༢༠༠༩ ཕྱི་ཟླ་ ༡༠ ཚེས་ ༩ རེས་གཟའ་པ་སངས།
༄༅། །ཕྱི་ལོ་ ༢༠༠༩ ཟླ་ ༡༠ ཚེས་༨་ཉིན་ཨ་རིའི་རྒྱལ་ས་ཝ་་ཤིང་ཊོན་དུ་སེམས་དང་སྲོག་ཅེས་པའི་ཚན་རིག་དང་ནང་ཆོས་འབྲེལ་བའི་སྐོར་གྱི་ཚོགས་འདུར་༸གོང་ས་མཆོག་ལ་ཇི་ལྟར་གསོལ་འདེབས་ཞུས་པ་བཞིན་ཆིབས་སྒྱུར་བཀའ་དྲིན་བསྐྱངས་ཡོད། ཚོགས་འདུའི་རྩ་བའི་བརྗོད་གཞི་ནི། དུ་རབས་ ༢༡ ནང་གི་འཛམ་གླིང་སྤྱི་འབངས་ལ་སློབ་གསོ། ཞེས་པ་དེ་ཡིན། ཚོགས་འདུའི་ཚོགས་ཐུན་དང་པོར་བགྲོ་གླེང་གནང་རྒྱུའི་ནང་གསེས་བརྗོད་གཞི་ཁག་ནི། ཤེས་ཡོན་དང་། བཟང་སྤྱོད་ཀྱི་ལྟ་གྲུབ། འགྲོ་བ་མིའི་བཟང་སྤྱོད་ཀྱི་ཚུལ་ཁྲིམས། སྒོམ་སྒྲུབ་ཀྱི་ཉམས་ལེན། ཚན་རིག་ཡར་རྒྱས། དེ་བཞིན་བོད་ཀྱི་སྲོལ་རྒྱུན་སྒོམ་སྒྲུབ་དང་དེ་དང་འབྲེལ་བའི་ཉམས་ལེན་གྱི་ཤེས་རབ། དེ་བཞིན་ཤེས་ཡོན། འགྲོ་བ་མིའི་སྦྱོང་བརྩོན་དང་ཡར་རྒྱས་ཐད་གཙོ་གནད་ཀྱི་རིག་པའམ་བསམ་བློ་ལ་གཞི་བཅོལ་བའི་ཐོག་ནས་སྤྱི་ཚོགས་ཀྱི་ཤེས་ཡོན་ཐོག་ལྟ་ཚུལ་གྱི་རྣམ་པ་གསར་པ། ཞེས་པ་དེ་ཡིན།
སྐབས་དེར་༸གོང་ས་མཆོག་ནས་སྐུ་ཉིད་བྱིས་པའི་སྐབས་ཀྱི་བྱུང་བ་སྙིང་བསྡུས་ཤིག་བཀའ་སློབ་སྩལ་བའི་ཐོག་ནས་ཤེས་ཡོན་ཆ་ཚང་བ་ཞིག་དགོས་གལ་ཆེ་བའི་སྐོར་བཀའ་སློབ་བཀའ་དྲིན་སྩལ། ཚོགས་ཐེངས་གཉིས་པའི་སྐབས་ཀྱི་བརྗོད་གཞི་གཙོ་བོ་ནི། བློ་རྩེ་སྒྲིམ་ཐབས་དང་། སེམས་ཚོར་སྟངས་འཛིན་བྱ་ཕྱོགས་ཞེེས་པ་དེ་ཡིན། དེ་བཞིན་སྐབས་དེར་༸གོང་ས་མཆོག་གིས་དགེ་རྒན་དང་དགེ་ཕྲུག་དབར་གྱི་འབྲེལ་ལམ་གལ་ཆེ་ཡིན་པའི་སྐོར་ལ་བཀའ་སློབ་སྩལ་དོན། དགེ་རྒན་གྱི་ཀུན་སྤྱོད་ཚུལ་ལྡན་དགོས་པ་དང་། དགེ་རྒན་གྱིས་རང་གི་སློབ་མར་ཕ་མས་ཕྲུ་གུར་བརྩེ་བ་ཡོད་པ་བཞིན་དགོས་པ་རེད་ཅེས་བཀའ་སྩལ་བ་དང་། སྐབས་དེར་མགོན་པོ་གང་ཉིད་མཆོག་ནས་སློབ་དཔོན་འཕགས་པ་ལྷའི་མཛད་པའི་རྩ་བ་ཞིག་ཀྱང་ལུང་འདྲེན་མཛད་ཡོད། སེམས་དང་སྲོག་ཅེས་པའི་ཚན་རིག་དང་ནང་ཆོས་དབར་གྱི་འབྲེལ་བའི་ཚོགས་འདུ་དང་པོ་དེ་ཕྱི་ལོ་ ༡༩༨༧ ལོར་རྡ་སར་ཚོགས་ཡོད་པ་བཅས་ཀྱི་གནས་བསྡུས་སུ།
