༢༠༠༩ ཕྱི་ཟླ་ ༨ ཚེས་ ༢༦ རེས་གཟའ་ལྷག་པ།
མགོན་པོ་དར་རྒྱས།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། ཟླ་ ༦ ཚེས་ ༢༧ ཉིན་ཁམས་སྡེ་དགེ་འཇོ་མདའ་རྫོང་ཁོངས་པཔདྨ་ཤང་སྟོད་སྨད་ཀྱི་ཡུལ་མིས་རྒྱ་གཞུང་ནས་ས་གནས་བོད་རིགས་འགན་ཡོད་མི་སྣ་གཉིས་ནས་ལས་དོན་མ་བསྒྲུབ་པར་བསྙད་དེ་འཛིན་བཟུང་བྱེད་སྐབས་ས་གནས་ཡུལ་མི་ཚོས་ངོ་རྒོལ་བྱས་པར་བརྟེན་ཡུལ་མི་མང་པོ་ས་གནས་དེར་ཡོད་པའི་སྐྱབས་ཆེ་དགོན་པའི་ནང་བཀག་ཉར་བྱས་ཏེ་ཉེས་རྡུང་ཚད་མེད་བཏང་བ་དང་། དེ་རྗེས་ཡུལ་མི་ལྔ་འཇོ་མདའ་རྫོང་དུ་བཙན་ཁྲིད་བྱས་ཏེ་བཙོན་འཇུག་བྱེད་བཞིན་པའི་ཁྲོད་ནས་མགོན་པོ་དར་རྒྱས་དང་། ནོར་ལྷ་གཉིས་ནི་བྱེད་གཏེའི་གྲས་སུ་བརྩི་བཞིན་ཡོད་པ་ལྟར། ཉེ་ཆར་ཟླ་ ༨ ཚེས་ ༢༠ ཉིན་མགོན་པོ་དར་རྒྱས་ཀྱི་བཟའ་ཟླ་དང་ཁོང་གི་བུ་ཕྲུག་ལྔ་པོས་འཇོ་མདའ་རྫོང་ཉེན་རྟོག་ལས་ཁུངས་ཀྱི་སྒོ་འགྲམ་དུ་བསྐྱོད་ནས་ངའི་བཟའ་ཟླ་ཉེས་མེད་བཙོན་འཇུག་བྱས་ཏེ་ཟླ་ངོ་གཉིས་ཕྱིན་སོང་། ད་ལྟ་གློད་བཀྲོལ་མ་བཏང་ན་ངེད་མ་བུ་དྲུག་པོ་འཚོ་བས་ཕོངས་ཤིང་མུག་ཤི་འགྲོ་རྒྱུ་ལས་མི་འདུག་པས་ས་ཆ་འདི་གར་རང་ཤི་རྒྱག་ངེས་ཡིན་ཞེས་སྐད་འབོད་ཤུགས་ཆེན་བྱས་རྐྱེན། རྫོང་ཉེན་རྟོག་པས་སྐད་མ་བརྒྱབ། གང་མགྱོགས་ཐག་གཅོད་བྱེད་རྒྱུ་ཡིན་ཚུལ་ཙམ་ལས་ཐག་གཅོད་གང་ཡང་བྱས་མེད་པར་བརྟེན་བཟའ་ཟླ་བུ་ཕྲུག་ཚོས་མུ་མཐུད་རྫོང་ཉེན་རྟོག་ལས་ཁུངས་སྒོ་འགྲམ་དུ་ཁོང་གང་མགྱོགས་གློད་བཀྲོལ་ཡོང་ཐབས་ཆེད་ངུ་འབོད་བྱེད་བཞིན་ཡོད་འདུག
མགོན་པོ་དར་རྒྱས་ནི་རྒྱུན་གཏན་ནས་གཟུགས་བབས་གནས་སྟངས་ཞན་ཙམ་ཡོད་པ་དང་། ཁྱིམ་ཚང་གི་འཚོ་བ་འཚོལ་སྒྲུབ་བྱེད་མཁན་གཙོ་བོ་དེ་ཡིན་ཞིང་། ཕྲུ་གུ་ལྔ་ཡོད་པའི་ཁོངས་ནས་ཆེ་ཤོས་རང་ལོ་ ༡༡ ལས་སོན་གྱི་མེད་པས་བཟའ་ཟླ་དང་བུ་ཕྲུག་ལ་འཚོ་བའི་ཐད་དཀའ་ངལ་ཆེན་པོ་འཕྲད་བཞིན་ཡོད་པའི་གནས་ཚུལ་ཐོན་ཡོད།
