༢༠༠༩ ཕྱི་ཟླ་ ༨ ཚེས་ ༡༣ རེས་གཟའ་པ་སངས།
༢༠༠༩ ལོ།
འཛམ་གླིང་ཡུལ་གྲུ་ཁག་གི་རྒྱ་རིགས་དང་བོད་རིགས་རྩོམ་པ་པོ། ཆེད་མཁས་པ། འགྲོ་བ་མིའི་ཐོབ་ཐང་ལས་འགུལ་སྤེལ་མཁན་བཅས་༢༠༠༩ ཟླ་༨ ཚེས་ ༦ ནས་ཚེས་ ༨ བར་ཇི་ནི་ཝར་ཐུན་མོང་གི་གཞི་རྟེན་འཚོལ་ཆེད་དུ་བགྲོ་གླེང་ཚོགས་འདུ་ཚུགས་ཡོད་པ་དང་། ཚོགས་འདུའི་རྩ་དོན་ནི། བོད་ཀྱི་རིག་གཞུང་འཇིག་ལ་ཉེ་བ་དང་། བོད་མིའི་འཚོ་གནས་དཀའ་ཉེན་ནང་ལྷུང་བ། བོད་མིའི་གཞི་རྩའི་འགྲོ་བ་མིའི་ཐོབ་ཐང་ཁག་ཆབ་སྲིད་བཙན་དབང་གིས་གཏོར་བཅོམ་གཏོང་བཞིན་པའི་གནས་ཚུལ་རྣམས་རྒྱལ་སྤྱིའི་སྤྱི་ཚོགས་དང་རྒྱ་རིགས་སྤྱི་ཚོགས་ནས་སྔར་ལས་ལྷག་པའི་ངོས་འཛིན་ཐོབ་རྒྱུ་དང་། དེར་བརྟེན་ནས་བོད་ལ་རང་དབང་ཐོབ་ཐབས་དང་། རླབས་ཆེན་གྱི་བསམ་བློའི་རིན་ཐང་ལྡན་པའི་བོད་ཀྱི་རིག་གཞུང་ཡུན་གནས་ཐུབ་ཆེད་དང་། ཕན་ནུས་ལྡན་པའི་ཐབས་ལམ་འཚོལ་རྒྱུར་དམིགས་པ་ཞིག་ཡིན། འདི་ནི་༸གོང་ས་ཏཱ་ལའི་བླ་མ་མཆོག་གིས་ཐེངས་འདིའི་ཚོགས་འདུར་འཆང་བའི་ཐུགས་རེའང་ཡིན། གོང་གསལ་རྩ་དོན་ཁག་ལ་བརྟེན་ནས། ཚོགས་འདུའི་སྟེང་ཐུན་མོང་གི་ལྟ་ཚུལ་གཤམ་གསལ་ ཁག་བྱུང་ཡོད།
ཀ། གཞི་རྩའི་རིན་ཐང་དང་རྩ་དོན།
མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་བསྒྲགས་གཏམ་དུ་གཏན་འབེབས་བྱས་པའི་འཇིག་རྟེན་ཀུན་ཁྱབ་ཀྱི་རིན་ཐང་སྟེ། རང་དབང་དང་མང་གཙོ། ཁྲིམས་ལུགས་དབང་བསྒྱུར། འགྲོ་བ་མིའི་ཐོབ་ཐང་། འདྲ་མཉམ། རིག་གཞུང་སྣེ་མང་མཉམ་གནས་སོགས་ནི། ཐེངས་འདིའི་ཚོགས་འདུའི་སྲུང་བརྩི་ཞུ་རྒྱུའི་གཞི་རྩའི་དམ་བཅའ་དང་རྩ་དོན་ཡིན།
ཁ། བོད་ཀྱི་གནད་དོན་གྱི་འབྱུང་རྩ་དང་ངོ་བོ།
༡༽ད་ལྟའི་བོད་ཀྱི་གནད་དོན་གྱི་འབྱུང་རྩ་ནི་བོད་རྒྱ་མི་རིགས་གཉིས་དབར་གྱི་གདོང་ཐུག་ལས་བྱུང་བ་ཞིག་མིན་པར། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་ལ་ལག་བསྟར་བྱས་པའི་སྲིད་དབང་སྒེར་སྡོམ་གྱི་དབང་བསྒྱུར་དང་། རིག་གཞུང་སྟེང་མི་རིགས་རྩ་གཏོར་གྱི་བྱེད་བབ་ལས་བྱུང་བ་ཞིག་ཡིན།
༢༽རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས། བོད་ནི་གནའ་སྔ་མོ་ནས་བཟུང་རྒྱ་ནག་གི་ཆ་ཤས་ཤིག་ཡིན་ཞེས་སྒྲོག་བཞིན་པ་དེ་ནི་ལོ་རྒྱུས་ཀྱི་དོན་དངོས་དང་མཐུན་གྱི་མེད།
༣༽བོད་ཀྱི་ཆོས་དང་རིག་གཞུང་། སྐད་ཡིག་དང་འཚོ་བ་སྐྱེལ་སྟངས་བཅས་པ་རྩ་སྟོང་འགྲོ་ཉེར་གཏུགས་ཡོད།
༤༽བོད་མིའི་མི་རིགས་རང་སྐྱོང་དང་། ཆབ་སྲིད་གདམ་ག ཆོས་ལུགས་དད་མོས། ་བརྗོད་རང་དབང་སོགས་ཀྱི་གཞི་རྩའི་འགྲོ་བ་མིའི་ཐོབ་ཐང་ཁག་ཚང་མ་འཕྲོག་ལེན་བྱས་ཡོད།
༥༽རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྟངས་འཛིན་འོག་ཏུ་ཡོད་པའི་གཞུང་འབྲེལ་གསར་འགྱུར་བརྒྱུད་ལམ་ཁག་ནས། བོད་ཀྱི་གནད་དོན་གྱི་ངོ་བོར་འཁྱོག་བརྗོད་དང་། བོད་རྒྱ་མི་རིགས་དབར་འགལ་བ་ཆེད་བཟོ་བྱས་ཡོད།
ག། བོད་ཀྱི་གནད་དོན་སེལ་བའི་ཐབས་ལམ།
༡༽ཆབ་སྲིད་གདམ་ག་དང་། ཆོས་ལུགས་དད་མོས་ཀྱི་ཐོབ་ཐང་གིས་མཚོན་པའི་བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་ངེས་པར་དུ་བརྩི་བཀུར་བྱེད་དགོས།
༢༽བོད་ཀྱི་གནད་དོན་ཐག་གཅོད་དང་རྒྱ་ནག་མང་གཙོ་ཅན་དུ་བསྒྱུར་རྒྱུ་ནི་གཅིག་ལ་གཅིག་བརྟེན་གྱི་འབྲེལ་བ་ཆགས་ཡོད།
༣༽རྒྱ་རིགས་ཚོས་རང་ཉིད་ཀྱི་རྒྱ་རིགས་ཆེན་པོའི་རིང་ལུགས་ལ་བཤགས་སྡོམ་བྱེད་དགོས་པ་དང་། བོད་མིའི་རིག་གཞུང་དང་འཚོ་བ་སྐྱེལ་སྟངས་ལ་བརྩི་བཀུར་བྱེད་དགོས།
༤༽རྒྱ་ནག་གཞུང་ལ་ཁྲིམས་ལུགས་དབང་བསྒྱུར་གྱི་རྩ་དོན་མངོན་འགྱུར་ཡོང་བའི་གཞེན་སྐུལ་བྱ་རྒྱུ།༥༽༸གོང་ས་ཏཱ་ལའི་བླ་མས་བཏོན་པའི་དབུ་མའི་ལམ་ལ་ཚོགས་བཅར་བ་ཡོངས་ནས་གོང་བཀུར་བླ་མེད་ཞུ་རྒྱུ།
༦༽༸གོང་ས་ཏཱ་ལའི་བླ་མ་མཆོག་རང་ཡུལ་དུ་༸ཞབས་སོར་འཁོད་རྒྱུའི་བླ་མེད་ཀྱི་སྐུ་དབང་དེ་སུས་ཀྱང་འཕྲོག་མི་ཆོག
ང་། བཙན་བྱོལ་བོད་གཞུང་ལ་འབུལ་རྒྱུའི་བསམ་འཆར།
༡༽འཛམ་གླིང་ཁྱོན་དུ་བོད་རྒྱ་མཛའ་འབྲེལ་ཚོགས་པ་དང་། བོད་རྒྱའི་གླེང་སྟེགས་སོགས་གཞུང་འབྲེལ་མ་ཡིན་པའི་ཚོགས་པ་གང་མང་བཙུགས་ཏེ། བོད་རྒྱ་མི་རིགས་གཉིས་དབར་རིག་གཞུང་དང་མཛའ་བརྩེ་སྤེལ་རེས་ལ་སྐུལ་འདེད་གཏོང་རྒྱུ།
༢༽བོད་རྒྱ་མི་རིགས་གཉིས་ཀྱི་མཁས་པ་ལས་གྲུབ་པའི་བོད་ཀྱི་ལོ་རྒྱུས་རིག་གཞུང་ཉམས་ཞིབ་ཁང་གསར་འཛུགས་ཀྱིས། ལོ་རྒྱུས་ཀྱི་དོན་དངོས་ཇི་བཞིན་མངོན་ཐབས་བྱ་རྒྱུ།
༣༽བོད་ཀྱི་གནད་དོན་དང་༸གོང་ས་ཏཱ་ལའི་བླ་མ་དང་འབྲེལ་བའི་གནས་ཚུལ་འགོག་བསྐྱིལ་དང་སྒེར་སྡོམ་གྱི་བཀག་རྒྱ་ལས་འགྲོལ་བའི་བྱེད་ཐབས་ལྷུར་བླངས་ཏེ། རྒྱ་ནག་ཕྱི་ནང་གི་རྒྱ་རིགས་དང་། རྒྱལ་སྤྱིའི་སྤྱི་ཚོགས་ལ་བོད་ཀྱི་གནད་དོན་གྱི་དོན་དངོས་དང་། ༸གོང་ས་ཏཱ་ལའི་བླ་མ་མཆོག་གི་ཐུགས་དགོངས་ཇི་བཞིན་རྒྱུས་ལོན་ཐུབ་ཐབས་ཞུ་རྒྱུ།
༤༽༸གོང་ས་ཏཱ་ལའི་བླ་མ་མཆོག་གིས་གང་ཉིད་ཀྱི་བཞེད་དགོངས་རྒྱ་རིགས་ཚོར་གསུང་བཤད་གནང་རྒྱུར་མཐུན་རྐྱེན་གང་མང་སབྱར་ཏེ། རྒྱ་རིགས་ཚོའི་བསམ་བློ་གཞི་རྟེན་བསྐྱར་འཛུགས་ལ་གོ་སྐབས་བརྩོན་ལེན་ཞུ་རྒྱུ།
བོད་རྒྱ་ཚོགས་འདུ་འདིའི་ཐུན་མོང་གི་བསམ་འདུན་ནི། བོད་མི་ཚོར་རང་དབང་ཐོབ་ཐབས་དང་། བོད་ཀྱི་རིག་གཞུང་རྩ་གཏོར་དུ་མི་འགྲོ་བ་བྱ་རྒྱུ་དེ་ཡིན། ང་ཚོར་ཐུན་མོང་གི་མངོན་འདོད་དེ། རང་དབང་ནི་རིན་ཐང་རྩ་འགངས་ཆེ་ཤོས་དེ་ཡིན། བོད་ཀྱི་རིག་གཞུང་ནི་འགྲོ་བ་མིའི་རིག་གཞུང་སྣེ་མང་ཁྲོད་ཀྱི་ནོར་བུ་ཁྱད་འཕགས་ཤིག་ཡིན། བོད་ཀྱི་རང་དབང་མེད་ན། རྒྱ་ནག་གི་རང་དབང་ཡང་མེད། བོད་ཀྱི་རིག་གཞུང་རྩ་གཏོར་གཏོང་བ་དེ་བོད་མི་རིགས་ཀྱི་སྐྱོ་གར་ཞིག་ཡིན་མ་ཟད། རྒྱ་རིགས་ཚོའི་ངོ་ཚ་ཡིན་ལ། འགྲོ་བ་མིའི་རིགས་ ཀྱི་གསབ་ཐབས་མེད་པའི་བསམ་བློའི་གྱོང་གུད་ཅིག་ཀྱང་ཡིན།།
ཇི་ནི་ཝ་བོད་རྒྱ་བགྲོ་གླེང་ཚོགས་འདུའི་ཚོགས་བཅར་བ་སྤྱི་མགྲིན་ནས་
༢༠༠༩ ཟླ་ ༨ ཚེས་ ༨ ཉིན།
