༢༠༠༩ ཕྱི་ཟླ་ ༡༠ ཚེས་ ༦ རེས་གཟའ་མིག་དམར།
༄༅། །༸གོང་ས་མཆོག་ཁེ་ཎ་ཌའི་ས་ཁུལ་ཁལ་གྷ་རིར་ཉིན་མཐའ་མ་དེར་རྒྱ་གར་འཕགས་པའི་ཡུལ་ནས་ཁེ་ཎ་ཌར་གཞིས་སྤོས་བྱས་པའི་རྒྱ་གར་བ་བརྒྱ་ཕྲག་འགལ་བ་འདུ་འཛོམས་ཀྱི་ཚོགས་མགོན་དུ་ཇི་ལྟར་གསོལ་འདེབས་ཞུས་པ་བཞིན་༸ཞབས་སོར་འཁོད། མཛད་སྒོའི་ཐོག་མར་ས་གནས་བོད་རིགས་ཚོགས་པའི་ཚོགས་གཙོ་ནས། ཁེ་ཎ་ཌ་རྒྱ་གར། ཞེས་པའི་ཚོགས་པ་དེའིེ་ཚོགས་གཙོ་སྐུ་ཞབས་མ་ཐུར་ལགས་ངོ་སྤྲོད་གནང་། དེ་རྗེས་སྐུ་ཞབས་མ་ཐུར་ལགས་ཀྱིས་ཐོག་མར་༸གོང་ས་མཆོག་ལ་ཆེ་བསྟོད་རྒྱ་ཆེ་ཕུལ་བ་དང་སྦྲགས་ཁོང་ནས་ཞུས་དོན། ༸གོང་ས་མཆོག་ནས་ད་རེས་ཆོས་ཕྱོགས་ཀྱི་ཆིབས་སྒྱུར་སྐབས་ཁེལ་གྷ་རིའི་ས་གནས་འདི་ཡང་གནད་འགག་ཅིག་ལ་གཟིགས་ནས་ས་ཁུལ་འདིར་ཆིབས་སྒྱུར་བསྐྱངས་པར་བཀའ་དྲིན་བླ་མེད་དུ་ཆེ། ང་ཚོས་དེ་རིང་གི་ཉིན་མོ་འདི་ནི་༸གོང་ས་མཆོག་དང་ལྷན་མཇལ་གྱི་འདུ་འཛོམས་བྱུང་བའི་དམིགས་བསལ་ཅན་གྱི་ཉིན་མོ་འདི་དུས་རྟག་ཏུ་ཡིད་རང་བྱ་རྒྱུ་ཡིན་ཞེས་ཞུས་ཡོད།
དེ་རྗེས་མགོན་པོ་གང་ཉིད་མཆོག་གིས་བཀའ་སློབ་ཕེབས་དོན། རྒྱ་བོད་འབྲེལ་བ་འདི་བཞིན་འདས་པའི་མི་ལོ་ ༥༠ ཙམ་མིན་པར་ལོ་ངོ་སྟོང་ཕྲག་བརྒལ་བའི་རིང་འབྲེལ་བ་ཡོད་སྐོར་དང་སྦྲགས་ནང་ཆོས་འདི་རྒྱ་གར་ནས་བོད་དུ་དར་ཚུལ་སོགས་ཞིབ་ཕྲའི་ལོ་རྒྱུས་ཀྱང་བཀའ་སྩལ་གནང་མཛད་ཡོད་པ་མ་ཟད། དེང་བོད་དུ་ནང་ཆོས་ཀྱི་བསླབ་པ་སློབ་གཉེར་བྱེད་རྒྱུའི་རང་དབང་མེད་ཀྱང་རྒྱ་གར་ནང་ཆོས་སྡེ་ཆེན་པོ་མང་པོ་བཙུགས་ཏེ་ཧི་མ་ལ་ཡའི་རི་རྒྱུད་ཀྱི་མི་རིགས་དང་། སོག་པོའི་མི་རིགས་བཅས་ལ་ནང་ཆོས་ཀྱི་བསླབ་པ་སློབ་གཉེར་བྱེད་རྒྱུའི་གདན་ས་ཆེན་པོ་ཁག་གསར་འཛུགས་གནང་ཐུབ་པ་ནི་རྒྱ་གར་དབུས་གཞུང་མང་དང་། དེ་བཞིན་འབྲེལ་ཡོད་མངའ་སྡེ་གཞུང་གི་བཀའ་དྲིན་ལ་བརྟེན་ནས་བྱུང་བས་རྒྱ་གར་གཞུང་དང་། འབྲེལ་ཡོད་མངའ་སྡེ། མི་མང་བཅས་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་བཀའ་སློབ་སྩལ། ཡང༸གོང་ས་མཆོག་ནས་བཀའ་ཕེབས་དོན། ངོས་རང་ས་གནས་གང་དུ་ཕྱིན་ཡང་དུས་རྒྱུན་དུ་འཚེ་མེད་ཞི་བ་དང་། ཆོས་ལུགས་མཐུན་སྒྲིལ་ཡོང་རྒྱུ་གལ་གནད་ཆེན་པོ་ཡིན་སྐོར་ནན་བཤད་བྱེད་ཀྱི་ཡོད། དེ་འདྲ་སོང་ཙང་གནད་དོན་གཉིས་པོ་དེ་ངོས་ཀྱི་འབད་བརྩོན་བྱེད་རྒྱུ་གཙོ་བོ་དང་། བརྡ་ལན་སྤྲོད་རྒྱུ་གཙོ་བོ་ལྟ་བུ་ཡིན། འཚེ་བ་མེད་པ་དང་ཆོས་ལུགས་མཐུན་སྒྲིལ་ཟེར་བ་དེ་གཉིས་ངོས་ཀྱིས་གསར་གཏོད་བྱས་པ་གང་ཡང་མིན། དེ་ནི་ལོ་ངོ་སྟོང་ཕྲག་རིང་ནས་ཡོད་པའི་རྒྱ་གར་གྱི་རིག་གཞུང་ཞིག་རེད། དེ་འདྲ་སོང་ཙང་ངོས་ནས་རྒྱུན་དུ་ནས་ངོས་རང་རྒྱ་གར་སྲོལ་རྒྱུན་གི་བསམ་བརྗོད་བརྡ་ལན་སྐྱེལ་མཁན་ཞིག་ཡིན་བསམ་པ་དང་། དེ་འདྲ་ཡིན་པའི་འགྲེལ་བཤད་ཀྱང་བྱེད་ཀྱི་ཡོད། དེ་བཞིན་༸གོང་ས་མཆོག་ནས་འཚེ་བ་མེད་པ་ལེགས་སྦྱར་ནང་ཨ་ཧིམ་ས་ Ahimsa ཞེས་པ་དེ་རྒྱ་གར་བ་རྣམས་ཀྱིས་མེས་པོ་དམ་པ་གྷན་དྷིས་ཕྱག་བཞེས་མཛད་པའི་འཚེ་མེད་ཞི་བའི་ཐབས་ལམ་གྱི་སྲོལ་བཟང་དེ་ཀུན་ལ་ཁྱབ་ཐུབ་པར་འབད་བརྩོན་དགོས་པའི་ལམ་སྟོན་བཀའ་སློབ་ཀྱང་སྩལ། ༸གོང་ས་མཆོག་ནས་འཚེ་བ་མེད་པའི་ཐབས་ལམ་གྱི་འཐབ་རྩོད་ཐོག་ནས་མཇུག་འབྲས་བཟང་པོ་ནི་མེས་པོ་དམ་པ་གྷན་དྷིས་ M.k Gandhi དབུ་ཁྲིད་འོག་རྒྱ་གར་རང་བཙན་ཐོབ་པ་དང་། དེ་དང་ཕྱོགས་མཚུངས་ནེལ་སོན་མཎ་ཌེ་ལའི་ Nelson Mandela ཚེ་སྟོད་ལོ་རྒྱུས་ཇི་ལྟར་ཡིན་མིན་ལ་མ་ལྟོས་པར་འཚེ་མེད་ཞི་བའི་ཐབས་ལམ་ལ་བརྟེན་ནས་ལྷོ་ཨ་ཕི་རི་ཀའི་ནང་མི་རིགས་དབྱེ་འབྱེད་མཇུག་བསྡུས་ཏེེ་མང་གཙོའི་ལམ་སྲོལ་སྲ་བརྟན་ཐུབ་པ་རེད། དེ་བཞིན་ཨ་རིའི་མི་རིགས་ནག་པོའི་དབུ་ཁྲིད་སྤྱི་དམངས་ཐོབ་ཐང་དོན་གཉེར་བ་ Dr.Martin Luther King མ་ཏཱན་ལུ་ཐར་ཀིང་མཆོག་གིས་འཚེ་མེད་ཞི་བའི་ཐབས་ལམ་ཁོ་ནར་བརྟེན་ནས་སྤྱི་དམངས་ཐོབ་ཐང་འཐབ་རྩོད་གནང་བ་མ་ཟད་ཁོང་ནི་རྒྱ་གར་གྱི་མེས་པོ་དམ་པ་གྷན་དྷིས་མཛད་བྱེད་ལ་མངོན་པར་བསྟོད་མཁན་དང་རྗེས་སུ་ཡི་རང་ཞུས་མཁན་ཞིག་ཡིན་པའི་སྐོར་མ་ཏཱན་ལུ་ཐར་ཀིང་དམ་པ་དེ་ཉིད་ཀྱི་སྐུ་ཟླས་༸གོང་ས་མཆོག་དང་མཇལ་འཕྲད་ཞུས་པའི་སྐབས་འགྲེལ་བརྗོད་ཞུས་ཡོད་པའི་ལོ་རྒྱུས་གསུང་གནང་མཛད་ཡོད།
མཐའ་དོན་༸གོང་ས་མཆོག་གིས་རྒྱ་གར་ནང་ལོ་ངོ་སྟོང་ཕྲག་གོང་ནས་དར་བའི་འཚེ་མེད་ཞི་བ་དང་ཆོས་ལུགས་མཐུན་སྒྲིལ་གྱི་ལུགས་བཟང་གཉིས་རྒྱ་གར་བ་རྣམས་ཀྱིས་འགན་ཁུར་ནས་འཛམ་གླིང་ནང་དར་ཁྱབ་ཡོང་ཐབས་གནང་གལ་ཆེ་སྐོར་བཀའ་སྩལ། ད་རེས་ཚོགས་འདུ་དེ་ནི་༸གོང་ས་མཆོག་གི་དབུས་བོད་གཞུང་མང་བཙན་བྱོལ་དུ་འབྱོར་ནས་འདས་པའི་མི་ལོ་ ༥༠ རིང་དཀའ་ངལ་དང་འགལ་རྐྱེན་ལ་མ་འཛེམས་པར་བོད་མི་སྐྱབས་བཅོལ་བ་འབུམ་ཕྲག་བརྒལ་བའི་འཚོ་ཐབས་དང་། ཤེས་ཡོན། བོད་མིའི་སྒྲིག་འཛུགས་བཅས་པ་སྲ་བརྟན་གནས་ཐུབ་རྒྱུར་རོགས་སྐྱོར་གནང་མཁན་རྒྱ་གར་དབུ་ཁྲིད་དང་། འབྲེལ་ཡོད་མངའ་སྡེ། དེ་བཞིན་གཞུང་མང་བཅས་ལ་སྙིང་ཐག་པ་ནས་བཀའ་དྲིན་རྗེས་དྲན་མཚོན་དོན་དུ་འདུ་འཛོམས་དེ་ཁེལ་གྷ་རིའི་གནས་སྡོད་བོད་རིགས་དང་རྒྱ་གར་བ་ཐུན་མོང་ནས་གོ་སྒྲིག་གནང་བ་ཞིག་རེད་འདུག
