༢༠༠༩ ཕྱི་ཟླ་ ༩ ཚེས་ ༡༥ རེས་གཟའ་མིག་དམར།

༄༅། །ཕྱི་ལོ་ ༢༠༠༩ ཟླ་བ་ ༩ ཚེས་ ༡༤ ཉིན་རྒྱབ་ཆུ་ཚོད་ ༢་༣༠ ནས་ ༥ བར་བོད་གཞུང་འཕྲོད་བསྟེན་ལས་ཁུངས་ཀྱི་གོ་སྒྲིག་འོག་སྲི་ཞུ་བ་ཁག་གཅིག་ལ་གངས་སྐྱིད་སྤྱི་ཐབ་ཀྱི་ཚོགས་ཁང་ནང་ གད་སྙིགས་ལས་གྲུབ་པའི་འཇུ་ཁུའི་ (Garbage Enzyme) ཐོག་ནས་གོ་ལ་སྲུང་སྐྱོབ་དང་སྒེར་གྱི་མི་ཚེའི་ནང་ཕན་ཐོགས་ཇི་ཡོད་སྐོར་མ་ལེ་ཤི་ཡའི་ཨེམ་ཆི་ཇེན་ཨོན Dr.Jean Oon ལགས་ནས་ལམ་སྟོན་གསུང་བཤད་ཟབ་རྒྱས་ཤིག་གནང་།

ཨེམ་ཆི་ཁོང་ནི་རྒྱ་ནག་དང་། ཐེ་ཝན། སིང་གྷ་པོར། རྒྱ་གར་སོགས་འཛམ་གླིང་ཡུལ་གྲུ་གང་སར་ཕེབས་ནས་ལམ་སྟོན་རྒྱ་ཆེ་གནང་མཁན་ཞིག་ཡིན་པ་དང་། ཕྱི་ཚེས་ ༡༥ ཉིན་རྡ་ས་མཚན་ཉིད་སློབ་གྲྭར་གསུང་བཤད་གནང་རྒྱུ་ཡིན་འདུག དེ་ཡང་ཨེམ་ཆི་ཁོང་ནས་གད་སྙིགས་ལས་གྲུབ་པའི་འཇུ་ཁུ་ Garbage Enzyme འདིས་འཕྲོད་བསྟེན་དང་ཁོར་ཡུག་སྲུང་སྐྱོབ་བྱེད་ཐུབ་ཀྱི་ཡོད་པ་དོན་དངོས་ལག་ལེན་ཐོག་ནས་གསལ་བཤད་གནང་བ་དང་། ལྷག་པར་ད་ལྟའི་འཛམ་གླིང་ནང་ཆུ་ལོག་དང་། ཐེམ་པ། དྲག་ཆར་རླུང་འཚུབ། ས་ཉིལ་བ་སོགས་དཀའ་ངལ་མང་དག་ཅིག་མིས་བཟོས་པ་དང་དེ་རྣམས་བྱུང་རྐྱེན་ནི་གོ་ལའི་ཚ་དྲོད་ཆེ་རུ་བཏང་བ་དང་རང་བྱུང་མཁའ་དབྱིངས་བུ་ག་ Ozone Layer རྡོལ་བ་སོགས་ལ་བརྟེན་ནས་བྱུང་བ་ཡིན། གད་སྙིགས་འཇུ་ཁུ་ Garbage Enzyme འདིས་མཁའ་རླུང་གཙང་མ་བཟོ་བ་དང་ཆུ་ཚོད་ ༢༤ རིང་སྲོག་རླུང་ཡང་སྦྱིན་གྱི་ཡོད་པ་སོགས་ཀྱི་གཏམ་བཤད་གནང་ཡོད་པའི་གནས་བསྡུས་སུ།