲོ་ཆུ་ཚོད་ ༤།༣༠ ཐོག་རྡ་ས་གནས་འགོ་འཛིན་ལས་ཁུངས་ཀྱི་ཚོགས་ཁང་དུ་ཆུ་ཚོད་གཅིག་རིང་གནམ་གཤིས་འགྱུར་ལྡོག་སྐོར་བགྲོ་གླེང་ཞིག་ཀྱང་གོ་སྒྲིག་གནང་བར་ལྟར་ཚོགས་རྗེས་གནམ་གཤིས་འགྱུར་ལྡོག་གིས་བོད་དུ་ཤུགས་རྐྱེན་ཇི་ཡོད་དངོས་བྱུང་བརྙན་དཔར་ཞིག་དེར་བསྡུས་མི་མང་རྣམས་ལ་བསྟན་ཡོད་པ་བཅས་སོ།
