༢༠༠༩ ཕྱི་ཟླ་ ༨ ཚེས་ ༡༧ རེས་གཟའ་ཟླ་བ།
༄༅། །བོད་གཞུང་འཕྲོད་བསྟེན་ལས་ཁུངས་ཀྱི་བཀའ་བློན་མཆོག་ནས་ཕྱི་ལོ་ ༢༠༠༩ ལོའི་ཟླ་ ༨ ཚེས་ ༡༤ ཉིན་ཕག་པའི་ཆམ་ནད་སྐོར་ལ་གསར་འགོད་གསལ་བསྒྲགས་ཤིག་བཀའ་བློན་མཆོག་གི་ལས་ཤག་ཏུ་རྡ་སའི་ཉེ་འཁོར་དུ་གནས་པའི་བོད་ཀྱི་གསར་འགོད་རྣམས་འདུ་བསྐོང་གནང་སྟེ་གསལ་བསྒྲགས་སྤེལ་དོན། དེང་སྐབས་རྒྱ་གར་གྱི་གསར་ཤོག་ཁ་ཤས་ཤིག་གི་ནང་དུ་རྡ་སར་ཕག་པའི་ཆམ་ཚད་དེས་རྐྱེན་བྱས་ཏེ་མི་བདུན་ཙམ་ནད་མནར་དུ་གྱུར་ཡོད་སྐོར་ཐོན་འདུག དེ་དག་དངོས་གནས་ཡིན་མིན་ཞིབ་འཇུག་བྱས་པར་ད་ལྟའི་ཆར་སྟབས་ལེགས་པ་ཞིག་ལ་དངོས་གནས་རེད་མི་འདུག སྤྱིར་རྒྱ་གར་ནང་དུ་ཕག་པའི་ཆམ་རིམ་འདི་མྱུར་ཚད་ཆེན་པོ་འཕེལ་བཞིན་ཡོད་པ་རེད་འདུག དེར་བརྟེན་རྡ་སའི་གནས་ཚུལ་འདི་དངོས་བདེན་ཡིན་མིན་ལ་མ་ལྟོས་པར་མང་ཚོགས་ལ་ལམ་སྟོན་གསལ་བསྒྲགས་ ཤིག་བྱུང་ན་ཕན་ཐོགས་ཆེན་པོ་འདུག་སྙམ་པ་བྱུང་། སྤྱིར་ཕག་པའི་ཆམ་ཚད་འདི་འཛམ་གླིང་འདིའི་སྟེང་གང་ཙམ་ཞིག་ཁྱབ་ཡོད་ཅིང་ཉེ་བའི་ཆར་རྒྱ་གར་ནང་དུ་མི་སྟོང་ཕྲག་བརྒལ་སོང་ཞེས་གསལ་བསྒྲགས་ཡོང་བཞིན་འདུག དེ་འདྲ་ཡིན་དུས་ང་ཚོའི་སྤྱི་ཚོགས་ནང་དུ་དེའི་ཐོག་དོ་སྣང་བྱས་ཏེ། སྔོན་འགོག་ཐབས་ཤེས་ག་རེ་ཡོད་པ་རེད། གལ་ཏེ་ན་བ་ཡིན་ན་ག་རེ་བྱེད་དགོས་གསལ་པོ་ཤེས་རྟོགས་ཡོང་ཆེད་ཡིན། སྤྱིར་ན་ཚ་འདིའི་ངོ་བོ་ཆམ་ཚད་རང་ཡིན་འདུག འབྱུང་ས་དེ་ཕག་པ་རེད།
ན་ཚ་འདི་གཅིག་ནས་གཅིག་ལ་འགོས་རྒྱུའི་མགྱོགས་ཚད་དེ་གཞན་དང་མི་འདྲ་བར་མྱུར་པོ་ཡོད་པ་ཞིག་རེད་འདུག འགོས་པའི་གནས་སྐབས་སུ་སྤྱིར་ཆམ་པ་ན་བ་གང་ཞིག་ལ་གཟུགས་གཞི་བདེ་ཐང་ཡོད་མཁན་མང་པོ་ཞིག་སྨན་བཅོས་མ་བྱས་ཀྱང་དྲག་འགྲོ་བ་གང་ཙམ་ཡོད་པ་འདྲ། འོན་ཀྱང་སྔོན་ཚུད་ནས་ཤོད་མི་ཐུབ་པ་ཞིག་ལ་སྐབས་འགའ་རེ་གཞོན་ནུ་མ་བདེ་ཐང་དེ་འདྲའི་བུ་སྣོད་ལ་ན་ཚ་ཆགས་ཏེ་གློ་བུར་རྐྱེན་འདས་སུ་གྱུར་བ་དེ་འདྲ་བྱུང་འདུག དེ་བཞིན་དུས་རྒྱུན་ན་ཚ་རྙིང་པ་ཡོད་མཁན་རིགས་ནད་ལོག་བརྒྱབ་སྟེ་རྐྱེན་འདས་སུ་གྱུར་བའང་བྱུང་འདུག དེ་འདྲ་ཡིན་དུས་ང་ཚོས་དང་པོ་ནས་ན་ཚ་འདི་མ་འགོས་གོང་ནས་སྔོན་འགོག་ག་རེ་བྱེད་དགོས་མང་ཚོགས་ནས་ཤེས་དགོས་པ་ཆགས་ཡོད། སྔོན་འགོག་གི་ཐབས་ལམ་གཙོ་བོ་གཉིས་ཡོད། གཅིག་མང་ཚོགས་འདུ་འཛོམས་ཆེན་པོ་ཡོད་ས་དང་ཁྲོམ་གཞུང་དུ་འགྲོ་སྐབས་ཁ་རས་གྱོན་ཏེ་ནད་དེ་མ་འགོས་བའི་ཐབས་ཤེས་གཅིག་དང་། གཉིས་པ་དེ་ཕྱོགས་བསྐྱོད་འགྲོ་སྐབས་མེ་འཁོར་དང་རླང་འཁོར་སོགས་གང་སར་ལག་པ་འཆང་གི་ཡོད་སྟབས་ལག་པ་ཡང་ཡང་འཁྲུ་དགོས་རྒྱུ་བཅས་གཙོ་བོ་དེ་གཉིས་རེད་འདུག གལ་སྲིད་ཆམ་པའི་གཉེན་ཚད་འདི་འགོས་པ་ཡིན་ན་སྨན་པ་བསྟེན་རྒྱུ་གལ་ཆེན་པོ་ཡིན་པ་དང་། སྨན་པ་བསྟེན་རྗེས་བདུན་གཅིག་རིང་ལྷོད་ལྷོད་ངལ་གསོ་རྒྱག་དགོས་རྒྱུ་མ་ད་ཕྱིར་མི་གཞན་དང་འབྲེལ་ལམ་མི་བྱེད་རྒྱུ་དེ་གལ་ཆེན་པོ་རེད་འདུག རྒྱུ་མཚན་གང་ཡིན་ཞེ་ན་གཅིག་ནི་ནད་གཞི་འདི་གཞན་ལ་མ་འགོ་བའི་ཕན་ཐོགས་ཡོད་པ་དང་། གཉིས་ནས་རང་ཉིད་ལ་ངལ་གསོ་ལྷོད་ལྷོད་བྱས་པ་ཡིན་ན་དྲག་སྐྱེད་མྱུར་བའི་ཁྱད་པར་ཡོད། དེ་འདྲ་ཡིན་དུས་ད་རེས་གསར་འགོད་པ་ཚོ་སྐད་གཏོང་དགོས་དོན་ནི་དང་པོ་རྒྱ་གར་བའི་གསར་འགྱུར་བརྒྱུད་ལམ་ཁག་ནང་རྡ་སར་མི་བདུན་ན་འདུག་ཟེར་བ་དེ་དག་དངོས་བདེན་རེད་མི་འདུག་ཞུ་རྒྱུའི་ཆེད་དུ་ཡིན། ཉེ་བའི་ཆར་གཏོང་ལེན་སློབ་གྲྭའི་ཕྲུ་གུ་དྲུག་བདུན་ཞིག་ཆམ་པ་བརྒྱབ་ཡོད་སྟབས་བརྟག་དཔྱད་བྱེད་པར་ཊན་ཊན་སྨན་ཁང་དུ་ཁྲིད་འདུག་ཀྱང་ཆམ་པ་དཀྱུས་མ་ལས་ན་ཚ་ཐོན་མི་འདུག དེ་ལྟ་བུ་ལ་དོགས་གཞི་ཆགས་ཏེ་བོད་པའི་ཕྲུ་གུ་བདུན་ན་མེད་དམ་སྙམ་པའི་རྣམ་དོགས་སེལ་ཆེད་དང་ད་ལྟའི་ཆར་རྡ་སར་ཕག་པའི་ཆམ་ཚད་འདི་མི་འདུག་པས་མང་ཚོགས་རྣམས་ལ་བློ་བདེ་པོ་གནང་རོགས་ཞུ་རྒྱུ་ཡིན། ཞེས་གསུངས་བ་དང་ཆབས་ཅིག་ད་ལྟ་མེད་ཀྱང་མ་འོངས་པའི་གྲ་སྒྲིག་སྔོན་ཚུད་ནས་ཐུབ་རྒྱུའི་ཆེད་ཕག་པའི་ཆམ་ཚད་ལ་དོ་སྣང་དགོས་པའི་གསལ་བསྒྲགས་སྤེལ་བ་གཤམ་གསལ།
ཉེ་ཆར་རྒྱ་གར་གྱི་གསར་ཤོག་ཁག་གཅིག་ནང་རྡ་རམ་ས་ལར་བོད་མི་བདུན་ལ་ཕག་པའི་ཆམ་ནད་ཡོད་གནས་ཐོན་འདུག་པ་དེ་ནི་གནས་ཚུལ་དངོས་བདེན་མ་རེད། འོན་ཀྱང་ཀུན་གྱི་མཁྱེན་གསལ་ལྟར། དེང་ཕག་པའི་ཆམ་ཚད་ནད་རིམས་འཛམ་གླིང་ཀུན་ལ་ཁྱབ་འཕེལ་འགྲོ་བཞིན་པ་མ་ཟད། རྒྱ་གར་དུའང་ཁྱབ་འཕེལ་འགྲོ་བཞིན་ཡོད་པ་རེད། གཞི་རྩའི་ནད་ཡམས་དེ་བཞིན་གསར་འཕྲིན་བརྒྱུད་ལམ་ཁག་གི་ནང་དོ་སྣང་ཇེ་ཆེར་བྱུང་བའི་རྐྱེན་ཀྱིས་ཛ་དྲག་གི་རྣམ་པ་གསལ་ཡང་། ནད་གཞི་འགོས་མ་ཐག་སྨན་བཅོས་བྱུང་ན་ལམ་སེང་བཅོས་ཐུབ་ཀྱི་ཡོད། ནད་རྟགས་སུ་གློ་བརྒྱབ་པ་དང་། མིད་པ་ཚ་བ། གྲང་ཤུམ་བྱེད་པ། རུས་ཚིག་ན་བ། མགོ་ན་བ། ངལ་སྣང་ཤར་བ་བཅས་ཡོང་གི་ཡོད། སྔོན་ཚུད་ནས་དོ་སྣང་བྱུང་ན་སྔོན་འགོག་ཀྱང་གང་འཚམས་ཐུབ་ཀྱི་ཡོད་པས་ཚང་མས་ཐུགས་སྣང་གནང་གལ་ཞིག་ལ། མང་ཚོགས་འདུ་འཛོམས་ཆེན་པོ་ཡོད་སར་འགྲོ་སྐབས་ཁ་རས་གྱོན་པ་དང་། ཁྱིམ་ནས་ཕྱིར་བསྐྱོད་སྐབས་རང་གི་ལག་པ་ཡང་སེ་འཁྲུས་དགོས་པ་བཅས་ནི་སྔོན་འགོག་གི་ཐབས་ལམ་ཡིན་འདུག དེ་བཞིན་བོད་སྨན་གྱི་ལམ་ནས་འགོག་སྲུང་ཡོད་པ་རྣམས་ཀྱང་ས་གནས་སོ་སོའི་ཡན་ལག་སྨན་རྩིས་ཁང་ལ་འབྲེལ་གཏུགས་གནང་དགོས་པ་དང་། གལ་སྲིད་ཕག་ཆམ་ན་བ་ཡིན་ན་གཞན་ལ་མ་འགོས་པ་དང་། རང་ཉིད་མགྱོགས་མྱུར་དུ་དྲག་སྐྱེད་ཡོང་སླད་བདུན་ཕྲག་གཅིག་རིང་རང་ནང་དུ་གསོལ་དལ་སྡོད་གལ་ཆེ། ཕྱོགས་མཚུངས་རང་རིགས་རྣམས་ནས་དྲ་རྒྱ་སོགས་ལ་དམིགས་བསལ་དོ་སྣང་གནང་སྟེ་སོ་སོའི་ནང་མི་དང་སྤུན་ཉེ། གྲོང་པ་ཁྱིམ་མཚེས། མདོར་ན་རང་དང་འབྲེལ་བ་ཡོད་པའི་མི་སྣ་ཚང་མར་རིམས་ནད་འདི་སྐོར་ཉེན་སྲུང་གི་བསླབ་བྱ་གཅིག་ནས་གཅིག་བརྒྱུད་གནང་དགོས་པའི་འབོད་སྐུལ་བཅས་ཀྱི་གསལ་བསྒྲགས་སུ།
བོད་གཞུང་འཕྲོད་བསྟེན་བཀའ་བློན་གྱིས་
ཕྱི་ལོ་ ༢༠༠༩ ཟླ་ ༨ ཚེས་ ༡༤ ལ།
