༢༠༠༩ ཕྱི་ཟླ་ ༨ ཚེས་ ༧ རེས་གཟའ་པ་སངས།
༸གོང་ས་མཆོག་ལ་མར་བྷར་གཙུག་ལག་སློབ་གྲྭའི་སློབ་སྤྱི་མཆོག་ནས་མཁས་དབང་གི་ཕྱག་འཁྱེརའབུལ་བཞིན་པ།
ཕྱི་ཟླ་ ༨ ཚེས་ ༣ ཉིན་གྱི་སྔ་དྲོ་ཆུ་ཚོད་ ༡༠།༣༠ སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཇར་མན་ཧེ་སན་མངའ་སྡེའི་ནང་ཡོད་པའི་མར་བྷར་གཙུག་ལག་སློབ་གྲྭ་ཆེ་མོ་ (Marburg University) ནས་༸གོང་ས་མཆོག་ལ་ཆེ་བསྟོད་མཁས་དབང་གི་ཕྱག་འཁྱེར་འབུལ་ལམ་ཞུས་ཡོད་པ་རེད། དེ་ཡང་ཆེ་བསྟོད་མཁས་དབང་གི་ཕྱག་འཁྱེར་འབུལ་ལམ་ཞུ་རྒྱུའི་ལྷན་ཚོགས་དེ་མར་བྷར་གྲོང་ཁྱེར་གྱི་ལོ་རྒྱུས་ལྡན་པའི་རྒྱལ་ཁང་གི་ཚོམས་ཆེན་ནང་དུ་ཚོགས་ཡོད་
༸གོང་ས་མཆོག་ནས་སྙན་གྲགས་ཅན་གྱི་མི་སྣའི་མཚན་རྟགས་འགོད་སའི་གསེར་གྱི་ཕྱག་དེབ་ནང་ལ་མཚན་རྟགས་སྐྱོན་བཞིན་པ།
ཅིང་། ལྷན་ཚོགས་དེའི་ཐོག་མར་བྷར་གཙུག་ལག་སློབ་གྲྭའི་སྤྱི་ཁྱབ་སློབ་སྤྱི་མཆོག་ནས་ཕེབས་བསུའི་གསུང་བཤད་གནང་བའི་ནང་། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ནས་བོད་བརྒྱུད་ནང་བསྟན་ཞིབ་འཇུག་ལ་རྒྱབ་སྐྱོར་གནང་བ་ལུང་འདྲེན་མཛད་ནས། དེ་རིང་གཙུག་ལག་སློབ་གྲྭ་འདིའི་ཆེ་བསྟོད་མཁས་དབང་གི་ཕྱག་འཁྱེར་འདི་འབུལ་ལམ་ཞུ་བཞིན་ཡོད་སྐོར་དང་། 
དེ་བཞིན་སྐུ་ཉིད་འདི་གའི་གཙུག་ལག་སློབ་གཉེར་ཁང་དུ་༸ཞབས་སོར་འཁོད་པ་འདི་ནི་ང་ཚོའི་གཟི་བརྗིད་ཅིག་ལ་ངོས་འཛིན་ཞུ་བཞིན་ཡོད་པས་སྐུ་ཉིད་ལ་བཀའ་དྲིན་ཆེ་ཞུ་བཞིན་ཡོད། ཅེས་དང་དེ་རྗེས་མར་བྷར་གཙུག་ལག་སློབ་གྲྭའི་སློབ་དཔོན་ཕི་ལིབ་མཆོག་ནས་གསུང་དོན། ཐེངས་འདིར་དམིགས་བསལ་སྐུ་མགྲོན་གསུམ་བརྒྱ་བརྒལ་བའི་དགའ་བསུའི་རྣམ་འགྱུར་ཤུགས་ཆེ་བསྟན་པའི་ཐོག་ནས་མར་བྷར་གཙུག་ལག་སློབ་གྲྭས་རྒྱུ་མཚན་གཙོ་བོ་གཉིས་ཀྱི་ཐོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཆེ་བསྟོད་མཁས་དབང་གི་ཕྱག་འཁྱེར་དེ་འབུལ་ལམ་ཞུས་ཡོད། དེ་ཡང་དང་པོ་༸གོང་ས་མཆོག་གི་མཛད་རྗེས་ལ་བརྟེན་ནས་རྒྱ་གར་དང་བོད་རིག་པའི་ཞིབ་འཇུག་ཡར་རྒྱས་གཏོང་རྒྱུར་རྒྱབ་སྐྱོར་ཤུགས་ཆེ་གནང་ཡོད་པའི་སྟེང་བོད་ཀྱི་ནང་བསྟན་རྒྱུན་སྲོལ་དང་ལྡན་ལ་དེང་དུས་ཀྱི་ཚན་རིག་དང་མཐུན་པར་འཆད་སྤེལ་མཛད་པར་བརྟེན་དེང་སྐབས་བོད་ཀྱི་ནང་བསྟན་དང་བོད་རིག་པ་་བ་མང་པོར་མིག་སྒོ་གསར་པ་ཞིག་ཕྱེ་གནང་བའི་མཛད་འཕྲིན་ལ་ཆེ་བསྟོད་ཞུ་རྒྱུ་དང་། ༸གོང་ས་མཆོག་གི་རྒྱ་ཆེའི་དགོངས་བཞེད་ལ་བརྟེན་ཝར་ཌྷ་བོད་ཀྱི་མཐོ་རིམ་སློབ་གཉེར་ཁང་དེ་བཙུགས་གནང་སྟེ་ནུབ་ཕྱོགས་ཚན་རིག་ལམ་ལུགས་ཐོག་ནས་ནང་ཆོས་ཀྱི་བསླབ་བྱ་དང་། ལོ་རྒྱུས་བཅས་ཚད་མཐོའི་ཞིབ་འཇུག་བྱེད་ཐུབ་པའི་ཁས་ལེན་ཞུ་རྒྱུའི་ཆེད་དུ་ཡིན། ཞེས་གསུང་བཤད་གནང་ཡོད་ཅིང་དེ་བཞིན་གསུང་བཤད་མཁན་ཚང་མས་ཆེ་བསྟོད་ཆེན་པོ་ཞུས་ཡོད་པ་རེད། ཆེ་བསྟོད་ཞུ་བའི་ལྷན་ཚོགས་དེར་ཇར་མན་གྲོས་ཚོགས་དང་མངའ་སྡེའི་གྲོས་ཚོགས་ཀྱི་འཐུས་མི། མངའ་སྡེའི་སྲིད་གཞུང་གི་བློན་ཆེན་གྱི་གཙོས་གནད་ཡོད་ལས་བྱེད་ཁག་དང་། གྲོང་ཁྱེར་སྤྱི་ཁྱབ། གཙུག་ལག་སློབ་གྲྭའི་སློབ་དཔོན་དང་སློབ་ཕྲུག་རྒན་པ་ཉུང་ཤས་བཅས་ཁྱོན་བསྡོམས་སྐུ་མགྲོན་གྲངས་ ༣༠༠ ཙམ་དང་དེ་མིན་གཙུག་ལག་སློབ་གྲྭ་དེའི་ཚོམས་ཆེན་ཨ་མའི་ནང་དུ་སློབ་ཕྲུག་གྲངས་ ༡༠༠༠ བརྒལ་བར་མཛད་སྒོ་དེ་བརྙན་འཕྲིན་བརྒྱུད་ཐད་ཀར་རྒྱང་སྲིངས་གནང་ཡོད། སྐབས་དེར་༸གོང་ས་མཆོག་ནས་བཀའ་སློབ་ཕེབས་པའི་ནང་། ཁྱེད་རྣམ་པས་ངོས་ལ་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་ཐོག་ལས་དོན་བསྒྲུབ་པར་ངོས་འཛིན་གནང་སྟེ་ཆེ་བསྟོད་ཀྱི་མཁས་པའི་གཟེངས་བསྟོད་གནང་བར་བཀའ་དྲིན་ཆེ་ཞེས་བཀའ་སྩལ་ཡོད་པ་མ་ཟད། ༸གོང་ས་མཆོག་ས་ཕྱོགས་གང་དུ་ཆིབས་སྒྱུར་བསྐྱངས་ཀྱང་སྐུའི་རླབས་ཆེན་མཛད་ཁུར་གསུམ་གྱི་ཐོག་བཀའ་སློབ་སྩལ་གྱི་ཡོད་པ་ལྟར་ཐེངས་འདིར་ཡང་བཀའ་སློབ་ཟབ་རྒྱས་སྩལ་ཡོད་པ་རེད།
སྐབས་དེར་རྒྱ་གར་དང་བོད་རིག་པ་་བའི་སློབ་དཔོན་ཕི་ལིབ་མཆོག་ནས་གསུང་དོན། ང་ཚོའི་སྡེ་ཚན་གྱིས་༸གོང་ས་མཆོག་ལ་ཆེ་བསྟོད་མཁས་དབང་གི་ཕྱག་འཁྱེར་འབུལ་ལམ་ཞུ་རྒྱུར་༸གོང་ས་མཆོག་མཛད་འཕྲིན་ཇི་ཙམ་ཆེ་ཡང་མཛད་སྒོར་དངོས་སུ་ཆིབས་སྒྱུར་བསྐྱངས་གནང་བ་འདི་ནི་ང་ཚོའི་གཟི་བརྗིད་ཅིག་ལ་ངོས་འཛིན་ཞུ་བཞིན་ཡོད། ཅེས་ཞུས་ཡོད་པ་བཅས་སྐབས་དེར་དམིགས་བསལ་༸གོང་ས་མཆོག་ལ་དྲི་བ་ཕུལ་རྒྱུའི་དུས་ཚོད་གནང་བར་དེར་བཅར་བའི་མི་མང་རྣམས་ཧ་ཅང་དགའ་ཚོར་ཆེན་པོས་རང་ཉིད་ཀྱིས་སེམས་ནང་གི་དོགས་དྲིས་རྣམས་ཞུས་ཡོད་པར་མགོན་པོ་གང་ཉིད་ནས་བཀའ་ལན་བཀའ་དྲིན་ཆེ་བ་སྩལ་ཡོད། ༸གོང་ས་མཆོག་གི་ཇར་མན་ཁུལ་གྱི་མཛད་འཕྲིན་གྱི་མཐའ་མར་གྲོང་ཁྱེར་མར་བྷར་གྱི་གསེར་གྱི་ཕྱག་དེབ། ཅེས་སྙན་གྲགས་ཅན་གྱི་མི་སྣའི་མཚན་རྟགས་འགོོད་སའི་ཕྱག་དེབ་དེར་མཚན་རྟགས་བཀོད་གནང་མཛད་ཡོད་པ་བཅས་ཐེངས་འདིའི་ཇར་མན་ཁུལ་གྱི་གནང་སྒོ་ཁག་ཡོངས་སུ་ལེགས་གྲུབ་ཀྱི་སུད་སིར་ཆིབས་ཞལ་བསྒྱུར།།
