༢༠༠༩ ཕྱི་ཟླ་ ༨ ཚེས་ ༡༨ རེས་གཟའ་མིག་དམར།
༄༅། །ཕྱི་ལོ་ ༢༠༠༩ ཟླ་ ༨ ཚེས་ ༡༥ ཐེ་ཝན་རྒྱལ་ས་ཐེ་པེ་དུ་ཡོད་པའི་བོད་གཞུང་ཐེ་ཝན་སྐུ་ཚབ་དོན་གཅོད་ཁང་ནས་རེས་གཟའ་སྤེན་པའི་ཉིན་དྲག་ཆར་རླུང་འཚུབ་ནང་རྐྱེན་འདས་སུ་གྱུར་བ་རྣམས་ཀྱི་ཆེད་དུ་སྨོན་ལམ་གསོལ་འདེབས་གནང་ཡོད།
ཆར་རླུང་དྲག་འཚུབ་ མོ་ར་ཀོ་ཊ་ ཞེས་པ་དེ་ནི་ཐེ་ཝན་དུ་ལོ་ལྔ་བཅུའི་ནང་གནམ་གཤིས་གོད་ཆག་ཚབས་ཆེ་ཤོས་བྱུང་སྟེ་དེས་ས་ཉིལ་ཕོན་ཆེ་དང་ཆུ་ལོག་ཚབས་ཆེ་བྱུང་བར་བརྟེན་ཐེེ་ཝན་དབུས་དང་ལྷོ་ཕྱོགས་ས་ཁུལ་དུ་མི་གྲངས་ ༥༠༠ བརྒལ་བ་འདས་གྲོངས་སུ་གྱུར་ཡོད། ཐེ་ཝན་ཕྱི་འབྲེལ་ལས་ཁུངས་ནས་བརྗོད་དོན་ལྟར་ན་རྒྱལ་ཁབ་ ༥༨ ལས་མང་བས་ཐེ་ཝན་ངལ་གསོའི་ལས་གཞིར་རོགས་སྐྱོར་གནང་ཡོད།
ཐེ་ཝན་ལྷོ་ཕྱོགས་སུ་དྲག་ཆར་དེས་མི་གྲངས་ ༥༠༠ ཙམ་རྐྱེན་ལམ་དུ་བཏང་བ་མ་ཟད་ཅ་དངོས་ཕོན་ཆེ་དང་སོ་ནམ་བརྡལ་ཞིག་ཤུགས་ཆེ་བཏང་ཡོད། དྲག་ཆར་མོ་ར་ཀོ་ཊ་དེས་ཆར་ཤུགས་དྲག་པོ་བབས་པར་བརྟེན་ལོ་ལྔ་བཅུའི་ནང་ཆུ་ལོག་ཚབས་ཆེ་ཤོས་དེ་བྱུང་ཡོད། རེས་གཟའ་སྤེན་པའི་སྔ་དྲོ་ཆུ་ཚོད ༩་༣༠ ཐོག་སེར་བྱེས་མཁན་ཟུར་མཆོག་ནས་མཆོད་མེ་ཕུལ་བ་དང་སྦྲགས་འདུས་མང་སེར་སྐྱ་རྣམས་ནས་སྨོན་ལམ་དབུ་འཛུགས་གནང་།
ཆོས་ཚོགས་ཀྱི་སློབ་མ་རྣམས་དང་གཞན་ཡང་ཐེ་ཝན་གྱི་ནང་པ་མང་པོས་སྨོན་ལམ་དེར་མཉམ་ཞུགས་གནང་ཡོད། བོད་གཞུང་སྐུ་ཚབ་དོན་གཅོད་ནས་ཐེ་ཝན་ནང་དུ་ཡོད་པའི་བོད་པའི་ཆོས་ཚོགས་གཞན་རྣམས་ལ་དྲག་ཆར་རླུང་འཚུབ་ མོ་ར་ཀོ་ཊ་ ནང་རྐྱེན་འདས་སོང་བ་རྣམས་ཀྱི་ཆེད་དུ་སྨོན་ལམ་འདོན་དགོས་པའི་བརྡ་ཁྱབ་གནང་ཡོད།
གཉན་འཕྲང་ཅན་གྱི་སྐབས་འདིར་ང་ཚོས་ཐེ་ཝན་སྤུན་མཆེད་ཕོོ་མོ་རྣམས་དང་གདུང་སེམས་མཉམ་སྐྱེ་ཞུ་བ་དང་རང་བྱུང་་གོད་ཆག་དེ་ལས་ཐེ་ཝན་གོམ་པ་མདུན་སྤོས་ཡོང་རྒྱུ་ཡིན་པ་ཐེ་ཝན་ནང་དུ་ཡོད་པའི་བོད་གཞུང་སྐུ་ཚབ་དོན་གཅོད་ཀྱི་གསུང་བཤད་ནང་གསལ་ཡོད།
