༢༠༠༩ ཕྱི་ཟླ་ ༩ ཚེས་ ༡༩ རེས་གཟའ་སྤེན་པ།
༄༅། །རང་རིགས་དང་སློབ་རྣམས་ནས་ལོ་ལྟར་མཧཱ་གུ་རུའི་འབུམ་ཚོགས་འབུལ་བཤམས་ཞུ་མུས་ལྟར། འདི་ལོ་ཡང་བོད་རྒྱལ་ལོ་ ༢༡༣༦ རབ་བྱུང་རི་ཟླའི་ས་གླང་ལོའི་བོད་ཟླ་ ༨ ཚེས་ ༡ ནས་ཚེས་ ༥ ཕྱི་ལོ་ ༢༠༠༩ ཟླ་ ༩ ཚེས་ ༡༩ ནས་ ༢༣ བར་ཉིན་གྲངས་ལྔའི་རིང་༸རྒྱལ་བའི་སྐུ་ཕྱ་དང་། བོད་དོན་བདེན་མཐའ་སེལ་ཐབས་སུ་དམིགས་ཏེ་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་མཆོད་སྤྲིན་སྟོང་ཚར་
དང་། རྣམ་རྒྱལ་གྲྭ་ཚང་གི་མཁན་རིན་པོ་ཆེ་མཆོག་དབུ་བཞུགས་ཐོག་རྣམ་གྲྭ་འདུས་ཚོགས་དང་། བཞུགས་སྒར་གནས་འཁོད་རིས་མེད་ཆོས་སྡེ་ཁག་གི་དགེ་བཙུན་སྔགས་གསུམ། གཞན་ཡང་གཉུག་མར་གནས་པ། གློ་བུར་ལྷགས་པའི་དགེ་བཙུན་སྔགས་གསུམ་བཅས་ནས་བྱང་གཏེར་རིག་འཛིན་གདུང་སྒྲུབ་ཀྱི་སྒོ་ནས་མཧཱ་གུ་རུའི་ཚོགས་མཆོད་འབུམ་ཐེར་སྨིན་སྒྲུབ་ཞུ་འགོ་བཙུགས་ཡོད།
ཉིན་གྲངས་ལྔའི་རིང་རང་རིགས་དང་སློབ་རྣམས་ནས་དགེ་འདུན་འདུས་པ་རྒྱ་མཚོར་བསྙེན་བཀུར་གསོལ་ཇ་དང་། བཞེས་བག དགུང་ཚིགས་དཀར་སྐྱོང་། དགེ་བཙུན་སྔགས་གསུམ་ལ་ཉིན་རེ་སྐུ་འགྱེད་ཀྱང་འབུལ་འཆར་ཡོད་འདུག
སྔ་དྲོ་ཆུ་ཚོད་ ༦།༣༠ ནས་ ༡༢།༠༠ བར་ཆོས་ཐུན་གཅིག་དང་། ཉིན་རྒྱབ་ཆུ་ཚོད་ ༡།༣༠ ནས་ ༤།༣༠ བར་ཆོས་ཐུན་གཅིག་གནང་གི་ཡོད་འདུག གོང་ཚེས་ཉིན་གྱི་སྔ་དྲོ་ཆུ་ཚོད་ ༦།༣༠ ཐོག་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཚོགས་མགོན་དུ་ཆིབས་སྒྱུར་བསྐྱངས་གྲུབ་བསྟུན་རྣམ་གྲྭའི་དབུ་མཛད་ནས་ཞལ་དོན་དབུ་འཛུགས་ཀྱིས་འདོན་སྐུལ་ཞུ་སྐབས་རྟེན་འབྲེལ་མཚོན་སླད་འབྲས་བསིལ་དང་གསོལ་ཇ་འདེགས་འབུལ་ཞུས། ༸གོང་ས་༸སྐྱབས་མགོན་ཆེན་པོ་མཆོག་ཆུ་ཚོད་ ༩ ཡོལ་ཙམ་བར་ཚོགས་མགོན་དུ་སྐུ་བཞུགས་མཛད་ཡོད་པ་དང་། དེ་བཞིན་བཙན་བྱོལ་བོད་གཞུང་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། བོད་མི་མང་སྤྱི་འཐུས་རྣམ་པ། ལྷན་ཁང་སོ་སོའི་དྲུང་ཆེ་ཆུང་བཅས་གཞུང་དང་། གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་མི་སྣ་ཆེད་བཅར་གྱིས་མཉམ་ཞུགས་གནང་ཡོད་པ་བཅས་ཀྱི་གནས་བསྡུས་ས
