༢༠༠༩ ཕྱི་ཟླ་ ༡༠ ཚེས་ ༡ རེས་གཟའ་ཕུར་བུ།
༄༅། །ཕྱི་ལོ་ ༢༠༠༩ ཟླ་ ༩ ཚེས་ ༢༨ ཉིན་༸གོང་ས་མཆོག་ཝཎ་ཁུ་བའི་ནང་མཛད་རིམ་མི་འདྲ་བ་ཁག་གསུམ་ཙམ་ཐོག་༸ཞབས་སོར་བསྐྱངས་ནས་བཀའ་སློབ་ཟབ་རྒྱས་སྩལ་བ་དང་། དེ་རྗེས་ཚེས་ ༢༩ ཉིན་གྱི་སྔ་དྲོ་༸གོང་ས་མཆོག་ཨོར་ཕི་ཡམ་འཁྲབ་སྟོན་ཚོགས་ཁང་ཆེན་མོའི་ནང་། སེམས་ཀྱི་སློབ་གསོ་ཞེས་པའི་བརྗོད་གཞིའི་ཐོག གསར་གཏོད་དང་བདེ་སྐྱིད། ཅེས་པའི་ཐོག་བཀའ་སློབ་སྩལ་དོན། གསར་གཏོད་ཀྱི་བློ་སྟོབས་དེ་ཤེས་རབ་དང་འབྲེལ་བ་ཡོད་པ་ཞིག་གཟིགས་ཀྱི་ཡོད་པ་དང་། ནུ་གསོའི་སེམས་ཅན་གཞན་ལ་གསར་གཏོད་ཀྱི་བློ་སྟོབས་དེ་འགྲོ་བ་མི་ལས་ཞན་པ་ཡོད། གསར་གཏོད་ཀྱི་བློ་སྟོབས་དེ་འཕེལ་བ་ལ་གདོང་ལེན་བྱེད་དགོས་པའི་དཀའ་ངལ་གྱི་གནས་སྟངས་ཤིག་འཕྲད་དགོས། གསར་གཏོད་ནི་གཞི་རྩའི་མིའི་རྣམ་དཔྱོད་དང་ཤེས་རབ་ལ་འབྲེལ་བ་ཡོད་པ་ཞིག་རེད། མི་རྣམས་ལ་ཀླད་པ་ཡོད་ཙང་གསར་གཏོད་ཀྱི་ནུས་པ་ཡོད། འོན་ཀྱང་དེ་ཕྱིར་མངོན་པ་བྱེད་པ་ལ་བསྐུལ་མ་གཏོང་མཁན་ཞིག་དགོས་ཀྱི་ཡོད། དེ་མེད་ན་ནུས་པ་དེ་ངལ་གསོ་བརྒྱབ་ནས་ཡར་མ་ལང་བར་གཉིད་ཁུག་པ་འདྲ་པོ་བྱས་ནས་སྡོད་ཀྱི་རེད། གལ་ཏེ་དཀའ་ངལ་ཞིག་དང་དེ་ལ་གདོང་ལེན་བྱེད་དགོས་པ་བྱུང་བ་ཡིན་ན་མིའི་རིག་པ་དང་ཤེས་རབ་དེ་སྔར་ལས་ལྷག་པའི་འཁྲུག་པོ་ཆགས་རྒྱུའི་བསྐུལ་མ་ཐེབས་ཀྱི་རེད། བྱས་ཙང་མིའི་རང་རྒྱུད་ལ་གསར་གཏོད་ཀྱི་རང་བཞིན་འཕེལ་རྒྱས་དང་ནུས་པ་དེ་ཕྱི་ལ་འབྲས་བུའི་ཚུལ་དུ་མངོན་པར་བྱེད་པ་ལ་རིག་པར་གདོང་ལེན་དང་ཁ་གཏད་གཅོག་དགོས་ཀྱི་རེད། གསར་གཏོད་ཀྱི་བློ་སྟོབས་འཕེལ་རྒྱས་གཏོང་བར་འདས་པའི་ཉམས་མྱོང་ལ་གཞི་བཅོལ་བའི་ཐོག་ནས་འགལ་ཟླའི་གནས་ཚུལ་ཕན་ཚུན་བསྡུར་ཏེ་བྱེད་དགོས། ཕྱི་དངོས་པོའི་གནས་སྟངས་ཐད་ལ་ཕྱོགས་གཉིས་མི་མཐུན་པའི་འགལ་ཟླ་མེད་པ་ཡིན་ན་མི་མཐུན་པ་རྣམས་མཐུན་པར་འགྱུར་རྒྱུའི་སླད་དུ་རིག་པའི་རྣམ་དཔྱོད་དང་དེར་གདོང་ལེན་བྱ་རྒྱུའི་གསར་གཏོད་ཀྱི་ནུས་པ་འཕེལ་རྒྱས་འགྲོ་མི་ཐུབ་ཅེེས་བཀའ་སྩལ། དེ་བཞིན་༸གོང་ས་མཆོག་ནས་གསར་གཏོད་དང་མིའི་བདེ་ཐབས་དབར་འབྲེལ་བ་ཡོད་སྐོར་བཀའ་ཕེབས་དོན། ང་ཚོ་ད་ལྟ་དུས་རབས་ ༢༡ ནང་ཡོད། ང་ཚོར་དུས་རབས་ ༢༠ ནང་ཇི་བྱུང་གནས་ཚུལ་གསལ་པོར་ཤེས་ཐུབ་ཀྱི་རེད། དུས་རབས་ ༢༠ ནི་འཁྲུག་རྩོད་ཀྱི་དུས་རབས་གཅིག་ཡིན་པ་ངོས་ནས་བརྗོད་ཀྱི་ཡོད་ཅེས་བཀའ་སྩལ་ཡོད། གཞན་ཡང་མགོན་པོ་གང་ཉིད་ནས་བཟང་སྤྱོད་ནི་དེ་བས་གལ་ཆེན་པོ་ཡིན་སྐོར་བཀའ་ཕེབས་དོན། དེང་དུས་ཀྱི་ཤེས་ཡོན་དེ་བཟངསྤྱོད་དང་ཟུང་དུ་འབྲེལ་ཐུབ་པ་ཞིག་དགོས། ལོ་ངོ་སྟོང་ཕྲག་སྔོན་ཙམ་ནས་ཤེས་ཡོན་བསྟི་གནས་ཐོག་མར་འཛུགས་སྐབས་བཟང་སྤྱོད་ཐོག་སློབ་གསོ་གཏོང་རྒྱུའི་འགན་དེ་ཡེ་ཤུའི་ལྷ་ཁང་ཁག་གིས་འཁྱེར་གྱི་ཡོད་པ་རེད། དེར་བརྟེན་ཤེས་ཡོན་ལྷན་ཁང་གི་བཟང་སྤྱོད་ཐོག་སློབ་གསོ་གཏོང་རྒྱུའི་འགན་དམིགས་བསལ་འཁྱེར་དགོས་ཀྱི་མེད། དེ་རིང་ཁ་སང་ཡེ་ཤུའི་ལྷ་ཁང་གི་ལས་འགན་དེ་འགྱུར་བ་ཕྱིན་ཚར་བ་རེད། དེར་བརྟེན་བཟང་སྤྱོད་ཀྱི་གནས་སྟངས་དེར་ཉམས་ཆག་ཕྱིན་ཡོད། གནས་སྟངས་དེ་འདྲའི་འོག་ནས་དེང་དུས་ཤེས་ཡོན་ལྷན་ཚོགས་ལ་དེང་དུས་ཀྱི་ཤེས་ཡོན་སྤྲོད་པའི་སྒོ་ནས་བཟང་སྤྱོད་ཐོག་སློབ་གསོ་དང་ཤེས་ཡོན་སྤྲོད་རྒྱུའི་འགན་འཁྱེར་དགོས་སྐོར་བཀའ་སྩལ། ༸གོང་ས་མཆོག་ཝཎ་ཁུ་བའི་ནང་མཛད་འཕྲིན་ཁག་ལེགས་པར་གྲུབ་མཚམས་ཝཌྷ་ཁུ་བར་ནས་ཆིབས་ཐོན་གྱིས་ཁལ་གྷ་རི་མཐོ་སློབ་ཏུ་ཆིབས་སྒྱུར་བསྐྱངས་ཡོད་པ་བཅས་ཀྱི་གནས་བསྡུས་སུ།
