༢༠༠༩ ཕྱི་ཟླ་ ༨ ཚེས་ ༦ རེས་གཟའ་ཕུར་བུ།
༄༅། །ཕྱི་ལོ་ ༢༠༠༩ ཟླ་ ༧ ཚེས་ ༣༡ སྔ་དྲོ་༸གོང་ས་མཆོག་དང་ཀལ་མིག་སྲིད་འཛིན་མཆོག་
མཇལ་འཕྲད་གནང་སྟེ་གསུང་མོལ་མཛད་པ་མ་ཟད། སྲིད་འཛིན་མཆོག་གི་ནང་མི་དང་སྐུ་འཁོར་ཚང་མར་མཇལ་ཁ་སྩལ་ཡོད། སྐབས་དེར་སྲིད་འཛིན་མཆོག་ནས་༸གོང་ས་མཆོག་ལ་རྒྱལ་ཁབ་དེའི་ནང་གསར་སྐྲུན་བྱས་པའི་ནང་བསྟན་སློབ་གཉེར་ཁང་རྣམས་སྙན་སྒྲོན་ཞུས་པ་དང་ཆབས་ཅིག་མགོན་པོ་གང་ཉིད་ཀྱི་དྲུང་ནས་འབྲེལ་ཡོད་བཀའ་སློབ་ལམ་སྟོན་ཞུས་ཡོད་པ་རེད།
༸གོང་ས་མཆོག་ནས་ཇར་མན་ཕ་རན་ཕུར་ཊིའི་གྲོང་ཁྱེར་དུ་གནས་སྡོད་མང་ཚོགས་ ༧༠༠༠ བརྒལ་བར་འོད་དཔག་མེད་ཀྱི་རྗེས་གནང་བཀའ་དྲིན་སྩལ་བ་དང་ཉིན་གུང་མགོན་པོ་གང་ཉིད་ཡུལ་དེའི་ནང་གདན་ཞུའི་གསོལ་འདེབས་ཞུ་མཁན་ཁོངས་སུ་ཡོད་པའི་ཝི་ཏི་ནམ་ཆོས་ཚོགས་ཀྱི་འཐུས་མི་ ༢༥༠ ཙམ་དང་།
དེ་བཞིན་ཇར་མན་ནང་པའི་ཆོས་ཚོགས་ཀྱི་འཐུས་མི་ ༣༠ བཅས་སོ་སོར་ཆ་བགོས་ཀྱིས་མཇལ་ཁ་དང་བཀའ་སློབ་ཕེབས་གསལ། གཙོ་བོ་ནང་པའི་ཆོས་ལ་མ་བསྒྱུར་སྔོན་ལ་ནང་པའི་ཆོས་བརྒྱུད་ཀྱི་ལྟ་གྲུབ་ལ་སྦྱང་པ་མཐར་སོན་དང་དཔྱད་ཞིབ་ནན་ཏན་བྱེད་གལ་ཆེ་བའི་ལམ་སྟོན་སྩལ་ཡོད་་རེད། ཕྱོགས་མཚུངས་ཉིན་རྒྱབ་དད་ལྡན་མང་ཚོགས་ལ་ཕྱི་ཚེས་ ༣༠ ནས་དབུ་འཛུགས་མཛད་པའི་སྒོམ་རིམ་བར་པའི་ཆོས་འབྲེལ་མཇུག་སྐྱོང་བསྐྱངས་པ་མ་ཟད། དེ་གྲུབ་མཚམས་ཆོས་ཞུ་ལ་བཅར་བའི་ཕྱི་རྒྱལ་དབང་པོ་སྐྱོན་ཅན་དད་ཅན་པ་ཁག་གཅིག་ལ་ཐུགས་བརྩེ་བ་ཆེན་པོས་མཇལ་དང་བཀའ་སློབ་ཀྱང་སྩལ་ཡོད་པའི་གནས་བསྡུས་སུ།
