༢༠༠༩ ཕྱི་ཟླ་ ༨ ཚེས་ ༡༠ རེས་གཟའ་ཟླ་བ།
༄༅།། ཕྱི་ལོ་ ༢༠༠༩ ཟླ་ ༨ ཚེས་ ༤ ཉིན་ཤེས་ཡོན་འགན་འཛིན་ཚེ་རིང་ཕུན་ཚོགས་ལགས་དང་དབུས་བོད་སློབ་འཛིན་ཚོགས་ཀྱི་ཤེས་ཡོན་འགན་འཛིན་ཨེས། པི། ར་ནཱ་རྣམ་གཉིས་ནས་ཨོ་རི་ས་ཕུན་ཚོགས་གླིང་གཞིས་ཆགས་ཀྱི་སློབ་གྲྭ་དབུས་མ་དང་། དེ་གའི་ཡན་ལག་མ་ཧན་རྡར་གྷར་དང་ལོ་བྷར་སིང་དམའ་རིམ་སློབ་གྲྭ་གཉིས་བཅས་ཀྱི་ལོ་འཁོར་ཤེས་ཡོན་རྟོག་ཞིབ་གནང་ཡོད་པ་རེད། དེ་བཞིན་ཉེ་འཁོར་སློབ་གྲྭ་ Jawahar Navodhya Vidhyalaya ནས་མཐོ་རིམ་དགེ་རྒན་ཞིག་ཀྱང་རྟོག་ཞིབ་གནང་ཆེད་ཕེབས་ཡོད། རྟོག་ཞིབ་རིང་དགེ་རྒན་སློབ་འཁྲིད་དང་སློབ་མའི་ཤེས་ཡོན། ལུས་རྩལ་དང་ཟློས་གར་སོགས་སློབ་གྲྭའི་ཉིན་རེའི་བྱེད་སྒོ་ཁག་གཟིགས་ཞིབ་དང་འབྲེལ་ཞོགས་ཚོགས་སྐབས་སློབ་ཕྲུག་ཡོངས་ལ་ཤེས་སྤྱོད་གཙང་གསུམ་སྐོར་དང་། དགེ་ལས་ཚོགས་འདུ་སྐབས་སློབ་གྲྭའི་གང་ཅིའི་གནས་སྟངས་ཡར་རྒྱས་གཏོང་ཕྱོགས་སྐོར་ལ་ལམ་སྟོན་གནང་ཡོད་པ་རེད།
དབུས་བོད་སློབ་འཛིན་ཚོགས་ཀྱི་ཁྱབ་ཁོངས་ཨོ་རི་ས་སློབ་གྲྭ་དེ་བཞིན་འཛིན་རིམ་བཅུ་པ་བར་ཡོད་པ་དང་། ད་ལྟའི་ཆར་སློབ་ཕྲུག་གྲངས་ ༢༧༦ དང་དགེ་ལས། ༣༦ ཡོད། ཕྱི་ལོ་ ༢༠༠༩ ལོའི་འཛིན་རིམ་བཅུ་པའི་རྒྱ་གར་རྒྱལ་ཡོངས་ཡིག་རྒྱུགས་ནང་སློབ་མ་གྲངས་ ༢༦ ཡོད་པ་ནས་ཆ་ཚང་ཡིག་རྒྱུགས་འཕྲོད་དེ་ལོ་གསུམ་བསྟུད་མར་སྤྱི་ཡོངས་ཡིག་རྒྱུགས་རྒྱ་ཆ་ ༡༠༠ ལོན་ཐུབ་པ་བྱུང་ཡོད། འདི་ལོར་སློབ་གྲྭའི་སྤྱི་ཡོངས་ཤེས་ཚད་གནས་སྟངས་དང་། གཙང་སྦྲ། སྒྲིག་ཆས་སོགས་གང་ཅིའི་ཐད་དྲག་ཏུ་ཕྱིན་པའི་མཐོང་སྣང་བྱུང་ཡོད་པ་རེད།
རྟོག་ཞིབ་རིང་ས་གནས་འགོ་འཛིན་ཉི་མ་བཀྲ་ཤིས་ལགས་ནས་མཉམ་ཞུགས་གནང་ཡོད་པ་མ་ཟད། ས་གནས་གྲོས་ཚོགས་ཀྱི་ཚོགས་གཙོ་དང་། གཞིས་ཀེམ་དང་ཚོགས་པ་ཁག་གི་འཐུས་མི། ཕ་མའི་འཐུས་མི་བཅས་ནས་ཕེབས་བསུ་སྣེ་ལེན་ཞུས་སོང་བའི་གནས་ཚུལ་བཅས།།
