༢༠༠༩ ཕྱི་ཟླ་ ༡༠ ཚེས་ ༡༦ རེས་གཟའ་པ་སངས།
༄༅། །ཕྱི་ལོ་ ༢༠༠༩ ཟླ་ ༡༠ ཚེས་ ༡༥ ཉིན་གྱི་སྔ་དྲོའི་ཆུ་ཚོད་ ༩།༣༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐེ་ཝན་དད་ལྡན་ཆོས་ཞུ་བའི་འཐུས་ཚབ་རྣམས་ཀྱིས་ཕོ་བྲང་གི་གཟིམ་ཆུང་ནས་དྲི་བཟང་སྤོས་སྣེས་སྔོན་བསུས་ཏེ་ཐེག་ཆེན་ཆོས་གླིང་གཙུག་ལག་ཁང་་དུ་གདན་ཞུས་དང་སྦྲགས་བཞུགས་ཁྲི་རིན་པོ་ཆེར་༸ཞབས་སོར་
འཁོད་རྗེས་ཐེ་ཝན་ཆོས་ཞུ་བ་རྣམས་ཀྱིས་རྒྱ་སྐད་ཐོག་ནས་ཤེས་རབ་སྙིང་པོ་བཏོན་གྲུབ་མཚམས་༸གོང་ས་མཆོག་གིས་བཀའ་སློབ་ཕེབས་དོན།རྒྱ་རིགས་ཆོས་གྲོགས་ཚོར་ཆོས་འབྲེལ་བྱས་ཏེ་ལོ་ཤས་ཕྱིན་པ་རེད། དེ་རིང་ཡང་བསྐྱར་ང་ཚོ་ཐུག་རྒྱུ་བྱུང་བ་རེད་ཁྱེད་རང་ཚོ་ཚང་མས་ཆེད་མངགས་དཀའ་ལས་བརྒྱབ་སྟེ་ཡོང་བ་རེད་ཐུགས་རྗེ་ཆེ་ཟེར་གྱི་ཡིན། ཆོས་འབྲེལ་བྱེད་རྒྱུ་དེ་ཤེར་ཕྱིན་གྱི་གཞུང་རྡོ་རྗེ་གཅོད་པ་དང་། དེ་ནས་བོད་གངས་ཅན་ལྗོངས་ཀྱི་བཀའ་གདམས་གསར་རྙིང་བསྟན་པ་ཕྱི་དར་རྗེས་ཇོ་བོ་རྗེ་ཕེབས་ནས་ཆོས་རྒྱུན་གསར་པ་ཞིག་ཇོ་བོ་བཀའ་གདམས་ཞེས་པ་དེའི་སློབ་རྒྱུན་གྱི་གྲས་དགེ་བའི་བཤེས་གཉེན་ཆེན་པོ་འཆད་ཁ་བས་མཛད་པའི་བློ་སྦྱོང་དོན་བདུན་མ་འདོན་རྒྱུ་དང་།
དེ་ནས་བཀའ་གདམས་གསར་མར་བརྩིས་བསྡད་པའི་འཇམ་མགོན་བླ་མ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་བཤད་ཁྲིད་བྱེད་རྒྱུ་དང་། འཆད་ཁ་བའི་བློ་སྦྱོང་དོན་བདུན་མ་དང་ལམ་གཙོ་རྣམ་གསུམ་གྱི་བཤད་ལུང་གི་རྒྱུན་ཡོད་པ་རེད། ངས་ཞུ་ས་དེ་སྐྱབས་རྗེ་ཁྲི་བྱང་རིན་པོ་ཆེའི་སྐུ་མདུན་ནས་ཞུས་པ་ཡིན། དེ་བཞིན་གླིང་རིན་པོ་ཆེའི་སྐུ་མདུན་ནས་ཐེངས་གཅིག་ཞུས་པ་ཡིན་བསམ་གྱི་འདུག ལམ་གཙོ་རྣམ་གསུམ་ཕལ་ཆེར་སྟག་བྲག་རིན་པོ་ཆེའི་སྐུ་མདུན་ནས་ཞུས་ཡོད་པ་རེད། དེ་ནས་རྡོ་རྗེ་གཅོད་པ་དེ་ལུང་རྒྱུན་མ་གཏོགས་ཁྲིད་རྒྱུན་ཡོད་པ་མ་རེད། ལུང་རྒྱུན་དེ་བྱང་རྩེ་ཆོས་རྗེ་རིན་པོ་ཆེ་དང་རིགས་གསུམ་རིན་པོ་ཆེའི་སྐུ་མདུན་ནས་ཞུས་པ་ཡིན། འཛམ་གླིང་འདིའི་སྒང་ལ་ཡང་ང་ཚོ་མི་དུང་ཕྱུར་དྲུག་ཅུ་ལྷག་ཡོད་པ་རེད་དེའི་ནང་དུམ་བུ་གསུམ་ལ་དབྱེ་ན། ཆོས་ཁས་ལེན་མཁན་གཅིག་དང་ཆོས་ལ་དམིགས་བསལ་གྱི་སྡང་པོ་བྱས་པའི་ཐོག་ནས་དེ་སྡུག་ཆགས་རེད་ཤོད་མཁན་གཅིག བཏང་སྙོམས་བྱས་ཏེ་དམིགས་བསལ་དོ་སྣང་ཆེ་བ་མེད་མཁན་གཅིག་བྱས་ཏེ་དུམ་བུ་གསུམ་འདུག དེ་གསུམ་ནི་སྡུག་བསྔལ་མི་འདོད་པ་དང་བདེ་བ་འདོད་པའི་ཐབས་ཤེས་བྱེད་མཁན་ཚང་མ་གཅིག་གྱུར་ཆགས་ཡོད་པ་རེད། ཡིན་ནའང་ཁྱད་པར་གཅིག་དེ་ཆོས་དད་པ་ཡོད་མཁན་དེ་དག་གི་སྡུག་བསྔལ་སེལ་ཐབས་དང་བདེ་བ་སྒྲུབ་ཐབས་དེ་གཙོ་བོ་ནང་བསམ་བློའི་ཐོག་ནས་སེམས་འདུལ་རྒྱུའི་ཐབས་ཤེས་བྱས་ཏེ་བདེ་བ་ཡོང་ཐབས་དང་མ་འོངས་པར་སྡུག་བསྔལ་སེལ་རྒྱུ།
ད་ལྟ་ཡིན་ནའང་སྡུག་བསྔལ་ཉུང་དུ་འགྲོ་རྒྱུའི་ཐབས་ཤེས་བྱེད་ཀྱི་ཡོད་པ་དེའི་ཁྱད་པར་ཡིན་པ་རེད། གཞན་གཉིས་པོ་དེ་ཆོས་ལ་སྡང་ཟུག་བྱེད་མཁན་དང་བཏང་སྙོམས་བྱེད་མཁན་གཉིས་ནི་སྡུག་བསྔལ་སེལ་ཐབས་དང་བདེ་བ་སྒྲུབ་རྒྱུ་བདེ་སྡུག་གཉིས་པོ་གཙོ་བོ་དེ་ལུས་ཚོར་གྱི་བདེ་སྡུག་དེ་གཙོ་བོ་རེད་འདུག ལུས་ཀྱི་ཚོར་བ་ནད་ན་ཚ་དང་དབུལ་ཕོངས་དེ་ཚོའི་གྲས་སེལ་རྒྱུ་དང་མིའི་ལྟོ་གོས་གཏམ་གསུམ་གྱི་བདེ་སྐྱིད་ཡོང་རྒྱུ་གཙོ་བོ་དངུལ་གྱིས་བཟོ་རྒྱུའམ་དཔལ་འབྱོར་ལ་བརྟེན་ནས་སྡུག་བསྔལ་སེལ་རྒྱུ་དང་བདེ་སྐྱིད་སྒྲུབ་རྒྱུའི་ཐབས་ཤེས་བྱེད་ཀྱི་ཡོད་པའི་ཁྱད་པར་ཞིག་འདུག ཆོས་ལ་དད་པ་ཡོད་མཁན་ཚོ་གཙོ་བོ་བསམ་བློའི་ཐོག་ནས་འགྲོ་རྒྱུ་ཞིག་ཆགས་ཀྱི་འདུག དེ་རིང་ཁ་སང་འཛམ་གླིང་འདིའི་ཐོག་ལ་དངོས་པོ་ཡར་རྒྱས་ཆེན་པོ་ཕྱིན་ཡང་དངོས་པོ་གཅིག་པུས་མིའི་སེམས་ལ་བདེ་སྐྱིད་བཟོ་ཐུབ་རྒྱུ་མེད། མཐུན་རྐྱེན་འཛོམས་པོ་ག་ཚོད་ཡོད་ཀྱང་སེམས་ནང་མ་སྐྱིད་པ་ཡོད་པ་ཞིག་ང་ཚོས་མཐོང་ཆོས་ཡིན་པར་བརྟེན། དེ་རིང་ཁ་སང་གཞི་ནས་སེམས་འདུལ་རྒྱུ་ཐོག་ལ་ཆོས་ཁས་ཀྱང་མི་ལེན་རུང་སེམས་ལ་ཞི་བདེ་ཡོང་རྒྱུར་དོ་སྣང་གསར་པ་ཞིག་སླེབས་ཀྱི་ཡོད་པ་རེད། ངོས་ནས་ནམ་རྒྱུན་དེ་འདྲ་ཞིག་དྲན་གྱི་ཡོད། ཆོས་ཁས་ལེན་མཁན། ཆོས་བཏང་སྙོམས་བྱས་ནས་སྡོད་མཁན། ཆོས་ལ་སྡང་ཟུག་བྱེད་མཁན་ཁག་གསུམ་པོ་དེའི་ནང་ནས་སྔོན་ལ་ཆོས་སྡང་ཟུག་བྱས་ཏེ་སྐྱོན་རེད། ཅེས་ཤོད་མཁན་དེ་དག་ཆོས་ཁས་ལེན་མཁན་དེ་གཉིས་གཅིག་བསྡུར་བ་ཡིན་ན། ཆོས་ཁས་མ་ལེན་མཁན་དེ་དག་མཐར་གཏུགས་ཡིན་ན་དྲང་པོ་དང་བདེན་པ་དེ་ཚོའི་གྲས་ལ་ཞེ་དྲག་མཐོང་མེད། ཆོས་ཁས་ལེན་མཁན་དེ་ཚོའི་གྲས་ཀྱི་བདེན་པ་དང་དྲང་པོ་དེ་ཚོའི་གྲས་ལ་ལག་ལེན་ཆ་ཚང་བསྟར་ཐུབ་རུང་མ་ཐུབ་རུང་དེ་ལ་དོ་སྣང་བྱེད་རྒྱུ་ཕལ་ཆེར་ཡོད་པ་རེད། བྱས་ཙང་དེ་འདྲ་གིས་རྐྱེན་པས་དེ་གཉིས་བསྡུར་བ་ཡིན་ན་ཆེད་མངགས་ཆོས་དུག་ལྟ་བུར་བལྟས་ནས་སྤང་མཁན་རྣམས་ལ་ཕལ་ཆེར་སེམས་ལ་ཆགས་སྡང་གི་བཅིངས་ཡོད་པ་རེད། དྲང་བདེན་གྱི་སྐད་ཆ་ཡང་ཕལ་ཆེར་མེད་པ་རེད། དེར་བརྟེན་ཆོས་ཡོད་མཁན་དེ་ཁེ་ཕན་ལྟ་བུ་ཏོག་ཙམ་ཆེ་བ་ཡོད་པ་དང་ཡག་པ་ལྟ་བུ་ཞིག་འདུག ཡིན་ཡང་ཆོས་ཞེས་པ་འདི་ལམ་ལུགས་སྲོལ་ལྟ་བུ་བྱས་ནས་ཕྱིན་པ་ཡིན་ན་ནོར་འཁྲུལ་རེད། སོ་སོ་ཆོས་ལ་དད་པ་མ་བྱས་གོང་གལ་ཏེ་ཆོས་ལ་དད་པ་བྱས་ན་ཁེ་ཕན་ག་རེ་ཡོད་པ་དང་ཆོས་ལ་དད་པ་མ་བྱས་ན་གྱོང་ག་རེ་ཡོད་པ་དེ་གཉིས་ལ་བསམ་བློ་ཞིག་བཏང་སྟེ་ཆོས་ལ་དད་པ་བྱས་ན་ཁེ་ཕན་ཡོད་པ་ཞིག་མཐོང་བའི་སྒོ་ནས་རང་གིས་མོས་པས་དང་དུ་བླང་སྟེ་ཆོས་བྱེད་རྒྱུ་དེ་དགོས་པ་རེད། ཡང་༸གོང་ས་མཆོག་གིས་བཀའ་སློབ་ཕེབས་དོན། འཛམ་གླིང་གི་ཆོས་ལུགས་སྤྱི་ཡོངས་ནས་བཤད་པ་ཡིན་ན། རྟག་གཅིག་རང་དབང་ཅན་གྱི་བདག་འདོད་མཁན་དང་མི་འདོད་མཁན་གཉེས་དབྱེ་བ་ཡིན་ན། འཛམ་གླིང་འདིའི་ནང་ལ་ནང་པ་སངས་རྒྱས་པའི་ཆོས་ལུགས་གཅིག་པུ་འདི་བདག་མི་འདོད་མཁན་དེ་ཡིན་པ་རེད། ཅེས་སོགས་ཀྱི་བཀའ་ཆོས་གཟབ་རྒྱས་སྩལ་ཡོད་པ་རེད། ཐེངས་འདི་ཆོས་འབྲེལ་ལ་ཐེ་ཝན་དང་རྒྱ་ནག་སྐམ་ས་ཆེན་པོ་བཅས་ནས་རྒྱ་རིགས་ཆིག་སྟོང་ཙམ་དང་འཛམ་གླིང་ཡུལ་གྲུ་ཁག་དྲུག་ཅུ་ཙམ་ནས་ཕྱི་རྒྱལ་བ་སྟོང་གཅིག་ལྷག་དང་རང་རིགས་ཆོས་ཞུ་བ་བཅས་ཁྱོན་མི་གྲངས་ ༥༠༠༠ ལྷག་བཅར་ཡོད་པ་དང་། ཡང་ཚེས་ ༢༠ ནས་ ༢༢ བར་ལྷོ་ཨེ་ཤི་ཡའི་ཡུལ་གྲུ་ནས་ཡིན་པའི་དད་ལྡན་ཆོས་ཞུ་བ་ཚོ་ཁག་གཅིག་ནས་ཇི་ལྟར་གསོལ་བ་བཏབ་པ་བཞིན་ཉིན་གསུམ་རིང་བདེན་བཞིའི་བཀའ་ཆོས་བཀའ་དྲིན་བསྐྱང་གནང་རྒྱུ་ཡིན་འདུག་པ་བཅས་ཀྱི་གནས་བསྡུས་སུ།།
