༢༠༠༩ ཕྱི་ཟླ་ ༨ ཚེས་ ༢༦ རེས་གཟའ་ལྷག་པ།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། སྔ་ལོའི་ཟླ་ ༣ ཚེས་ ༡༠ རྗེས་སྟག་རྩེ་རྫོང་ཁོངས་སུ་སྔ་རྗེས་སུ་ཞི་རྒོལ་ཁ་ཤས་བྱུང་བའི་ཁྲོད་མཉམ་ཞུགས་གནང་མཁན་གྱི་གཞོན་སྐྱེས་ཁག་གཅིག་ལ་ད་ལོའི་ལོ་འགོར་ལྷ་ས་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཞེས་པ་ནས་དུས་བཀག་བཙོན་འཇུག་བཟོས་ཏེ་ལྷ་ས་གྲོང་ཁྱེར་ཁོངས་ཆུ་ཤུལ་བཙོན་ཁང་དུ་བསྒྱུར་བཀོད་བྱ་བར་བཏང་ཡོད་འདུག ཁོང་རྣམ་པའི་ཁྲོད་ནས་ན་གཞོན་གསུམ་ནི་སྟག་རྩེ་རྫོང་ཁོངས་སུ་སྔ་ལོའི་ཞི་བའི་ལས་འགུལ་ནང་ཞུགས་རྐྱེན་འཛིན་བཟུང་དུ་ཚུད་པ་དང་། གཅིག་ལྷ་སར་སྔ་ལོའི་ཟླ་ ༣ པའི་ཞི་རྒོལ་ནང་ཞུགས་རྗེས་འཛིན་བཟུང་བྱས་པ་ཞིག་ཡིན་འདུག
ན་གཞོན་དེ་དག་ནི།
དབང་ཕྱུག་ཆུང་དུས་གྲྭ་པའི་སྐབས་ཀྱི་དཔར་ཞིག
༡༽དབང་ཕྱུག (བློ་བཟང་དབང་ཕྱུག)རང་ལོ་ ༢༦ ཕ་མིང་བསོད་ནམས་ཚེ་རིང་། སྟག་རྩེ་རྫོང་བདེ་ཆེན་ཤང་རུ་ཁག་བཞི་པ། སྔ་ལོ་ཟླ་ ༣ པའི་ཚེས་ ༡༠ རྗེས་སྟག་རྩེ་རྫོང་ཁོངས་སུ་ཞི་བའི་ངོ་རྒོལ་ནང་ཞུགས་རྗེས་དུས་བཀག་བཙོན་འཇུག་ལོ་ ༡༥ ཁྲིམས་ཐག་བཅད་ཡོད། ཁོང་ནི་དེ་སྔ་བདེ་ཆེན་གསང་སྔགས་དགོན་པར་སློབ་གཉེར་གནང་མྱོང་ཡོད་པ་དང་། རྗེས་སུ་དགོན་པ་ནས་དོན་རྗེས་སྒེར་གཉེར་རླངས་འཁོར་གཏོང་་མཁན་ཞིག་ཡིན་འདུག
2༽ཚུལ་ཁྲིམས། རང་ལོ་ ༢༣ གོང་གསལ་བློ་བཟང་དབང་ཕྱུག་གི་ཕ་གཅིག་མ་གཅིག་གི་གཅུང་པོ། གོང་མཚུངས་ཞི་རྒོལ་ནང་ཞུགས་རྐྱེན་འཛིན་བཟུང་བྱས་པ་དང་། དུས་བཀག་བཙོན་འཇུག་ལོ་ ༢ དང་ཕྱེད་ཀའི་ཁྲིམས་ཐག་བཅད་ཡོད། རྒྱུན་གཏན་སྟག་རྩེ་རྫོང་ཁོངས་སུ་གནས་སྡོད་བྱེད་ཀྱི་ཡོད།
ལྷག་པ་ཚེ་རིང་ཆུང་དུས་སྐབས་ཀྱི་འདྲ་དཔར།
༣༽ཆོས་འཕེལ། རང་ལོ་ ༢༤ ཕ་མིང་བློ་བཟང་ཤེས་རབ། སྟག་རྩེ་རྫོང་བདེ་ཆེན་ཤང་རུ་ཁག་བཞི་པ། གོང་མཚུངས་སྟག་རྩེའི་ཞི་རྒོལ་ནང་ཞུགས་རྗེས་འཛིན་བཟུང་བྱས། དུས་བཀག་བཙོན་འཇུག་ལོ་ ༢ དང་ཕྱེད་ཀའི་ཁྲིམས་ཐག་བཅད་ཡོད། རྒྱུན་གཏན་སྟག་རྩེ་རྫོང་ཁོངས་སུ་གནས་སྡོད་བྱེད་ཀྱི་ཡོད།
༤༽ལྷག་པ་ཚེ་རིང་། རང་ལོ་ ༢༢ ཕ་དབང་འཛིན། སྟག་རྩེ་རྫོང་བདེ་ཆེན་ཤང་རུ་ཁག་བཞི་པ། འཛིན་བཟུང་མ་བྱས་གོང་ལྷ་སར་ཚོན་བཏང་སྟེ་འཚོ་ཐབས་འཚོལ་མཁན་ཞིག་ཡིན་པ་དང་། སྔ་ལོའི་ཟླ་ ༣ པའི་ནང་ལྷ་སར་ཞི་རྒོལ་ནང་ཞུགས་རྗེས་འཛིན་བཟུང་བྱས་ཏེ་དུས་བཀག་བཙོན་འཇུག་ལོ་ ༥ ཁྲིམས་ཐག་བཅད་ཡོད་པ་རེད་འདུག ཁོང་རྣམས་ད་ལྟ་ཆུ་ཤུལ་བཙོན་དུ་ཡོད་མུས་ཡིན་རེད།
