༢༠༠༩ ཕྱི་ཟླ་ ༨ ཚེས་ ༡༧ རེས་གཟའ་ཟླ་བ།
༄༅། །ཕྱི་ལོ་ ༢༠༠༩ ཟླ་ ༨ ཚེས་ ༡༤ ཉིན་དབུས་བོད་ཀྱི་བུད་མེད་ལྷན་ཚོགས་ནས་གོ་སྒྲིག་འོག་གངས་སྐྱིད་ལས་བྱེད་གསོལ་ཚིགས་ཁང་གི་ཡང་སྟེང་དུ་རྒྱ་གར་ས་གནས་གཞུང་གི་ཞི་དྲག་དཔོན་རིགས་དང་ཡུལ་མིའི་ཚོགས་པ། དེ་བཞིན་གནད་ཡོད་མི་སྣ་བཅས་བརྒྱ་ལ་ཉེ་བར་ཐུགས་རྗེ་ཆེ་ཞུའི་གསོལ་སྟོན་ཟབ་རྒྱས་ཤིག་བཤམས་ཡོད། དེར་བཙན་བྱོལ་བོད་གཞུང་གི་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་དང་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག དེ་བཞིན་རྡ་སའི་ས་གནས་བདེ་དོན་ཚེ་རིང་ཕུན་ཚོགས་སོགས་མཉམ་ཞུགས་གནང་ཡོད། རྒྱ་གར་ཡུལ་མིའི་སྐུ་ཚབ་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨ་ཇེ་སིང་མན་པ་ཏྲི་ཡ་ལགས་ཀྱིས་གསུང་བཤད་གནང་གསལ། ༸གོང་ས་༸སྐྱབས་མགོན་ཆེན་པོ་མཆོག་གི་ཡང་དག་པའི་དབུ་ཁྲིད་འོག་བོད་དོན་བདེན་མཐའ་མྱུར་དུ་གསལ་རྒྱུར་ཡིད་ཆེད་བརྟན་པོ་ཡོད། ཅེས་འགྲེལ་བརྗོད་གནང་རྗེས་བཀའ་ཁྲི་མཆོག་ནས་གསུང་བཤད་ནང་དོན། ༸གོང་ས་༸སྐྱབས་མགོན་ཆེན་པོ་མཆོག་གི་དབུས་བཙན་བྱོལ་བོད་གཞུང་རྡ་སར་གནས་སྤོས་གནང་བ་ནི་སྐབས་དེའི་གནས་ཚུལ་མང་པོ་ཞིག་ལ་དགོངས་བཞེས་ཀྱིས་ཐག་ཆོད་གནང་བ་ཞིག་ཡིན། འདས་པའི་ལོ་ངོ་ལྔ་བཅུ་ཐམ་པའི་རིང་རྡ་སར་འགྱུར་ལྡོག་ཆེན་པོ་ཕྱིན་ཡོད་པ་མ་ཟད། ལྷག་པར་དུ་ལོ་ངོ་ལྔ་བཅུ་ཐམ་པའི་རིང་བཙན་བྱོལ་བོད་མི་རྣམས་ནས་རྒྱ་གར་འཕགས་ཡུལ་དེ་བཞིན་རང་ཡུལ་གཉིས་པ་ཞིག་ཡིན་པའི་ཚོར་སྣང་ཤུགས་ཆེ་བྱུང་བ་དེ་ནི་རྒྱ་གར་གཞུང་མང་གཉིས་ཀྱི་བཀའ་དྲིན་ཡིན་ཞེས་དང་། ཡང་བཀའ་ཁྲི་མཆོག་ནས་གསུང་གསལ། ཕྱི་ལོ་ ༢༠༡༠ ལོ་དེ་ནི་༸གོང་ས་༸སྐྱབས་མགོན་ཆེན་པོ་མཆོག་གི་དབུས་པའི་བཙན་བྱོལ་བོད་གཞུང་རྡ་སར་གནས་སྤོས་བྱས་ནས་ལོ་ངོ་ ༥༠ འཁོར་བའི་དུས་ཚིགས་ཤིག་ཀྱང་འཁེལ་གྱི་ཡོད་པས་སྐབས་འདིར་དམིགས་བསལ་གྱི་བྱེད་སྒོ་ཁག་སྤེལ་གནང་རྒྱུའི་གྲ་སྒྲིག་གནང་བཞིན་ཡོད་པའི་ངོ་སྤྲོད་གསུང་བཤད་གནང་ཡོད་པ་སོགས་ཀྱི་གནས་བསྡུས་སུ།།
