༢༠༠༩ ཕྱི་ཟླ་ ༩ ཚེས་ ༢༩ རེསདམིག་དམར།
༄༅། །ཕྱི་ལོ་ ༢༠༠༩ ཟླ་ ༩ ཚེས་ ༢༤ ཉིན་༸གོང་ས་མཆོག་མེམ་ཕིས་ནང་གི་མཛད་འཕྲིན་ཁག་གྲུབ་རྗེས་ཁལ་ལི་ཕོ་ནི་ཡའི་མངའ་སྡེའི་ CALIFORNIA ནང་ལོང་སྦི་ཆི་ LONG BEACH ས་ཁུལ་དུ་རྟེན་གཞི་བྱས་པའི་དགེ་ལྡན་ཆོས་གླིང་ཆོས་ཚོགས་ནས་ཇི་ལྟར་གསོལ་འདེབས་ཞུས་པ་བཞིན་༸ཞབས་སོར་འཁོད་དེ་ཆོས་ཚོགས་དེའི་དཔེ་མཛོད་ཁང་ལ་རབ་གནས་ཀྱང་མཛད་ཡོད།
ཚེས་ ༢༤ ཉིན་རྒྱབ་ཆུ་ཚོད་ ༢། ༣༠ ཙམ་གྱི་ཐོག་ཁལ་ལི་ཕོ་ནི་ཡའི་ལྷོ་ཕྱོགས་དང་། དེ་བཞིན་ཉེ་འགྲམ་ས་ཁུལ་དུ་གནས་སྡོད་བོད་མི་གྲངས་ ༥༠༠ ཙམ་ནས་༸གོང་ས་མཆོག་གི་གསེར་ཞལ་མཇལ་བར་ཆེད་བཅར་ཞུས་ཡོད་པ་ཁོང་རྣམས་ལ་མགོན་པོ་གང་ཉིད་མཆོག་གིས་དུས་ཡུན་སྐར་མ་ ༥༠ ཙམ་གྱི་རིང་བཀའ་སློབ་བཀའ་དྲིན་སྩལ་དོན། ད་ཆ་ང་ཚོ་བཙན་བྱོལ་བ་ཆགས་ནས་མི་ལོ་ ༥༠ ཐམ་པ་ཕྱིན་པ་རེད། བོད་ནང་ཡིད་སྐྱོའི་གནས་ཚུལ་བྱུང་ནས་མི་ལོ། ༦༠ ཙམ་ཕྱིན་ཟིན་པ་དེ་རྒྱལ་རབས་ལོ་རྒྱུས་ཐོག་ནས་བལྟས་ན་དུས་ཚོད་རིང་པོ་ཞིག་མིན། འོན་ཀྱང་མི་སྒེར་ཞིག་གི་མི་ཚེའི་ཐོག་ནས་བལྟས་ན་ལོ་ ༥༠ དང་ ༦༠ ཟེར་སྐབས་དུས་ཚོད་རིང་པོ་ཞིག་ཆགས་ཀྱི་ཡོད། ལོ་ངོ་ ༥༠ དུས་ཡུན་དེའི་གནས་སྟངས་ནི་ཕྱོགས་གཅིག་ནས་ཡིད་སྐྱོ་དགོས་པ་ཞིག་རེད། བོད་མི་བཙན་བྱོལ་བ་རྣམས་སྡོད་གནས་མེད་པའི་དཀའ་ངལ་དང་དེ་བས་གཞིས་ལུས་བོད་མི་རྣམས་དཀའ་ངལ་ཆེན་པོའི་འོག་གནས་དགོས་བྱུང་ཡོད། འོན་ཀྱང་དཀའ་ངལ་དེ་འདྲ་ཞིག་འཕྲད་པའི་འོག་ཆོལ་གསུམ་བོད་རིགས་ཡོངས་རྫོགས་བོད་གངས་ཅན་པའི་མི་རིགས་གཅིག་པ་ཡིན་པའི་འདུ་ཤེས་དེ་ཤུགས་ཆེ་རུ་ཕྱིན་ཡོད་པ་དེ་ཚང་མས་མཐོང་ཆོས་སུ་གྱུར་ཡོད། སྔ་མོ་ངོས་རང་སྐྱེས་ཡུལ་ལྟ་བུར་མཚོན་ན་ས་གནས་དེའི་བོད་མི་རྣམས་བོད་གཞུང་དགའ་ལྡན་ཕོ་བྲང་དང་འབྲེལ་བ་གང་ཡང་མེད། མི་མང་དབར་ཆོས་ཕྱོགས་ཀྱི་འབྲེལ་བ་ཞིག་ཡོད་ནའང་བོད་མི་གཅིག་མཚུངས་ཡིན་པའི་འདུ་ཤེས་དེ་ཙམ་མངོན་གསལ་མེད། འོན་ཀྱང་སྔ་ལོ་བོད་ནང་དོན་རྐྱེན་བྱུང་བ་དེས་ཆོལ་གསུམ་བོད་རིགས་ཡོངས་རྫོགས་མི་རིགས་གཅིག་པ་ཡིན་པའི་འདུ་ཤེས་འཛིན་བཞིན་ཡོད་པ་ང་ཚོ་ཚང་མས་ཤེས་གསལ་ཆགས་ཡོད། སྤྱིར་བཏང་བོད་མི་རྣམས་བཙན་བྱོལ་དུ་གནས་སའི་ས་གནས་རྒྱ་གར་དང་། ཨ་རི། སུད་སི་སོགས། གང་དུ་ཡིན་ནའང་བོད་མིར་མཐོང་ཕྱོགས་བཟང་པོ་ཞིག་ཡོད་པ་རེད། འོན་ཀྱང་དེ་རིང་ཁ་སང་ང་ཚོས་གཟབ་གཟབ་མ་བྱས་ན་བོད་མིའི་བཟང་སྤྱོད་དེ་དག་ག་ལེར་ག་ལེར་ཇེ་ཞན་དུ་འགྲོ་ཉེན་ཡོད། རྒྱལ་སྤྱིའི་ཤེས་ཡོན་ཅན་གྱི་མི་སྣའི་ཁྲོད་དུ་བོད་ཀྱི་རིག་གཞུང་འདི་འཛམ་གླིང་སྤྱི་ལ་ཕན་ཐོགས་ཡོད་པ་ཞིག་ཡིན་པའི་ལྟ་ཚུལ་ཡོད། ཚན་རིག་པའི་ཁྲོད་དུའང་བོད་ཀྱི་རིག་གཞུང་དང་། དེ་བཞིན་ནང་ཆོས་ནི་འགྲེམས་སྟོན་ཁང་དུ་སྒྲིག་ཤོམ་བྱ་རྒྱུའི་ཅ་དངོས་ལྟ་བུ་མིན་པར་དོན་དངོས་ཁ་ཡོད་ལག་ཡོད་ཀྱི་ཉིན་རེའི་འཚོ་བའི་ཁྲོད་དུ་འབྲེལ་བ་ཡོད་པ་ཞིག་ཡིན་པར་ངོས་འཛིན་བྱེད་ཀྱི་ཡོད། གལ་ཏེ་ང་ཚོས་མི་ལོ་ ༥༠ ལ་ཕྱིར་མིག་ཅིག་བལྟས་པ་ཡིན་ན་ང་ཚོར་རྐྱེན་ངན་དེ་འདྲ་ཞིག་འཕྲད་པ་དེ་གྲོགས་སུ་ཕྱིན་པའི་བཟོ་འདྲ་པོ་ཡོད། ངོས་ནས་རྒྱུན་དུ་ཤོད་ཀྱི་ཡོད། གལ་ཏེ་ངོས་རང་བཙན་བྱོལ་བ་མིན་པར་ལྷ་སར་བསྡད་ཡོད་ན་སྤམ་པོ་དང་རྫིག་ཉམས་དོད་པོ་བྱས་ནས་སྡོད་པ་ལས་འཛམ་གླིང་ཕྱི་ལ་འབྲེལ་བ་ཡོང་མི་ཐུབ་པ་དང་ཕྱི་ནང་གནས་ཚུལ་རྣམས་ལ་དོ་སྣང་དེ་འདྲ་སླེབས་ཐབས་མེད། ང་ཚོ་བཙན་བྱོལ་དུ་ཡོང་བར་བརྟེན་སྲིད་དོན་པ་དང་། ཚན་རིག་པ། མི་དཀྱུས་མ། ནད་པ་སོགས་མི་སྣ་འདྲ་མིན་དང་ཐུག་འཕྲད་བྱུང་ཐུབ་པ་དེ་འདྲ་རེད། ངོས་རང་བྱིས་པའི་སྐབས་ནས་ཤེས་བྱའི་གནས་ག་འདྲ་ཞིག་ཡིན་རུང་གནས་སྟངས་དེ་ཇི་འདྲ་ཡིན་བསམ་པ་དང་དེ་འདྲ་ཡོང་དགོས་དོན་གང་ཡིན་སྙམ་པའི་ཤེས་འདོད་ཀྱི་འདུན་པ་དེ་ཤུགས་ཆེན་པོ་ཡོད། མི་སྣ་འདྲ་མིན་དང་ཐུག་འཕྲད་བྱུང་བ་དེས་ཕྱི་ནང་གི་གནས་ཚུལ་མང་པོ་ཞིག་ཤེས་རྒྱུར་གོ་སྐབས་ཐོབ་བྱུང་། ངོས་ནས་དུས་རྒྱུན་དུ་ཤོད་བཞིན་པ་དེ་རེ་བ་བཟང་ས་ནས་རྒྱག་དགོས་པ་དང་། གྲ་སྒྲིག་སྡུག་ས་ནས་བྱེད་དགོས། དེར་བརྟེན་ཚང་མས་ལྷོད་གཡེང་མ་ཤོར་བའི་ཐོག་གྲུང་གཟབ་བྱེད་དགོས། བོད་ནང་དུ་ཡོད་པའི་བོད་མི་རྣམས་ཉིན་ལྟར་འཇིགས་སྣང་དང་དཀའ་ངལ་འོག་གནས་ཡོད་ཙང་སོ་སོའི་གནས་སྟངས་ཇི་འདྲ་ཡིན་པ་དྲན་སྐུལ་ཐེབས་ཀྱི་ཡོད། ང་ཚོ་བཙན་བྱོལ་དུ་ཡོད་པའི་བོད་མི་རྣམས་སོ་སོའི་ཉིན་རེའི་འཚོ་བའི་གནས་སྟངས་དང་། ཡར་རྒྱས་ཇི་འདྲ་ཞིག་གཏོང་དགོས་པ་དེ་འདྲའི་ཐོག་ནས་འགྲོ་བཞིན་ཡོད། རྩ་བའི་ཚང་མས་འགན་ཁུར་གྱི་ཐོག་ནས་འཐབ་རྩོད་བྱེད་ཀྱི་ཡོད་ནའང་ཉིན་རེའི་གནས་སྟངས་དེ་ཙམ་ཛ་དྲག་པོ་ཞིག་མེད་སྟབས་ལྷོད་གཡེང་ཤོར་རྒྱུའི་ཉེན་ཁ་ཏན་ཏན་ཡོད། བྱས་ཙང་ཚང་མས་སོ་སོའི་གནས་སྟངས་ལ་བསམ་བློ་བཏང་ནས་གཞིས་ལུས་རྒྱ་ཆེའི་མི་དམངས་ཀྱིས་ང་ཚོར་རེ་བ་གང་འདྲ་ཞིག་རྒྱག་གི་ཡོད་པ་དེ་ཚོ་དྲན་པ་བྱེད་དགོས། འོན་ཀྱང་ངོས་ནས་ཁྱེད་རང་ཚོར་བོད་དོན་ཐོག་དམིགས་བསལ་དེ་འདྲ་བྱེད་དགོས་རེད་དེ་འདྲ་བརྗོད་ཀྱི་མེད། ཁྱེད་རང་ཚོ་བོད་མི་སུ་འདྲ་ཞིག་ཡིན་རུང་སོ་སོའི་ཉིན་རེའི་ལས་ཀ་བྱེད་ཡུལ་ནང་བོད་མིའི་ཡ་རབས་བཟང་སྤྱོད་ཀྱི་ཁྱད་ཆོས་དེ་དག་མངོན་ཐུབ་པ་བྱེད་རྒྱུའི་གོ་སྐབས་དེ་བཟུང་དགོས། སྤྱོད་ལམ་དེ་ལ་བརྟེན་ནས་མི་གཞན་གྱི་བོད་དོན་ལ་རྒྱབ་སྐྱོར་ཐོབ་ཀྱི་རེད། ཕ་མ་ཚོས་ཀྱང་ཕྲུ་གུ་ཚོར་སོ་སོའི་ཉམས་མྱོང་ཤོད་དགོས། དེ་འདྲ་བྱས་ན་ཕྲུ་གུ་ཚོས་ང་ཚོའི་གནས་སྟངས་ཇི་འདྲ་ཞིག་གི་འོག་ལ་ཡོད་པ་དང་སོ་སོའི་ངོ་བོ་ཇི་འདྲ་ཡིན་པར་དྲན་སྐུལ་ཐེབས་ཀྱི་རེད། ང་ཚོས་འཚེ་བ་མེད་པའི་ཐོག་ནས་བོད་དོན་བདེན་མཐའ་སེལ་ཐབས་བྱེད་བཞིན་ཡོད། ང་ཚོར་བདེན་པ་ཡོད་ཙང་འཚེ་བ་མེད་པའི་ཐབས་ལམ་དེར་གདེང་སྤོབས་ཡོད། དེར་བརྟེན་ང་ཚོ་འཚེ་བ་མེད་པའི་ལམ་གྱི་ཐོག་ནས་ལས་དོན་རྣམས་ཕྱི་གསལ་ནང་གསལ་བྱེད་ཐུབ་པ་དེ་འདྲ་རེད། རྒྱ་མི་དམར་ཤོག་པ་ཚོས་དེ་ལས་ལྡོག་སྟེ་བོད་དོན་དང་འབྲེལ་བའི་གནས་ཚུལ་རྣམས་དྲང་བདེན་བརྗོད་ཀྱི་མེད། དེར་བརྟེན་ཁོང་ཚོས་སྐྱག་རྫུན་དང་འཁྱོག་བཤད། དྲག་གནོན་བྱེད་རྒྱུ་མ་གཏོགས་ཐབས་གཞན་གང་ཡང་མེད། ཁོ་ཚོར་དྲང་བདེན་ཡོད་ན་རྒྱུ་མཚན་ཤོད་ཐུབ་རྒྱུ་ཞིག་ཡོད་དགོས་འོན་ཀྱང་དེ་འདྲ་མེད། ང་ཚོ་འཚེ་བ་མེད་པའི་ལམ་གྱི་ཐོག་འགྲོ་བར་ཤེས་ཡོན་དགོས་པ་ཡིན། སྔ་མོ་ང་ཚོར་དེང་དུས་ཤེས་ཡོན་གྱི་མ་འདང་པར་རྗེས་ལུས་ཤོར་ཡོད། ༸རྒྱལ་དབང་སྐུ་ཕྲེང་ ༡༣ པ་ཆེན་པོས་རྒྱ་གར་ནས་བོད་དུ་ཕྱིར་ཆིབས་སྒྱུར་བསྐྱངས་རྗེས་བོད་པའི་སློབ་ཕྲུག་ཁག་གཅིག་ཕྱི་རྒྱལ་དུ་སློབ་སྦྱོང་ཆེད་གཏོང་རྒྱུའི་དགོངས་བཞེས་གནང་ཡོད་ཀྱང་དེ་ལྟར་ལག་སྟར་མ་ཐུབ་པ་རེད། ངོས་རང་ལ་དྭགས་ཁུལ་དུ་བསྐྱོད་སྐབས་ཡེ་ཤུའི་ཆོས་པ་ཁག་གཅིག་དང་ཐུག་འཕྲད་བྱུང་བའི་སྐབས་དེར་ངོས་ནས་ཁོང་ཚོར། ཁྱོད་ཚོ་ཡེ་ཤུའི་ཆོས་ལུགས་པ་ཚོ་འཛམ་གླིང་ནང་ཤེས་ཡོན་དར་སྤེལ་གནང་མཁན་ཆོས་ལུགས་ཚགས་ཚུད་ཤོས་ཤིག་ཡིན་གྱི་རེད། ཅེས་ལབ་པ་ཡིན། སྔ་མོ་བོད་ཁམས་ཕྱོགས་སུ་ཡོད་པའི་འབའ་ཐང་ཁུལ་དུ་ཡེ་ཤུའི་ཆོས་ལུགས་པས་སློབ་གྲྭ་ཞིག་བཙུགས་ཡོད་པ་དེར་འབའ་པ་ཕུན་ཚོགས་དབང་རྒྱལ་ཁོ་རང་སློབ་གྲྭ་དེར་འགྲོ་མྱོང་ཡོད་སྐོར་ངོས་ལ་བརྗོད་བྱུང་། དེ་མཚུངས་ཨ་མདོའི་ནང་དུའང་སློབ་གྲྭ་གཞན་གཅིག་ཡོད་པ་རེད།
གལ་ཏེ་བོད་ནང་སློབ་གྲྭ་དེ་ལས་མང་བ་ཡོད་ན་བོད་མི་སྟོང་ཕྲག་མང་པོར་དེང་དུས་ཤེས་ཡོན་གྱི་གོ་སྐབས་ཐོབ་པ་བྱུང་ཡོད། ང་ཚོས་སྔ་མོའི་ཉམས་མྱོང་ལ་གཞིགས་ནས་ཤེས་ཡོན་ལ་དམིགས་བསལ་དོ་སྣང་བྱེད་དགོས། ཞེས་བཀའ་སྩལ། དེ་ནས་༸གོང་ས་མཆོག་ནས་མཇལ་བཅར་བའི་ཁྲོད་དུ་མཐོ་སློབ་འགྲིམས་བཞིན་པའི་སློབ་མ་གྲངས་ ༡༥ ཙམ་ཡོད་པ་ཁོང་རྣམས་ལ་བསྔགས་བརྗོད་མཛད་ནས་བཀའ་སློབ་ཕེབས་དོན། ཁྱེད་རང་ཚོས་སློབ་སྦྱོང་དང་མཉམ་དུ་གཞན་དང་འབྲེལ་བ་མང་ཙམ་བྱེད་དགོས། དམིགས་བསལ་རྒྱ་རིགས་ཡོད་ཚེ་ཁོང་ཚོ་དང་སེམས་ཐག་ཉེ་པོ་བྱེད་དགོས། དེ་འདྲ་བྱས་ན་ཕན་ཐོགས་ཡོད་སྐོར་བཀའ་སྩལ། དེ་བཞིན་མགོན་པོ་གང་ཉིད་མཆོག་གིས་ཕ་མ་ཚོར་བཀའ་ཕེབས་དོན། ཕ་མ་ཚོས་སོ་སོའི་ལྟོ་གོས་ཙམ་ལ་མགོ་མ་འཁོར་བར་ཕྲུ་གུར་ཤེས་ཡོན་སློབ་སྦྱོང་བྱ་དགོས་པའི་སློབ་གསོ་གཏོང་དགོས་པ་དང་ལྷག་པར་དུ་རིགས་གཅིག་རྐང་འཛིན་གྱི་སློབ་སྦྱོང་དེ་འདྲ་ཐོན་ཐུབ་པའི་སློབ་གསོ་རྒྱག་དགོས། སྐབས་རེ་ཁག་གཅིག་གི་ཁང་པ་དེ་འདྲ་ཉོས་ནས་འཚོ་བ་སོགས་ལ་དཀའ་ངལ་འཕྲད་སྐབས་ཕ་མས་ཕྲུ་གུ་ཚོ་དངུལ་གསོག་རྒྱུའི་ཆེད་དུ་བེད་སྤྱོད་ཕྱིན་པ་ཡིན་ན་ཡག་པོ་མེད། དེང་དུས་ཀྱི་ཤེས་ཡོན་དང་ལྷན་དུ་བོད་ཀྱི་ཐུན་མོང་མིན་པའི་རིག་གཞུང་ནང་ཆོས་ལ་གཞི་བཅོལ་ནས་ཡོད་པ་དེ་ཚོར་དོ་སྣང་བྱེད་འཇུག་དགོས། ནང་ཆོས་ལ་དད་པ་ཡོད་པ་ཙམ་གྱི་མི་ཆོག་པར་དེ་ལ་སློབ་སྦྱོང་བྱེད་རྒྱུ་དང་རྒྱུ་མཚན་ཤེས་པའི་ཐོག་ནས་ཡིད་ཆེས་དང་དད་པ་སྐྱེ་ཐུབ་པ་ཞིག་བྱེད་དགོས་ཞེས་བཀའ་སློབ་བཀའ་དྲིན་སྩལ། དེ་བཞིན་དགེ་འདུན་པ་ཁག་གཅིག་བཅར་ཡོད་པ་རྣམས་ལ་བཀའ་སློབ་ཕེབས་དོན། དགེ་འདུན་པ་གང་ལ་གང་འཚམས་ཤིག་ཕེབས་འདུག་ཁྱེད་རང་ཚོ་སོ་སོ་རབ་བྱུང་ཞིག་ཡིན་པ་དང་ལུས་ལ་སངས་རྒྱས་ཀྱི་ན་བཟའ་བཞེས་མཁན་ཞིག་ཡིན་པའི་ཆ་ནས་ཡ་རབས་བཟང་སྤྱོད་བྱེད་དགོས་པ་ལས་ལུས་ལ་སངས་རྒྱས་ཀྱི་ན་བཟའ་གྱོན་ནས་སྒོ་གསུམ་གྱི་སྤྱོད་པ་དེ་སྤྱིར་བཏང་མི་སྐྱའི་འཚོ་བ་འདྲ་པོ་ཞིག་དང་གྲྭ་ཆས་དེ་ཉིན་རེའི་འཚོ་བ་སྐྱེལ་རྒྱུའི་ལག་ཆ་ལྟ་བུ་ཆགས་པ་ཡིན་ན་ཡག་པོ་མེད། དེ་འདྲ་ཆགས་རྒྱུའི་ཉན་ཁ་ཏན་ཏན་ཡོད། སོ་སོ་རབ་བྱུང་ཞིག་ཡིན་པའི་ཆ་ནས་སོ་སོའི་ལས་འགན་དེ་བསྒྲུབ་དགོས། ན་བཟའ་དེ་དང་འགལ་བའི་ཚུལ་མིན་རིགས་དེ་འདྲ་བྱེད་རྒྱུ་མེད། ཅེས་བཀའ་སྩལ། ཡང་༸གོང་ས་མཆོག་གིས་རྒྱ་ནག་དང་འབྲེལ་བའི་སྐོར་ལ་བཀའ་སློབ་ཕེབས་དོན། རྒྱ་ནག་དང་འབྲེལ་བའི་སྐོར་ངོས་ལ་དམིགས་བསལ་གང་ཡང་ཤོད་རྒྱུ་མེད། ལས་འགན་རྐང་གཙོ་བོ་དེ་མི་དམངས་ཀྱིས་འོས་འདེམས་བྱས་པའི་བཀའ་བློན་ཁྲི་པས་འཁྱེར་གྱི་ཡོད། ང་ཚོ་མང་གཙོ་ཡང་དག་པའི་ལམ་ཐོག་སྐྱོད་བཞིན་ཡོད། སྔ་ལོའི་ནང་རྒྱལ་ཡོངས་མི་མང་ཚོགས་ཆེན་སྐབས་ངོས་ནས་བཀའ་ཁྲི་མཆོག་ལ་ང་ཚོས་མ་འོངས་པའི་ལངས་ཕྱོགས་ཇི་འདྲ་ཞིག་གི་ཐོག་འགྲོ་དགོས་མིན་མི་དམངས་ཀྱི་བསམ་ཚུལ་གང་ཡོད་པ་དྲང་བདེན་ཐོག་ནས་ཤེས་པ་བྱེད་དགོས་པ་ལས་ང་ཚོའི་མངོན་འདོད་ལྟར་མི་དམངས་ཁྲིད་རྒྱུའི་འབད་བརྩོན་བྱེད་མི་རུང་ཞེས་ཞུས་ཡོད། སྔ་ལོའི་བོད་ནང་ཞི་རྒོལ་བྱུང་བའི་རྗེས་རྒྱ་གཞུང་གི་བྱེད་ཕྱོགས་ལ་གཞིགས་ནས་ང་ཚོས་རྒྱ་གཞུང་དང་འབྲེལ་བ་བྱེད་པ་དང་ཆབས་ཅིག་རྒྱ་རིགས་མཁས་དབང་ཁག་དང་ཐུག་འཕྲད་གང་ཡོང་བྱེད་དགོས་པ་རེད། བོད་རྒྱ་མཛའ་འབྲེལ་ཚོགས་པ་དེ་འདྲ་འཛུགས་དགོས་པ་ངོས་ནས་བསམ་ཚུལ་བཏོན་པ་བཞིན་ཚོགས་པ་དེ་འདྲ་ཁ་ཤས་བཙུགས་ཡོད། ངོས་ནས་དམིགས་བསལ་རྒྱ་རིགས་མཁས་དབང་ཚོ་དང་ཐུག་རྒྱུའི་འབད་བརྩོན་བྱེད་ཀྱི་ཡོད། ལོ་གཅིག་ནང་ངོས་ནས་རྒྱ་ནག་མཁས་དབང་མི་གྲངས་ ༣༠༠ ཙམ་དང་ཐུག་འཕྲད་བྱས་པ་ཡིན།
ཁོང་ཚོར་བོད་དང་འབྲེལ་བའི་གནས་ཚུལ་གསལ་བཤད་བྱེད་སྐབས་ང་ཚོར་རྒྱབ་སྐྱོར་བྱེད་རྒྱུར་ཐེ་ཚོམ་མི་འདུག རྒྱ་རིགས་མཁས་དབང་ཁག་གཅིག་གིས་རྒྱ་ནག་ནང་ཆབ་སྲིད་ཀྱི་གནས་སྟངས་ལ་འགྱུར་བ་འགྲོ་རྒྱུ་ཡིན་པ་དང་། འདས་པའི་ལོ་ངོ་ ༦༠ ནང་ལ་བལྟས་པ་ཡིན་ན་རྒྱ་མིའི་བཟང་སྤྱོད་དེར་ཉམས་ཆག་ཕྱིན་ཡོད། དེ་རིང་ཁ་སང་རྒྱ་ནག་ནང་དངུལ་གཙོ་བོ་ཡིན་པའི་བསམ་ཚུལ་འཛིན་བཞིན་ཡོད། རྒྱ་རིགས་དེ་ཚོས་རྒྱ་མི་རིགས་ཀྱི་བཟང་སྤྱོད་དེ་དག་སླར་གསོ་གཏོང་དགོས་པའི་བསམ་ཚུལ་ཤུགས་ཆེན་པོ་འདུག ཁོང་ཚོས་ངོས་ལ་བརྗོད་གསལ། ད་ལྟ་ཁྱེད་ཚོར་བོད་དོན་ཐོག་ལ་རྒྱ་མིའི་མཁས་དབང་ཁག་གིས་རྒྱབ་སྐྱོར་དགོས་པ་ཞིག་རེད། མ་འོངས་པར་བོད་པ་ཚོས་རྒྱ་མི་རིགས་ཀྱི་བཟང་སྤྱོད་སླར་གསོ་གཏོང་རྒྱུར་རྒྱབ་སྐྱོར་གནང་དགོས་ངེས་ཤིག་ཆགས་ཀྱི་རེད། ཅེས་ངོས་ལ་བཤད་བྱུང་བར་བརྟེན་རྒྱ་རིགས་མཁས་དབང་ཚོས་བོད་ཀྱི་ཐུན་མོང་མིན་པའི་རིག་གཞུང་གི་རིན་ཐང་ཇི་ཡིན་ཤེས་ཀྱི་ཡོད། དེའི་ཐོག་ནས་རྒྱ་ནག་ནང་གི་སྤྱི་ཚོགས་ཡར་རྒྱས་གཏོང་རྒྱུར་ཕན་ཐོགས་ཡོད་པའང་ཤེས་ཀྱི་ཡོད། དེ་འདྲ་སོང་ཙང་ང་ཚོས་རྒྱ་མི་རིགས་དང་མཉམ་དུ་འབྲེལ་བ་འཇོག་དགོས་པ་ཤིན་ཏུ་གལ་གནད་ཆེན་པོ་འདུག རྒྱ་རིགས་འགའ་ཤས་ཀྱིས་ཁོང་ཚོ་སྔ་མོ་རྒྱ་ནག་གཞུང་གིས་འགྲེལ་བཤད་གང་བརྒྱབ་པའི་གནས་ཚུལ་དེ་མ་གཏོགས་ཤེས་ཀྱི་མེད་པ་དང་། རྗེས་སུ་རྒྱ་གར་དུ་ཡོང་ནས་བོད་མི་དང་དངོས་སུ་ཐུག་འཕྲད་བྱུང་སྐབས་གཞི་ནས་དངོས་ཡོད་གནས་ཚུལ་ཇི་ཡིན་གྱི་གསལ་བཤད་ཐུབ་པ་བྱུང་སྟེ་ཁོང་ཚོས་བོད་མི་ཚོར་གནས་ཚུལ་ཐབས་སྡུག་དེ་འདྲ་བྱུང་བར་བཟོད་གསོལ་ཡང་ཞུ་གི་འདུག དེ་འདྲ་ཡོང་དགོས་དོན་གཙོ་བོ་ནི་ང་ཚོར་དྲང་བདེན་ཡོད་པའི་རྐྱེན་གྱི་རེད། ང་ཚོས་སྐབས་འཕྲལ་གནས་ཚུལ་ལ་བལྟས་པ་ཡིན་ན་ཐབས་ཟད་རེ་བ་མེད་པ་འདྲ་པོ་ཞིག་ཡོད་ནའང་རྒྱ་ཆེ་ས་ནས་བལྟས་པ་ཡིན་ན་སྔ་ཕྱི་མ་གཏོགས་བདེན་པར་རྒྱལ་ཁ་ཐོབ་ངེས་ཡིན། དེར་བརྟེན་ཚང་མས་ཞུམ་པ་མེད་པའི་སྙིང་སྟོབས་དང་འགྱུར་བ་མེད་པའི་ཆོད་སེམས་བརྟན་པོ་ཞིག་བཟུང་དགོས་པའི་བཀའ་སློབ་ཟབ་རྒྱས་སྩལ་ཡོད། དེ་རྗེས་༸གོང་ས་མཆོག་ལ་ཆོས་ཚོགས་ནས་ཇི་ལྟར་གསོལ་འདེབས་ཞུས་པ་བཞིན་བདེན་བཞིའི་གསུང་ཆོས་དང་། འོད་དཔག་མེད་ཀྱི་རྗེས་གནང་། དེ་བཞིན་སྨན་བླའི་བཀའ་དབང་སོགས་སྩལ་ཡོད་པ་དང་ཆོས་ཚོགས་ནས་༸གོང་ས་མཆོག་ལ་བཀའ་དྲིན་གཏང་རག་གི་སྒོ་ནས་མཎྜལ་རྟེན་གསུམ་འདེགས་འབུལ་ཞུས་ཡོད་པ་བཅས།
