༢༠༠༩ ཕྱི་ཟླ་ ༨ ཚེས་ ༢༠ རེས་གཟའ་ཕུར་བུ།
༄༅། །བོད་གཞུང་ཆོས་རིག་ལས་ཁུངས་ནས་ཕྱི་ལོ་ ༢༠༠༩ ཟླ་ ༨ ཚེས་ ༢༠ དང་བོད་ཟླ་ ༦ ཚེས་ ༣༠ སྟེ་གསོ་སྦྱོང་གི་དུས་ཚོད་ཁྱད་པར་ཅན་དང་སྟབས་བསྟུན་སྔ་དྲོ་ཆུ་ཚོད་ ༡༠ ཐོག་ཉེ་ལམ་ཐེ་ཝན་ལྷོ་ཕྱོགས་དང་བྱང་ཤར་ཁུལ་ནང་རླུང་འཚུབ་དང་ཆུའི་འཇིག་པ་བྱུང་བའི་རྐྱེན་གྱིས་མི་གྲངས་ ༦༠༠ ཙམ་རྐྱེན་འདས་སུ་གྱུར་པ་དང་། མི་མང་ཁྱོན་ཆེ་ཞིག་ལ་རྨས་སྐྱོན་ཕོག་ཅིང་། གྲོང་གསེབ་ ༤༣༣ ཙམ་གར་སོང་ཆ་མེད་དུ་གྱུར་པ་བཅས་ཀྱི་གོད་ཆག་སྡུག་བསྔལ་བཟོད་དཀའ་བ་བྱུང་བ་རྣམས་ཀྱི་ཆེད་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་མཆོད་སྤྲིན་སྣ་ལྔ་འབུལ་གཤོམ་དང་འབྲེལ་རྣམ་གྲྭ་མཁན་པོ་རིན་པོ་ཆེ་དང་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་དབུ་བཞུགས་ཐོག་རྡ་སའི་ཉེ་འཁོར་དགོན་སྡེ་ཁག་གི་གྲ་བཙུན་བརྒྱ་ཕྲག་བརྒལ་བ་སྨོན་
ལམ་རྣམ་བརྒྱད་སོགས་འདོན་བསྐུལ་གྱིས་དེར་བསྡུས་དགེ་འདུན་རྣམས་ལ་བོད་གཞུང་ཆོས་རིག་ལས་ཁུངས་ནས་བསྙེན་བསྐུར་མང་ཇ་དང་བཞེས་བག སྐུ་འགྱེད་དང་བཅས་འབུལ་ལམ་ཞུས་ཏེ་སྤྱིར་སྐྱེ་འགྲོ་ཡོངས་དང་ཡང་སྒོས་ཉེ་ཆར་ཐེ་ཝན་དུ་རླུང་འཚུབ་དང་ཆུའི་འཇིག་པས་རྐྱེན་འདས་སུ་སོང་བ་རྣམས་ཚེ་རབས་ཕྲེང་བར་བསགས་པའི་སྡིག་ལྟུང་མཐའ་དག་བྱང་ཞིང་དག་ནས་དལ་རྟེན་བཟང་པོ་རིམ་བརྒྱུད་ཀྱི་སྐུ་བཞི་ཡེ་ཤེས་ལྔ་ལྡན་གྱི་གོ་འཕང་མངོན་དུ་འགྱུར་ཆེད་དང་། རྨས་སྐྱོན་གོད་ཆག་ཕོག་པ་རྣམས་ཀྱང་མྱུར་དུ་དྲག་སྐྱེད་ཀྱི་ཚེ་ལྷག་དོན་ལྡན་ཡོང་བ། ཐེ་ཝན་གཞུང་མང་གིས་གཙོས་འཇིག་རྟེན་ཀུན་ཏུ་སྙིགས་ལྔའི་རྒུད་ཚོགས་སྤྱི་དང་ཁྱད་པར་འབྱུང་གཞིའི་འཇིག་པ་མི་འབྱུང་བར་བདེ་སྐྱིད་རྫོགས་ལྡན་གྱི་དཔལ་ལ་ལོངས་སུ་སྤྱོད་ཐུབ་པ་སོགས་ཡོང་བའི་རེ་འབྲས་རྣམས་དེ་དེ་བཞིན་དུ་འགྲུབ་པའི་ཐུགས་སྨོན་གསོལ་འདེབས་གནང་བ་བཅས་ཀྱི་གནས་བསྡུས་སུ།
