༢༠༠༩ ཕྱི་ཟླ་ ༩ ཚེས་ ༡༠ རེས་གཟའ་ཕུར་བུ།

༄༅། །བོད་ཀྱི་འགྲོ་བ་མིའི་ཐོབ་ཐང་དང་མང་གཙོའི་འཕེལ་རྒྱས་ལྟེ་གནས་ཁང་ནས་ཕྱི་ལོ་ ༢༠༠༩ ཟླ་ ༩ ཚེས་ ༢ ཉིན་རྒྱབ་ཆུ་ཚོད་ ༢ ཐོག་རྡ་ས་མེ་གྷན་ Club House ཞེས་པའི་ཚོགས་ཁང་དུ། དེང་རབས་མང་གཙོའི་རིང་ལུགས་ལ་འཕྲད་བཞིན་པའི་དཀའ་ངལ་དང་གདོང་ལེན་བྱེད་ཕྱོགས་སྐོར་ཞེས་པའི་བརྗོད་གཞིའི་ཐོག་བགྲོ་གླེང་ཞིག་གོ་སྒྲིག་ཞུས་ཡོད་པའི་ཐོག་མར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཨུ་རྒྱན་བསྟན་འཛིན་ལགས་ནས་བགྲོོ་གླེང་ངོ་སྤྲོད་གནང་གྲུབ་མཚམས་བཀའ་ཁྲི་ཟམ་གདོང་རིན་པོ་ཆེ་མཆོག་ནས་གསུང་བཤད་གནང་གསལ། དེང་རབས་ཀྱི་མང་གཙོའི་རིང་ལུགས་ལ་འཕྲད་བཞིན་པའི་དཀའ་ངལ་ཞེས་པ་དེ་ངས་སྡེ་ཚན་གཉིས་ལ་དབྱེ་ནས་བགྲོ་གླེང་ཞུ་རྒྱུའི་འབད་བརྩོན་བྱེད་ཀྱི་ཡིན།

དོན་ཚན་དང་པོ། ལྟ་གྲུབ་དང་ལམ་སྲོལ་ཁོ་རང་ནང་ལ་ཡོད་པའི་དཀའ་ངལ་གང་རེད། དབྱིན་སྐད་ནས་ཞུས་ན་ inbuilt up problem ཁོ་རང་དང་པོ་བྱུང་དུས་ནས་ཡོད་པའི་དཀའ་ངལ་ལམ། ཡང་ན་བཟོ་སྐབས་སྐྱོན་ཤོར་འགྲོ་བ་ manufacturing defects དེ་ཚོ་སྔོན་དུ་ལྟ་དགོས་པ་ཡིན། སྡེ་ཚན་གཉིས་པ་དེ་ལག་ལེན་བསྟར་བའི་སྐབས་ལ་དེ་ལྟར་མ་ཐུབ་པའི་དཀའ་ངལ་དེ་ལམ་སྲོལ་དང་ལྟ་གྲུབ་ཀྱི་སྐྱོན་མིན་ཡང་ལག་བསྟར་བྱེད་མཁན་གང་ཟག་གི་སྐྱོན་དེ་ལྟ་གྲུབ་ལ་ཤུགས་རྐྱེན་ཐེབས་ནས་དཀའ་ངལ་ཆགས་པའི་རིགས་གཉིས་ཡོད།

དང་པོ་ལམ་སྲོལ་ཁོ་རང་ནང་ལ་ཡོད་པའི་སྐྱོན་ཆའམ་དཀའ་ངལ་དེ་གང་འདྲ་བྱས་ནས་ངོས་བཟུང་དགོས་ཀྱི་རེད། དེ་ངོས་བཟུང་བ་ལ་ཐོག་མ་ལམ་སྲོལ་དེ་གང་འདྲ་བྱུང་བ་དང་། ཡར་རྒྱས་གང་འདྲ་ཕྱིན་པ། གང་འདྲ་བྱས་ནས་ད་ལྟའི་གནས་བབས་བར་སླེབས་པ། དེའི་འཕེལ་རིམ་དང་བྱུང་རབས་ལ་ལྟ་དགོས་པ་གལ་ཆེན་པོ་རེད། སྲོལ་རྒྱུན་གྱི་རིག་གནས་དང་དེང་རབས་ཀྱི་རིག་གནས་གཉིས་ཀྱི་ཁྱད་པར་ནི། སྲོལ་རྒྱུན་རིག་གནས་དེ་གསུང་པ་པོས་གང་ཟག་དེས་ཚང་མ་ཤེས་ནས། དོན་བཞིན་གཟིགས་ཤིང་འདིར་གསུངས་པ་ལྟར་རིག་གནས་དེའི་བརྗོད་བྱའི་དོན་ཡོངས་སུ་རྫོགས་པ་གསུང་མཁན་གྱི་གང་ཟག་དེས་ཆ་ཚང་ཤེས་པ་དང་། དེ་ཡང་གང་ཤེས་པ་དེ་རིག་པའི་གཞུང་ལུགས་ནང་གསུངས་སྐབས་རིག་གནས་དེ་ཉམས་རྒུད་འགྲོ་རྒྱུ་མ་གཏོགས་ཡར་རྒྱས་འགྲོ་རྒྱུ་དང་གསར་པ་སྣོན་རྒྱུ་གང་ཡང་མེད། དེ་ལ་ང་ཚོས་རིག་པའི་གནས་ཤིག་བརྗོད་ཀྱི་ཡོད། དེ་མ་ཡིན་པའི་དེང་རབས་ཤེས་བྱ་དེ་དག་དང་པོ་སྲོལ་གཏོད་མཁན་གྱིས་ཚང་མ་ཤེས་ནས་སྲོལ་གཏོད་པ་ཞིག་མིན། ཚོད་ལྟ་བྱས་ནས་དེ་མིན་ནམ་བསམ་ནས་གཅིག་སྟེང་ལ་ཁ་སྣོན་ཏོག་ཙམ་བརྒྱབ་ནས་ཡར་རྒྱས་ཕྱིན་པའི་རིག་པའི་གཞུང་ལུགས་གཅིག་ལ་དེང་རབས་རིག་གནས་ ཞེས་བརྗོད་ན་འགྲིག་གི་ཡོད།

ཡང་དེ་ཚོ་མང་ཆེ་བ་གང་འདྲ་བྱས་ནས་འགོ་འཛུགས་ཀྱི་ཡོད་དམ་ཟེར་ན། གནས་ཚུལ་བྱུང་རྐྱེན་བྱེ་བྲག་པ་གཅིག་གིས་རྐྱེན་བྱས་པས་དབང་གིས་རིག་པའི་གཞུང་ལུགས་ལྟ་གྲུབ་ལམ་སྲོལ་དར་ཡོང་རྒྱུའི་འགྲོ་སྟངས་གཅིག་ཡོད། དེའི་འོག་ནས་གང་འདྲ་བྱས་ནས་ལྟ་གྲུབ་དེ་དར་ཡོད་མེད་ལྟ་དགོས། དེ་མ་བྱས་པར་སྔོན་ནས་ང་ཚོས་ཤེས་དགོས་པ་གང་ཡིན་ཟེར་ན་འགྲོ་བ་མིའི་མངོན་འདོད་དང་སྒྲུབ་བྱ་སྐྱེས་བུའི་འདོད་དོན་གཏན་འཁེལ་སྟངས་ལ་མི་འདྲ་བ་གཉིས་རེད།

ཆོས་དང་འཇིག་རྟེན་གཉིས་ཀ་ཡོད་པའི་སྲོལ་རྒྱུན་ནང་ལ་སྐྱེས་བུའི་འདོད་དོན་གཏན་ལ་འབེབས་སྟངས་གཅིག་དང་། དེང་རབས་ནང་ལ་འཇིག་རྟེན་རྐྱང་པ་མ་གཏོགས་ཆོས་ཀྱི་བསམ་ཚུལ་མེད་མཁན་དེ་ཚོས་སྐྱེས་བུའི་མངོན་འདོད་གཏན་ལ་འབེབས་སྟངས་གཉིས་ཡོད་པ་དེ་ཚང་མས་ཤེས་གསལ་རེད། དེ་ཡིན་ཙང་ངས་བསྡོམས་ཤིག་བརྒྱབ་ནས་ཞུས་པ་ཡིན་ན། ཆོས་སྲིད་གཉིས་ལྡན་གྱི་སྲོལ་རྒྱུན་སྐྱེས་བུའི་འདོད་དོན་གཏན་ལ་ཕབ་པའི་སྐབས་ལ་ཆོས་ནོར་འདོད་ཐར་བཞི་བརྗོད་པ་འདི་རྒྱ་གར་ཕྱི་ནང་ཐུན་མོང་དུ་ཡོངས་གྲགས་ཀྱི་བརྗོད་ཚུལ་ཞིག་རེད། སྐྱེས་བུའི་གནས་སྐབས་ཀྱི་འདོད་པའི་ཡོན་ཏན་ལ་ལོངས་སུ་སྤྱོད་རྒྱུ་དང་དེ་བསྒྲུབ་པའི་ཐབས་ལམ་དཔལ་འབྱོར་བསྒྲུབ་དགོས་རྒྱུ་དེ་གཉིས་ཚེ་འདིའི་སྐྱེས་བུའི་མངོན་འདོད་གཉིས་པོ་རེད། ཕུགས་ཀྱི་སྐྱེས་བུའི་མངོན་འདོད་ནི་སྡུག་བསྔལ་ལས་གྲོལ་བའི་ཐར་པ་སྒྲུབ་པའི་ཐབས་ལམ་རེད། དེ་ནི་ཆོས་ཡིན། དེ་འདྲ་ཡིན་ཙང་ཆོས་ནོར་འདོད་ཐར་ཞེས་སྐྱེས་བུའི་མངོན་འདོད་བཞི་བཞག་པའི་སྐབས་དེ་བཞི་པོ་མཉམ་དུ་བསྒྲུབ་རྒྱུ་རེད་མ་གཏོགས་ཁ་ཁག་བྱས་ནས་བསྒྲུབ་ཀྱི་མེད། ཅེས་སོགས་དང་། ཡང་བཀའ་ཁྲི་མཆོག་ནས་གསུང་གསལ།

དེང་རབས་ཀྱི་བསམ་བློའི་ཚན་རིག་ཐོག་མ་སྲོལ་འབྱེད་མཁན་མཁས་པ་དེས་མིའི་སེམས་དང་སེམས་བྱུང་། ཡང་ན་མིའི་རྣམ་རྟོག་གི་འགྱུར་བ་ཡོངས་རྫོགས་དེ་འདོད་པའི་འདོད་ཆགས་ལས་མ་བྱུང་བ་གཅིག་ཀྱང་མེད། དེ་འདྲ་ཡིན་ཙང་དེ་སྐོང་རྒྱུའི་ཐབས་ལམ་འཚོལ་ཐུབ་པ་ཡིན་ན་སྐྱེས་བུའི་མངོན་འདོད་ཡོངས་རྫོགས་སྒྲུབ་ཐུབ་ཀྱི་ཡོད། འདོད་པ་དེ་ཡང་མཚན་ཉིད་པའི་སྐད་ཆ་ཤོད་སྟངས་བྱེད་པ་ནང་བཞིན་མ་རེད། འདོད་པའི་འདོད་ཆགས་མ་གཏོགས་གཟུགས་དང་གཟུགས་མེད་ཀྱི་འདོད་ཆགས་ཚུད་མེད། འདོད་པའི་འདོད་ཆགས་རྐྱང་པ་དེ་སྐྱེས་བུའི་མངོན་འདོད་ཡིན་པའི་བསམ་ཚུལ་ཞིག་འཁྱེར་ནས་དེས་དབང་གིས་དེང་རབས་ཀྱི་བསམ་བློའི་ཚན་རིག་པ་ psychologist ཟེར་ནའང་མི་འདུག ནུབ་ཕྱོགས་ལ་འདོད་པའི་འདོད་ཆགས་ལ་འཛེམས་གཟོན་མེད་པ་བག་མེད་དུ་སྤྱོད་པའི་ལམ་སྲོལ་དེ་ཁོ་རང་གི་ལྟ་གྲུབ་དེའི་ཐོག་ནས་ཕལ་ཆེར་བྱུང་བ་རེད་བསམ་གྱི་འདུག དེ་འདྲ་ཡིན་དུས་དེང་རབས་རིག་གནས་ཀྱི་ནང་ལ་ནོར་དང་འདོད་པ་གཉིས་པོ་དེ་གཙོ་བོ་ལས་གཞན་པའི་སྐྱེས་བུའི་མངོན་འདོད་མེད་པའམ་མ་ཤེས་པ་རེད།  དེ་འདྲ་ཞིག་གི་འོག་ནས་ད་ལྟ་ང་ཚོའི་བདེ་སྤྱོད་བྱེད་བཞིན་པའི་སྲིད་དོན་ཚན་རིག་དེ་ཡར་རྒྱས་ཕྱིན་པ་རེད། དེ་ཡར་རྒྱས་ཕྱིན་པའི་སྐབས་ལ་གོང་དུ་ཞུས་པ་ལྟར་དམིགས་བསལ་བྱུང་བ་གཅིག་གི་འོག་ནས་ཡར་རྒྱས་འགྲོ་རྒྱུ་ཞིག་དེང་རབས་ཚན་རིག་ཚང་མ་གཅིག་པ་རེད། ནུབ་ཕྱོགས་ཀྱི་གཉའ་གནོན་དང་བཤུ་གཞོག་མྱོང་མཁན་མི་མང་པོ་ཞིག་གི་བསམ་བློའི་ནང་ལ་གཅིག་བསྡུས་དབང་འཛིན་རིང་ལུགས་པ་དང་བཀས་བཀོད་རྒྱུད་འཛིན་རིང་ལུགས་པས་མི་མང་ལ་ཚད་ལས་བརྒལ་བའི་གཉའ་གནོན་བཤུ་གཞོག་བཏང་བ་དང་མི་ལ་འདྲ་མཉམ་གྱི་ཐོབ་ཐང་མེད་པར་གྲལ་རིམ་མཐོ་དམན་སོགས་ཀྱི་དབྱེ་བའི་རྒྱུ་མཚན་ལ་བརྟེན་ནས་མིའི་སྤྱི་ཚོགས་ལ་རང་དབང་མེད་པ་དེ་དག་གིས་མིའི་བསམ་བློའི་ནང་ཚོར་བ་གཏིང་ཟབ་པོ་ཡོད་རྐྱེན་དེ་ལ་ལན་གཅིག་རྒྱག་དགོས་རྒྱུའི་ལས་རིམ་ནང་ལ་ད་ལྟའི་སྲིད་དོན་ཚན་རིག་དེ་དག་ཡར་རྒྱས་ཕྱིན་པ་རེད།  གཅིག་བསྡུས་དབང་འཛིན་རིང་ལུགས་དང་། བཀས་བཀོད་རྒྱུད་འཛིན་རིང་ལུགས་ནི་ཡུལ་གྱི་དབང་འཛིན་མི་སྣ་གཅིག་གིས་དབང་ཆ་ཚང་མ་བཟུང་ནས་ཁོ་རང་གིས་གང་བཤད་བྱས་ཏེ་གཞན་མི་སུ་གཅིག་ལ་ཡང་བཤད་ས་མེད་པར་བཙན་དབང་གིས་འོག་ལ་གནས་དགོས་པའི་དེ་འདྲ་ཞིག་གིས་སྡུག་བསྔལ་ལ་མ་བཟོད་པར་དམར་པོའི་རིང་ལུགས་དེ་བྱུང་བ་ཡིན་པ་སོགས་ཀྱི་སྐོར་ལ་གསུང་བཤད་ཟབ་རྒྱས་གནང་རྗེས་དྲི་བ་དྲིས་ལན་ཡང་གནང་ཡོད། ད་རེས་ཀྱི་བགྲོ་གླེང་དེར་རྡ་སའི་སེར་སྐྱ་མི་མང་བརྒྱ་ཕྲག་བརྒལ་བ་མཉམ་ཞུགས་གནང་ཡོད་པ་བཅས་ཀྱི་གནས་བསྡུས་སུ།